‘Spirit i Save Lukaot Ol Tingting Blong God We Oli Haed’

“Spirit ya blong God i save lukaot olgeta samting we i haed. Ol tingting blong God we man i no save faenemaot, be Spirit ya i save faenemaot olgeta”—1 KOR. 2:10.

 1. ?Long 1 Korin 2:10, Pol i tokbaot wanem wok blong tabu spirit? ?Wanem ol kwestin we maet yu askem?

!YUMI talem tangkiu tumas from wok we tabu spirit blong Jeova i mekem! Baebol i talem se spirit ya i save givhan long yumi, hem i olsem wan presen, hem i save talemaot sam samting long yumi, mo i save prea long God from yumi. (Jon 14:16; Wok 2:38; Rom 8:16, 26, 27) Aposol Pol i tokbaot wan narafala impoten wok we tabu spirit i mekem, i se: “Spirit ya blong God i save lukaot olgeta samting we i haed. Ol tingting blong God we man i no save faenemaot, be spirit ya i save faenemaot olgeta.” (1 Kor. 2:10) Tru ya, Jeova i yusum tabu spirit blong hem blong mekem ol dip trutok oli kam klia. Sipos spirit ya i no givhan long yumi, bambae yumi no kasem save nating long ol tingting blong Jeova. (Ridim 1 Korin 2:9-12.) Be maet yu askem se: ?Olsem wanem spirit ya i lukaot ‘ol tingting blong God we oli haed’? ?Long faswan handred yia, Jeova i yusum hu blong soemaot ol tingting blong hem? ?Tede, olsem wanem spirit ya i lukaot ol tingting ya blong God? ?Mo spirit ya i soemaot ol tingting ya long hu?

 2. ?Wanem tufala wok we tabu spirit i mekem?

² Jisas i talem tu wok we spirit ya i mekem. Jes bifo we hem i ded, hem i talem long ol aposol blong hem se: “Spirit ya blong givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.” (Jon 14:26) Yes, tabu spirit bambae i tijim olgeta, mo bambae i mekem olgeta oli tingbaot ol tok blong Jisas bakegen. Spirit ya bambae i tijim ol Kristin long ol samting we oli no kasem save long hem yet. Mo spirit ya bambae i halpem olgeta blong tingbaot bakegen mo folem gud ol save we oli kasem finis.

Long Faswan Handred Yia

 3. ?Wanem tok blong Jisas i soemaot se sloslo ‘ol tingting blong God we oli haed’ bambae oli kamaot?

³ Jisas i tijim ol disaepol blong hem long plante trutok we oli neva harem bifo. Be i gat plante moa samting yet we oli mas lanem. Jisas i talem long ol aposol blong hem se: ‘Mi mi gat plante narafala samting yet blong talem long yufala. Be naoia yufala i no save kasem olgeta evriwan, oli strong tumas yet long yufala. Be taem Spirit ya we i Stamba blong Trutok i kam, hem bambae i save tijim yufala long olgeta tok we i tru.’ (Jon 16:12, 13) Ale, Jisas i talem se tabu spirit bambae i soemaot sloslo, ol tingting blong God we oli haed.

 4. Long dei blong Pentekos long yia 33 K.T., ?tabu spirit i tijim Pita long wanem samting, mo i mekem hem i tingbaot wanem samting bakegen?

⁴ Long dei blong Pentekos long yia 33 K.T., “Spirit ya we i Stamba blong Trutok” i kamdaon long samwe long 120 Kristin we oli joen wanples long Jerusalem. I gat sam samting we ol man oli luk mo harem blong soemaot se spirit ya i kamdaon. (Wok 1:4, 5, 15; 2:1-4) Ol disaepol oli stat toktok long ol naranarafala lanwis, oli stap tokbaot “ol bigbigfala wok ya we God i mekem.” (Wok 2:5-11) Hemia i stret taem blong soemaot wan niufala samting. Profet Joel i talemaot finis se tabu spirit bambae i kamdaon. (Joel 2:28-32) Ol man we oli stap long taem ya oli luk we profet tok ya i kamtru long wan rod we oli neva tingbaot. Mo aposol Pita i faswan blong eksplenem samting we i hapen. (Ridim Ol Wok 2:14-18.) Taswe tabu spirit i tijim Pita, taem i mekem i klia long hem se, samting we i hapen long ol disaepol long taem ya i mekem profet tok ya i kamtru. Mo tu, spirit ya i mekem Pita i tingbaot bakegen samting we hem i kasem save long hem finis. Taswe Pita i no talemaot tok blong Joel nomo, be i talem tok blong tufala Sam tu. (Sam 16:8-11; 110:1; Wok 2:25-28, 34, 35) Samting we ol man long dei ya oli luk mo oli harem, oli rili ol tingting blong God we oli haed.

