God i Spel—?Hemia i Minim Wanem?

“I gat janis i stap yet blong ol man blong [God] oli go spel.”—HIB. 4:9.

1, 2. ?Ol tok blong Jenesis 2:1-3 i soemaot wanem long saed blong namba seven dei? ?Wanem ol kwestin we yumi mas faenem ansa blong olgeta?

LONG Jenesis japta 1, yumi lanem se, long sikis dei, God i mekemrere wol ya blong man i save stap long hem. Ol dei ya wanwan oli no 24 aoa nomo, be oli ol longlongfala taem. Baebol i makem en blong ol dei ya wanwan taem i talem se: “Nao dei ya i finis.” (Jen. 1:5, 8, 13, 19, 23, 31) Be taem yumi ridim Jenesis 2:1-3, yumi no save faenem ol tok ya se “dei ya i finis,” long saed blong namba seven dei.

² From we yumi no save faenem ol tok ya long Baebol se namba seven dei i finis, yumi kasem save se “dei” ya we God i spel long hem, i stap gohed yet. ?Olsem wanem tede? ?God i stap spel yet? ?Sipos yes, yumi save joen wetem hem long spel ya? I impoten tumas we yumi faenem ansa blong ol kwestin ya.

?Jehova i ‘Stap Spel’ Yet?

 3. ?Jisas i talem wanem long Jon 5:16, 17 blong soemaot se, long taem blong hem, namba seven dei i stap gohed yet?

³ I gat tu samting we tufala i soemaot se, long taem blong Jisas mo ol fas Kristin, namba seven dei i stap gohed yet. Fas samting, hemia tok we Jisas i talem long ol man we oli agensem hem from we hem i mekem wan sikman i kam gud long Sabat dei. Ol man ya oli talem se taem Jisas i mekem samting ya, hem i mekem wan wok. Masta Jisas i talem long olgeta se: “Oltaem Papa blong mi i stap wok, mo mi tu mi mas wok.” (Jon 5:16, 17) ?Yu yu luksave poen we Jisas i wantem soemaot? Ol man oli stap agensem hem se hem i wok long Sabat dei. Be hem i ansa long olgeta se, “Oltaem Papa blong mi i stap wok.” I olsem we hem i talem long olgeta se: ‘Mi mo Papa blong mi, mitufala i mekem sem wok. Papa blong mi i stap gohed blong wok long ol taosen yia we oli sabat dei blong hem. Taswe i stret nomo we mi tu mi gohed blong wok long Sabat dei.’ Ale, tingting we yumi kasem long ol tok ya blong Jisas, se, long taem blong hem, namba seven dei, no dei ya we God i spel long wok blong mekem ol samting long wol, i no finis yet. Be God i stap wok yet blong mekem stamba tingting blong hem long saed blong ol man mo wol ya i kamtru.a

 4. ?Pol i talem wanem blong soemaot se, long taem blong hem, namba seven dei i stap gohed yet?

⁴ Namba tu samting, hemia ol tok blong aposol Pol. Pol i talem bakegen ol tok blong Jenesis 2:2 se God i spel. Mo tabu spirit i pulum hem blong raetem se: “Yumi ya we yumi bilif, bambae yumi save kasem spel ya.” (Hib. 4:3, 4, 6, 9) Ale, long taem blong Pol, namba seven dei i stap gohed yet. ?Dei ya blong spel bambae i finis wetaem?

 5. ?Namba seven dei ya i blong wanem? ?Wetaem samting ya bambae i kamtru fulwan?

