Stadi 11

Yusum Gudfala Toktok Evri Dei

 1. ?Wanem samting bambae i mekem se Jeova i haremgud long tok blong yumi?

¹ “Prea blong mi, we ol tok blong mi . . . bambae oli stret gud long fes blong yu [Jeova, NW].” (Sam 19:14) Blong samting ya i tru long saed blong yumi, yumi mas tokbaot ol samting we oli stret mo long wan fasin we i stret long wan man blong God. Evri dei yumi wantem se tok blong yumi i soemaot se yumi ol man blong holemstrong long God, i no long taem ya nomo we yumi stap long Haos Kingdom no taem yumi mekem wok blong prij. No gat. Sipos yumi yusum ol gudfala tok long haos, long ples blong wok, long skul, bambae yumi yusum ol gudfala tok long minista wok blong yumi tu.—2 Kor. 6:3.

2, 3. ?From wanem fasin blong toktok blong yumi mo fasin blong jusum ol tok i impoten?

² Fasin blong toktok blong yumi hem i impoten. Olsem fes mo voes blong yumi i impoten tu. Yumi mas soemaot long fes blong yumi se yumi stap glad olsem ol man blong Jeova. Fasin blong frengud wetem ol man mo wan smael i save pulum ol man i kam long yumi. I tru we yumi stap tokbaot ol trutok blong Baebol we ol man oli mas tinghevi long olgeta, be oli save mekem man i haremgud tu. !Taswe yumi mas glad blong toktok! Wan “strong fes” i no stret long mesej blong hop we yumi stap talemaot.

³ Taem yu savegud fasin blong gudfala toktok bambae yu luksave se ol defdefren tok mo ol toktok oli gat prapa “fasin blong olgeta.” Oli save mekem man i harem nogud no oli save mekem man i haremgud, man i save yusum blong tok slou no tok long bigfala voes, tok we i mekem fren no tok we i mekem enemi, tok i save leftemap tingting blong narafala man no i save daonem man. Taswe fasin blong jusum stret tok no toktok i impoten tumas. Samting ya i tru moa taem man i tokbaot trutok, mo gud nyus blong Kingdom.

 4. ?Olsem wanem yumi save lanem plante tok?

⁴ Lanem plante tok. Taem yu luk long wan diksonari bambae yu luksave se i gat plante tok we yu save yusum blong presem Jeova. Be kwestin se: ?Yu yu stap yusumgud ol tok ya? ?Taem yu rid yu stap jekemgud ol tok we yu no rili kasem save long hem, no maet yu raetemdaon olgeta blong faenem mining blong olgeta afta long riding? Samting ya bambae i givhan long yu blong lanem plante tok moa. Bambae yu faenemaot tu se i gat plante tok we yu luksave be yu no stap yusum evri dei taem yu toktok. Traehad blong yusum ol tok ya taem hem i stret taem blong mekem olsem. From we yu yu wan Kristin minista no wan studen, i impoten tumas we yu kamgud moa long fasin blong toktokgud.

5, 6. ?Wanem samting bambae i givhan long yumi blong yusumgud ol tok?

⁵ Lanem blong yusum ol stret tok. Maet tu tok i gat sem mining be taem oli yusum blong tokbaot ol defren samting, mining blong tufala i defren smol. Sipos yu luksave samting ya bambae yu no save tok nogud long ol man we oli stap lesin long yu, mo bambae fasin blong tok blong yu i stap kam klia moa. Yusum gudfala diksonari blong givhan long yu. Long sam diksonari evri tok we i stap, i gat ol narafala tok we oli stap aninit long olgeta, tok we i defren be i gat sem mining mo tok we mining i defren olgeta long tok we i stap finis. Nao yu faenemaot ol defren toktok we oli givim sem tingting, mo tu olsem wanem oli defren smol long saed blong mining. Samting ya bambae i givhan long yu bigwan taem yu stap traem faenem stret tok blong tokbaot sam samting. Fasin blong yusum ol stret toktok i givhan tu long yu blong yu no talem plante toktok we yu no rili nidim, mo i givhan long yu blong tokbaot poen ya nomo we yu wantem talem. Plante toktok i save kavremap ol tingting. Traem lanem blong no yusum plante toktok blong talemaot tingting blong yu. Taem yu gat gudhan blong mekem olsem, nao stat blong jenisim ol toktok, blong yu yusum ol tok we oli eksplenem gud samting mo mekem tok blong yu i moa gud mo i gat mining.

