Japta 16

Gavman Blong God i Stat Blong Rul

 1. (a) ?Ol man blong bifo we oli bilif, oli wantem wanem samting tumas? (b) ?Blong wanem oli kolem kingdom ya blong God olsem wan “taon”?

BLONG PLANTE TAOSEN yia finis, ol man we oli bilif long gavman blong God oli wantem tumas we rul blong hem i stat. Wan man olsem, hemia Ebraham. Baebol i talem we hem “i stap wet blong wan taon we i gat stret fandesen, we God i mekem ol plan blong hem, mo i stanemap.” (Hibrus 11:10) “Taon” ya, hemia nao kingdom blong God. ?Be blong wanem oli kolem olsem wan “taon”? From we bifo longtaem, ol taon oli gat king blong rul long hem. Taswe, long tingting blong ol man, wan taon i olsem wan kingdom.

 2. (a) ?Wanem i soemaot we Kingdom i olsem wan tru samting long maen blong ol man blong Kraes bifo? (b) ?Oli wantem save wanem long Kingdom ya?

² Long taem blong Kraes, ol man blong hem oli bilif se kingdom ya blong God i wan tru samting. Taswe olgeta ya oli intres tumas long rul blong hem. (Matyu 20:​20-23) Wan kwestin we i stap long maen blong olgeta, hemia: ?Long wetaem Kraes wetem ol man blong hem bambae oli stat blong rul? Taem Jisas i bin stanap finis long ded, hem i kamtru long ol man blong hem, nao oli askem long hem, oli se: “?Masta, i stret taem nao blong yu yu stanemap kingdom blong Isrel bakegen, no no yet?” (Wok 1:6) ?Olsem wanem long yu? ?Yu tu yu wantem save long wetaem Kraes bambae i rul olsem wan King long gavman blong God, olsem ol man ya blong Kraes tu oli wantem save?

GAVMAN YA WE OL KRISTIN OLI STAP PREA FROM

3, 4. (a) ?Wanem i soemaot se long fastaem, taem olgeta samting oli no stap yet, God i rul finis olsem wan King? (b) ?Blong wanem Kraes i tijim ol man blong hem long prea ya we i askem we kingdom blong God bambae i kam?

³ Kraes i bin tijim ol man blong hem blong prea long God, olsem hemia: “Letem kingdom blong yu i kam. Letem ol samting we yu yu wantem oli kamaot long wol, olsem oli kamaot finis long heven.” (Matyu 6:​9, 10) Be maet man i askem se: ‘Mi ting se long fastaem, taem olgeta samting oli no stap yet, God Jeova i stap rul finis olsem wan king. ?I tru no? ?Mo sipos i tru, be blong wanem yumi mas prea blong askem we kingdom blong hem bambae i kam?’

⁴ I tru we Baebol i kolem Jeova se “King we i no save finis.” (1 Timote 1:17) Mo tu, i talem se: “Jeova i King, nao i putum bigfala jea blong hem i stanap strong long heven; mo kingdom blong hem i rulum ol samting.” (Sam 103: 19) Olsem ya nao, blong oltaem nomo Jeova i bin rulum olgeta samting we hem i mekem, mo Rul blong hem i Hae Moa. (Jeremaea 10:10) Be from we olgeta ya long garen blong Iden oli girap nogud long fes blong God, taswe hem i rerem wan spesel gavman. Hemia nao sem gavman ya we Jisas Kraes i tijim ol man blong hem blong prea from. Wok blong gavman ya i blong tekemaot olgeta trabol we Devel Setan wetem sam narafala man oli bin statem, taem oli tanem baksaed long rul blong God.

 5. ?Kingdom ya i blong God, be blong wanem oli kolem se kingdom blong Kraes mo kingdom blong 144,000?

⁵ Nyufala Kingdom gavman ya i kasem paoa, mo raet blong rul, long Bigfala King ya, God Jeova. Kingdom ya i blong hem. Blong plante taem Baebol i kolem kingdom ya se “kingdom blong God.” (Luk 9:​2, 11, 60, 62; 1 Korin 6:​9, 10; 15:50) Be from we Jeova i putum Pikinini blong hem i olsem Stampa Man blong Rul, taswe oli kolem Kingdom ya se kingdom blong Kraes. (2 Pita 1:11) Mo i olsem we yumi lanem finis, se i gat 144,000 man we oli kamaot long wol ya, we bambae oli rul wetem Kraes long kingdom blong hem. (Revelesen 14:​1-4; 20:6) Taswe tu, Baebol i kolem kingdom ya se “Kingdom blong olgeta.”​—Daniel 7:27.

