Japta 10

!Kingdom Blong God i Stap Rul!

1, 2. ?Ol gavman blong man, oli no naf blong mekem wanem?

ATING samtaem yu bin pem wan enjin, be biaen yu faenemaot se enjin ya i no wok. Maet yu bin singaot wan man blong fiksimap enjin ya. Be, smoltaem biaen we hem i “fiksimap,” enjin ya i brokdaon bakegen. !Ating yu bin harem nogud!

² Sem mak long ol gavman blong man. Oltaem ol man oli wantem wan gavman we i save givim pis mo hapi laef. Be ol bigfala wok blong fiksimap ol samting we oli brokdaon long saed blong laef blong ol man, i no rili karem frut. Ol kantri oli bin mekem plante kontrak blong pis. Be biaen oli brekem ol kontrak ya bakegen. Mo tu, ?wanem gavman i bin soem se hem i naf blong winim fasin pua, fasin blong no laekem narafala, fasin blong brekem loa, sik, mo ol trabol we i stap spolem graon, win mo wora blong wol? I no gat wan samting we i save fiksimap rul blong man. Waes King Solomon blong Isrel tu, i askem se: “Long saed blong ol man long wol ya, ?olsem wanem oli save luksave stret rod blong wokbaot long hem?”—Proveb 20:24.

 3. (a) ?Wanem stampa tok blong Jisas taem hem i stap prij? (b) ?Wanem ol defren tingting blong ol man long saed blong Kingdom blong God?

³ !Be yu no mas harem nogud! Wan gudfala gavman we i save stanap strong oltaem blong rul long wol, i no wan drim nomo. Hemia nao stampa tok blong Jisas, taem hem i stap prij. Hem i kolem gavman ya se ‘kingdom blong God.’ Mo hem i tijim ol man blong hem blong prea from gavman ya. (Luk 11:2; 21:31) Yes, samtaem ol man blong skul oli tokbaot Kingdom blong God. Plante milyan man oli prea evri dei from Kingdom ya, taem oli talem Prea blong Masta (samfala oli kolem, prea blong Papa blong Yumi, no prea we i wan eksampel). Be ol man oli talem ol defren ansa long kwestin ya, “?Wanem ya Kingdom blong God?” Samfala oli talem se, “Hem i stap long hat blong yu.” Samfala oli talem se i minim heven. Baebol i givim wan klia ansa, we bambae yumi luk.

WAN KINGDOM WE I GAT PLAN

4, 5. ?From wanem Jeova i jusum blong soemaot hae rul blong hem long wan nyufala rod, mo bambae wanem i kamaot from?

⁴ Olwe, Jeova God i bin King, no Hae Rula, blong heven mo wol. Hem i wokem olgeta samting, taswe hem i stap long hae ples ya. (1 Kronikel 29:11; Ol Sam 103:19; Ol Wok 4:24) Be Kingdom ya we Jisas i talemaot, i stap aninit, no i namba tu, long hae rul blong God long heven mo wol. Kingdom ya blong Mesaea i gat wan spesel plan. ?Wanem plan ya?

⁵ Olsem yumi tokbaot finis long Japta 6 blong buk ya, faswan man mo woman, tufala i agensem rul blong God. From ol kwestin we oli stanap long taem ya, Jeova i jusum blong soemaot rul blong hem long wan nyufala rod. God i talemaot stampa tingting blong hem blong gat wan “laen” we bambae i smasem Snek ya, Setan, mo bambae i tekemaot ol nogud frut blong sin, we ol man oli kasem from Adam. Impoten man long “laen” ya, hemia Jisas Kraes. Mo ‘kingdom blong God’ i olsem tul we hem bambae i yusum blong winim Setan fulwan. Tru long Kingdom ya, bambae Jisas Kraes i mekem se wan gavman i rul bakegen long wol long nem blong Jeova. Mo bambae hem i pruvum blong olwe se hae rul we God i gat raet long hem, i stretgud.—Jenesis 3:15; Ol Sam 2:2-9.

6, 7. (a) ?Kingdom ya i stap wea, mo hu ya King blong hem mo ol man we oli rul wetem hem? (b) ?Hu ya ol man we oli stap aninit long rul blong Kingdom ya?

