Laef Bakegen—!Wan Trufala Hop!

1-2. ?Ol man blong Jehova oli gat wanem nambawan hop?

HOP i impoten tumas. Sam man oli hop blong gat wan gudfala mared, gat ol helti pikinini, o kamgud bakegen long wan bigfala sik. Maet yumi ol Kristin tu i gat ol hop ya. Be yumi gat hop blong wan samting we i gud moa, hemia laef olwe long fiuja mo luk bakegen ol famle blong yumi we oli ded.

² Aposol Pol i talem se: “Hop blong mi i stap long God, se ol man we oli stret wetem ol man we oli no stret bambae oli laef bakegen.” (Wok 24:15) Pol i no faswan blong tokbaot hop blong laef bakegen. Olfala Job tu i tokbaot. Hem i sua fulwan se God bambae i rimemba hem mo i mekem hem i laef bakegen.—Job 14:7-10, 12-15.

 3. ?Olsem wanem 1 Korin japta 15 i save halpem yumi?

³ “Laef bakegen long ded” i haf blong “fandesen,” o “stamba tijing,” blong bilif blong ol Kristin. (Hib. 6:1, 2) Pol i tokbaot laef bakegen long 1 Korin japta 15. I sua se tok blong hem i enkarejem ol fas Kristin. Mo japta ya i save enkarejem yumi mo mekem hop blong yumi i kam strong moa.

 4. ?From wanem yumi bilif se olgeta we oli ded bambae oli laef bakegen?

⁴ Laef bakegen blong Jisas Kraes, hemia nao ki blong hop blong yumi long saed blong ol famle we oli ded. Mo hemia i joen tu long “gud nius” we Pol i talemaot long ol man Korin. (1 Kor. 15:1, 2) Yes, hem i talem se sipos wan Kristin i no bilif se Kraes i laef bakegen, bilif blong hem i blong nating nomo. (1 Kor. 15:17) Bilif long laef bakegen blong Jisas i stamba blong Kristin hop ya blong yumi.

5-6. ?Ol tok long 1 Korin 15:3, 4 oli minim wanem long yumi?

⁵ Taem Pol i stat blong tokbaot laef bakegen, hem i makem tri trutok. Ol trutok ya, hemia (1) “Kraes i ded from sin blong yumi.” (2) “Oli berem hem.” (3) “Long namba 3 dei hem i laef bakegen olsem we Ol Tok Blong Baebol oli talem.”—Ridim 1 Korin 15:3, 4.

⁶ ?Ded blong Jisas, taem we oli berem hem, mo laef bakegen blong hem, oli minim wanem long yumi? Profet Aesea i bin talemaot se bambae “oli aotem [Mesaea] long ples blong ol man we oli laef,” mo “oli givim wan ples blong berem hem wetem ol rabis man.” Be i gat wan moa samting we bambae i hapen. Aesea i talem tu se Mesaea bambae i “karem sin blong plante man.” Jisas i mekem olsem taem i givim laef blong hem olsem ransom. (Aes. 53:8, 9, 12; Mat. 20:28; Rom 5:8) Taswe ded blong Jisas, taem we oli berem hem, mo laef bakegen blong hem, oli mekem yumi sua long hop ya blong kam fri long sin mo ded, mo luk bakegen ol famle we oli ded finis.

7-8. ?Wanem i halpem ol Kristin blong bilif fulwan se Jisas i laef bakegen?

⁷ Hop blong yumi long laef bakegen i joen wetem laef bakegen blong Jisas, taswe yumi mas bilif fulwan se Jisas i bin laef bakegen. ?From wanem yumi save bilif se Jehova i mekem Jisas i laef bakegen?

