Ona Long Jeova Taem Yu Leftemap Hae Nem Blong Hem

“Olgeta samting we [Jeova] i mekem oli stap leftemap hae nem blong hem, mo oli stap soemaot paoa blong hem.”—SAM 111:3.

1, 2. (a) ?Bambae yu yu eksplenem mining blong tok ya “hae nem” olsem wanem? (b) ?Wanem ol kwestin we bambae yumi tokbaot long stadi ya?

SAM man oli askem long Madison, wan yangfala gel we i gat ten yia blong hem, blong i eksplenem mining blong tok ya “hae nem.” Wantaem nomo Madison i talem se i minim “man we i putum naesfala klos.” Ating yangfala gel ya i no save se Baebol i tokbaot God se hem i putum ‘hae nem olsem klos blong Hem.’ (Sam 104:1) Long saed blong ol man, i tru se oli mas putum ol naesfala klos blong leftemap hae nem blong God. Tingbaot taem ya we aposol Pol i talem se hem i wantem ol Kristin woman blong oli “putum klos . . . we i stret nomo, i no blong pulum ae blong man, mo i no blong flas. Bambae oli no mas mekem hea blong olgeta i flas tumas, mo oli no mas putum ol flas samting we oli wokem long gol mo perel, mo ol dres ya we praes blong olgeta i antap tumas.” (1 Tim. 2:9) Be i no ol klos mo hea blong yumi nomo we oli leftemap ‘hae nem mo paoa’ blong Jeova. I gat sam narafala samting we yumi mas mekem.—Sam 111:3.

² Hibru tok we oli tanem i kam “hae nem” long Bislama Baebol, yumi save tanem i kam “paoa,” mo “ona” tu. Wan diksonari i talem se tok ya “hae nem” i minim “i stret we wan man i kasem wan samting, man i ona long hem, no leftemap hem.” I no gat wan narafala man we i stret blong yumi ona mo leftemap hem moa i bitim Jeova. Taswe, sipos yumi givim laef blong yumi long hem finis blong yumi mekem wok blong hem, ol toktok mo fasin blong yumi oli mas ona long hem. ?Be from wanem ol man oli save mekem samting blong ona long hae nem blong Jeova? ?Olsem wanem Jeova i leftemap hae nem mo paoa blong hem? ?Ona we Jeova i soem long yumi i gat paoa long yumi olsem wanem? ?Yumi lanem wanem long eksampol blong Jisas Kraes we i givhan long yumi blong soemaot fasin ya? ?Mo yumi save mekem wanem blong soem ona long hae nem blong Jeova?

?From Wanem Yumi Save Mekem Samting Blong Ona Long Hae Nem Blong God?

3, 4. (a) ?Yumi mas tekem wanem aksen from ona we Jeova i soem long yumi? (b) ?Ol Sam 8:5-9 i wan profet tok long saed blong hu? (Lukluk futnot.) (c) ?Hu olgeta long taem bifo we Jeova i soem ona long olgeta?

³ From we God i wokem ol man long pija blong hem, yumi naf blong ona long hae nem blong hem long olgeta samting we yumi mekem. Jeova i soem ona long faswan man taem hem i givim wok long hem blong lukaot long wol. (Jen. 1:26, 27) Nating se man i mekem sin mo i no moa stretgud olgeta, Jeova i talem bakegen long ol man se oli gat wok ya blong lukaot long wol. Taswe, God i gohed blong leftemap ol man olsem se hem i putumap olgeta oli kam ‘king.’ (Ridim Ol Sam 8:5-9)a From we Jeova i leftemap yumi, yumi mas tekem aksen blong leftemap hem. Yes, wetem bigfala respek mo ona, yumi mas presem hae nem blong hem.

⁴ Jeova i soem ona speseli long ol man we oli mekem tabu wok blong hem. God i ona long Ebel taem hem i soem se hem i glad long sakrefaes we Ebel i givim, be i no glad long hemia we brata blong hem Ken i givim. (Jen. 4:4, 5) God i talem long Moses blong i letem Josua i ‘karem hae nem blong Moses,’ hemia from we Josua bambae i tekem ples blong Moses blong lidim ol man Isrel. (Nam. 27:20) Baebol i talem long saed blong Solomon, pikinini blong Deved se: “Hae God i mekem olgeta evriwan oli tinghae long hem, mo i mekem we hem i kam hae moa, i winim ol narafala king we oli bin rul long Isrel fastaem long hem.” (1 Kron. 29:25) Bambae God i soem spesel ona long ol tabu Kristin we oli laef bakegen. Olgeta ya oli holemstrong long wok blong talemaot “haenem blong nambawan kingdom blong hem.” (Sam 145:11-13, NW) Ol “narafala” sipsip blong Jisas we namba blong olgeta i stap kam antap moa oltaem, olgeta tu oli kasem ona we i kam long God. Hem i givim nambawan blesing mo wok ya long olgeta blong oli presem hem.—Jon 10:16.

