!‘Olgeta We Oli Laef Bakegen Fastaem’ Oli Stat Girap Finis!

“Ol man we oli stap bilif long Kraes gogo oli ded, olgeta ya bambae oli laef bakegen fastaem.”​—1 TESALONAEKA 4:16.

1, 2. (a) ?Wanem gudfala samting i stap blong olgeta we oli ded? (b) ?Wanem i mekem yu yu bilif se ol dedman bambae oli save laef bakegen? (Lukluk futnot.)

“OL MAN we oli laef yet oli save se bambae oli ded.” Ol man oli save samting ya finis, stat long taem we Adam i mekem sin. Olgeta man we oli bon long wol ya oli save se wan dei bambae oli ded, mo plante long olgeta oli wantem save se: ?Wanem i hapen afta ded? ?Mo ol dedman oli stap olsem wanem? Baebol i givim ansa long tufala kwestin ya i se: ‘Ol dedman oli no save wan samting nating.’​—Prija 9:5.

² ?Olsem wanem? ?I gat gudfala samting i stap blong olgeta we oli ded? Yes i gat. Taem God i wokem man fastaem, hem i gat wan stamba tingting long saed blong olgeta mo hem i wantem mekem stamba tingting ya i kamtru. Long ol handred yia we oli pas, ol gudfala man blong God oli bilif long promes blong Jeova se wan Pikinini bambae i mas bon we bambae i kilim Setan i ded mo i finisim ol trabol we rabis enjel ya i statem. (Jenesis 3:15) Bighaf blong ol gudfala man ya oli ded finis. Sipos ol man ya oli wantem luk we ol promes blong Jeova oli kamtru, oli mas laef bakegen. (Hibrus 11:13) ?Ol dedman bambae oli save laef bakegen? Yes yumi save sua long samting ya. Aposol Pol i talem se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Long Baebol, i gat naen stori blong dedman we i laef bakegen. Laswan long olgeta ya, hemia Yutikas we hem i foldaon long wan windo long namba tri stori blong wan haos, nao i ded. Be Pol i mekem hem i laef bakegen.​—Ol Wok 20:​7-12.a

 3. ?Wetaem ol tok long Jon 5:​28, 29 oli bin givhan long yu, mo from wanem?

³ Ol naen stori ya long Baebol oli givhan long yumi blong bilif long ol tok blong Pol long saed blong laef bakegen. Oli mekem we yumi sua long promes ya blong Jisas tu se: “I nogud yufala i sapraes long samting ya, from we i gat taem i stap kam we ol dedman bambae oli harem voes blong mi, nao bambae oli aot long beregraon.” (Jon 5:​28, 29) !Ol tok ya oli gud tumas! !Mo oli mekem plante milian man oli harem gud taem oli lusum sam famle no fren long ded!

4, 5. ?Wanem ol defren kaen laef bakegen long ded we Baebol i tokbaot, mo weswan we bambae yumi tokbaot long stadi ya?

⁴ Bighaf blong ol dedman we oli laef bakegen bambae oli stap long wol ya nomo aninit long rul blong Kingdom blong God we bambae i putum pis. (Ol Sam 37:​10, 11, 29; Aesea 11:​6-9; 35:​5, 6; 65:​21-23) Be bifo we olgeta ya oli laef bakegen long ded, i gat sam narafala dedman we oli mas laef bakegen fastaem. Faswan long olgeta ya hemia Jisas Kraes. Hem i mas go long heven blong soemaot se hem i givim sakrefaes finis olsem ransom, blong God i fogivim ol sin blong yumi. Jisas i ded mo i laef bakegen long yia 33 K.T.

⁵ Afta long hem, ol tabu Kristin we oli mekemap “Isrel blong God,” olgeta tu oli mas go joen wetem Masta Jisas Kraes we i king long heven, nao bambae oli “stap oltaem wetem Masta.” (Galesia 6:​16, NW; 1 Tesalonaeka 4:17) Blong go long heven oli mas “laef bakegen fastaem long ol narafala,” yes oli “ol faswan man blong laef bakegen.” (Filipae 3:​10, 11, NW; Revelesen 20:​6, NW ) Taem olgeta evriwan ya oli laef bakegen finis, ale bambae i taem blong mekem ol narafala milian dedman oli laef bakegen blong kasem janis blong laef olwe long Paradaes long wol. Taswe, nating se bambae yumi laef long heven no long wol, yumi intres tumas blong kasem save long ‘laef bakegen ya we i mas hapen fastaem.’ ?Bambae oli laef bakegen wetem wanem kaen bodi? ?Bambae oli laef bakegen wetaem?