⁸ I gat plante man we oli bin luk Jisas i laef bakegen, mo oli talemaot long ol narafala. (1 Kor. 15:5-7) Pol i tokbaot faswan man we i witnesem samting ya, hemia aposol Pita (Kefas). Wan grup blong aposol tu oli talem se Pita i luk Jisas we i laef bakegen. (Luk 24:33, 34) Mo tu, ol twelef aposol oli luk Jisas afta we hem i laef bakegen. Biaen Kraes “i kamtru long bitim 500 brata long sem taem nomo,” maet hemia long gudfala miting long Galili we Matiu 28:16-20 i tokbaot. Mo tu Jisas i “kamtru long Jemes,” we i haf brata blong hem, we bifo hem i no bilif se Jisas i Mesaea. (Jon 7:5) Afta we Jemes i luk Jisas i laef bakegen, hem i bilif fulwan. Makem se, samwe long 55 K.T. taem Pol i raetem leta ya, plante man we oli luk Jisas i laef bakegen, oli laef yet long taem ya, taswe sipos i gat sam man we oli no bilif, oli save askem long ol witnes ya.

 9. Folem Ol Wok 9:3-5, ?olsem wanem Pol i givim moa pruf se Jisas i laef bakegen?

⁹ Biaen, Jisas i kamtru stret long Pol. (1 Kor. 15:8) Pol (Sol) i stap go long Damaskes taem hem i harem voes blong Jisas ya we i laef bakegen, mo long wan vison, hem i luk Jisas long heven. (Ridim Ol Wok 9:3-5.) Ekspiriens ya blong Pol i givim moa pruf se Jisas i laef bakegen, mo hemia i no wan giaman stori.—Wok 26:12-15.

10. From we Pol i bilif se Jisas i laef bakegen, ?hem i mekem wanem?

¹⁰ Sam man bambae oli intres tumas long samting we Pol i talem, from we bifo, hem i stap ronem mo kilim ol Kristin. Afta we Pol i bilif se Jisas i laef bakegen, hem i wok strong blong pulum ol narafala blong oli bilif long trutok ya. Hem i gotru long plante trabol, oli kilim hem, oli sakem hem long kalabus, mo i stap long wan sip we i rek, taem hem i stap talemaot trutok ya se Jisas i bin ded mo naoia hem i laef bakegen. (1 Kor. 15:9-11; 2 Kor. 11:23-27) Pol i bilif fulwan se Jisas i laef bakegen, taswe hem i no fraet blong ded from bilif ya blong hem. ?Olsem wanem? ?Ol tok blong ol Kristin ya, oli mekem yu yu bilif fulwan se Jisas i laef bakegen? ?Mo i mekem bilif blong yu long laef bakegen i kam strong moa?

11. ?From wanem sam long Korin oli save gat rong tingting long saed blong laef bakegen?

¹¹ Sam man long taon blong Korin oli gat rong tingting long saed blong laef bakegen, mo oli talem tu se “ol dedman oli no save laef bakegen.” ?From wanem? (1 Kor. 15:12) Ol waes man blong Gris long Atens, oli jikim tingting ya se Jisas i laef bakegen. Hemia i save spolem sam Kristin long Korin. (Wok 17:18, 31, 32) Sam narafala, maet oli ting se laef bakegen i wan pijatok nomo, blong minim se man i “ded” long sin, be i “laef bakegen” olsem wan Kristin. Nating se oli gat wanem tingting, bilif blong olgeta i blong nating nomo from we oli no bilif long laef bakegen. Sipos God i no mekem Jisas i laef bakegen, bambae i no gat ransom, mo bambae God i neva fogivim ol sin blong yumi. Taswe olgeta we oli no bilif long laef bakegen, oli no gat trufala hop.—1 Kor. 15:13-19; Hib. 9:12, 14.