⁶ Wan Baebol i tanem tok we Jisas i talem long ol Farisi we oli man nogud, i kam olsem: “Kingdom blong God i stap insaed long yufala.” (Luk 17:21, King James Version) ?Jisas i minim se Kingdom ya i stap long rabis hat blong ol man nogud ya? No gat. Wan narafala Baebol i tanem olfala Grik tok long rod we i moa stret, i se: “Kingdom blong God i stap long medel blong yufala.” (New World Translation) Olsem nao, Jisas, we i stap long medel blong olgeta, i stap tokbaot hem wan olsem King we bambae i rul long fyuja. Kingdom blong God i no samting we i stap long hat blong man nomo. Hem i wan trufala gavman we i stap rul. Hem i gat wan king, mo i gat ol man we oli stap aninit long rul blong hem. Hem i wan gavman long heven, from we Baebol i talem tufala nem ya blong hem, “kingdom blong heven,” mo “kingdom blong God.” (Matyu 13:11, NW; Luk 8:10, NW) Long wan drim, profet Daniel i luk we King blong kingdom ya i “olsem pikinini blong man.” Ale hem i kam stanap long fored blong God we i gat Olgeta Paoa. Nao God i givim “paoa blong rul mo haenem mo kingdom long hem, blong olgeta pipol, mo olgeta nesen, mo olgeta lanwis, bambae oli mekem wok blong hem.” (Daniel 7:13, 14) ?Hu ya King ya? Baebol i talem se Jisas Kraes i “Pikinini blong Man.” (Matyu 12:40; Luk 17:26) Yes, Jeova i jusumaot Pikinini blong hem, Jisas Kraes, blong kam King.

⁷ Jisas i no stap rul hem wan. I gat 144,000 man we “God i pemaot olgeta oli fri long wol,” we oli wok wetem hem olsem ol king mo pris. (Revelesen 5:9, 10; 14:1, 3; Luk 22:28-30) Ol man we oli stap aninit long rul blong Kingdom blong God, bambae oli olsem wan famle blong man long ful wol, we oli glad blong letem Kraes i lidim olgeta. (Ol Sam 72:7, 8) ?Be, olsem wanem yumi save sua se Kingdom ya bambae i rili pruvum se hae rul blong God i stret, mo mekem wol ya i kam wan paradaes bakegen?

KINGDOM BLONG GOD I WAN TRUFALA SAMTING

8, 9. (a) ?Wanem pijatok i soem se yumi save trastem ol promes blong Kingdom blong God? (b) ?From wanem yumi save se Kingdom i wan trufala samting?

⁸ Traem tingbaot wan pijatok: Haos blong yu i bon long faea, ale evri samting i lus. Nao wan fren we hem i gat ol samting blong bildim haos, hem i promes blong halpem yu blong wokem bakegen, mo blong givim kakae long famle blong yu. Sipos fren ya i neva bin gyaman long yu, ?bambae yu trastem promes blong hem? Yes. Ale, long nekis dei, yu kambak afta wok, nao yu luk se ol wokman oli stat finis blong karemaot ol haf blong olfala haos we i bon. Mo tu, yu luk we wan man i karem kakae i kam finis long famle blong yu. I klia se, bambae yu bilif fulwan we, ol samting oli save kamgud long fyuja, mo ating oli save kam moa gud bitim bifo.

⁹ Sem mak nao, Jeova i mekem plante samting blong soem se Kingdom i wan trufala samting. Buk blong Hibrus long Baebol i tokbaot plante haf blong Loa, we oli pija blong ol samting long saed blong Kingdom. (Hibrus 10:1) Plante samting long kingdom blong Isrel long wol long taem bifo, oli pija blong ol samting we bambae oli kamaot aninit long Kingdom blong God. Kingdom blong Isrel bifo i no olsem ol narafala gavman, from we ol king blong hem oli sidaon long “jea blong Jeova.” (1 Kronikel 29:23) Mo tu, profet tok i talem se: ‘Wokingstik blong king bambae i no save aot long laen blong Juda, mo stik blong rul i mas stap bitwin long tufala leg blong hem, gogo Silo i kamtru. Nao ol man bambae oli obei long hem.’ (Jenesis 49:10)a Yes, Jisas, we bambae i King olwe long gavman blong God, i kamaot long Juda, we i laen blong ol king.—Luk 1:32, 33.