⁵ Blong ansa long kwestin ya, yumi mas tingbaot se, ?namba seven dei ya i blong wanem? Jenesis 2:3 i talem se: ‘God i blesem namba seven dei ya, mo i makemaot se dei ya i tabu.’ ‘Dei ya i tabu,’ i min se Jehova i makemaot dei ya blong i yusum long wan spesel fasin, hemia blong mekem stamba tingting blong hem i kamtru. Stamba tingting blong hem, hemia se wol ya i mas fulap long ol man mo woman we oli obei long hem, mo we oli lukaot gud long wol ya mo long ol laef samting long hem. (Jen. 1:28) Jehova God mo Jisas Kraes we hem i “Masta blong Sabat dei,” tufala i “stap wok” kasem naoia, blong mekem stamba tingting ya i kamtru. (Mat. 12:8) Dei ya we God i spel long hem, bambae i gohed gogo kasem taem we tingting blong hem i kamtru fulwan. Hemia long en blong Taosen Yia Rul Blong Kraes.

Yumi No Mas “Folem Fasin Blong Olgeta Ya Bifo We Oli No Obei Long God”

 6. ?Fasin blong hu i save givim woning long yumi? ?Yumi lanem wanem samting long olgeta ya?

⁶ God i talemaot klia nomo long Adam mo Iv, wanem stamba tingting blong hem. Be tufala i no wantem wok blong mekem stamba tingting ya i kamtru. I no tufala nomo we i no wantem obei long God. I gat plante milian narafala man we oli kamaot biaen long tufala, we olgeta tu oli no wantem obei long God. Neson blong Isrel we God i jusumaot olsem spesel neson blong hem, hem tu i no wantem obei long God. Mo Pol i givim woning long ol fas Kristin, se sam long olgeta oli save foldaon long fasin ya blong ol man Isrel bifo. Hem i raetem se: “Yumi mas traehad blong kasem spel ya. I nogud wan long yumi i folem fasin blong olgeta ya bifo we oli no obei long God, nao hem bambae i no save kasem spel ya.” (Hib. 4:11) Pol i talem se man we i no obei long God, bambae i no kasem spel ya. ?Long saed blong yumi, tok ya i minim wanem? ?Hem i min se, sipos yumi mekem fasin we i agensem stamba tingting blong God, maet bambae yumi no save joen wetem God long spel ya? I klia se, ansa blong kwestin ya i impoten tumas. Bambae yumi tokbaot samting ya moa. Be fastaem, bambae yumi tokbaot nogud fasin blong ol man Isrel. Bambae yumi luk wanem samting moa we yumi save lanem, blong yumi save joen wetem God long spel blong hem.

‘Neva Bambae Oli Go Spel Long Graon Ya’

 7. ?Jehova i gat wanem tingting taem hem i tekemaot ol man Isrel long wok slef long Ijip? ?Be oli mas mekem wanem?

⁷ Long yia 1513 B.K.T.,b Jehova i talemaot long man blong hem, Moses, wanem we hem i tingting blong mekem long ol man Isrel, i se: “Mi mi kamdaon blong tekemaot olgeta long han blong ol man Ijip, mo blong lidim olgeta oli aot long Ijip oli kam. Bambae mi tekem olgeta i go long wan gudfala kantri, we i bigfala tumas, we graon blong hem i gud tumas, oltaem i karem fulap kakae.” (Eks. 3:8) Jehova i mekem samting we hem i talem finis long Ebraham, papa blong ol man Isrel. Hem i “tekemaot olgeta long han blong ol man Ijip,” blong i mekem olgeta oli kam wan neson we i blong hem nomo. (Jen. 22:17) God i givim ol loa long ol man Isrel. Sipos oli obei long ol loa ya, bambae oli gat pis oltaem wetem hem. (Aes. 48:17, 18) Hem i talem long olgeta se: “Sipos yufala i obei long mi, mo yufala i holemgud promes ya [long Loa blong Moses] . . . bambae yufala i nambawan man blong mi, i winim ol narafala man long wol. Nating we olgeta man long wol ya oli blong mi, be yufala bambae i tabu, yufala i man blong mi nomo, mo bambae yufala i pris blong mi, yufala i stap mekem wok blong mi.” (Eks. 19:5, 6) Yes, sipos ol man Isrel oli wantem stap oltaem olsem ol spesel man blong God, oli mas obei long hem.

 8. ?Sipos ol man Isrel oli obei long God, laef blong olgeta bambae i olsem wanem?