Hae Nem Mo Paoa Blong Jeova i Stap Long Klia Ples

 5. ?Hae nem blong Jeova i antap olsem wanem?

⁵ Long wan singsing, Deved we i man blong raetem Ol Sam, i sing long saed blong bigfala paoa blong God mo i skelem wetem paoa blong ol man we i smol nomo, i se: “Hae God. Yu yu Masta blong mifala. Olgeta man long evri ples long wol oli save luk bigfala paoa blong yu. Yu yu King, mo hae nem blong yu i finisim olgeta ples long heven.” (Sam 8:1) Stat long taem bifo we God i wokem “skae mo graon” go kasem taem we stamba tingting blong God blong mekem wol i kam paradaes i kamtru mo olgeta man oli kam stretgud olgeta—i min se stat bifo olgeta gogo kasem taem we i no save finis—hae nem blong Jeova i antap olgeta mo i no gat narafala man long heven mo wol we i stret blong ona moa long hem i bitim Jeova.—Jen. 1:1; 1 Kor. 15:24-28; Rev 21:1-5.

 6. ?From wanem man blong raetem Ol Sam i talem se hae nem blong Jeova i olsem klos blong Hem?

⁶ Man ya we i raetem Ol Sam i wan man we i onagud long God, mo taem hem i lukluk ol naesfala sta long naet, i olsem we hem i luk “ol sas ston” we oli saen long skae. !I sua se samting ya i tajem ol filing blong hem! Man blong raetem Ol Sam i sapraes blong luk olsem wanem God i ‘putumap skae olsem i wan haos tapolen,’ nao hem i soemaot se hae nem blong Jeova i olsem klos blong Hem from we fasin blong Hem blong wokem samting i gud tumas. (Ridim Ol Sam 104:1, 2.) I tru se yumi no save luk hae nem mo paoa blong God ya we i Wokem Olgeta Samting, be yumi save luksave hae nem mo paoa blong hem long ol samting we hem i wokem.

7, 8. ?Olsem wanem ol samting we yumi luk long skae oli pruvum hae nem mo paoa blong Jeova?

⁷ Tingbaot galaksib ya we oli kolem Milky Way. Long galaksi ya, i gat plante plante sta, mo planet, mo grup blong ol sta mo planet we oli stap muv i goraon long san. Be long medel blong ol sta mo ol planet ya, wol blong yumi i smol we i smol olsem wan smol pis blong sanbij long medel blong ol sanbij long solwota. !Yes, long galaksi ya nomo i gat bitim 100 bilian sta long hem! Sipos yu save kaontem wan sta long evri seken mo yu no stop blong 24 aoa, bambae i tekem bitim 3000 yia blong yu kasem 100 bilian sta.

⁸ ?Sipos galaksi blong Milky Way nomo i gat 100 bilian sta, olsem wanem long ol narafala haf blong skae? Ol man blong stadi long ol sta oli ting se Milky Way hem i wan galaksi nomo long samwe 50 kasem 125 bilian galaksi. ?I gat hamas sta long ful skae? Namba ya i bigwan tumas blong bren blong yumi i kasem save long hem. Be Jeova, hem i stap “makem namba blong ol sta, mo i putum nem blong olgeta wanwan.” (Sam 147:4) Taem yumi kasem save olsem wanem hae nem mo paoa blong Jeova i olsem klos blong hem, i sua se yumi wantem presem hae nem blong hem.

9, 10. ?Olsem wanem bred i leftemap waes fasin blong God we i Wokem yumi?

