Yu Mas Glad Long Ol Tok Blong Jehova

 1. (1) ?Wanem ol defdefren samting we ol man oli mekem taem oli kasem advaes? ?From wanem? (2) ?Man we i praod hem i mekem wanem taem i kasem advaes?

OL MAN oli mekem samting i defdefren. Sipos wan haeman i givim wan advaes, maet oli glad long hem, be maet oli no glad sipos wan man olbaot i givim advaes ya. Sam man oli sore, oli harem nogud, no oli sem taem oli kasem advaes no tok blong stretem olgeta. Be sam narafala oli harem se ol tok ya oli mekem tingting blong olgeta i kam strong, mo oli wantem kam gud moa. ?From wanem oli gat ol defdefren tingting olsem? Wan risen hemia fasin praod. Taem man i praod, hem i ting se advaes we hem i kasem i no stret long hem, ale hem i sakemaot advaes ya, nao hem i mestem gudfala tijing we i save kamaot from advaes ya.—Prov. 16:18.

 2. ?From wanem ol tru Kristin oli tinghae long ol advaes long Tok blong God?

² Yumi ol tru Kristin yumi mekem i defren. Yumi tinghae long ol gudfala advaes, antap moa sipos ol advaes ya oli kamaot long Tok blong God. Ol tok blong Jehova oli givhan long yumi blong luksave ol samting we oli no stret mo we oli save spolem yumi. Sam long ol samting ya, hemia fasin blong ronem ol sas samting, nogud fasin blong man wetem woman, mo fasin blong yusum ol drag mo strong dring bitim mak. (Prov. 20:1; 2 Kor. 7:1; 1 Tes. 4:3-5; 1 Tim. 6:6-11) Mo taem yumi obei long ol tok blong God, yumi glad.—Aes. 65:14.

 3. ?Wanem tingting blong man blong raetem Sam, we yumi save folem?

³ Sipos yumi wantem gohed blong fren gud wetem Papa blong yumi long heven, yumi mas gohed blong folem ol waes advaes blong hem. Yumi mas gat sem tingting olsem man blong raetem Sam, we i raetem se: “Ol rul we yu yu mekem, bambae oli rul blong mi oltaem nomo. Oltaem oli stap mekem tingting blong mi i glad tumas.” (Sam 119:111) ?Yu tu yu glad blong obei long ol loa blong Jehova? ?No samtaem yu luk se i had tumas blong yu obei long olgeta? Nating sipos samtaem yu no glad tumas long sam advaes, be yu no mas harem nogud. Yu mas save se taem yu obei long ol loa blong God, hemia bambae i mekem i gud long yu oltaem. Bambae yumi tokbaot tri rod blong mekem olsem.

 4. ?Wanem samting long laef blong Deved we i no jenis nating?

⁴ King Deved i kasem plante gudfala samting mo plante trabol long laef blong hem, be i gat wan samting long laef blong hem we i no jenis nating. Hem i trastem fulwan God ya we i mekem hem. Hem i talem se: “Hae God, yu yu God blong mi. Mi mi stap prea long yu nomo, mo mi trastem yu oltaem.” (Sam 25:1, 2) ?Wanem i givhan long Deved blong i trastem Papa blong hem long heven?

5, 6. ?Ol prea blong Deved oli soemaot wanem?

⁵ Plante man oli prea long God taem oli kasem trabol nomo. Oli olsem wan fren we i toktok long yu taem hem i nidim mane no i wantem blong yu mekem wan samting blong hem. Afta we sam taem i pas, maet yu stat blong askem sipos fren ya i lavem yu tru. Be fasin fren blong Deved wetem Jehova i no olsem. Long laef blong Deved, nomata long gud taem no trabol taem, hem i soemaot long ol prea blong hem se hem i lavem Jehova tumas mo i trastem hem.—Sam 40:8.

⁶ I gud yumi makem tok blong Deved taem hem i presem Jehova mo i talem tangkiu long hem. Hem i talem se: “Hae God. Yu yu Masta blong mifala. Olgeta man long evri ples long wol oli save luk bigfala paoa blong yu. Yu yu King, mo hae nem blong yu i finisim olgeta ples long heven.” (Sam 8:1) Taem yumi ridim tok ya, yumi haremsave se fasin fren blong Deved wetem Papa blong hem long heven, i strong we i strong. Deved i tinghae long bigfala paoa blong Jehova, mo hemia i pusum hem blong i presem Jehova “evri dei.”—Sam 35:28.

