?Bambae Yu Yu Holemstrong Long Jeova?

“!Go kasem taem we mi mi ded, bambae mi no save lego fasin blong mi blong holemstrong long God!”—JOB 27:5, NW.

1, 2. ?Yumi mas wokem wanem fasin? ?Wanem trifala kwestin we bambae yumi tokbaot?

TRAEM tingbaot se yu yu stap lukluk plan blong wan haos. Yu luk se plan ya i nambawan, hem i stret long samting we yu yu nidim. Yu harem gud tumas blong tingbaot olsem wanem haos ya bambae i mekem i gud long yu mo famle blong yu. Be ating bambae yu yu agri se plan ya wetem ol gudfala tingting blong yu, bambae oli blong nating nomo sipos yu no gohed blong wokem haos ya, muf i go insaed long hem, mo lukaot gud long hem.

² Sem mak long fasin blong holemstrong long Jeova. Maet yumi laekem fasin ya, mo yumi luk se hem i wan impoten fasin we bambae i mekem i gud long yumi mo long olgeta we yumi lavem olgeta. Be gudfala tingting ya we yumi gat long saed blong fasin ya i no naf. Yumi mas wokem mo holemtaet Kristin fasin ya tu. Long wol blong yumi tede, wan man i mas spenem bigfala mane blong wokem wan haos. (Luk 14:28, 29) Long sem fasin, i nidim we yumi spenem taem mo paoa blong yumi blong wokem fasin blong holemstrong long God. Sipos yumi rere blong mekem bigfala traehad ya, bambae i no blong nating nomo. Taswe i gud we yumi tokbaot trifala kwestin ya: ?Olsem wanem yumi save wokem fasin blong holemstrong long God? ?Olsem wanem yumi save holemtaet Kristin fasin ya? ?Yumi save mekem wanem sipos wan long yumi i lego fasin ya blong holemstrong long Jeova blong smoltaem?

?Olsem Wanem Yumi Save Wokem Fasin Blong Holemstrong Long Jeova?

3, 4. (a) ?Olsem wanem Jeova i givhan long yumi blong wokem fasin blong holemstrong long hem? (b) ?Olsem wanem yumi save wokem fasin ya blong holemstrong long Jeova, olsem Jisas i bin mekem?

³ Long laswan stadi, yumi tokbaot se Jeova i ona long yumi taem hem i letem yumi blong jusum sipos yumi wantem holemstrong long hem. Be yumi glad se hem i no lego yumi blong yumi mekem samting ya yumi wan nomo. Nogat. Hem i tijim yumi olsem wanem blong wokem nambawan fasin ya. Mo hem i givim tabu spirit long yumi we i plante we i plante, blong halpem yumi blong mekem ol tijing blong hem oli wok long laef blong yumi. (Luk 11:13) Mo tu, hem i protekem ol man blong hem long saed blong spirit, sipos oli traehad blong holemstrong long hem.—Prov. 2:7, NW.

⁴ ?Olsem wanem Jeova i tijim yumi blong holemstrong long hem? Faswan bigfala samting we hem i mekem, se hem i sanem Pikinini blong hem Jisas i kam long wol. Jisas i obei fulwan long Jeova long laef blong hem. Hem “i obei long God gogo i ded.” (Fil. 2:8) Long evri samting we Jisas i mekem, hem i obei long Papa blong hem long heven. Mo tu, hem i obei taem i no isi nating blong obei. Hem i talem long Jeova se: “Yu no mekem olsem we mi mi wantem, yu mekem olsem we yu nomo yu wantem.” (Luk 22:42) I gud we wanwan long yumi i traem tingbaot se, ‘?Mi mi gat tingting olsem Jisas blong wantem obei long God oltaem?’ Bambae yumi holemstrong long Jeova sipos yumi obei long hem, mo sipos tingting we i pusum yumi blong obei i stret. Traem tingbaot sam taem long laef blong yumi we i impoten tumas blong obei long Jeova.

5, 6. (a) ?Olsem wanem Deved i soemaot se i impoten blong holemstrong long God oltaem mo long taem ya tu we ol narafala oli no stap lukluk yumi? (b) ?Taem ol Kristin tede oli stap olgeta nomo we i no gat narafala man i lukluk olgeta, wanem samting i save traem olgeta?