⁶ Taem yu stap lanem plante tok olsem, yu no mas tingting nomo long ol nyufala tok ya, be tingbaot ol tok we oli gat ol prapa fasin blong olgeta: ol tok (veb) blong talem samting we man i stap mekem ol tok (ajektiv) we oli givim gudfala pija long tingting; ol tok we oli joenem ol narafala tok blong mekem se man i glad blong lesin; ol tok we oli givim gudfala filing mo oli soemaot kaen fasin. Taem yu ridim ol buk blong Sosaeti yu save makem ol defren toktok mo ol fultoktok we yu save jusum blong yusum.

7, 8. ?Sipos yumi lanem plante tok, wanem samting yumi mas lukaotgud long hem?

⁷ Risen blong lanem ol plante tok, i no blong mekem flas from. Yumi wantem serem tingting wetem ol man, yumi no wantem pulum ol man we oli stap lesin long yumi blong oli leftemap yumi from ol toktok blong yumi. Tingting blong yumi i mas laenap wetem tok blong aposol Pol se: “Be long fes blong ol memba blong jyos, mi mi glad tumas blong talem faef wod nomo we oli kamaot long tingting blong mi, mo oli save tijim ol narafala man. Hemia i gud moa, i winim we mi talem ten taosen wod long ol narafala lanwis ya.” (1 Kor. 14:9, 19) Sipos tok blong wan man i hadwok tumas blong ol man oli haremsave i sem mak sipos hem i tok long wan narafala lanwis. Sem mak, i waes blong no yusum ol tok we yu no nidim sipos ol man oli no save kasem save long olgeta. Mo tu long tok we yumi stap talem evri dei yumi no mas traem blong mekem ol man we oli stap lesin long yumi oli sapraes long ol tok blong yumi mo long ol longfala toktok we yumi stap yusum. Hem i impoten se ol man we oli stap lesin long yumi oli kasem save long samting we yumi stap talem. Tingbaot, Proveb 15:2 i se, “Tang blong ol waes man i givim dip save.” Fasin blong yusum ol gudfala toktok, ol tok we man i haremsave, i givhan blong mekem se ol man oli haremgud long toktok blong yumi mo tok ya i wekemap tingting blong man, bitim tok we i no klia mo man i no intres long hem.—Kol. 4:6.

⁸ Hem i impoten tu blong lanem blong talemgud ol tok. Talemgud ol tok ya. Yu save jekemap long wan diksonari, mo tu yu save luk olsem wanem ol narafala man oli stap talem sam tok. Samting ya bambae i givhan long yu blong yu lukaotgud long fasin blong talemgud ol tok. Ol narafala samting we yu no save mekem evri dei taem yu toktok se slakmaot mo fasin blong no talem en blong ol tok. Yu no mas satem maot blong yu taem yu toktok. Mekem ol saon blong tok oli kamaot. Openem maot blong yu blong talemgud ol tok blong yu.

9-12. ?Wanem kaen toktok we yumi no mas yusum, mo from wanem?

⁹ Ol tok we yumi no mas talem. Tok blong God i soemaot long yumi wanem kaen tok yumi no mas talem long evri dei laef blong yumi. Aposol Pol i givim advaes long yumi, se yumi no mas talem “ol rabis tok, mo ol krangke tok, mo ol tok plei we i nogud.” (Efes. 5:3, 4) Yumi no mas yusum ol nogud tok mo ol doti tok. Pol i raetem tu, se: “Long ol toktok blong yufala, yufala i mas no talem ol rabis tok we i save spolem man. Yufala i mas talem ol gudfala tok, we i save mekem ol man we oli slak oli kam strong moa. Tok olsem i save givhan moa long ol man we oli harem.” (Efes. 4:29) Taswe ol Kristin oli no mas yusum ol tok swea mo ol doti tok. Sam man oli ting se ol tok olsem oli givim paoa long tok blong olgeta. Be no gat, i gat plante gudfala tok we oli save gat paoa. I no nid blong yumi yusum ol nogud toktok olsem ol man blong wol taem yumi toktok wetem olgeta. Ol tok we oli isi nomo oli save givhan long ol man, be hem i mas klin mo i stret.