 7. ?Wanem i hapen taem yumi prea long Jehova oltaem?

⁷ Olsem Deved, yumi mas toktok long Jehova oltaem blong yumi save trastem hem moa. Baebol i talem se: “Yufala i mas stap klosap long God, nao hem bambae i kam stap klosap long yufala.” (Jem. 4:8) Taem yumi prea long Jehova, yumi kam klosap moa long hem, mo yumi save kasem tabu spirit blong hem.—Ridim 1 Jon 3:22.

 8. ?From wanem yumi no mas talem sem toktok bakegen mo bakegen taem yumi prea?

⁸ Taem yu prea, ?yu stap talem ol sem toktok bakegen mo bakegen? Sipos yes, i gud we bifo yu prea, yu spenem smoltaem blong tingbaot samting we yu wantem talem. Sipos yu luk wan fren blong yu, mo yu ripitim ol sem toktok long hem bakegen mo bakegen, ?yu ting se bambae hem i harem olsem wanem? Ating bambae hem i no moa wantem lesin long yu. I tru se Jehova bambae i lesin oltaem long prea we yumi mekem wetem fulhat blong yumi. Be yumi mas traehad blong no talem sem samting bakegen mo bakegen taem yumi prea.

9, 10. (1) ?Yumi save tokbaot wanem bakegen long ol prea blong yumi? (2) ?Wanem i save mekem ol prea blong yumi i kam gud moa?

⁹ I klia se sipos yumi wantem kam klosap long God, prea blong yumi i mas dip. Moa we yumi talemaot ol tingting mo ol filing blong yumi, moa we bambae yumi trastem Jehova. ?Yumi save tokbaot wanem bakegen long ol prea blong yumi? Baebol i ansa se: “I gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.” (Fil. 4:6) I stret blong yumi tokbaot eni samting we i joen wetem fasin fren blong yumi wetem God, no i joen wetem laef blong yumi.

¹⁰ Yumi save lanem plante samting long prea blong ol gudfala man mo woman we i stap long Baebol. (1 Saml. 1:10, 11; Wok 4:24-31) Long buk blong Ol Sam, i gat plante prea mo singsing we ol man oli mekem taem oli gat ol defdefren filing, olsem oli harem nogud no oli glad tumas. Taem yumi stadi gud long ol prea ya, bambae ol prea blong yumi oli kam gud moa.

11. ?From wanem yumi mas tingting dip long ol advaes blong God?

¹¹ Deved i talem se: “Ol tok we Hae God i putum, yumi save bilif long hem, mo i stap givim waes long olgeta we oli no waes.” (Sam 19:7) Taswe, nating sipos yumi no waes, be taem yumi obei long ol loa blong Jehova, yumi save kam waes. Be i gat sam advaes blong Baebol we yumi mas tingting dip long olgeta, sipos yumi wantem holemstrong long God. Taem yumi tingting dip long ol rul blong Baebol, bambae yumi no foldaon taem ol narafala long skul no long wok oli pulum yumi blong mekem samting we i no stret. Hem i save givhan long yumi tu blong obei long loa ya blong God long saed blong blad mo blong no joen long wol. Mo blong yumi folem ol rul blong Baebol taem yumi jusum ol klos blong yumi. Taem yumi tingting dip long ol advaes blong God, hemia bambae i mekem yumi rere gud from ol samting olsem. Biaen, yumi save jusum samting we bambae yumi mekem, sipos wan dei yumi fesem wan long ol samting ya. Fasin blong rere gud fastaem i save givhan long yumi blong yumi no mekem ol mastik we yumi save harem nogud from.—Prov. 15:28.

12. ?Wanem ol kwestin we yumi mas tingting dip long olgeta?