 6. ?Samfala man oli talem we kingdom blong God i bin stat blong rul long wanem taem?

⁶ Samfala man oli talem we Kingdom ya i statem rul blong hem long taem ya we Jisas i bin gobak bakegen long heven. Oli talem we Kraes i statem rul blong hem taem hem i kafsaedem tabu speret i go long olgeta man blong hem long dei blong Pentekos, long yia namba 33 K.T.a (Wok 2:​1-4) Be hemia i no stret taem we Kingdom gavman i bin stat blong rul. I no gat wan samting blong soemaot we “pikinini boe” ya, (we i minim olsem gavman blong God wetem man blong rul blong hem, Kraes) i bon mo i statem rul blong hem long taem ya. (Revelesen 12:​1-10) ?Be olsem wanem? ?Jisas i gat wan kingdom long yia 33 K.T., no i no gat?

 7. ?Stat long 33 K.T. Kraes i stap rul long hu?

⁷ Yes, long 33 K.T. Jisas i bin stat blong rulum kongregesen blong hem, olsem ol man blong hem. Hemia olgeta ya we bambae oli joen wetem hem long heven. Taswe Baebol i tokbaot olgeta ya, taem oli stap yet long wol; se God i tekemaot ol man ya, nao i putum olgeta “long kingdom blong Pikinini ya blong hem, we hem i lavem tumas.” (Kolosi 1:13) Be rul no kingdom ya, we i blong rulum olgeta Kristin ya we oli gat hop blong bambae oli kasem laef long heven, hemia i no sem Kingdom gavman ya we Jisas i bin tijim ol man blong hem blong prea from. Be narawan ya hemia i wan kingdom blong rulum olgeta 144,000 man ya we bambae oli rul wetem Kraes long heven. Olsem ya nao, stat long 33 K.T. gogo kasem naoia, olgeta ya nomo oli sabjek blong kingdom ya. Rul ya, no ‘kingdom blong Pikinini ya blong God,’ bambae i finis taem laswan blong olgeta sabjek ya i ded, nao i go antap long heven blong joen wetem Kraes. Taem oli stap long heven finis, bambae oli no moa sabjek blong Kraes, be oli kam king wetem hem long Kingdom gavman ya blong God, we promes blong hem i stap longtaem finis.

STAT BLONG RUL LONG MEDEL BLONG OL ENEMI

 8. (a) ?Wanem i soemaot, se taem Kraes i bin stanap long ded finis, hem i mas wet bifo we hem i save statem rul blong hem? (b) ?God i talem wanem long Kraes long stret taem blong rul?

⁸ Taem Kraes i stanap i laef bakegen long ded, nao hem i bin gobak bakegen long heven, hem i no stat blong rulum Kingdom gavman blong God long taem ya. Be hem i mas wet. Aposol Pol i eksplenem samting ya, i se: “Man ya [Kraes] i bin givim wan sakrafaes nomo blong tekemaot ol sin [blong ol man], nao sakrafaes ya hemia i naf blong i save stap foreva. Nao hem i go sidaon long raet saed blong God, mo i stap wet long ples ya, gogo God bambae i mekem ol enemi blong hem olsem wan smol jea, we i ples blong putum leg blong hem.” (Hibrus 10:​12, 13) Taem stret taem i kam blong Kraes i statem rul blong hem, Jeova i bin talem long hem, i se: “Yu yu go stap long medel blong ol enemi blong yu, nao yu winim olgeta.”​—Sam 110:​1, 2, 5, 6.

 9. (a) ?Blong wanem sam man i no wantem kingdom blong God? (b) ?Taem gavman blong God i statem rul blong hem, olgeta laen blong ol man long wol oli mekem wanem?