5, 6. (a) Afta we oli mekem lafet blong Pentekos long yia 33 K.T., ?wanem ol bigfala kwestin we oli mas faenem ansa blong olgeta long saed blong niufala kontrak blong God? (b) ?Hu i stanemap ol kwestin ya? ?Olsem wanem desisen i kamaot?

⁵ Be i gat sam samting we oli no klia yet long tingting blong ol Kristin long faswan handred yia. I gat sam kwestin long saed blong niufala kontrak we i stat blong kamtru long dei ya blong Pentekos. ?Olsem wanem? ?God i mekem niufala kontrak ya wetem ol prapa man Isrel nomo, mo ol man we oli stap wetem olgeta mo joen long skul blong olgeta? ?Hem i mekem niufala kontrak ya wetem ol man blong ol narafala laen tu? ?Olgeta tu oli save kasem tabu spirit? (Wok 10:45) ?Olgeta we oli no man Isrel, bambae oli mas sakomsaes mo folem Loa blong Moses, blong oli save kasem tabu spirit? (Wok 15:1, 5) Hemia ol bigfala kwestin ya. Oli mas gat spirit blong Jeova blong lukaot ol save ya we oli haed. ?Be tabu spirit ya bambae i soemaot ol samting ya long hu?

⁶ Ol brata we oli gat wok blong lidim kongregesen, oli stanemap ol kwestin ya wanwan. Pita, Pol, mo Banabas, trifala i stap long miting ya blong hed kampani, nao trifala i tokbaot wanem we Jeova i stap mekem long ol man blong ol narafala laen we oli no sakomsaes. (Wok 15:7-12) Hed kampani i lesin long ol tok blong trifala ya, mo i tingting tu long sam tok blong ol Hibru hanraet blong Baebol. Nao, wetem help blong tabu spirit, hed kampani i mekem wan desisen. Afta, hem i raetem wan leta blong talemaot desisen ya long ol kongregesen.—Ridim Ol Wok 15:25-30 mo 16:4, 5; Efes. 3:5, 6.

 7. ?Olsem wanem ol save we oli haed, oli kam klia?

⁷ Plante narafala save i kam klia taem tabu spirit i pulum Jon, Pita, Jemes, mo Pol, blong raetem sam haf blong Baebol. Be samtaem afta we oli finisim ol Kristin hanraet, paoa blong talemaot profet tok i finis, mo oli no moa kasem ol save long rod we i olsem merikel. (1 Kor. 13:8) ?Olsem wanem? ?Spirit bambae i gohed blong tijim ol Kristin mo mekem oli tingbaot bakegen ol save we oli kasem finis? ?Spirit ya bambae i gohed blong halpem olgeta blong lukaot ol tingting blong God we oli haed? Profet tok i talem se yes.

Long Taem Blong En

8, 9. ?Long taem blong en, hu olgeta we bambae oli “saen we i saen” from we oli waes gud long ol save blong God? ?Bambae oli saen olsem wanem?

⁸ Wan enjel i tokbaot taem blong en, se: “‘Olgeta we oli waes gud bambae oli saen we i saen olsem san. Mo olgeta we oli bin tijim ol man blong mekem ol stret fasin, bambae oli saen olsem ol sta gogo i no save finis.’ . . . [“mo tru save bambae i kam fulap,” NW].” (Dan. 12:3, 4) ?Hu olgeta we oli waes gud we bambae oli saen we i saen? Jisas i halpem yumi blong kasem save long olgeta, long parabol blong hem long saed blong wit mo rabis gras. Hem i tokbaot taem we i klosap “en blong wol ya,” se long taem ya, ‘ol stret man bambae oli saen olsem san [“long kingdom blong Papa blong olgeta,” NW].’ (Mat. 13:39, 43) Taem Jisas i eksplenem parabol ya, hem i talem se ‘ol stret man ya’ hemia “ol pikinini blong kingdom,” no ol Kristin we tabu spirit i makemaot olgeta.—Mat. 13:38, NW.