⁸ !Yu traem tingbaot se laef blong ol man Isrel bambae i olsem wanem, sipos oli bin obei long God! Jehova bambae i mekem se garen blong olgeta i karem plante kakae, plantesen blong grep i givim plante waen, mo oli gat plante sipsip mo buluk. Ol enemi blong olgeta bambae oli no save holem olgeta oli stap aninit long paoa blong olgeta. (Ridim 1 King 10:23-27.) Neson blong Isrel i gat janis blong stap gud, we i no dipen long wan narafala neson, mo i no harem nogud aninit long strong rul blong ol man Rom, olsem plante narafala neson long taem blong Jisas. Jehova i wantem we neson blong Isrel i wan gudfala eksampol long ol narafala neson raonabaot. God ya we hem nomo i tru, i wantem soemaot klia se ol man we oli obei long hem, bambae oli kasem blesing ya blong fren gud wetem Hem, mo bambae oli kasem plante samting tu.

9, 10. (a) ?From wanem i nogud tumas we ol man Isrel oli wantem gobak long Ijip? (b) ?Sipos oli gobak long Ijip, olsem wanem long wosip blong olgeta?

⁹ Neson blong Isrel i gat nambawan janis ya blong Jehova i yusum hem blong mekem stamba tingting blong hem i kamtru. !Samting ya i save karem plante blesing long ol man Isrel! !Mo i no long olgeta nomo, be long ol narafala man long wol tu! (Jen. 22:18) Be bighaf blong ol man Isrel oli no tinghae long janis ya we oli gat blong stap olsem spesel neson blong God. Oli no wantem soemaot gudfala eksampol long ol narafala neson raonabaot. !Mo oli wantem gobak long Ijip tu! (Ridim Namba 14:2-4.) Be sipos oli gobak long Ijip, oli no save mekem wosip long God long fasin we hem i wantem. Mo oli no save soemaot wan gudfala eksampol long ol narafala neson. Sipos oli gobak long han blong ol hiten man, oli no save folem Loa blong Moses. Mo tu, oli no save kasem blesing from rod we Jehova i stanemap blong fogivim ol sin blong olgeta. !Ol man Isrel oli tingbaot ol samting long saed blong bodi nomo! !Mo oli tingbaot blong harem gud naoia nomo! Yumi no sapraes long tok we Jehova i talem long saed blong ol stronghed ya, se: “Mi mi kros tumas long olgeta, nao mi talem se, ‘Olgeta ya oli no holem promes blong olgeta nating, oli no wantem nating blong obei long ol tok blong mi.’ Mi mi kros gud long olgeta, nao mi mekem wan strong tok, mi talem se, ‘Olgeta ya, neva bambae oli go insaed long graon ya we mi mi wantem givim long olgeta blong oli go spel long hem.’”—Hib. 3:10, 11; Sam 95:10, 11.

¹⁰ Taem ol stronghed man Isrel oli wantem gobak long Ijip, oli soemaot se oli ting nating long ol blesing we oli kasem olsem spesel neson we Jehova i jusumaot. Oli laekem moa ol gudfala kakae we oli save kasem long Ijip. (Nam. 11:5) Ol stronghed ya oli olsem Esao, we i ting nating long spesel blesing we hem i kasem olsem fasbon, nao i lego blesing ya blong kasem wan plet kakae nomo. Ol man Isrel tu oli rere blong lego blesing ya blong stap olsem ol spesel man blong God, blong kasem sam gudfala kakae nomo.—Jen. 25:30-32; Hib. 12:16.

11. Ol man Isrel we oli aot long Ijip, oli no trastem God. ?Samting ya i jenisim stamba tingting blong God, no olsem wanem?