⁵ Mo tu, yumi mas obei long Jeova taem yumi stap yumi wan nomo. Long wan Sam we Deved i raetem, hem i soem se i impoten we yumi holemstrong long Jeova taem yumi stap yumi wan nomo. (Ridim Ol Sam 101:2.a) Deved i wan king, ale oltaem nomo ol man oli stap raonabaot long hem. Plante taem, ating i gat handred no taosen man we oli wajem hem. (Skelem Ol Sam 26:12.) Long ol taem olsem, i impoten tumas we Deved i holemstrong long God, from we king i mas givim gudfala eksampol long ol man blong hem. (Dut. 17:18, 19) Be Deved i luksave se taem hem i stap hem wan, maet ‘long haos blong hem’ nomo, long taem ya tu hem i mas holemstrong long God. ?Yu yu lanem samting ya finis, no no yet?

⁶ Long Ol Sam 101:3 (NW), yumi faenem tok ya blong Deved se: “Neva bambae mi putum ol nogud fasin long fored blong ae blong mi.” Tede yumi gat plante janis blong putum ol nogud fasin long fored blong ae blong yumi, antap moa, taem yumi stap yumi wan nomo. Long saed ya, Intenet i mekem trabol long plante man. I isi nomo blong lukluk ol samting we i no stret long Intenet, maet ol doti pija long saed blong seks. Be sipos yumi lukluk ol samting olsem, ?yumi stap obei long God ya we i pulum Deved blong raetem Sam ya antap? Nogat. Ol doti pija blong seks oli save spolem man, from we oli mekem se hem i wantem mo i griri from samting we i nogud, oli mekem se tingting blong man i no moa klin long fes blong God, oli save spolem mared tu, mo oli mekem evriwan we oli insaed long bisnes ya oli kam doti.—Prov. 4:23; 2 Kor. 7:1; 1 Tes. 4:3-5.

 7. ?Wanem promes long Baebol we i save givhan long yumi blong holemstrong long Jeova taem yumi stap yumi wan nomo?

⁷ I tru, i no gat wan man blong Jeova we i rili stap hem wan nomo. Papa blong yumi we i lavem yumi i stap wajem yumi oltaem. (Ridim Ol Sam 11:4.) !Jeova i glad tumas taem hem i luk we yu stap blokem ol samting we oli kam blong traem yu! Taem yu mekem olsem, yu stap soem se yu lesin long woning we Jisas i givim long Matiu 5:28. Yu mas gat strong tingting blong blokem ol pija we oli save pulum yu blong mekem i no stret. Fasin blong holemstrong long Jeova i wan samting we i gud tumas. !Yu no mas jenisim gudfala fasin ya wetem fasin blong lukluk ol doti pija no ridim ol doti tok long saed blong seks! !Rabis fasin ya i wan samting blong sem nomo!

8, 9. (a) ?Daniel mo trifala fren blong hem oli kasem wanem trabol we i traem fasin blong olgeta blong holemstrong long Jeova? (b) ?Olsem wanem ol yangfala Kristin tede oli save mekem Jeova mo ol Kristin brata mo sista blong olgeta oli glad tumas?

⁸ Yumi save holemstrong long Jeova tu sipos yumi obei long hem taem yumi stap long medel blong ol man we oli no bilif. Tingbaot Daniel mo trifala fren blong hem. Taem fofala i yangfala, ol man Babilon oli karem olgeta oli go kalabus long Babilon. Long ples ya, fofala i stap long medel blong ol man we oli no bilif, mo we oli save smol nomo no maet oli no gat save nating long saed blong Jeova. Ol man ya oli traem pulum fofala Hibru ya blong oli kakae ol rij kakae we Loa blong God i putum tabu long olgeta. I isi blong fofala boe ya oli ting se i wan smol samting nomo blong tekem ol kakae ya, mo i oraet nomo. Mo tu, papa mama blong fofala boe ya oli no stap, mo ol olfala wetem ol pris blong nesen blong olgeta oli no stap tu blong luk wanem we oli mekem. ?Hu i save luk fasin we fofala boe ya oli mekem? Jeova i save luk. Taswe fofala i stanap strong mo obei long Jeova, nating se ol man oli traem fosem olgeta mo oli save lusum laef blong olgeta tu.—Dan. 1:3-9.