⁹ ?Yu yu sapraes we gavman blong God i gat enemi blong hem? Be i gat ya. From we i no olgeta evriwan we oli wantem stap aninit long wan gavman we ol sabjek blong hem oli mas mekem ol samting we oli stret nomo. Baebol i talem we Jeova, mo Pikinini blong hem, tufala bambae i rulum olgeta wol. Nao from samting ya, “olgeta laen blong man oli kam kros tumas.” (Revelesen 11:​15, 17, 18) Long wol, olgeta laen blong man oli no wantem kingdom blong God, oli agensem. Oli mekem olsem from we Setan i stap gyaman long olgeta.

10, 11. (a) ?Taem gavman blong God i statem rul blong hem, wanem i hapen long heven? (b) ?Wanem i hapen long wol? (c) ?Wanem impoten samting ya we yumi no mas fogetem?

¹⁰ Taem gavman blong God i statem rul blong hem, Setan mo ol enjel blong hem, oli stap yet long heven. Be from we olgeta ya oli agensem rul blong Kingdom, wantaem nomo faet i stat long heven. Long faet ya, oli tekem Setan wetem olgeta enjel blong hem, nao oli sakemaot long heven. Nao wan voes i singaot bigfala, i se: “!Naoia God blong yumi i sevem yumi, mo naoia paoa mo kingdom blong hem i kamtru finis, mo naoia Kraes i gat paoa long evri samting!” !Yes, rul blong gavman blong God i stat ya! Mo from we i no moa gat Setan wetem ol enjel blong hem long heven, olgeta long ples ya oli glad ya. Baebol i talem se: “!Nao from samting ya, yu heven, mo yufala evriwan we i stap long heven, yufala i mas glad!”​—Revelesen 12:​7-12.

¹¹ ?Hemia i wan gladtaem blong wol ya tu? !No gat ya! Wol i kasem bigbigfala trabol long taem ya, we neva i kasem bifo samtaem. Baebol i talem long yumi, i se: “Be trabol tumas long yu, graon, mo long yu, solwora, from we Devel [Setan] i kamdaon finis long yufala, mo hem i kros tumas, from we i save se i gat smoltaem nomo blong hem i stap yet.” (Revelesen 12:12) Olsem ya nao, impoten samting we yumi no mas fogetem, hemia: Taem rul blong kingdom blong God i stat, hemia i no min se wantaem nomo ol man long wol oli kasem pis, mo oli sefgud nomo. Prapa pis bambae i kam afta, taem kingdom blong God i stat blong kontrolem olgeta wol. Hemia i kamtru long en blong “smoltaem” ya, taem Setan mo ol enjel blong hem oli no moa stap blong mekem trabol long man.

12. ?Blong wanem yumi save we Baebol i mas talemaot long wetaem kingdom blong God i stat blong rul?

¹² ?Be long wetaem oli sakemaot Setan long heven, blong i godaon blong mekem trabol long wol blong “smoltaem”? ?Long wetaem gavman blong God i statem rul blong hem? ?Baebol i givim ansa long ol kwestin ya, no no gat? I mas givim ya. ?Blong wanem? From we bifo finis Baebol i talemaot long wetaem Pikinini blong God bambae i kamtru long wol blong i kam Mesaea. I soemaot gud long wanem yia hem i kam Mesaea. ?Be olsem wanem long samting ya we i impoten moa, hemia nao: ?Long wetaem Mesaea, no Kraes, bambae i kam blong statem Kingdom rul blong hem? !Ating Baebol i mas talemaot samting ya tu!

13. ?Olsem wanem Baebol i talemaot stret yia we Mesaea i mas kamtru long wol?

¹³ Be maet wan man i askem se: ‘?Long weples long Baebol yumi save faenem stret namba blong yia we Mesaea i blong kamtru long wol?’ Baebol i talem long buk blong Daniel, i se: “I stat long taem ya we oli givim oda blong stanemap Jerusalem, mo wokem i gud bakegen, i go kasem Lida ya Mesaea, nao hemia bambae i olsem seven wik, mo sikistetu wik,” no olsem 69 wik. (Daniel 9:25) Be olgeta 69 wik ya oli no prapa wik, we oli olsem 483 dei nomo, olsem i bitim wan yia nomo. Be olgeta 69 wik ya oli olsem 69 wik blong yia, no olsem 483 yia. (mo tu, ridim Namba 14:34) Oda ya blong stanemap Jerusalem mo wokem i gud bakegen, oli givim long 455 B.K.T.b (Nehemaea 2:​1-8) Olsem ya nao, 69 wik blong yia ya, we i olsem 483 yia, i stat long 455 B.K.T. nao i finis long 29 K.T. !Hemia nao sem yia ya we Jisas i kam luk Jon, blong hem i baptaes! Nao long semtaem ya, God i makemaot hem wetem tabu speret, nao i kam Mesaea, no Kraes.​—Luk 3:​1, 2, 21-23.

