Toktok Klia

SIPOS yu wantem we ol man oli kasem save long tok blong yu, yu mas toktok klia. Maet ol man oli wantem tumas blong save long samting we bambae yu talem, mo maet samting we yu talem i impoten, be bighaf blong ol tok blong yu i save lus sipos ol man oli harem se i had blong kasem save long hem.

Toktok blong yu i no save gat paoa long man sipos man ya i no kasem save long hem. Nating se voes blong wan man i strong we i naf blong evriwan oli harem, be sipos hem i no toktok klia, ol tok blong hem i no save pulum ol man blong oli mekem wan samting. Bambae i olsem we man ya i stap toktok long wan lanwis we ol man oli no save. (Jer. 5:15) Baebol i talem se: “Sipos pupu i krae we i no klia gud, bambae i no gat man i save se i taem blong faet. Be long yufala, i olsem nomo. Sipos tok blong yufala i paspas from we yufala i stap tok long ol narafala lanwis ya, bambae i no gat man i save wanem samting we yufala i stap talem. Ol tok ya blong yufala bambae i blong nating nomo.”—1 Kor. 14:8, 9.

?Wanem i Mekem Se Yu No Toktok Klia? Maet yu no stap openem gud maot blong yu. Sipos ol masel blong fes mo maot oli taet, bambae yu no save openem gud maot blong yu, nao toktok blong yu bambae i no klia.

Sipos yu tok hareap tumas, hemia tu i save mekem i hadwok blong man i haremsave samting we yu talem. I olsem we yu plei wan kaset mo yu mekem i spid tumas. Ol tok bambae oli kamaot, be bighaf blong olgeta bambae yu no haremsave.

I had blong sam man oli tok klia, from we oli gat wan problem long maot, tang, no trot blong olgeta. Nating se i olsem, olgeta ya tu oli save kam gud moa long toktok blong olgeta sipos oli folem ol advaes ya.

Plante taem, man i no toktok klia from we hem i no talem gud ol wod, be hem i joejoenem olgeta oli go nomo. Taem man i mekem olsem, maet hem i no talem gud ol smosmol haf blong evri wod, maet i mestem wan haf blong wod, no i sotem sam wod. Taem man i joejoenem tumas ol wod, ating ol man oli kasem sam tingting mo toktok blong hem, be oli mas ademap ol narawan folem prapa tingting blong olgeta, from we oli no kasem gud evriwan. Taswe, sipos man i no talem gud ol wod, samting ya i save spolem gudfala tijing we hem i traem blong givim.

?Yu Mas Mekem Wanem Blong Toktok Klia? Wan samting we i save mekem ol tok blong yu i klia gud, hemia sipos yu luksave se wan wod i gat defdefren haf blong hem. Long plante lanwis, ol wod wanwan oli gat tu no tri haf blong olgeta. Man i mas talem olgeta haf ya, be i no nid blong hem i talem strong evriwan. Sipos yu wantem toktok klia moa, yu mas toktok slo mo traem bes blong yu blong talem evri haf blong ol wod. Fastaem maet yu harem olsem se yu wan pikinini we yu stap lanem blong toktok, be taem yu mekem bakegen mo bakegen, bambae yu luk se toktok blong yu i rongud. Blong mekem se toktok i rongud, ating bambae yu joejoenem sam wod, be yu no mas bitim mak, from we samting ya i save mekem se mining blong ol tok i no klia.

Sipos yu wantem trenem yu wan blong toktok klia, maet yu traem talem mo ridim evri haf blong ol wod long fasin we i klia bitim mak. !Be yu mas lukaot! Sipos yu folem fasin ya oltaem, ol toktok blong yu bambae i saon narakaen, olsem we i no kamaot long hat blong yu.

Sipos toktok blong yu i no klia, i gud yu traem leftemap hed blong yu mo yu lukluk i go stret long fored, yu no mas lukluk i godaon long graon. Taem yu ridim Baebol, yu mas holem Baebol i stap antap lelebet. Olsem nao, bambae yu no nid blong leftemap hed blong yu blong lukluk ol man mo benem hed blong yu bakegen blong lukluk buk, be yu save muvum ae blong yu nomo. Hemia i save mekem se ol toktok blong yu i kamaot klia we i no gat samting i blokem.