⁹ ?Olsem wanem? ?Olgeta Kristin evriwan, we tabu spirit i makemaot olgeta, bambae oli “saen we i saen”? Long wan fasin, yes. Hemia from we evriwan bambae oli joen long wok blong prij, pulum ol man oli kam disaepol blong Kraes, mo mekem olgeta oli kam strong long ol miting. Long rod ya, bambae oli soemaot eksampol long ol narafala Kristin. (Sek. 8:23) Antap long hemia, ol tingting blong God we oli haed oli mas kam klia long taem blong en. Profet tok blong Daniel, hemia tu i “stap haed” go kasem taem blong en ya. (Dan. 12:9) ?Olsem wanem spirit ya i lukaot ol tingting ya blong God? ?Mo spirit ya i soemaot ol save ya long hu?

10. (a) ?Long ol las dei, tabu spirit i soemaot ol dip trutok long hu? (b) Eksplenem olsem wanem trutok long saed blong prapa haos tapolen we Jeova nomo i stanemap, i kam klia.

¹⁰ Long taem blong yumi, tabu spirit i mekem ol save oli kam klia long stret taem. Spirit ya i givhan long Hed Kampani, we i haf blong grup ya blong ‘slef we i stret mo waes,’ blong i faenemaot ol tingting blong God, we bifo i no kasem save long olgeta. (Mat. 24:45, NW; 1 Kor. 2:13) Hed Kampani, olsem wan grup, i tokbaot enikaen niufala save we oli faenem, mo i tokbaot sipos i gat nid blong jenisim wan tingting we oli gat fastaem. (Wok 15:6) Sipos i gat nid, bambae oli printim niufala save ya long ol buk, blong yumi evriwan i save ridim. (Mat. 10:27) Taem ol yia oli pas, maet i gat nid blong jenisim sam tingting taem save i kam klia moa. Be oltaem oli talemaot klia mo eksplenem gud ol niufala save ya.—Lukluk bokis ya “Spirit i Soemaot Mining Blong Prapa Haos Tapolen We God Nomo i Stanemap.”

Kasem Gudfala Samting From Wok Blong Spirit Tede

11. ?Olsem wanem ol Kristin tede oli kasem gudfala samting from wok we spirit i mekem blong soemaot ol tingting blong God we oli haed?

¹¹ Olgeta Kristin we oli holemstrong long God oli kasem gudfala samting from wok we tabu spirit i mekem tede, blong soemaot ol tingting blong God we oli haed. Olsem ol Kristin long faswan handred yia, yumi tede yumi stadi. Biaen, yumi tingbaot bakegen ol save we tabu spirit i halpem yumi blong kasem, mo yumi mekem i wok long laef blong yumi. (Luk 12:11, 12) Yumi no nidim hae edukesen blong kasem save long ol dip trutok blong Baebol we oli stap long ol buk blong yumi. (Wok 4:13) ?Yumi save mekem wanem blong kasem save moa long ol tingting blong God we oli haed? Hemia sam advaes we yumi save folem.

12. ?Long wanem taem, yumi mas prea from tabu spirit?

¹² Prea from tabu spirit. Bifo we yumi ridim mo stadi long ol save blong Baebol, yumi mas prea blong tabu spirit i lidim yumi. Maet yumi stap yumi wan nomo, no maet yumi gat smoltaem nomo blong rid mo stadi, be nating, yumi mas prea yet from tabu spirit. Taem yumi prea wetem tingting daon, yumi mekem Papa blong yumi long heven i harem gud. Olsem Jisas i talem, Jeova i glad tumas blong givim tabu spirit long yumi, sipos yumi askem wetem wan hat we i tru.—Luk 11:13.

13, 14. ?Taem yumi reregud from ol miting, olsem wanem samting ya i halpem yumi blong kasem save long ol tingting blong God?

¹³ Reregud from ol miting. Grup ya we i olsem slef we i stret mo waes, i givim ‘kakae long yumi long stret taem blong hem.’ “Slef” ya i mekem wok blong hem taem i givimaot ol save we i stanap long Baebol, mo taem i mekemrere plan blong ol miting mo samting we yumi stadi long hem. Hem i tingting gud fastaem, blong jusum gud ol save we i askem “olgeta Kristin” blong stadi long hem mo tokbaot long ol miting. (1 Pita 2:17; Kol. 4:16; Jud 3) Yumi wok gud wetem tabu spirit taem yumi mekem bes blong yumi blong rerem mo stadi long ol save ya.—Rev. 2:29.