¹² Taem yumi stap wet blong ol promes blong God oli kamtru, ?yumi soemaot se yumi bilif strong long ol promes ya? ?Mo yumi soemaot se impoten samting long laef blong yumi, hemia samting we God i wantem? ?Yumi rili bilif se klosap nao Bigfala Babilon i lus? ?Yumi bilif strong yet long ol blesing we bambae oli kamaot long fiuja, olsem laef we i no save finis long paradaes long wol mo laef bakegen long ded? ?Yumi gohed yet blong wok strong long wok blong prij, no yumi mekem prapa bisnes blong yumi fastaem? ?Samting we Jehova bambae i mekem blong leftemap nem mo hae rul blong hem, i impoten yet long tingting blong yumi? Sipos yumi tingting dip long ol kwestin olsem, bambae yumi mekem se ‘ol rul ya oli blong yumi oltaem.’—Sam 119:111.

13. ?From wanem i had blong ol man blong Jisas oli kasem save long sam samting? Talem sam eksampol.

¹³ I gat sam samting long Baebol we yumi no kasem save gud long olgeta naoia, from we i no stret taem yet blong Jehova i eksplenem long yumi. Jisas i talem bakegen mo bakegen long ol aposol blong hem se bambae ol man oli mekem hem i harem nogud mo oli kilim hem i ded. (Ridim Matiu 12:40; 16:21.) Be ol aposol oli no kasem save long tok blong hem. Oli jes kasem save afta nomo taem Jisas i laef bakegen, i kamtru long olgeta, mo i givhan long olgeta blong oli kasem save long ol profet tok long saed blong Kraes. (Luk 24:44-46; Wok 1:3) Mo ol man blong Jisas oli no kasem save se Kingdom blong God bambae i stap long heven. Oli jes kasem save long dei blong Pentekos long yia 33, taem oli kasem tabu spirit.—Wok 1:6-8.

14. ?Wanem gudfala eksampol we ol tru Kristin oli soemaot?

¹⁴ Long sem fasin, long stat blong ol yia 1900, ol tru Kristin oli gat rong tingting long saed blong ol las dei. (2 Tim. 3:1) Long 1914, samfala oli ting se klosap nao bambae oli go long heven, be samting ya i no kamtru. Ol Kristin ya oli gohed blong stadi long ol tok blong Baebol, nao oli kasem save se i gat bigfala wok blong talemaot gud nius i stap yet. (Mak 13:10) Taswe long 1922, J.F. Rutherford we i lidim wok blong prij long taem ya, i talem long ol man we oli stap long wan bigfala asembli long Amerika, se: “!Yufala i luk, King i stap rul finis! Yufala nao i man we hem i yusum blong talemaot hem long olgeta man. Taswe talemaot, talemaot, talemaot, King ya mo kingdom blong hem.” Stat long taem ya, ol man oli save se ol man blong Jehova oli stap “talemaot gud nius” blong Kingdom.—Mat. 4:23; 24:14.

15. ?From wanem i gud blong yumi tingting dip long ol samting we Jehova i mekem long ol man blong hem?

¹⁵ I gud blong yumi tingting dip long ol nambawan samting we Jehova i mekem long ol man blong hem bifo mo tede tu. Hemia i givhan long yumi blong trastem hem moa se hem i naf blong mekem samting we hem i wantem i kamtru. Taem yumi tingting dip long ol promes blong God, hemia i givhan long yumi blong yumi glad long ol promes ya, mo blong yumi trastem moa se bambae oli kamtru.

16. ?Wanem blesing i kamaot taem yumi wok strong long wok blong God?

¹⁶ Jehova i wan God we i stap wok oltaem. Man blong raetem Sam i talem se: ‘Hae God. Yu gat olgeta paoa. I no gat wan man nating we i strong olsem yu.’ Mo i talem bakegen se: “Paoa blong yu i bigwan tumas.” (Sam 89:8, 13) God i stap wok oltaem, taswe hem i tinghae long ol wok blong yumi, mo hem i blesem yumi. Hem i luk se ol man blong wok blong hem, ol man mo ol woman, ol yangfala mo ol olfala, oli no les be oli stap wok strong. (Prov. 31:27) Taem yumi bisi long wok blong God, yumi stap folem fasin blong hem. Taem yumi mekem bes blong yumi long wok blong God, yumi glad mo hem tu i glad.—Ridim Ol Sam 62:12.

17, 18. Taem yumi wosip long Jehova, ?olsem wanem samting ya i givhan long yumi blong trastem hem? Talem wan eksampol.