12. Folem 1 Pita 3:18, 22, ?olsem wanem laef bakegen blong Jisas i defren long ol narawan?

¹² Pol hem wan i save se “Kraes ya i laef bakegen finis.” Laef bakegen ya blong Jisas i gud moa long hemia blong sam man we oli bin laef bakegen, be biaen oli ded bakegen. Pol i talem se Jisas i “faswan blong laef bakegen, hem i olsem fasfrut blong garen.” ?Olsem wanem Jisas i faswan? Hem i faswan man blong laef bakegen long wan bodi we i spirit mo i faswan man blong go long heven.—1 Kor. 15:20; Wok 26:23; ridim 1 Pita 3:18, 22.

13. ?Olsem wanem Pol i skelem Adam mo Jisas?

¹³ ?Olsem wanem ded blong wan man nomo i save givim laef long plante milian man? Pol i eksplenem gud ansa blong kwestin ya. Hem i skelem olsem wanem samting we i kamaot long Adam, i defren long wanem we i save kamaot long Kraes. Long saed blong Adam, Pol i se: “Wan man nomo i mekem se ded i kasem olgeta man.” Taem Adam i sin, hem i mekem ded i kasem hem mo ol pikinini blong hem. Tede yumi stap safa yet from fasin blong hem blong no obei. !Be samting we i kamaot taem God i mekem Pikinini blong hem i laef bakegen, i defren olgeta! Yes, tru long Jisas, “olgeta dedman oli save laef bakegen.” Taswe Pol i talem se: “Olgeta man we oli joen long Adam oli ded. Long sem fasin, olgeta man we oli joen long Kraes bambae oli laef bakegen.”—1 Kor. 15:21, 22.

14. ?From wanem bambae Adam i no laef bakegen?

¹⁴ ?Pol i minim wanem taem hem i se “olgeta man we oli joen long Adam oli ded”? Pol i stap tokbaot olgeta man we oli kamaot biaen long Adam, evriwan i sinman mo oli no stret gud, mo oli stap blong ded nomo. (Rom 5:12) Adam i no stap long lis blong ol man we “bambae oli laef bakegen.” Ransom blong Kraes i no kavremap Adam, from we hem i stret gud be i jusum blong no obei long God. Samting we i hapen long Adam, bambae i sem mak long olgeta we “Pikinini blong man” i jajem olgeta se oli “nani,” hemia i min se “bambae oli kasem ded we i blong olwe.”—Mat. 25:31-33, 46; Hib. 5:9.

15. ?Hu ya “olgeta man” we “bambae oli laef bakegen”?

¹⁵ Makem we Pol i se “olgeta man we oli joen long Kraes bambae oli laef bakegen.” (1 Kor. 15:22) Pol i raetem leta ya i go long ol tabu Kristin long Korin, we bambae oli laef bakegen long heven. Ol Kristin ya, ‘God i mekem olgeta oli tabu, blong oli save mekem wok olsem ol disaepol blong Kraes Jisas.’ Mo Pol i tokbaot “olgeta ya tu we oli joen long Kraes be oli stap slip long ded.” (1 Kor. 1:2; 15:18; 2 Kor. 5:17) Long wan narafala leta, Pol i talem long olgeta we oli “ded olsem [Jisas]” se bambae oli ‘laef bakegen tu olsem Kraes, nao long fasin ya, oli joen wetem Kraes.’ (Rom 6:3-5) Jisas i laef bakegen long wan spirit bodi mo i go long heven. Mo hemia semfala samting we bambae i hapen long olgeta tabu Kristin we oli “joen long Kraes.”

16. Taem Pol i talem se Jisas i olsem “fasfrut,” ?hem i minim wanem?

¹⁶ Pol i talem se “long olgeta we oli stap slip long ded, [Kraes] i faswan blong laef bakegen, hem i olsem fasfrut blong garen.” Tingbaot se ol narafala, olsem Lasaros, oli bin laef bakegen long wol ya, be Jisas i faswan blong laef bakegen long wan spirit bodi mo i kasem laef ya we i no save finis. Hem i olsem fasfrut blong garen we ol man Isrel oli stap givim long God. Mo tu, taem Pol i talem se Jisas i olsem “fasfrut,” hem i stap minim se i gat ol narafala we bambae oli laef bakegen blong go long heven. Long stret taem, ol aposol mo ol narafala we “oli joen long Kraes” bambae oli kasem sem ekspiriens ya olsem Jisas.