¹¹ Nating se ol man Isrel we Jehova i tekemaot olgeta long Ijip oli no obei long hem, be hem i gat longfala tingting. Hem i gohed nomo, i “stap wok” blong mekem stamba tingting blong hem i kamtru. Ale, hem i putum tingting blong hem i stap strong long ol yangfala long neson blong Isrel. Olgeta ya oli obei moa long hem i bitim ol olfala blong olgeta. Oli folem tok blong Jehova se oli mas go insaed long Promes Lan, mo oli stat blong tekem graon ya i blong olgeta. Josua 24:31 i talem se: “Long taem we [Josua] i stap laef, ol laen blong Isrel oli stap biaen long Hae God oltaem nomo. Mo biaen, long taem we hem i ded, be olgeta oli stap holem fasin ya yet, gogo kasem taem we ol lida ya we oli luk ol bigbigfala wok ya we Hae God i mekem long ol man blong hem oli ded evriwan.”

12. ?Wanem i soemaot se i gat janis i stap yet tede, blong joen wetem God long spel blong hem?

¹² Taem olgeta ya we oli obei long God oli kam olfala mo oli ded, olgeta we oli gruap biaen long olgeta ‘oli no moa tingbaot Jehova, mo oli fogetemgud ol bigbigfala samting we hem i mekem long ol olfala blong olgeta bifo.’ Ale, “ol laen blong Isrel oli stat mekem ol samting nogud long fes blong Hae God, mo oli stat mekem wosip long ol pija blong god ya Bal.” (Jaj. 2:10, 11) Promes Lan i no kam wan ples we oli save “spel long hem.” Oli no obei long God, mo from samting ya, oli no gat pis oltaem wetem God. Pol i tokbaot ol yia biaen long taem ya, i se: “Bifo, sipos Josua i bin givim spel long [ol man Isrel] olsem we God i bin promes, bambae God i no save talem wan narafala dei bakegen. Nao from we hem i talem wan narafala dei, i gat janis i stap yet blong ol man blong hem oli go spel, long sem fasin ya we hem i spel long wok blong hem bifo, long namba seven dei.” (Hib. 4:8, 9) ‘Ol man blong God’ we Pol i tokbaot, hemia ol Kristin. ?Olsem wanem? ?Pol i stap talem se ol Kristin oli save joen wetem God long spel blong hem? !Yes, ol Kristin we oli kamaot long laen blong Isrel, mo ol Kristin blong ol narafala laen tu, oli save joen wetem hem long spel ya!

Sam Kristin Oli No Kasem Spel Ya

13, 14. (a) ?Long taem blong Moses, ol man we oli wantem joen wetem God long spel blong hem, oli mas mekem wanem? (b) ?Long taem blong ol fas Kristin, ol man we oli wantem joen wetem God long spel blong hem, oli mas mekem wanem?

¹³ Pol i raetem leta long ol Hibru Kristin, from we sam long olgeta oli no stap wok folem stamba tingting blong God. (Ridim Hibrus 4:1.) ?Oli stap mekem wanem? Oli stap folem yet sam haf blong Loa blong Moses. I tru, long ol 1,500 yia bifo long taem ya, ol man Isrel we oli wantem mekem God i glad, oli mas obei long Loa blong Moses. Be taem Jisas i ded, hem i tekemaot Loa ya. Sam Kristin oli no kasem save gud long samting ya, ale oli ting se oli mas gohed blong folem sam samting long Loa blong Moses.c

¹⁴ Pol i eksplenem long ol Hibru Kristin ya se hae pris Jisas i moa gud i winim ol narafala hae pris we oli sinman. Hem i eksplenem se niufala promes i moa gud i winim promes blong Loa blong Isrel. Mo hem i eksplenem tu se Haos Tapolen we God i stanemap, i moa gud i winim haos blong God we ‘ol man nomo oli stanemap.’ (Hib. 7:26-28; 8:7-10; 9:11, 12) Taswe, taem Pol i tokbaot janis we yumi gat blong joen wetem God long spel blong hem, ating hem i stap tingbaot Sabat dei we ol man oli holem evri wik folem Loa. Pol i raetem se: “I gat janis i stap yet blong ol man blong hem oli go spel, long sem fasin ya we hem i spel long wok blong hem bifo, long namba seven dei. Olgeta we bambae oli kasem spel ya, bambae oli save spel long ol wok blong olgeta, long sem fasin ya we God i spel long ol wok blong hem bifo.” (Hib. 4:8-10) Ol Hibru Kristin ya oli mas sakemaot tingting ya se oli save mekem Jehova i glad sipos oli mekem ol wok blong Loa blong Moses. Stat long lafet blong Pentekos long yia 33 K.T.,d sipos man i bilif long Jisas Kraes, hemia nao samting we i mekem God i glad.