10. (a) ?Wetaem Jisas i putum faondesen blong Kingdom blong God we Mesaea bambae i rul long hem? (b) ?Wanem impoten wok we ol man blong rul wetem Jisas oli lidim long wol?

¹⁰ Taem Jisas i jusum ol aposol blong hem, hem i putum faondesen blong Kingdom blong God we Mesaea bambae i rul long hem. (Efesas 2:19, 20; Revelesen 21:14) Olgeta ya oli ol faswan blong ol 144,000 man we bambae oli rul wetem Jisas Kraes long heven olsem ol king. Taem ol man ya we bambae oli rul wetem hem oli stap yet long wol, oli lidim wan bigfala wok blong prij, folem oda ya we Jisas i givim se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu speret.”—Matyu 28:19.

11. ?Olsem wanem wok blong talemaot Kingdom i stap gohed tede, mo wanem frut blong wok ya?

¹¹ Naoia, plante man bitim olgeta taem bifo, oli stap obei long oda ya blong pulum ol man oli kam man blong Jisas. Ol Wetnes blong Jeova oli stap talemaot gud nyus blong Kingdom long olgeta ples long wol, stret olsem profet tok blong Jisas i talem, se: “Gud nyus ya blong kingdom, bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.” (Matyu 24:14, NW) Haf blong wok ya blong talemaot Kingdom, hemia wan bigfala program blong tijim ol man, we i stap gohed. Olgeta we oli obei long ol loa mo rul blong Kingdom blong God, oli gat pis mo fasin joengud finis. Hemia samting we ol gavman blong man oli no save kasem. !Samting ya i soemaot klia se Kingdom blong God i wan trufala samting!

12. (a) ?From wanem i stret blong singaot ol man blong talemaot Kingdom se, ol Wetnes blong Jeova? (b) ?Olsem wanem Kingdom blong God i defren long ol gavman blong man?

¹² Jeova i talem long ol man Isrel se: ‘Yufala i olsem ol wetnes blong mi, yes, yufala i olsem ol man blong wok blong mi we mi mi jusumaot.’ (Aesea 43:10-12) Jisas, we hem i ‘Tru Wetnes,’ i wok strong blong talemaot gud nyus blong Kingdom. (Revelesen 1:5; Matyu 4:17) Taswe i stret we ol man blong talemaot Kingdom long taem blong yumi, oli tekem nem ya we God i givim, ol Wetnes blong Jeova. ?Be from wanem ol Wetnes oli hadwok mo oli spenem plante taem blong tokbaot Kingdom blong God long ol narafala man? Oli mekem olsem from we Kingdom ya nomo i hop blong olgeta man. Olgeta gavman blong man oli stap foldaon, be neva samting ya i save hapen long Kingdom blong God. Aesea 9:6, 7 i tokbaot Rula blong Kingdom ya, Jisas, olsem “Prins blong Pis,” mo i talem tu se: “Bigfala rul blong hem olsem prins, mo fasin blong stap long pis, oli no save finis.” Kingdom blong God i no olsem ol gavman blong man, we oli stap tede be tumora oli foldaon. No gat. Daniel 2:44 i talem se: “God blong heven bambae i stanemap wan kingdom we neva i save brokdaon. Mo bambae kingdom ya i no save go long han blong narafala nesen, . . . hem nomo bambae i stanap olwe.”

13. (a) ?Wanem sam problem we Kingdom blong God bambae i winim? (b) ?From wanem yumi save sua se ol promes blong God bambae oli kamtru?

¹³ ?Wanem king long wol ya we hem i naf blong finisim ol faet, fasin blong brekem loa, ol sik, hanggri mo fasin we man i no gat haos? Antap moa, ?wanem rula long wol ya we i save mekem ol dedman oli laef bakegen? Kingdom blong God mo King blong hem, bambae oli mekem ol samting ya. Kingdom ya i stretgud olgeta. Hem i no olsem wan enjin we i no wokgud, ale wan man i mas fiksimap oltaem. Kingdom blong God bambae i karem gudfala frut, from we Jeova i mekem promes ya se: ‘Tok we i kamaot long maot blong mi . . . i no save kambak long mi sipos i no gat frut blong hem, be bambae i kamaot olsem we mi haremgud long hem, mo bambae hem i mekem wok we mi mi sanem hem blong mekem.’ (Aesea 55:11) Stampa tingting blong God bambae i kamtru. ?Be Kingdom ya i mas stat blong rul long wanem taem?