⁹ Long olgeta ples blong wol, ol yangfala Witnes blong Jeova oli stap folem fasin blong fofala Hibru ya. Oli stap holemstrong long ol rul we God i putumap blong ol Kristin, mo oli no letem ol fren mo ol narafala man oli pulum olgeta blong mekem samting nogud. Yufala ol yangfala, taem yufala i no joen long fasin blong tekem drag, faet, tok swea, slip olbaot, mo ol narafala nogud fasin, yufala i stap obei long Jeova. Taem yufala i obei long Jeova, yufala i stap holemstrong long hem. !Yufala i mekem i gud long yufala bakegen, mo yufala i mekem Jeova mo ol Kristin brata sista blong yufala oli glad tumas!—Sam 110:3.

10. (a) ?Sam yangfala oli tekem wanem rong tingting we i lidim olgeta blong lego fasin blong holemstrong long Jeova? (b) ?Man we i holemstrong long Jeova i mekem wanem taem hem i luk se i gat denja i stap we i save pulum hem blong mekem rabis fasin long saed blong seks?

¹⁰ Yumi mas obei long Jeova tu, long saed blong fasin we i stret blong man i mekem long woman, mo woman i mekem long man. Yumi save se Tok blong God i blokem yumi se yumi no mas mekem ol nogud fasin long saed blong seks. Be i isi nomo blong kam slak blong obei long God, nao yumi stat blong ting se ol fasin ya oli oraet nomo. Olsem nao, sam yangfala oli foldaon long rabis fasin ya we oli yusum maot no as blong mekem seks no oli pleplei wetem ol tabu haf blong bodi blong narafala. Olgeta ya oli mekem eskius se ol fasin ya oli oraet nomo from we oli no “slip” wetem narafala ya. Be ol yangfala ya oli fogetem, no maet oli no wantem save nomo, se tok ya we Baebol i yusum blong talem nogud fasin long saed blong seks, i minim ol doti fasin ya tu, mo se kongregesen i save putumaot wan man no woman we i mekem ol nogud fasin ya.b Samting we i moa nogud, se ol yangfala ya oli no tingbaot se oli mas holemstrong long Jeova. Sipos yumi stap traehad blong holemstrong long Jeova, yumi no traem faenem wan rod blong mekem fasin we i no stret. Yumi no mekem fasin we i klosap nomo long sin, we yumi ting se i oraet nomo blong mekem fasin ya from we yumi no save kasem panis from. Yumi no tingbaot nomo panis we bambae yumi kasem sipos yumi mekem samting nogud. Nogat. Yumi tingbaot wanem samting i save mekem Jeova i glad long yumi, yumi no mekem samting we i save spolem filing blong hem. Yumi no traem luk sipos yumi save kam klosap nomo long sin, we yumi no mekem sin stret. Yumi stap longwe long sin mo yumi “ronwe long nogud fasin long saed blong seks.” (1 Kor. 6:18, NW) Long rod ya, yumi soemaot se yumi rili wantem holemstrong long Jeova.

?Olsem Wanem Blong Holemtaet Fasin Ya?

11. ?From wanem evri smosmol samting we yumi mekem blong obei long God i impoten? Talem wan pijatok blong soemaot samting ya.

¹¹ Yumi wokem fasin blong holemstrong long Jeova taem yumi obei long God. Taswe, yumi holemtaet fasin ya taem yumi gohed blong obei long God. Maet i luk olsem se taem yumi obei long wan smol samting, hemia i no impoten tumas. Be taem yumi gohed blong obei long God long evri smosmol samting, olgeta smosmol samting ya tugeta oli kam wan bigfala samting. Tingbaot pijatok ya: Wan smol brikis i no impoten tumas, be sipos yumi joenem plante brikis mo putumgud olgeta long stret ples blong olgeta, yumi save wokem wan naesfala haos. Long sem fasin, sipos yumi gohed blong obei long God long evri samting, yumi holemtaet fasin ya blong holemstrong long Jeova.—Luk 16:10, Nyutesteman wetem Ol Sam long Bislama (NTB).