¹⁷ Taem yumi wosip long Jehova, ?olsem wanem samting ya i givhan long yumi blong trastem hem? Yumi traem tingbaot ol man Isrel taem oli rere blong go insaed long Promes Lan. Jehova i talem long ol pris we oli stap karem bokis blong kontrak, se oli mas wokbaot i go insaed long Jodan Reva. Be taem ol man Isrel oli go klosap long reva ya, oli luk se reva ya i fulap mo i ron strong from we hem i taem blong ren. ?Bambae oli mekem wanem? ?Bambae oli putum ol haos tapolen blong olgeta long saed blong reva ya fastaem, blong wet se wota i godaon? Nogat. Oli trastem Jehova fulwan mo oli mekem samting we hem i talem. ?Wanem samting i kamaot from? Baebol i talem se: “Long semtaem ya we ol pris ya oli purumbut long wota, wota ya i no moa ron. . . . Ol pris ya oli stap stanap long medel blong ples ya we i drae finis, gogo kasem we olgeta man ya evriwan oli gokros.” (Jos. 3:12-17) !Traem tingbaot olsem wanem oli glad tumas taem oli luk se wota ya we i ron strong, i stop! Bilif blong olgeta i kam strong moa from we oli trastem ol tok blong Jehova.

¹⁸ I tru se tede, Jehova i no mekem ol merikel olsem blong givhan long ol man blong hem. Be hem i blesem yumi taem yumi trastem hem mo yumi mekem samting we hem i talem. Tabu spirit blong God i givhan long yumi blong yumi mekem wok ya blong talemaot Kingdom long olgeta ples long wol. Mo Jisas Kraes we i faswan Witnes blong Jehova, i promes long ol disaepol blong hem se bambae hem i givhan long olgeta blong mekem impoten wok ya. Hem i talem se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi.” Mo hem i promes long olgeta se: “Bambae mi stap wetem yufala oltaem, gogo wol ya i finis.” (Mat. 28:19, 20) Plante Witnes we fastaem oli stap sem no oli fraet, oli talem se tabu spirit blong God i mekem tingting blong olgeta i strong blong prij long ol man we oli no save olgeta.—Ridim Ol Sam 119:46; 2 Korin 4:7.

19. Nating sipos yumi no moa save mekem plante wok, ?be wanem samting we yumi save gud?

¹⁹ Sam brata mo sista oli sik bigwan no oli kam olfala, ale oli no moa save mekem plante wok. Nating se i olsem, oli save gud se ‘Papa blong yumi we i gat sore, mo we i stamba blong fasin blong givhan,’ i kasem save long samting we i stap hapen long laef blong olgeta. (2 Kor. 1:3) Hem i tinghae long olgeta samting we yumi mekem long wok blong hem. Yumi evriwan i mas tingbaot se God bambae i sevem yumi sipos yumi bilif long sakrefaes blong Jisas.—Hib. 10:39.

20, 21. ?Wanem sam rod blong soemaot se yumi trastem Jehova?

²⁰ Yumi yusum taem, paoa, mo olting blong yumi blong wosipim Jehova. Yumi wantem mekem bes blong yumi long wok blong prij. (2 Tim. 4:5) Yumi glad blong givhan long ol narafala blong oli “save trutok.” (1 Tim. 2:4) I klia se taem yumi ona mo yumi presem Jehova, yumi kasem plante gudfala samting we oli mekem bilif blong yumi i strong. (Prov. 10:22) Mo samting ya i givhan long yumi blong trastem moa Jehova, nomata wanem samting i hapen.—Rom 8:35-39.

²¹ Olsem we yumi luk finis, yumi mas traehad blong gat fasin ya blong trastem Jehova. Taswe, i gud yu prea blong yu save trastem Jehova moa. Yu mas tingting dip long ol samting we Jehova i mekem finis bifo, mo ol samting we bambae hem i mekem i no longtaem. Mo yu mas gohed blong trastem hem taem yu mekem wosip long hem. Yu mas tingbaot se ol tok blong Jehova bambae oli stap gogo i no save finis. !Mo sipos yu obei long ol tok ya, yu save kasem laef we i no save finis!