¹⁰ Mo tu yumi no save yusum sam kaen tok no ol fasin blong tok we i no laenap wetem stret rul blong toktok. Ol tok olsem ol man blong pleplei long wol oli stap yusum no oli stap yusum long singsing blong olgeta tede. Ol man oli stap traem blong mekem olsem olgeta ya. Be i no stret long ol Kristin blong oli folem fasin ya blong toktok blong olgeta. Sipos yumi mekem olsem yumi stap soemaot se yumi blong wol ya mo ol fasin blong hem. Ol man blong drag mo ol narafala man we oli gat fasin blong brekem loa no ol rabis fasin long saed blong seks oli gat prapa toktok blong olgeta, oli yusum ol tok we i no klia long ol man we oli stap harem. Be fasin blong toktok blong yumi i no mas jenis blong folem ol fasin ya blong wol.—Rom 12:2.

¹¹ Ol Kristin oli mas lukaotgud blong oli no save yusum ol tok we oli no givim ona long God. Sam man oli yusum ol tok olsem “God” mo “Masta,” mo tu “Jisas” mo “Kraes” blong ademap long tok blong olgeta blong mekem i impoten, no tok we oli yusum blong tekem ples blong tok swea. Ol narafala tok olsem “gos,” “goli,” “ji,” oli olsem tok ya “God” mo “Jisas,” taswe ol tok ya tu oli no stret blong yusum.—Eks. 20:7; Mat. 5:34-37.

¹² Samtaem ol man oli talem sam samting no oli mekem sam samting we yumi save kros from. Sipos i olsem, i no stret blong wan Kristin i givimbak long fasin kros no i tok strong. Aposol i talem se: “Yufala i mas putumaot ol fasin ya, oli goaot long laef blong yufala. Bambae yufala i no kros. Bambae yufala i no man blong faerap long kros. Bambae yufala i no stap badfren long yufala. Bambae yufala i no tok agens long narafala man, mo yufala i no yusum ol doti tok.” (Kol. 3:8) Nating se tok blong ol narafala man oli save mekem yu yu kros, i waes blong bos long tingting blong yu.—Prov. 14:29; Jem. 3:11.

13-16. ?Wanem samting bambae i givhan long yumi blong kamgud moa long rul blong toktok mo fasin blong yumi blong toktok?

¹³ Stret rul blong toktok. Sam man oli luksave se toktok blong olgeta i no folemgud stret rul blong toktok. Maet from we oli gruap long wan narafala kantri no oli no gat ol gudfala jans blong gohed moa long skul taem oli yangfala. Tingting blong olgeta i no mas foldaon from; be, oli mas rili traehad blong kamgud moa, oli mekem olsem from gud nyus. I gat ol rod blong folem blong givhan long olgeta blong oli save mekem olsem. Eksampel, taem famle i mekem riding, samting ya i givim jans long olgeta blong oli stretem ol mastik ya. Yumi lanem plante samting long saed blong rul blong toktok taem yumi lesin long ol narafala man oli toktok. Taswe i gud blong lesingud taem wan brata we i bigman mo i skulgud i stap toktok. Taem yu ridim Baebol mo ol buk blong Sosaeti, tingtinggud long fasin we oli raetem fultoktok long hem mo ol tok we oli yusum long ol defren samting. Jenisim fasin blong tok blong yu blong i laenap wetem ol gudfala eksampel ya.

¹⁴ Taem ol yangfala oli stap go long skul oli mas traehad blong lanem ol gudfala rul blong toktok mo fasin blong talem klia ol toktok. Sipos yu no savegud from wanem i gat rul blong talem tok olsem no olsemia, askem long tija blong yu. Yu gat gudfala risen blong traehad long fasin ya, from we yu wantem kam wan minista blong gud nyus we yu karem frut long wok blong yu.

¹⁵ Traehad blong yusum gudfala toktok evri dei. Man we i no kea long fasin blong toktok blong hem evri dei, hem i no save toktokgud long ol spesel taem. Man i mas lanem samting ya. Be sipos yu stap yusum ol gudfala toktok evritaem long laef blong yu bambae i isi mo i kam olsem fasin blong yu finis taem yu stap long platfom mo yu toktok no taem yu stap talemaot trutok blong God long ol narafala man.

¹⁶ Gudfala fasin blong toktok evri dei i givhan long yumi blong fulumap tingting mo hat blong yumi wetem ol gudfala toktok mo yumi save soemaot fasin tangkyu from ol bigfala plan blong Jeova long Kingdom blong hem. Nao bambae yumi kasem save trutok blong Jisas we i stap long Luk 6:45, se: “Gudfala man, we i fulap long ol gudfala tingting, hem i save mekem ol gudfala fasin.”