⁹ Naoia tingbaot wan samting we yumi evriwan i save gud long hem, hemia bred. I tru se Jeova i God ya we i ‘mekem skae mo graon’ be hem i God ya tu we i “givim [“bred,” NW] long olgeta we oli hanggri.” (Sam 146:6, 7) Yumi save luk ‘hae nem mo paoa’ blong God long ol nambawan wok blong hem, olsem ol sid we yumi stap yusum blong wokem bred long hem. (Ridim Ol Sam 111:1-5.) Jisas i tijim ol disaepol blong hem blong prea se: “Plis yu givim [“bred,” NW] long mifala, i naf blong tede.” (Mat. 6:11) Bred i wan stamba kakae blong ol man long taem bifo mo ol man Isrel tu oli kakae plante bred. Nating se yumi tingbaot bred olsem wan kakae we i isi blong wokem, be samting we i hapen long flaoa, wota mo is, blong mekem se bred i solap mo i gat gudfala tes, hemia i no wan isi samting nating.

¹⁰ Long taem we ol man oli stap raetemdaon Baebol, ol man blong Isrel oli wokem bred long flaoa we oli wokem long wit no bale mo wota. Samtaem oli yusum is tu long bred blong olgeta. Taem yu miksimap trifala samting ya nomo, oli mekem plante plante kemikol mo taem ol kemikol ya oli miks tugeta oli mekem se flaoa i solap. Ol man oli no kasem save fulwan yet olsem wanem ol kemikol ya oli wok tugeta. Mo tu wok we bodi blong yumi i mekem taem yumi kakae bred i wan narafala samting blong sapraes, from we wok ya i no isi nating. Yumi kasem save from wanem wan man blong raetem Ol Sam i singsing se: “Hae God. Yu yu mekem plante naranarafala samting, mo olgeta evriwan oli stap soemaot we fasin blong yu blong wokem olgeta i waes we i waes.” (Sam 104:24) ?Ol samting we Jeova i wokem oli pusum yu tu blong yu wantem presem Jeova?

?Hae Nem Mo Paoa Blong God i Mekem Wanem Long Yu?

11, 12. ?Taem yumi tingting dip long ol samting we God i wokem, samting ya i mekem wanem long yumi?

¹¹ Yumi no nid blong kam man blong stadi long ol sta, blong yumi save sapraes taem yumi lukluk skae long naet, mo yumi no nid blong kam man blong stadi long ol kemikol, blong yumi save haremgud taem yumi kakae bred. Be blong kasem save long paoa blong God ya we i Wokem yumi, yumi nidim blong tektaem blong tingbaot ol samting we hem i wokem. ?Taem yumi tingting dip olsem, hemia i save mekem wanem long yumi? Hem i mekem sem samting long yumi olsem taem yumi tingting dip long ol narafala wok blong Jeova.

¹² Deved i singsing long saed blong ol nambawan wok we Jeova i mekem blong givhan long ol man blong Hem, i se: “Oltaem bambae oli stap tokbaot paoa blong yu mo hae nem blong yu, mo oltaem bambae mi stap tingting gud long ol gudgudfala wok blong yu.” (Sam 145:5) Yumi tingting gud long ol wok blong God taem yumi stadi long Baebol mo tektaem blong tingting dip long wanem we yumi ridim. ?Taem yumi tingting dip olsem, wanem frut bambae yumi kasem? Tangkiu we yumi gat long hae nem mo paoa blong God bambae i kam bigwan moa. Ale, olsem Deved, bambae i sua se yumi wantem givim ona long Jeova mo talem long hem se: “Mi bambae mi stap talemaot we yu yu hae we yu hae.” (Sam 145:6) Sipos yumi tingting dip long ol gudgudfala wok blong God, bambae samting ya i mekem fasin fren blong yumi wetem Jeova i kam strong moa, mo bambae i pusum yumi blong gat strong tingting mo glad taem yumi tokbaot hem long ol narafala. ?Olsem wanem? ?Yu yu stap wok strong blong talemaot gud nius mo halpem ol man blong oli kasem save long hae nem mo paoa blong Jeova God?

Jisas i Leftemap Hae Nem Blong God Long Fasin We i Stret Gud Olgeta

13. (a) ?Daniel 7:13, 14 i talem se Jeova i givim wanem long Pikinini blong hem? (b) ?Olsem King, Jisas i gat wanem fasin long ol man we oli stap aninit long rul blong hem?