“?Bambae Bodi Blong Olgeta i Olsem Wanem?”

6, 7. (a) ?Bifo we ol tabu Kristin oli save go long heven, wanem bambae i mas hapen? (b) ?Bambae oli laef bakegen wetem wanem kaen bodi?

⁶ Long faswan leta we Pol i raetem i go long ol Kristin long Korin, hem i askem wan kwestin long saed blong olgeta we oli mas laef bakegen fastaem. Hem i se: “?Bambae ol dedman oli laef bakegen olsem wanem? ?Bambae bodi blong olgeta i olsem wanem?” Nao hem i ansa long kwestin ya, i se: “Taem yufala i planem wan sid, sid ya i save gru, mo olfala sid ya i mas roten long graon. . . . God i mekem sid ya i gat gru blong hem, stret olsem we hem i wantem. . . . Flas blong ol samting ya [ol bodi] long skae, mo flas blong ol samting ya [ol bodi] long wol i naranarafala.”​—1 Korin 15:​35-40.

⁷ Ol tok ya blong Pol oli soemaot se ol Kristin we tabu spirit i makemaot olgeta, oli mas ded bifo we oli save go long heven. Taem olgeta ya oli ded, bodi blong olgeta long wol ya i roten mo i gobak long graon bakegen. (Jenesis 3:19) Long taem we God i jusum, olgeta ya oli laef bakegen wetem wan bodi we i stret blong go stap long heven. (1 Jon 3:2) God i givim wan spirit bodi long olgeta, we i no save ded samtaem. Hemia i no minim se taem oli bon long wol ya oli gat wan spirit insaed long olgeta we i no save ded samtaem. Nogat. Pol i talem se: “Bodi ya we i blong lus, hem i mas jenis blong kam we bambae i no moa save lus bakegen samtaem.” Yes, spirit bodi ya we i no save lus samtaem hem i wan presen we God i givim, mo olgeta we oli laef bakegen fastaem, oli mas karem wan bodi olsem.​—1 Korin 15:​50, 53; Jenesis 2:7; 2 Korin 5:​1, 2, 8.

 8. ?Olsem wanem yumi save se God i no jusumaot ol memba blong 144,000 long plante defdefren skul?

⁸ I gat 144,000 man nomo we oli laef bakegen fastaem. Jeova i stat jusum olgeta long Pentekos long yia 33 K.T., smoltaem afta we hem i mekem Jisas i laef bakegen long ded. Olgeta evriwan oli gat “nem blong [Jisas] wetem nem blong Papa blong hem i stap finis long fored blong olgeta.” (Revelesen 14:​1, 3) Taswe, olgeta ya oli no kamaot long ol defdefren skul. Olgeta evriwan oli man blong Kraes, mo oli no sem nating blong holem nem blong Papa​—hemia Jeova. Taem oli laef bakegen long ded, oli kasem wan wok long heven. Blesing ya we oli kasem blong mekem wok blong God long spesel fasin ya i givim bigfala glad long olgeta.

?I Stat Finis?

 9. ?Olsem wanem Revelesen 12:7 mo Revelesen 17:14 i halpem yumi blong faenem taem ya we ol 144,000 man oli stat laef bakegen?

⁹ ?Ol man we oli blong laef bakegen fastaem oli stat girap wetaem? I gat plante pruf we oli soemaot se oli stat girap finis. Tingbaot wanem we tu japta blong Revelesen i tokbaot. Fastaem, ridim Revelesen japta 12. Japta ya i tokbaot taem Jisas Kraes we i jes kam king, wetem ol tabu enjel blong hem, oli faet agensem Setan mo ol rabis enjel blong hem. (Revelesen 12:​7-9) Plante taem finis, Wajtaoa i soemaot se faet ya i stat long 1914.b Be yu luk we japta ya i no tokbaot se ol tabu Kristin oli stap wetem Jisas long taem blong faet ya long heven. Nogat. Ale naoia ridim Revelesen japta 17. Long ples ya i talem se afta we ‘Bigfala Babilon’ i lus, Smol Sipsip bambae i faet agensem ol neson mo bambae i winim olgeta. Be long japta ya hem i talem tu se: “[Jisas] wetem ol man we hem i singaot olgeta, mo i jusumaot olgeta, mo we olgeta oli stap holem tok blong hem, bambae oli faet.” (Revelesen 17:​5, 14) Yes, ‘olgeta ya we Jisas i jusumaot olgeta, mo we oli stap holem tok blong hem’ oli mas laef bakegen finis, sipos oli mas stap wetem Jisas long laswan faet ya agensem wol blong Setan. Taswe, i stret blong ting se olgeta tabu Kristin we oli ded bifo long Amagedon, oli mas laef bakegen samtaem bitwin long 1914 mo Amagedon.