12. ?Olsem wanem Deved i soemaot se hem i holemstrong long Jeova taem Sol i ronem hem mo i mekem i no stret long hem?

¹² Yumi soemaot gud se yumi holemstrong long Jeova taem yumi stanap strong blong winim ol hadtaem, ol nogud fasin we narafala i mekem long yumi, mo fasin ya we narafala i jajem yumi wetem tingting we i no stret. Tingbaot fasin we Baebol i talem se Deved i gat. Taem Deved i yangfala, King Sol we i rul long nem blong Jeova, i ronem hem mo i mekem i nogud long hem. Be Deved i stanap strong, i no letem samting ya i daonem hem. Taswe Jeova i no moa glad long King Sol be hem i glad long Deved. Be Sol i jalus bitim mak long Deved. Nating se i olsem, Sol i gohed blong holem haenem blong king, mo hem i yusum ami blong Isrel blong ronem Deved mo traem kilim hem i ded. Jeova i letem Sol i gohed blong sam yia blong mekem i no stret long Deved. ?Olsem wanem? ?Deved i kam kros long God? ?Hem i letem trabol ya i daonem hem, mo hem i tekem tingting ya se i blong nating nomo we hem i stanap strong? Nogat. Hem i gohed blong respektem bigwan haenem blong Sol olsem man we God i putumap, mo hem i no givimbak long Sol, nating se hem i gat janis blong givimbak.—1 Saml. 24:2-7.

13. ?Olsem wanem yumi save holemstrong long Jeova taem narafala Kristin i mekem yumi harem nogud?

¹³ !Eksampol blong Deved i save givhan bigwan long yumi tede! Yumi stap long wan bigfala kongregesen blong ol man long fulwol, mo ol man ya oli no stretgud olgeta. Eniman long kongregesen ya oli save mekem i no stret long yumi no maet oli lego trutok. Nating se i olsem, i wan blesing blong stap laef naoia, from we Jeova i no save letem wan samting i spolem ol man blong hem olsem wan grup, mo i no gat samting i save mekem grup ya i kam nogud. (Aes. 54:17) ?Be sipos wan Kristin i mekem yumi harem nogud, bambae yumi mekem wanem? Sipos yumi stap kros longtaem long wan man blong God, hemia i save kam olsem posen we i spolem hat blong yumi, nao yumi save lego fasin ya blong holemstrong long Jeova. Fasin blong narafala i neva mas kam wan eskius blong tingting nogud long God, no blong lego stret rod. (Sam 119:165) Sipos yumi stanap strong taem wan samting olsem i traem yumi, hemia bambae i givhan long yumi blong holemstrong long Jeova oltaem.

14. ?Ol man we oli holemstrong long Jeova oli mekem wanem taem i gat sam jenis long fasin blong ogenaesesen no long wan tijing?

¹⁴ Narafala rod blong holemstrong long Jeova, se yumi no mas lukaot poen oltaem mo komplen. Hemia i min se yumi mas stap tru long Jeova. Hem i stap blesem ol man blong hem moa naoia i bitim olgeta taem bifo. I no gat wan narafala taem long histri blong wol we trufala wosip i kam antap bigwan olsem naoia. (Aes. 2:2-4) Sipos i gat wan jenis long saed blong mining blong sam vas long Baebol no fasin blong mekem samting long ogenaesesen, yumi mas agri long jenis ya nomo. Yumi glad tumas blong luk samting ya, from we i soemaot se laet blong trutok i stap saen strong moa oltaem. (Prov. 4:18) Sipos wan jenis i kamaot we i mekem tingting blong yumi i fasfas, yumi mas askem Jeova blong i halpem yumi blong kasem save long jenis ya. Long semtaem, yumi gohed blong obei long Jeova mo holemstrong long hem.

?Olsem Wanem Sipos Wan Kristin i No Moa Holemstrong Long Jeova?

15. ?Hu nomo i save mekem se yu lego fasin blong holemstrong long Jeova?