I gud tu we yu lanem blong no fraet tumas, hemia i save mekem se yu toktok klia. Yumi save finis se taem man i fraet, hem i taetem ol masel blong fes mo ol masel we oli givhan long hem blong pulum win, nao samting ya i save mekem se hem i no toktok klia. Taem yu taetem ol masel blong yu olsem, tingting i no moa bos gud long maot, tang, trot, mo fasin blong pulum win. Be hemia i wan wok we tingting blong yu i sud mekem isi nomo.

Sipos ol masel blong fes oli taet, bambae oli no save mekem kwiktaem samting we bren i wantem olgeta blong mekem. Yu no mas taetem maot blong yu tu. Yu mas slakem ol masel blong maot blong yu blong i save muvmuv kwiktaem. Olsem nao, yu save mekem se ol noes we oli kamaot long trot mo maot blong yu, oli kam ol wod. Tru ya, sipos ol masel long fes mo maot oli taet, maot blong yu bambae i no save open gud, mo bambae i olsem se ol tut blong yu oli blokem ol wod we oli stap traem blong kamaot long maot blong yu. Nao noes we i kamaot long maot blong yu bambae i narakaen, voes blong yu bambae i daon tumas, mo toktok blong yu bambae i no klia nating. Be taem yu slakem ol masel blong fes mo maot blong yu, hemia i no min se yu les blong toktok. Nogat. Yu no mas slakem maot blong yu bitim mak, be yu mas slakem i naf nomo blong yu save talem gud ol wod, nao tok we i kamaot long maot blong yu bambae i klia.

Taem yu wantem faenemaot wanem samting nao we yu mas stretem, maet i gud we yu rid long bigfala voes. Mo yu traem tingbaot ol haf blong bodi we oli givhan long yu blong toktok. ?Yu stap yusum olgeta olsem wanem? ?Yu stap openem gud maot blong yu blong mekem se i no gat samting i blokem saon blong ol wod? I tru se taem yu toktok, tang nao hem i bisi moa. Be yu mas tingbaot se i no tang nomo we i mekem se yu save toktok. Nek, bun blong maot, maot, ol masel blong fes, mo ol masel blong trot, olgeta evriwan oli gat wok blong mekem. ?Olsem wanem? ?Taem yu toktok, yu luk se fes blong yu i no stap muvmuv nating? Sipos yes, ating ol toktok blong yu oli no klia gud.

Sipos yu gat janis blong yusum wan tep, i gud yu rikodem voes blong yu taem yu stap storian nomo, maet olsem we yu stap toktok long wan man long wok blong prij. Yu rikodem storian blong yu blong sam minit. Ale, taem yu lesin long storian ya bakegen, yu save faenemaot enikaen problem we i mekem se toktok blong yu i no klia. Yu lesin blong harem ol wod we yu no talem gud, be yu stap joejoenem olgeta nomo. Yu save traem faenem ol tok we oli no kamaot klia from we yu no openem gud maot blong yu, mo ol wod we yu mestem wan haf blong olgeta, olsem se yu sotem olgeta. Yu traem kasem save from wanem yu mekem olsem. Plante taem, yu save stretem ol trabol ya sipos yu folem ol advaes we yumi tokbaot finis.

?I gat wan problem long bodi blong yu we i mekem se yu no save toktok gud? I gud yu trenem yu blong openem maot blong yu moa, mo yu meksua se yu talem gud ol wod. Yu mas pulum gud win, mo yu mas toktok slo. Plante man we oli mekem olsem, oli kam naf blong toktok klia, nating se oli gat wan problem long bodi blong olgeta we i joen wetem fasin blong toktok. Maet problem blong yu se yu no save talem gud tok we i gat “s” long hem. Sipos i olsem, taem yu talem ol tok ya, yu mas traem mekem se tang blong yu i no tajem ol tut long fored. I tru se maet yu no save winim problem blong yu fulwan, be yu no mas harem nogud. Yu tingbaot Moses. Moses i gat wan problem we i mekem se hem i no save toktok gud. Be Jehova i jusum hem blong i talemaot ol impoten tok long ol man Isrel mo long king blong Ijip. (Eks. 4:10-12) Jehova i save yusum yu tu blong yu mekem wok blong hem sipos yu wantem tumas blong mekem, mo bambae hem i blesem yu.