15. ?Wanem i soemaot se yumi mas obei long Jehova sipos yumi wantem joen wetem hem long spel blong hem?

¹⁵ ?From wanem ol man Isrel oli no save go insaed long Promes Lan long taem blong Moses? From we oli no obei long Jehova. ?From wanem sam Kristin long taem blong Pol oli no save joen wetem God long spel blong hem? From sem risen ya—oli no obei long Jehova. Oli no wantem luksave se Loa i mekem wok blong hem finis, mo se naoia Jehova i wantem we oli mekem wosip long hem long defren fasin.

Tede Yumi Save Joen Wetem God Long Spel Blong Hem

16, 17. (a) ?Tede yumi mas mekem wanem blong joen wetem God long spel blong hem? (b) ?Long nekis stadi, bambae yumi tokbaot wanem?

¹⁶ Ol tru Kristin tede oli no ting se oli mas folem Loa blong Moses blong oli save kasem laef. Ol tok we tabu spirit i pulum Pol blong raetem long ol Kristin long Efesas, i klia nomo. Hem i talem se: “God i givhan long yufala long gladhat blong hem, i sevem yufala, from we yufala i bilif long Kraes. Be ol samting ya i no kamaot long yufala, mo i no from ol samting we yufala i mekem. Hem i kamaot long God nomo, olsem wan samting we hem i givim i go nomo long yufala, blong bambae i no gat wan long yufala we i save tok flas from.” (Efes. 2:8, 9) Taswe, ?ol Kristin tede oli mas mekem wanem blong joen wetem God long spel blong hem? Yu mas tingbaot se Jehova i makemaot namba seven dei we hem i spel long hem, blong i mekem stamba tingting blong hem long saed blong wol ya i kamtru fulwan. Hem i yusum ogenaesesen blong hem blong tijim yumi long saed blong stamba tingting blong hem, mo blong talem long yumi se hem i wantem we yumi mekem wanem. Yumi save joen wetem Jehova long spel blong hem sipos yumi obei long hem mo ogenaesesen blong hem.

¹⁷ Be sipos yumi no obei long slef we i stret mo waes, mo sipos yumi obei long samting we yumi nomo yumi ting se i impoten, yumi stap go agensem stamba tingting blong Jehova. Sipos yumi go agensem stamba tingting blong Jehova, yumi no fren blong hem. Long nekis stadi, bambae yumi tokbaot sam samting we oli save kamaot long laef blong yumi, we oli givim janis long yumi blong soemaot se yumi rere blong obei long God no nogat. Bambae yumi luk se desisen we yumi mekem long taem ya, i save soemaot sipos yumi joen wetem God long spel blong hem.

[Ol futnot]

Ol Kwestin Blong Tingbaot

• ?God i wantem yusum namba seven dei blong mekem wanem?

• ?Wanem i soemaot se namba seven dei ya i stap gohed yet?

• ?Wanem i mekem se ol man Isrel long taem blong Moses, mo sam long ol fas Kristin, oli no joen wetem God long spel blong hem?

• ?Tede yumi mas mekem wanem blong joen wetem God long spel blong hem?

[Tok blong makem poen long pej 27]

Yumi save joen wetem Jehova long spel blong hem sipos yumi obei long hem mo ogenaesesen blong hem

[Tok blong pija long pej 26, 27]

?Wanem samting we man i mas mekem bifo mo tede tu, sipos hem i wantem joen wetem God long spel blong hem?