¹⁴ Taem yumi stap rerem ol Kristin miting, i gud yumi jekem ol vas we oli no raetem fulwan long ol buk. I gud tu we yumi traem luksave olsem wanem ol vas ya oli joen wetem save we yumi stap stadi long hem. Sipos yumi mekem olsem, sloslo bambae yumi kasem save long plante dip trutok blong Baebol. (Wok 17:11, 12) Taem yumi lukaot mo ridim ol vas long Baebol, samting ya i makem ol vas ya long tingting blong yumi. Nao tabu spirit i save halpem yumi blong tingbaot ol vas ya bakegen. Mo tu, taem yumi lukluk wan vas long Baebol, ae blong yumi i makem weples vas ya i stap long pej, nao bambae i moa isi long yumi blong faenem vas ya bakegen taem yumi nidim.

15. ?From wanem yumi mas ridim ol niufala buk? ?Olsem wanem yu yu mekem samting ya?

¹⁵ Ridim ol niufala buk. Long ol miting, yumi no yusum olgeta buk blong yumi evriwan. Nating se i olsem, ol buk ya oli blong givim ol gudfala save long yumi. Taem oli wokem ol Wajtaoa mo Wekap! we yumi givimaot long ol narafala man, oli stap tingbaot wanem save i gud long yumi ol man blong Jeova tu. From we wol ya i bisi, plante taem yumi mas wet long wan man no wan samting. Sipos yumi karem wan buk wetem yumi oltaem, maet wan buk we yumi no ridim yet no wan we yumi ridim smol haf blong hem finis, ale yumi save tekem janis blong ridim buk ya taem yumi stap wet. Sam man blong Jeova oli kasem ol niufala save taem oli stap wokbaot mo taem oli stap ron long trak, nao oli lesin long CD blong ol buk blong yumi. Olgeta we oli raetem ol buk ya, oli spenem plante taem blong lukaot ol save, mo oli raetem long fasin we olgeta man oli harem gud blong ridim, nating se maet sam man oli no man blong rid plante. Olgeta save ya i givhan long yumi blong kasem ol tingting blong God we oli haed.—Hab. 2:2.

16. ?From wanem i gud blong raetemdaon ol kwestin we yu tingbaot mo lukaot ansa blong olgeta?

¹⁶ Tingting dip. Taem yu stap ridim Baebol no wan buk we i stanap long Baebol, yu mas tekem taem blong tingting gud long samting we yu stap ridim. Taem yu folem stori ya long tingting blong yu, ating bambae yu tingbaot sam kwestin tu. Maet yu raetemdaon ol kwestin ya mo lukaot ansa blong olgeta samtaem biaen. Taem yumi wantem faenemaot ansa blong wan kwestin we i kam long tingting blong yumi, long taem ya nao yumi stadi dip moa. Ol save we yumi kasem i olsem ol gudgudfala samting we yumi hivimap i stap, nao taem yumi nidim, yumi save yusum ol save ya.—Mat. 13:52.

17. ?Yu yu folem wanem program blong famle stadi no prapa stadi blong yu?

¹⁷ Makemaot taem blong mekem famle wosip. Hed Kampani i pulum yumi evriwan blong makemaot wan naet no wan narafala taem evri wik, blong mekem prapa stadi blong yumi no famle stadi. Naoia we yumi gat wan niufala program blong ol miting, yumi gat gudfala janis blong folem advaes ya blong Hed Kampani. ?Olsem wanem long yu? ?Yu yu mekem wanem long naet ya blong Famle Wosip? Samfala oli ridim Baebol. Oli lukaot moa save long sam vas we oli gat kwestin long hem. Mo oli raetem ol smosmol poen long Baebol blong olgeta blong eksplenem sam vas. Plante famle oli tektaem blong tokbaot olsem wanem famle i save folem ol save we oli stadi long hem. Sam hed blong famle oli jusum ol save we oli ting se i stret long famle blong olgeta. Sipos no, oli yusum ol save mo kwestin we famle i wantem tokbaot. Taem yu gohed blong folem program ya blong Famle Wosip, bambae yu tingbaot plante moa samting we yu save mekem.a

18. ?From wanem yumi no mas fogetem blong stadi long ol dip trutok blong Baebol?