10, 11. (a) ?Hu ya ol 24 elda, mo wanem samting we wan long olgeta ya i talemaot long Jon? (b) ?Samting ya i soemaot wanem long yumi?

¹⁰ ?I gat wan narafala rod blong faenemaot se wetaem stret ol faswan blong ol 144,000 oli laef bakegen? Wan poen we yumi intres long hem mo we i save givhan long yumi long saed blong kwestin ya, hemia long Revelesen 7:​9-15 (NW ). Long vas ya aposol Jon i tokbaot vison blong hem we hem i luk “wan bigfala kampani blong man, we i no gat man i save kaontem olgeta.” Jon i faenemaot hu ya bigfala kampani ya from we wan long ol 24 elda i talemaot long hem. Ol 24 elda ya i minim ol 144,000 man we oli joen wetem Kraes long kingdom blong heven.c (Luk 22:​28-30; Revelesen 4:4) Jon tu i wan long olgeta ya we i blong go long heven. Be taem elda ya i toktok long Jon long vison ya, Jon i olsem man yet long wol ya. Taswe long vison ya ating Jon i pija blong olgeta tabu Kristin long wol taem we oli no kasem praes blong olgeta yet long heven.

¹¹ Wan long ol 24 elda ya nao i kam talemaot mining blong bigfala kampani long Jon. ?Samting ya i soemaot wanem long yumi? I soem se olgeta long grup ya blong ol 24 elda we oli laef bakegen finis long heven, maet oli joen long wok ya blong talemaot ol trutok blong God long yumi tede. ?From wanem hemia wan impoten samting blong save? From we long 1935 ol tabu man blong God long wol ya oli kasem save hu ya bigfala kampani. Sipos wan long ol 24 elda ya nao i talemaot impoten trutok ya long ol tabu Kristin ya, i min se hem i mas laef bakegen long ded finis mo stap long heven bifo long 1935. Hemia i soemaot se ol faswan we oli mas laef bakegen blong go long heven oli stat girap samtaem bitwin long 1914 mo 1935. ?Yumi save klia moa long saed ya?

12. ?From wanem yumi save kasem tingting ya se olgeta we oli laef bakegen fastaem oli mas stat blong girap jes bifo long fashaf blong yia 1918?

¹² Blong givhan long yumi long poen ya, i gud yumi tingbaot tu samting long Baebol we tufala i laenapgud. Klosap long en blong yia 29 K.T., tabu spirit i makemaot Jisas Kraes se hem nao bambae i kam King long Kingdom blong God long fiuja. Ale, tri mo haf yia biaen, long fas haf blong yia 33 K.T., Jisas i ded mo i laef bakegen wetem wan spirit bodi we i gat bigfala paoa. Long sem fasin, from we Jisas i kam king klosap long en blong yia 1914, yumi save talem se ol tabu brata blong hem we oli ded finis, oli stat laef bakegen tri yia haf biaen, hemia jes bifo long fashaf blong yia 1918. ?I stret blong tingting olsem? Yes, maet i bin hapen olsem. I no gat wan vas blong Baebol we i talem stret se i hapen olsem, be ol samting ya oli laenap gud wetem plante narafala vas blong Baebol we oli soem se olgeta ya we oli laef bakegen fastaem, oli mas stat blong girap smoltaem afta we Kraes i kam king.

13. ?Olsem wanem 1 Tesalonaeka 4:​15-17 i givim tingting se olgeta we oli laef bakegen long ded fastaem bambae oli stat girap jes afta we Kraes i kam king?