¹⁵ I tru se, hemia wan kwestin we i mekem yumi tingting plante. Olsem yumi lanem long laswan stadi, i impoten tumas we yumi holemstrong long Jeova. Sipos yumi no gat fasin ya, yumi no fren wetem Jeova mo yumi no save gat strong tingting se bambae hem i sevem yumi. I gat wan samting we yumi no mas fogetem: Long olgeta man long heven mo long wol, i gat wan man nomo we i save mekem se yu lego Jeova, hemia yu ya. Job i kasem save gud long samting ya. Hem i se: “!Go kasem taem we mi mi ded, bambae mi no save lego fasin blong mi blong holemstrong long God!” (Job 27:5, NW) Sipos yu yu gat strong tingting olsem Job mo yu stap klosap long Jeova oltaem, bambae yu no save lego fasin blong holemstrong long hem.—Jem. 4:8.

16, 17. (a) ?Sipos wan man i foldaon long bigfala sin, wanem samting we i no stret blong mekem? (b) ?Wanem samting we i stret blong mekem?

¹⁶ Nating se yumi nomo i save mekem se yumi lego fasin blong holemstrong long Jeova, be i gat sam we oli no holemtaet fasin ya. Samfala oli foldaon long bigfala sin mo oli gohed long rod ya, olsem i bin hapen long samfala bifo we ol aposol oli ded. ?Olsem wanem sipos samting ya i hapen long yu? ?I no moa gat rod blong kamgud bakegen? Si, i gat rod. ?Yu save mekem wanem? Fastaem bambae yumi tokbaot samting we yu no mas mekem. Tingting we i kasem ol sinman taem oli mekem wan bigfala rong, se oli wantem haedem sin ya. Maet oli haedem long papa mama blong olgeta, ol Kristin brata sista blong olgeta, mo long ol elda. Be Baebol i mekem yumi tingbaot se: “Sipos yu stap traem haedem ol sin blong yu, bambae yu no save win long laef blong yu. Be sipos yu . . . talemaot ol sin ya blong yu . . . mo yu gowe long olgeta, [God] bambae i gat sore long yu.” (Prov. 28:13) Olgeta we oli traem haedem sin blong olgeta oli mekem wan bigfala mastik, from we i no gat wan samting we i haed long fes blong God. (Ridim Hibrus 4:13.) Samfala oli folem wan dabol laef, i min se oli mekem olsem we oli wosipim Jeova be long semtaem oli stap mekem ol bigfala sin. Wan laef olsem i no laef blong wan man we i holemstrong long Jeova, hem i narakaen long fasin ya. Jeova i no glad long wosip blong man we i stap haedem bigfala sin. Defren olgeta, fasin tu fes blong man ya i mekem Jeova i kros tumas.—Prov. 21:27; Aes. 1:11-16.

¹⁷ Baebol i talem klia, wanem we wan Kristin i mas mekem sipos hem i foldaon long bigfala sin. Hem i mas askem ol Kristin elda blong halpem hem. Jeova i putumap ol elda blong oli save givhan long man we i kam sik tumas long saed blong spirit. (Ridim Jemes 5:14.) Maet yu fraet se ol elda bambae oli stretem yu. Be yu no mas letem fraet ya i blokem yu blong yu no lukaot help blong kam strong bakegen. Tingbaot wan man we i no wantem se dokta i stikim hem no katem hem blong stretem wan bigfala sik long bodi blong hem, from we hem i fraet se bambae i harem i soa blong smoltaem. !Man ya i no waes nating!—Hib. 12:11.

18, 19. (a) ?Olsem wanem samting we i hapen long laef blong Deved i soemaot se man we i lego fasin blong holemstrong long Jeova i save kasembak fasin ya? (b) ?Yu yu gat strong tingting blong mekem wanem?