TAEM GAVMAN BLONG GOD I STAT BLONG RUL

14. ?“Tri” ya long Daniel japta fo i saen blong wanem samting?

¹⁴ Oraet, ?weples long Baebol i talemaot yia we Kraes i statem rul blong hem olsem wan king, long gavman blong God? Long sem buk ya blong Daniel. (Daniel 4:​10-37) Long buk ya, i gat store blong wan bigbigfala tri we i hae olsem heven. Nao tri ya i olsem wan pija blong king Nebukanesa blong Babilon. King ya i hae we i hae, i bitim ol narafala king long taem blong hem. Be God i bin fosem king Nebukanesa, blong mekem hem i save se i gat wan narafala king we i stap rul, we i hae moa. Hemia nao God Jeova, we i “Hae Moa,” mo we i “King blong heven.” (Daniel 4:​34, 37) Olsem ya nao, tri ya i gat wan narafala mining blong hem we i impoten moa. Hem i pija blong nambawan rul blong God, i tru moa long saed blong wol. Jeova i bin stanemap wan kingdom long Isrel blong rulum kantri ya. Nao long taem ya, rul blong Jeova i pastru long kingdom ya blong Isrel. Ale, taswe Baebol i talem se ol king long laen blong Juda, we oli rulum Isrel, oli stap “sidaon long bigfala jea blong Jeova.”​—1 Kronikel 29:23.

15. ?Blong wanem oli fasem stampa blong “tri” ya wetem ol strap?

¹⁵ Long japta fo blong Daniel, Baebol i talem we oli katemdaon bigbigfala tri ya we i hae olsem heven. Be oli livim stampa blong hem, nao oli putum ol strap blong aean mo kopa oli raon long hem, oli fasem gud. Ol strap ya oli mekem we stampa ya i no moa save gru. Oli mas stap long tri ya gogo kasem taem we God bambae i tekemaot olgeta, i letem tri ya i gru bakegen. ?Be olsem wanem, mo long wanem taem, oli bin katemdaon rul blong God?

16. (a) ?Olsem wanem, mo long wanem taem, oli katemdaon rul blong God? (b) ?God i talem wanem long las king ya blong Juda we i sidaon long “bigfala jea blong Jeova”?

¹⁶ Kingdom blong Juda we Jeova i bin stanemap, i mekem plante samting i kam nogud long ol rabis fasin blong hem. Taswe Jeova i letem king Nebukanesa i spolem kingdom ya, olsem i katemdaon. Hemia i hapen long yia 607 B.K.T. Long taem ya, Sedekaea, we hem i las king blong sidaon long bigfala jea blong Jeova, i harem wan tok, i se: “Tekemaot hat [long hed] blong king. . . . i no gat narafala man we i save tekem samting ya, be hem ya nomo we i gat raet long hem, nao bambae mi mi mas givim long hem.”​—Esikel 21:​25-27.

17. ?Wanem taem ya we i bin stat long 607 B.K.T.?

¹⁷ Olsem ya nao, “tri” ya we i olsem pija blong rul blong God, oli katemdaon long 607 B.K.T. Hemia i min se i no moa gat wan gavman blong karem tok blong rul blong God long wol. Ale, long 607 B.K.T. i gat taem i stat we Jisas Kraes i kolem “taem blong ol man blong ol narafala laen,” no “taem blong ol man Jentael.” (Luk 21:24; King James Version) Long “taem” blong ol man ya, God i no gat wan gavman blong karem tok blong rul blong hem long wol ya.

18. ?Wanem bambae i kamaot long en blong “taem blong ol man blong ol narafala laen”?