¹³ Pol i raetem se: “Yumi ya, we yumi laef i stap yet taem we Masta i kam king mo i stap rul [hemia i no talem klosap long en blong taem ya we Jisas i stap finis], bambae yumi no save go fastaem long olgeta ya we oli slip finis long ded. From we Masta hem wan bambae i aot long heven i kamdaon mo bambae i singaot wetem voes blong akenjel, mo wetem pupu blong God. Nao olgeta we oli joen long Kraes gogo oli ded, bambae oli girap bakegen fastaem. Ale biaen, yumi ya we yumi stap laef yet long taem ya, bambae hem i tekem yumi i go long ol klaod, tugeta wetem olgeta, blong mitim Masta long skae ya antap. Olsem ya nao, bambae yumi stap oltaem wetem Masta.” (1 Tesalonaeka 4:​15-17, NW ) Taswe, olgeta tabu Kristin we oli ded bifo we Kraes i kam king, oli laef bakegen long heven fastaem long ol narafala tabu Kristin we oli ded afta we Kraes i kam king. Hemia i min se olgeta we oli laef bakegen fastaem, oli stat girap jes afta we Jisas Kraes i kam king. Ale ol narafala we oli ded biaen, bambae oli stap girap long ‘taem ya we Kraes i stap’ olsem King. (1 Korin 15:​23, NW ) Ol man we oli mas laef bakegen fastaem, oli no laef bakegen long semtaem, be i gat taem we i olsem plante yia, blong olgeta ya oli laef bakegen long hem.

“God i Givim Waet Klos Long Olgeta”

14. (a) ?Wetaem vison blong Revelesen japta 6 i kamtru? (b) ?Wanem samting we Revelesen 6:9 i tokbaot?

¹⁴ Tingbaot sam narafala impoten save we oli stap long Revelesen japta 6. Japta ya i tokbaot Jisas we i stap sidaon long wan hos, hem i raed i kam olsem King we i win finis long faet. (Revelesen 6:2) Ol bigbigfala faet oli stap kamkamaot olbaot long ol kantri blong wol olsem we i neva hapen bifo. (Revelesen 6:4) Kakae i sot long plante ples long wol. (Revelesen 6:​5, 6) Olkaen rabis sik oli stap spolem laef blong ol man. (Revelesen 6:8) Olgeta samting ya, we oli olsem profet tok, oli laenap gud wetem wanem we i stap hapen long wol stat long 1914. Be i gat wan samting bakegen we Jon i luk long vison ya. Hem i luk wan olta i stap. Nao long stamba blong olta ya i gat “sol blong olgeta we ol man oli bin kilim olgeta i ded from we oli stap talemaot tok blong God mo from we oli stap givim witnes long saed blong Hem.” (Revelesen 6:​9, NW ) From we ‘laef [no, sol] i stap long blad,’ samting ya we i stap long stamba blong olta ya hemia blad ya, yes, blad blong ol gudfala man blong Jisas we ol man oli bin kilim olgeta i ded from we oli wok strong blong givim witnes mo oli no fraet nating.​—Levitikas 17:11.

15, 16. Talem from wanem tok blong Revelesen 6:​10, 11 i laenap wetem olgeta we oli laef bakegen fastaem.

¹⁵ Olsem blad blong gudfala man ya Ebel bifo, blad blong ol Kristin ya tu we oli ded from we oli holemstrong long bilif, i stap krae long God blong i jajem ol enemi blong olgeta. (Jenesis 4:10) “Mo oli stap singaot bigwan, oli talem se, ‘Hae God. Yu yu gat olgeta paoa. Yu yu tabu, mo yu tru. Plis yu no moa wet, yu jajem ol man long wol, yu givim panis long olgeta, from we oli kilim mifala i ded.’ ” ?Wanem i hapen biaen? “God i givim waet klos long olgeta, nao i talem long olgeta se, ‘I gud yufala i spel smol moa. I gat ol man oli stap yet we oli wok wetem yufala bifo, mo oli brata mo sista blong yufala, we bambae ol man oli save kilim olgeta olsem we oli kilim yufala bifo. Fulnamba blong yufala bambae i mas kamtru fastaem.’ ”​—Revelesen 6:​10, 11.