¹⁸ ?Man we i sik bigwan long saed blong spirit, i save kamgud fulwan? ?Man we i lego fasin blong holemstrong long Jeova, i save kasembak fasin ya? Blong ansa long tufala kwestin ya, tingbaot wanem i hapen long Deved. Hem i mekem wan bigfala sin. Hem i lukluk waef blong narafala man wetem tingting blong wantem hem, ale hem i slip wetem woman ya. Biaen, hem i mekem wan plan blong kilim man blong woman ya i ded. Ating bambae yu talem se Deved i no holemstrong long Jeova long taem ya. ?Be hem i kamgud mo i holemstrong long Jeova bakegen? Yes. Deved i nidim blong kasem ol strong tok blong stretem hem, mo hem i kasem samting ya. Ale Deved i lesin long ol tok ya, i tanem tingting blong hem fulwan, mo from samting ya Jeova i sore long hem. Strong fasin ya blong stretem Deved i tijim hem, mo hem i kasembak fasin blong holemstrong long God taem hem i obei long God bakegen mo i gohed long rod ya. Laef blong Deved i soemaot gud samting we Ol Proveb 24:16 i talem, se: “Nating we trabol i stap kasem stret man hamas taem, be oltaem hem i save girap bakegen.” ?Olsem wanem long laef blong Deved biaen? Ridim ol tok we Jeova i talem long Solomon long saed blong Deved, afta we Deved i ded. (Ridim 1 King 9:4.c) God i tingbaot Deved olsem wan man we i holemstrong long hem. Tru ya, Jeova i save mekem se ol man we oli tanem tingting blong olgeta from sin oli kam klin bakegen, nating se sin blong olgeta i bigwan olsem wanem.—Aes. 1:18.

¹⁹ Yes, yu bambae yu stap olsem wan man we i holemstrong long Jeova sipos lav i pusum yu blong obei oltaem long Jeova. Yu mas holemtaet fasin ya blong stap tru long Jeova mo stanap strong longtaem. Mo sipos yu foldaon long wan bigfala sin, yu mas soemaot se yu rili sore mo yu mas tanem tingting blong yu from sin ya. !Tru ya, fasin blong holemstrong long Jeova i gud tumas, i olsem wan sas ston! Yumi evriwan i mas gat strong tingting blong talem olsem Deved se: “Long saed blong mi, mi bambae mi holemstrong oltaem long Jeova.”—Sam 26:11, NW.

[Ol futnot]

?Bambae Yu Yu Ansa Olsem Wanem?

• ?Olsem wanem yu yu save wokem fasin blong holemstrong long Jeova?

• ?Yu yu save mekem wanem blong holemtaet fasin ya?

• ?Olsem wanem man we i lego fasin blong holemstrong long Jeova i save kasembak fasin ya?

[Bokis blong pija long pej 16]

“HEM I MEKEM NAMBAWAN FASIN”

Wan woman we i gat bel faef manis, i talem tok ya antap long saed blong wan strenja we i kaen long hem mo i mekem fasin we i stret. Woman ya i bin go long wan ples blong dring kofe. Plante aoa biaen, hem i luksave se hem i fogetem paos blong hem long ples blong kofe. I gat 200,000 vatu long paos blong hem. Long dei ya nomo hem i karem bigfala mane long paos blong hem, be hem i no stap mekem samting ya evritaem. Woman ya i talem long man blong niuspepa se: “Taem mi faenemaot se mi lusum paos blong mi, mi harem nogud bitim mak.” Be wan yangfala woman i faenem paos ya mo hem i hareap blong traem faenem man we paos ya i blong hem, be hem i no faenem, ale hem i tekem paos ya i go long polis stesen, nao polis i faenem woman ya we i gat bel we paos ya i blong hem. Woman ya i gat bigfala tangkiu long yangfala woman we i faenem paos blong hem, mo i talem se: “Hem i mekem nambawan fasin.” ?From wanem yangfala woman ya i hadwok olsem blong givimbak mane ya? Niuspepa i talem se yangfala woman ya i wan Witnes blong Jeova, mo woman ya i talem se, “skul we hem i gruap long hem i tijim hem blong mekem fasin we God i laekem.”

[Tok blong pija long pej 17]

Ol yangfala oli naf blong holemstrong long Jeova taem wan samting i traem olgeta

[Tok blong pija long pej 18]

Deved i lego fasin blong holemstrong long Jeova blong smoltaem, be biaen hem i kamgud bakegen