Kwestin Blong Olgeta We Oli Ridim Magasin Ya

?Bambae Mi Mas Givim Hamas Mane?

“God i lavem man we i save givim samting long gladhat blong hem.” (2 Korin 9:7) Plante milian man long olgeta ples blong wol oli savegud long advaes ya. Be sam man we oli stap go long jos oli harem se oli mas givim moa mane i bitim wanem we oli gat. Blong talem stret, sam jos oli talem stret hamas mane we ol memba blong olgeta oli mas givim. Oli kolem fasin ya se givim taet, hemia man i givim 10 pesen blong mane blong hem i go long jos.

?Olsem wanem? ?Baebol i rili talem se i gat wan stret amaon we yumi mas givim oltaem i go long jos olsem presen mane? ?Bambae mi mas givim hamas mane?

?Long Taem Blong Baebol, Wanem Samting We Oli Mas Mekem Mo Givim?

Baebol i talemaot klia ol samting we God i wantem ol man Isrel blong givim. (Levitikas 27:30-32; Namba 18:21, 24; Dutronome 12:4-7, 11, 17, 18; 14:22-27) Ol samting ya we God i wantem olgeta blong givim oli no strong tumas. Jeova i promes se sipos oli obei long ol loa blong hem, bambae hem i mekem neson ya i gat ‘plante pikinini, anamol, mo plante gudgudfala kakae long garen.’—Dutronome 28:1, 2, 11, 12.

Sam narafala taem, ol man Isrel oli glad nomo blong givim presen mane olsem we oli wantem, nomata sipos i bigwan no i smol nomo. Tingbaot, taem Deved i wantem bildim wan haos prea blong Jeova, ol man blong hem oli givim fri nomo “gol we mane blong hem i kasem faef taosen talen.”a (1 Kronikel 29:7, NW) Traem skelem samting ya wetem wanem we Jisas i luk taem hem i stap long wol. Hem i luk “wan wido woman we i pua, i kam sakem tu smol mane we i olsem twanti vatu nomo” long ples blong kleksen long haos blong God. ?Mane we hem i givim, i bigwan olsem wanem? Hemia wan smol haf nomo blong pei blong wan dei. Jisas i talem se, nating we mane ya i smol nomo, be God i glad long hem.—Luk 21:1-4.

?Ol Kristin Oli Mas Givim Wan Stret Amaon Blong Mane?

Ol Kristin oli no moa stap aninit long kontrak blong Loa we Moses i mekem wetem ol man Isrel. Taswe, oli no nidim blong givim wan stret amaon blong mane i go long God. Long trufala Kristin kongregesen, fasin blong givim presen i karem bigfala glad long yumi. Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.”—Ol Wok 20:35.

Ol Witnes blong Jeova oli givim presen mane blong sapotem wok blong prij long fulwol. Oli yusum presen mane ya blong printim ol buk olsem magasin ya we yu stap ridim, mo blong oli bildim mo wokemgud ol haos wosip, we oli kolem ol Haos Kingdom. Oli no yusum presen mane ya blong pem ol man. Samfala we oli glad nomo blong wok fultaem long wok ya blong mekem disaepol, oli kasem smol help blong pem transpot blong olgeta mo sam samting we oli nidim. Be i no gat wan long olgeta we i askem help olsem. Blong talem stret, bighaf blong ol Witnes blong Jeova we oli sapotem wok ya blong talemaot gud nius, oli no kasem pei from. Be oli gat ol wok we oli save winim mane long hem, blong givhan long olgeta long saed blong bodi, olsem Pol bifo taem hem i somap ol haos tapolen.—2 Korin 11:9; 1 Tesalonaeka 2:9.

Sipos wan man i wantem givim presen mane blong givhan long wok we ol Witnes blong Jeova oli mekem, ?bambae hem i save givim hamas mane? Aposol Pol i raetem se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.”—2 Korin 8:12; 9:7.

[Futnot]