¹⁶ ?Olsem wanem? ?God i givim waet klos i go long blad ya we i stap long stamba blong olta ya? Nogat. Hem i givim waet klos ya long ol man we oli ded olsem sakrefaes long olta. Olgeta ya oli ded olsem sakrefaes from we oli talemaot Jisas mo naoia oli laef bakegen finis wetem spirit bodi. ?Yumi save samting ya olsem wanem? Yumi save ridim tok ya long ol faswan japta blong buk blong Revelesen se: “Man we bambae i win long faet, hem bambae i putum waet klos olsem olgeta ya. Nao nem blong hem, bambae mi no save tekemaot long buk ya we nem blong ol man we oli gat laef i stap long hem.” Tingbaot tu se, ol 24 elda ya oli gat ‘klos we i waet, mo oli putum hat olsem hat blong king we oli wokem long gol.’ (Revelesen 3:5; 4:4) Taswe, afta we faet, kakae i sot, mo sik i stat spolem ol man long wol, ol memba blong grup ya blong 144,000 we oli ded finis, we blad ya long stamba blong olta i pija blong olgeta, oli laef bakegen long ded blong go long heven, mo hemia i olsem we oli kasem waet klos.

17. ?Olsem wanem ol man we oli kasem waet klos oli “spel”?

¹⁷ Olgeta we oli laef bakegen fastaem oli mas “spel.” I min se oli mas gat longfala tingting blong wet long dei blong God blong givimbak long ol man. Ol ‘man ya we oli wok wetem olgeta’, hemia ol tabu Kristin we oli stap yet long wol, olgeta ya oli mas pruvum yet se oli holemstrong long God long taem blong traem. Taem dei blong God blong jajem man i kam, bambae “spel” blong olgeta ya i finis. (Revelesen 7:3) Long taem ya, olgeta we oli laef bakegen long ded bambae oli joen wetem Masta Jisas Kraes blong spolem ol rabis man, wetem olgeta ya tu we oli kilim i ded ol Kristin man we oli no gat rong.​—2 Tesalonaeka 1:​7-10.

?Hemia i Minim Wanem Long Yumi?

18, 19. (a) ?Wanem ol risen we oli mekem yu yu luksave se ol faswan we oli laef bakegen long ded oli stap girap naoia? (b) ?Save we yu kasem long saed blong laef bakegen ya we i faswan, i mekem yu yu harem olsem wanem?

¹⁸ Baebol i no talem stret dei blong laef bakegen ya we i hapen fastaem, be hem i soemaot klia se samting ya bambae i stap gohed blong plante yia long taem we Jisas Kraes i stap finis olsem king. Taem Jisas Kraes i kam king, ol faswan man we oli laef bakegen hemia ol tabu Kristin we oli ded bifo. Biaen, ol narafala tabu Kristin we oli laef yet long wol ya mo we oli stanap strong long bilif, be taem oli ded, bodi blong olgeta i jenis wantaem, “olsem taem man i satem ae,” mo oli gat bodi olsem spirit man blong go long heven. (1 Korin 15:​52, NW ) ?Olgeta tabu Kristin ya evriwan bambae oli stap finis long heven bifo long Amagedon? Yumi no save stret. Be samting we yumi sua long hem se, long taem we God i jusum finis, ol 144,000 man evriwan bambae oli stap stanap long bigfala hil ya Saeon long heven.

¹⁹ Yumi save se bighaf blong ol 144,000 man oli stap finis wetem Jisas Kraes long heven. Smol nomo oli stap yet long wol ya. !Hemia wan strong saen se taem blong jajmen blong God i stap kam klosap tumas! I no longtaem, rabis wol ya blong Setan bambae i lus. Setan bambae i go kalabus long bigfala hol ya we i godaon we i godaon. Afta long hemia, ol narafala dedman oli save laef bakegen. From ransom sakrefaes blong Jisas, ol gudfala man blong God bambae oli laef bakegen wetem bodi we i stretgud olgeta olsem Adam bifo. Profet tok blong Jeova long Jenesis 3:15 i stap kamtru long wan fasin we i nambawan tumas. !I wan gudfala blesing long yumi, blong laef long taem ya we ol samting ya oli stap kamtru!

[Ol Futnot]

?Yu Yu Save Eksplenem?

?Olsem wanem ol vas ya oli halpem yumi blong luksave stret taem we ‘ol faswan man oli laef bakegen’?

• Revelesen 12:7; 17:14

• Revelesen 7:13, 14

• 1 Korin 15:23; 1 Tesalonaeka 4:​15-17

• Revelesen 6:​2, 9-11

[Tok blong pija long pej 24]

?Hu olgeta we oli laef bakegen fastaem, bifo we ol narafala man long wol ya oli laef bakegen?

[Tok blong pija long pej 27]

?Olsem wanem samfala we oli stap slip long ded oli kasem waet klos?