17. ?Wetaem olgeta we “oli joen wetem Kraes” oli kasem pei blong olgeta long heven?

¹⁷ Olgeta ya we oli “joen long Kraes” oli no laef bakegen yet taem Pol i raet i go long ol Kristin long Korin. Be, Pol i talem se samting ya bambae i hapen long fiuja: “Olgeta wanwan bambae oli laef bakegen, be long oda: Faswan, hemia Kraes we i olsem fasfrut blong garen, mo biaen, olgeta man blong Kraes bambae oli laef bakegen long taem we hem i stap.” (1 Kor. 15:23; 1 Tes. 4:15, 16) Tede yumi laef long taem ya we “[Kraes] i stap” olsem profet tok i talem. Ol aposol mo ol narafala tabu kristin we oli ded finis, oli mas wet go kasem taem ya blong oli ‘laef bakegen olsem Jisas, nao long fasin ya, oli joen wetem hem’ mo kasem pei blong olgeta long heven.

18. (1) ?From wanem yumi save talem se bambae i gat wan narafala laef bakegen? (2) Olsem 1 Korin 15:24-26 i soem, ?wanem samting bambae i hapen long heven?

¹⁸ ?Olsem wanem long olgeta Kristin we oli no gat hop blong laef long heven wetem Kraes? Olgeta tu oli gat hop blong laef bakegen. Baebol i talem se Pol i stap tu wetem olgeta ya “we oli faswan blong laef bakegen.” (Fil. 3:11) Hemia i soem se bambae i gat wan narafala laef bakegen. Hemia i laenap wetem tok we Job i talem long saed blong fiuja blong hem. (Job 14:15) ‘Olgeta man blong Kraes we oli laef bakegen long taem we hem i stap,’ bambae oli stap long heven wetem Jisas taem hem i spolem olgeta gavman mo olgeta haeman mo olgeta we oli gat paoa. Mo tu, bambae hem i finisim “laswan enemi, hemia ded.” Yes, ded bambae i no moa gat paoa long olgeta ya we oli go laef long heven. ?Be olsem wanem long ol narafala man?—Ridim 1 Korin 15:24-26.

19. ?Wanem bambae i hapen long olgeta we bambae oli laef long wol ya?

¹⁹ ?Wanem bambae i hapen long olgeta we bambae oli laef long wol ya? Ansa i kamaot long tok ya blong Pol we i se: “Hop blong mi . . . se ol man we oli stret wetem ol man we oli no stret bambae oli laef bakegen.” (Wok 24:15) I klia se ol man we oli no stret oli no save go long heven, taswe ol tok ya i soem se bambae i gat laef bakegen long wol ya.

20. ?Olsem wanem hop blong yu long laef bakegen i kam strong moa?

²⁰ !I sua se “bambae [i gat] laef bakegen”! Olgeta we oli laef bakegen bambae oli laef foreva long wol ya. Yu save trastem promes ya. Tok ya i save mekem yu haremgud taem yu tingbaot ol famle blong yu we oli ded. Oli save laef bakegen long taem ya we Kraes wetem ol narafala oli “king mo oli rul . . . gogo 1,000 yia i pas.” (Rev. 20:6) Yu tu yu save trastem se sipos yu ded bifo we 1,000 yia i stat, be bambae yu gat hop ya blong laef bakegen. “Hop ya bambae i no mekem yumi harem nogud.” (Rom 5:5) Hop ya i save mekem yu yu strong naoia, mo i mekem yu glad long wok blong God. Be i gat plante samting we yumi save lanem yet long 1 Korin japta 15, mo nekis stadi bambae i tokbaot moa.