¹⁸ Jisas i talem se tabu spirit bambae i givhan long yumi. Taswe yumi no mas fogetem blong stadi long ol dip trutok blong Baebol. Ol gudgudfala trutok ya oli halpem yumi blong ‘savegud Hae God.’ Hem i askem long yumi blong lukaot olgeta. (Ridim Ol Proveb 2:1-5.) Oli givim save long yumi long saed blong ‘plante samting we God i mekem rere finis blong ol man we oli lavem hem.’ Sipos yumi traehad blong lanem moa long saed blong Tok blong Jeova, tabu spirit bambae i givhan long yumi, from we “Spirit ya i save lukaot olgeta samting we i haed. Ol tingting blong God we man i no save faenemaot, be Spirit ya i save faenemaot olgeta.”—1 Kor. 2:9, 10.

[Futnot]

?Bambae Yu Yu Ansa Olsem Wanem?

• ?Wanem tufala wok we spirit i mekem blong halpem yumi blong lukaot ‘ol tingting blong God we oli haed’?

• ?Long faswan handred yia, tabu spirit i soemaot ol dip trutok long hu?

• ?Long taem blong yumi, olsem wanem tabu spirit i stap mekem ol save i kam klia moa?

• ?Yu yu save mekem wanem blong kasem ol gudfala samting from wok blong tabu spirit?

[Bokis blong pija long pej 30]

Spirit i Soemaot Mining Blong Prapa Haos Tapolen We God Nomo i Stanemap

Wan long ol ‘tingting blong God we oli haed’ i kam klia long faswan handred yia. Hemia se, haos tapolen mo haos blong God bifo, oli pija blong samting we i bigwan moa. Pol i talem se oli pija blong ‘prapa haos tapolen we Hae God nomo i stanemap,’ i no man we i stanemap. (Hib. 8:2) Prapa haos tapolen ya i minim plan blong tru wosip, rod blong kam long God, we i stanap long sakrefaes blong Jisas Kraes mo wok blong olgeta we oli wok wetem Jisas olsem ol pris.

‘Prapa haos tapolen we Hae God nomo i stanemap’ i stat long yia 29 K.T., taem Jisas i baptaes. Long taem ya, Jeova i agri long Jisas se hem nao Man ya we bambae i givim sakrefaes we i stret gud olgeta. (Hib. 10:5-10) Afta we Jisas i ded mo i laef bakegen, hem i go insaed long Rum we i Tabu we i Tabu long haos tapolen ya we God i stanemap. Long ples ya, hem i go “stanap long fes blong God,” mo i givim sakrefaes blong hem i go long God.—Hib. 9:11, 12, 24.

Long wan narafala ples long Baebol, Pol i tokbaot ol Kristin we tabu spirit i makemaot olgeta, se oli olsem ‘haos we i stap kam gud moa, wan haos blong Hae God we i tabu, i klin gud.’ (Efes. 2:20-22) ?Olsem wanem? ?Haos ya i sem mak long “prapa haos tapolen” we Pol i tokbaot long leta we hem i raetem long ol Hibru Kristin? Blong plante yia, ol man blong Jeova oli ting se yes. Oli ting se ol Kristin we tabu spirit i makemaot olgeta oli stap kasem trening long wol ya, blong kam “ol pos” blong haos blong Jeova long heven.—1 Pita 2:5.

Be klosap long yia 1971, sam long grup ya blong slef we i stret mo waes, oli luksave se haos blong God we Pol i tokbaot long leta we hem i raetem long ol Kristin long Efesas, i no sem mak long prapa haos tapolen ya we Jeova nomo i stanemap. Sipos ol Kristin we tabu spirit i makemaot olgeta mo we oli laef bakegen finis oli “prapa haos tapolen ya we Hae God nomo i stanemap,” haos ya i mas stanap afta we oli laef bakegen long ded. Hemia ‘long taem ya we Masta i stap.’ (1 Tes. 4:15-17, NW) Be long saed blong haos tapolen ya, Pol i raetem se: “Hemia i wan pija blong makem taem ya we yumi stap long hem naoia.”—Hib. 9:9.

Taem yumi skelem ol vas ya wetem sam narafala vas blong Baebol, yumi luksave klia se God i no stap wokem prapa haos tapolen ya naoia. Mo ol Kristin we tabu spirit i makemaot olgeta oli no stap kasem trening long wol ya blong kam olsem “ol pos” blong haos tapolen ya. Nogat. Ol Kristin ya oli stap mekem wok long vranda blong prapa haos tapolen ya, mo long Rum we i Tabu. Evri dei, oli stap ‘leftemap nem blong God, olsem we oli givim presen i go long hem.’—Hib. 13:15.

[Tok blong pija long pej 31]

?Yumi mas mekem wanem blong kasem save moa long ‘ol tingting blong God we oli haed’?