¹³ Jisas Kraes, Pikinini blong God, i wok strong blong talemaot gud nius mo ona long hae nem blong Papa blong hem long heven. Jeova i givim spesel ona long stret Pikinini blong hem taem Hem i putumap hem i kam ‘king mo i givim bigfala paoa long hem’ blong rul long kingdom. (Ridim Daniel 7:13, 14.) Be nating se Jisas i kasem spesel ona ya, hem i no kam flas mo hem i no ting se hem i hae tumas blong kea long narafala. Defren olgeta, hem i wan Rula we gat sore long ol man we oli stap aninit long rul blong hem, hem i kasem save long wanem we ol man oli naf blong mekem mo hem i gat respek long olgeta. Bambae yumi tokbaot wan eksampol blong luk se King ya we God i makemaot, Jisas Kraes, i mekem olsem wanem long ol man, speseli olgeta we ol narafala oli no wantem joen wetem mo we oli no laekem olgeta.

14. ?Long taem bifo, ol man Isrel oli gat wanem tingting long man we i kasem leprosi?

¹⁴ Long taem bifo, ol man we oli kasem rabis sik blong leprosi, oli harem nogud blong longtaem, i go kasem taem we oli ded. Sloslo sik ya i kakae ol defren haf blong bodi blong olgeta. Long tingting blong ol man, i had tumas blong hilim wan man we i gat leprosi, olsem we i had blong mekem wan dedman i laef bakegen. (Nam. 12:12; 2 King 5:7, 14) Taem man i kasem leprosi, pris i talemaot se hem i doti, ale ol man oli no moa laekem hem nating mo oli putumaot hem blong hem i no moa joen wetem olgeta. Sipos hem i kam klosap long ol man, hem i mas singaot blong givim woning long olgeta, se: “!Mi mi doti! !Mi mi doti!” (Lev. 13:43-46) Long tingting blong ol man, man we i gat leprosi i olsem wan dedman. Folem ol buk blong ol tija blong loa, man we i gat leprosi i no save go klosap long wan narafala man, hem i mas stap samwe 1.7 mita longwe long man ya. Wan buk i talem se wan taem, taem wan lida blong skul i luk wan man we i gat leprosi, nating se man ya i stap longwe long hem, be lida ya i stonem hem blong meksua se hem i no kam klosap long ol man Jiu.

15. ?Jisas i mekem wanem taem wan man we i gat leprosi i kam luk hem?

¹⁵ Be makem wanem we Jisas i mekem taem wan man we i gat leprosi i kam luk hem mo i plis long Jisas blong i hilim hem. (Ridim Mak 1:40-42.) Jisas i no ronemaot hem. Defren olgeta, hem i gat sore long man ya we ol narafala oli daonem hem mo hem i soem respek long hem. Taem Jisas i luk man ya, hem i luk se hem i harem nogud bitim mak mo i nidim blong i kamgud bakegen. Samting ya i tajem hat blong Jisas, mo kwiktaem nomo hem i tekem aksen blong soemaot se hem i gat sore long man ya. Jisas i putum han blong hem long man ya, i tajem hem, mo i hilim hem.

16. ?Yu yu lanem wanem long fasin we Jisas i mekem long ol narafala?

¹⁶ ?Olsem wanem yumi we yumi biaen long Jisas, yumi save folem fasin blong hem blong leftemap hae nem blong Papa blong hem? Wan rod hemia taem yumi luksave se olgeta man oli gat raet blong kasem ona mo respek nomata sipos oli rijman no oli puaman, oli gat gudfala helt no oli sikman, oli olfala no oli yangfala. (1 Pita 2:17) Ol man we oli gat wok blong lukaot long ol narafala, olsem ol hasban, ol papa mama mo ol Kristin elda, olgeta tu oli nidim tumas blong tingbaot mo soem ona long ol man we oli stap aninit long kea blong olgeta mo halpem olgeta blong oli gat respek long olgeta wan. Baebol i makem klia se hemia wan samting we olgeta Kristin oli mas mekem, i se: “Yufala i mas lavlavem yufala olsem we yufala i wan brata nomo from we yufala i joen long Kraes, mo oltaem yufala i mas rere blong ona long yufala.”—Rom 12:10.

Leftemap Hae Nem Blong Jeova Long Wosip Blong Yumi

17. ?Long Baebol, yumi save lanem wanem long saed blong respek mo ona we yumi mas gat, taem yumi mekem wosip long Jeova?

