OL YANGFALA OLI ASKEM
?Boefren Mo Gelfren o Wan Gudfala Fren Nomo?—Pat 1: ?Hem i Givim Wanem Tingting Long Mi?
Yu laekem hem tumas, mo yu sua se hem i laekem yu tu. Yutufala i teks evri dei, mo taem evriwan oli joen wanples blong kakae, oltaem yu mo hem i storian gud tugeta. . . . Mo tu, sam mesej we hem i sanem long yu, oli soemaot klia se hem i laekem yu.
Ale yu mekem desisen blong askem long hem sipos hem i gat sem filing olsem yu. Ansa blong hem se: “Mi tingbaot yu olsem wan gudfala fren, hemia nomo.”
?Yu harem olsem wanem?
“!Mi kros we mi kros—mi kros long hem mo mi kros long mi wan! Evri dei, mitufala i teks, mo hem i soemaot se hem i laekem mi. Samting ya i mekem se mi gat filing long hem.”—Jasmine.
“Mi wetem wan gel, oltaem mitufala i folem wan narafala boe mo gel we tufala i stap fren, blong tufala i no stap tufala nomo. Sam samtaem i luk olsem se mitufala tu i boefren mo gelfren. Mitufala i storian plante, mo sloslo mitufala i stat blong teks. Mi harem nogud taem hem i talem long mi se hem i tingbaot mi olsem wan gudfala fren nomo, be hem i stap frenem wan narafala boe.”—Richard.
“Wan boe i stap teksem mi evri dei, mo samtaem mitufala tugeta i talem sam tok we i pulum filing blong mitufala. Be taem mi talemaot filing blong mi long hem, hem i laf mo i se: ‘!Mi no wantem frenem eniwan yet!’ Mi krae we mi krae.”—Tamara.
Stamba poen: Taem yu ting se narafala i laekem yu be yu faenemaot se hem i no gat filing long yu, yu kros, yu sem, mo yu harem se hem i giaman long yu. Wan boe we nem blong hem Steven, i talem se: “Taem samting ya i hapen long mi, tingting blong mi i foldaon mo mi harem nogud tumas. I tekem taem blong mi save trastem narafala bakegen.”
?From wanem i hapen olsem?
Fasin ya blong teksem narafala mo toktok long narafala tru long Intenet, i save mekem i isi blong yu laekem wan boe o gel we i no gat filing long yu. Hemia toktok blong sam yangfala.
“Maet wan boe i teksem yu from we hem i stap nating nomo, be yu save ting se hem i stap soemaot se hem i laekem yu. Mo sipos hem i teksem yu evri dei, yu save ting se yu yu spesel long hem.”—Jennifer.
“Maet wan boe i rili wantem faenem wan gelfren, be maet gel we hem i toktok wetem i jes wantem storian nomo, blong i lanem blong toktok isi wetem ol boe.”—James.
“Yu save ridim wan teks mesej we wan boe i talem ‘gud naet’ long yu, olsem we i wan mesej blong lav. Be maet boe ya i no gat filing nating long yu.”—Hailey.
“Sipos wan boe i sanem teks mesej we i putum wan smael fes long hem, hemia i save min se hem i kaen o i save min se hem i stap pulum filing blong yu. Samtaem yu save ting se hem i stap soemaot se hem i laekem yu.”—Alicia.
Stamba poen: Sipos wan boe o wan gel i tekem taem blong toktok long yu, yu no mas ting se hem i wantem frenem yu.
!I tru, i isi blong talem samting ya be i no isi blong mekem! Baebol i talem se: “Hat i save giaman i bitim eni narafala samting mo i denja bitim mak.” (Jeremaea 17:9) Hat i save mekem yu yu ting se wan boe o gel i laekem yu, be taem yu luksave se hemia tingting blong yu nomo, i olsem we bigfala wef i wasemaot wan hip blong sanbij we yu hivimap.
?Yu save mekem wanem?
No letem filing i pulum yu. Traem blokem filing blong yu mo skelem gud fasin fren we yu gat wetem boe ya o gel ya. Askem se: ‘?Mi luk wan strong risen blong ting se hem i mekem i moa gud long mi i bitim wanem we hem i mekem long ol narafala?’ Yu no mas letem filing i winim yu nao yu no moa ‘yusum gud tingting blong yu.’—Rom 12:1.
Yusum fasin luksave. Taem yu luk ol saen we oli mekem yu yu ting se hem i laekem yu, traem makem tu ol saen we oli mekem se yu no sua. Yu no mas ting se from we yu yu gat filing long hem, hem tu i gat filing long yu.
Longfala tingting. Wet blong hem i talem stret long yu se hem i wantem frenem yu. Go kasem taem ya, yu no mas putum tingting blong yu tumas long hem, yu mas rere blong lusum hem.
Tok stret. Baebol i talem se “i gat taem blong toktok.” (Prija 3:7) Sipos yu wantem faenemaot se hem i gat filing long yu o nogat, i gud yu tokbaot wetem hem. Wan gel we nem blong hem Valerie, i talem se: “Sipos hem i no gat sem filing olsem yu, i moa gud we yu harem nogud smol naoia i bitim we yu gohed plante manis wetem hem nao yu faenemaot se hem i no laekem yu.”
Stamba poen: Ol Proveb 4:23 i talem se: “Yu mas lukaot gud . . . long hat blong yu.” Sipos yu gat filing long narafala, faenemaot sipos hem i gat filing long yu. Sipos yu letem filing blong yu i kam strong bifo we yu faenemaot, i olsem we yu traem blong mekem wan plant i gru long ples we i ston.
Sipos yu faenemaot se hem i gat filing long yu, mo yu naf mo yu rere blong kam boefren o gelfren blong hem, i stap long yu nao blong mekem desisen ya. Yu no mas fogetem se blong gat wan gudfala mared, hasban mo waef i mas gat sem tingting blong wantem mekem Jehova i glad, mo tufala i mas tok tru oltaem long tufala. (1 Korin 7:39) Blong talem stret, long stat tufala i gudfala fren, mo tufala i gohed blong stap gudfala fren blong olwe.—Ol Proveb 5:18.