¹⁸ ?Wanem bambae i kamaot long en blong “taem blong ol man blong ol narafala laen”? Jeova bambae i givim paoa blong rul long Hem ya “we i gat raet long hem.” Man ya nao, hemia Jisas Kraes. Oraet, sipos yumi save faenemaot long wanem taem “taem blong ol man blong ol narafala laen” bambae i finis, bambae yumi save long stret taem ya we Kraes i statem rul blong hem, olsem wan king.

19. ?Blong hamas “taem” rul blong God bambae i no save wok long wol?

¹⁹ Daniel japta fo i talem se “taem” blong ol man Jentael ya, i olsem “seven taem.” Daniel i soemaot se insaed long “seven taem” ya, rul blong God, we “tri” ya i saen blong hem, bambae i no save wok long wol. (Daniel 4:​16, 23) ?“Seven taem” ya, i olsem hamas yia?

20. (a) ?Wan “taem” i olsem hamas dei? (b) ?“Seven taem” i olsem hamas dei? (c) ?Blong wanem yumi kaontem we wan dei i olsem wan yia?

²⁰ Long Revelesen japta 12, vas 6 mo 14, yumi lanem we 1,260 dei i stret long “wan taem, mo long tu taem, mo long haf taem bakegen.” Sipos yumi ademap, bambae yumi kasem 3¹⁄2 taem. Olsem ya nao, “wan taem” i stret long 360 dei. Ale, “seven taem” i olsem 7×360, no 2,520 dei. Nao sipos yumi yusum rul blong Baebol we i talem se wan dei i stret long wan yia, hemia i minim we “seven taem” i stret long 2,520 yia.​—Namba 14:34; Esikel 4:6.

21. (a) ?“Taem blong ol man blong ol narafala laen” i finis long wanem yia? (b) ?Gavman blong God i statem rul blong hem long wanem taem? (c) ?Blong wanem i stret nomo blong yumi prea blong askem we kingdom blong God bambae i kam?

²¹ Yumi lanem finis we “taem blong ol man blong ol narafala laen” i bin stat long 607 B.K.T. Ale, sipos yumi kaontem 2,520 yia, i stat long 607 B.K.T., bambae yumi kasem 1914 K.T. Hemia nao stret yia we “taem” ya blong ol man Jentael i finis long hem. Plante milyan man we oli laef yet tede, oli rimemba gud long ol samting we oli hapen long 1914. Long yia ya, Fas Wo blong Wol i statem taem blong bigfala trabol we i stap kasem yumi tede yet. Hemia i min se Jisas Kraes i bin statem rul blong hem, olsem hem i kam king blong gavman blong God long heven, long 1914. !Mo from we Kingdom ya i statem rul blong hem finis, i stret nomo blong yumi prea long God, blong askem we Kingdom ya i “kam” blong finisim olgeta rabis fasin blong Setan we oli stap long wol!​—Matyu 6:10; Daniel 2:44.

22. ?Ating samfala man oli askem wanem kwestin?

²² Be ating samfala man oli askem, oli se: ?‘Sipos Kraes i kambak finis blong rul long kingdom blong Papa blong hem, be weswe yumi no save lukluk hem?’

[Ol Futnot]

[Bokis blong pija long pej 140, 141]

Long 607 B.K.T. kingdom blong Juda, we i blong God, i foldaon.

Long 1914 K.T. Jisas Kraes i statem rul blong hem, olsem hem i kam king blong gavman blong God long heven

607 B.K.T.—1914 K.T.

Oktomba, 607 B.K.T.​—Oktomba, 1 B.K.T. = 606 yia

Oktomba, 1 B.K.T.​—Oktomba, 1914 K.T. = 1,914 yia

SEVEN TAEM BLONG JENTAEL = 2,520 yia

[Tok blong pija long pej 134]

“?I stret taem nao blong yu yu stanemap kingdom blong Isrel bakegen, no no yet?”

[Tok blong pija long pej 138]

Bigbigfala tri ya long Daniel japta 4 i saen blong rul blong God. Blong samfala yia, rul ya i bin pastru long kingdom blong Juda

[Tok blong pija long pej 140]

Taem oli spolem kingdom blong Juda, i olsem we oli katemdaon tri ya