¹⁷ I impoten we yumi tingbaot blong ona long hae nem blong Jeova taem yumi mekem wosip long hem. Prija 5:1 i talem se: “Taem yu go long haos blong God, yu mas tingting gud long fasin we yu stap mekem.” God i talem long Moses mo Josua blong tufala i tekemaot sandel blong tufala taem tufala i stanap long graon we i tabu. (Eks. 3:5; Jos. 5:15) Tufala i mas mekem samting ya blong soem bigfala respek mo ona long God. Ol pris blong Isrel oli mas werem ol longfala kalsong blong “blokemgud olgeta.” (Eks. 28:42, 43) Samting ya i blong mekem se ol narafala oli no save luk ol tabu haf blong bodi blong pris taem hem i mekem wok blong hem long olta. Evri memba long famle blong pris oli mas holem ol rul ya blong God blong oli leftemap hae nem blong hem.

18. ?Olsem wanem yumi ona long hae nem blong Jeova long wosip blong yumi?

¹⁸ Taswe, blong leftemap hae nem blong Jeova long wosip blong yumi, yumi mas gat ona mo respek. Sipos yumi wantem kasem ona mo respek, ol fasin blong yumi oli mas soem se yumi gat respek. Yumi no ona nomo long hae nem blong Jeova taem yumi stap long fored blong ol narafala man, olsem se yumi putum wan klos blong ol man oli luksave yumi. Fasin blong yumi blong ona long Jeova mo leftemap hae nem blong hem i mas kamaot long hat blong yumi—hemia nao samting we God i luk. (1 Saml. 16:7; Prov. 21:2) Yumi mas tingbaot hae nem blong Jeova olsem nem we yumi karem, taswe i mas gat paoa long ol fasin mo tingting blong yumi, mo long fasin fren blong yumi wetem ol narafala mo tu long tingting mo filing we yumi gat long saed blong yumi wan. Yes, yumi mas ona long hae nem blong Jeova oltaem, long olgeta samting we yumi mekem mo talem. Long ol fasin, filing, klos mo stael blong hea blong yumi, yumi tingbaot toktok blong aposol Pol, we i se: “Mifala i no wantem we sam man oli save faenem sam rabis poen long ol wok blong mifala. Nao mifala i stap traehad, blong mifala i no mekem sam fasin we narafala man bambae i save foldaon long hem. Long olgeta samting we mifala i mekem, mifala i stap soemaot we mifala i man blong wok blong God.” (2 Kor. 6:3, 4) “Long olgeta samting we [yumi] mekem, bambae [yumi] stap [“flasem tijing,” NW] blong God ya we i sevem yumi.”—Taet. 2:10.

Gohed Blong Ona Long Hae Nem Blong God

19, 20. (a) ?Wanem wan gudfala rod blong ona long ol narafala? (b) ?Yumi mas gat strong tingting blong mekem wanem fasin?

¹⁹ Ol Kristin we tabu spirit i makemaot olgeta, oli ol “man blong karem tok blong Kraes” no ol ambasada blong Kraes mo oli stap ona long hae nem blong God. (2 Kor. 5:20) Ol “narafala sipsip” oli sapotem olgeta long wok blong olgeta mo oli wok long nem blong Kingdom blong Mesaea olsem ol mesenja blong hem. Wan ambasada no wan mesenja i no fraet blong toktok long saed blong gavman blong hem, mo i tinghae long ona we hem i gat blong toktok from gavman blong hem. Taswe, yumi no mas fraet blong toktok blong sapotem gavman blong God no Kingdom blong hem mo yumi mas tinghae long ona ya we yumi gat. (Efes. 6:19, 20) Mo, taem yumi “talemaot gud nius” long ol narafala, yumi stap ona long olgeta.—Aes. 52:7.

²⁰ Yumi mas gat strong tingting blong mekem ol fasin we oli ona long hae nem blong God mo leftemap hem. (1 Pita 2:12) I gud we oltaem yumi soem bigfala respek long hem, long wosip we yumi mekem long hem, mo long ol Kristin brata sista blong yumi. Long rod ya, God ya we i putum hae nem mo paoa olsem klos blong hem, bambae i glad long fasin blong yumi blong wosipim hem wetem bigfala ona.

[Ol futnot]

?Bambae Yu Yu Ansa Olsem Wanem?

• ?Sipos yumi kasem save olsem wanem nem blong Jeova i hae we i hae, bambae samting ya i mekem wanem long yumi?

• ?Fasin we Jisas i mekem long wan man we i gat leprosi, i tijim yumi long wanem samting long saed blong fasin blong ona long narafala?

• ?Wanem sam rod blong ona long hae nem blong Jeova?