RUL BLONG KINGDOM—?WETAEM?

14. ?Wanem rong tingting we ol disaepol blong Jisas oli gat long saed blong Kingdom, be Jisas i save wanem long saed blong rul blong hem?

¹⁴ “?Masta, i stret taem nao blong yu stanemap kingdom blong Isrel bakegen, no no yet?” (NW) Kwestin ya we ol disaepol blong Jisas oli askem, i soem se long taem ya, oli no save yet wanem plan blong Kingdom blong God, mo stret taem blong Kingdom ya i stat blong rul. Jisas i givim woning long olgeta blong no tingting tumas long saed ya, i se: “I no blong yufala i save ol taem ya mo ol dei ya we Papa blong mi nomo i gat raet blong jusumaot.” Jisas i save se bambae hem i rul antap long wol long fyuja nomo, longtaem biaen we hem i laef bakegen mo i go long heven. (Ol Wok 1:6-11; Luk 19:11, 12, 15) Baebol i bin talem samting ya finis. ?Olsem wanem hem i talem olsem?

15. ?Olsem wanem Ol Sam 110:1 i halpem yumi blong faenemaot wetaem Jisas i rul?

¹⁵ Long wan profet tok, King Deved i singaot Jisas olsem “Masta,” i se: “Jeova i talem long Masta blong mi, i se: ‘Yu kam sidaon long raetsaed blong mi, gogo kasem taem we mi putum ol enemi blong yu oli stap daon, olsem wan mat aninit long leg blong yu.’ ” (Ol Sam 110:1, NW; skelem wetem Ol Wok 2:34-36.) Profet tok ya i soemaot se rul blong Jisas i no stat stret long taem we hem i go antap long heven. No gat. Hem i mas wet long raetsaed blong God. (Hibrus 10:12, 13) ?Hem i mas wet blong hamas yia? ?Rul blong hem bambae i stat wetaem? Baebol i halpem yumi blong faenem ansa long ol kwestin ya.

16. ?Wanem i hapen long 607 B.K.T., mo olsem wanem samting ya i joen wetem Kingdom blong God?

¹⁶ I gat wan taon nomo long wol we Jeova i bin putum nem blong hem long hem, hemia Jerusalem. (1 King 11:36) Mo tu, hem i bigfala taon blong wan kingdom long wol we God i bin agri long hem, we hem i pija blong Kingdom blong God long heven. Taswe, taem ol man Babilon oli spolem Jerusalem long 607 B.K.T., samting ya i gat bigfala mining. Hem i makem stat blong wan longfala taem, we God i no moa rul stret long ol man blong hem long wol. Sikis handred yia biaen, Jisas i soem se taem ya we ol man nomo oli stap rul, i stap gohed yet. Hem i se: “Bambae ol hiten man oli save rul olbaot long Jerusalem, gogo kasem we taem blong ol hiten man bambae i finis.”—Luk 21:24.

17. (a) ?Wanem ya “taem blong ol hiten man,” mo taem ya bambae i gohed blong hamas yia? (b) ?Long wanem yia “taem blong ol hiten man” i stat, mo long wanem yia i finis?

¹⁷ Long “taem blong ol hiten man,” God i letem ol gavman blong wol, oli blokem rul blong gavman we God i agri long hem. Taem ya i stat long 607 B.K.T., taem ol ami oli spolem Jerusalem. Mo Daniel i soem se taem ya i mas gohed blong “seven taem.” (Daniel 4:23-25) ?Seven taem i minim hamas yia? Baebol i talem se tri “taem” mo haf, i olsem 1,260 dei. (Revelesen 12:6, 14) Seven taem, we i dabolem samting ya, hemia 2,520 dei. Be i no gat wan bigfala samting i hapen long en blong sot taem ya. Sipos yumi folem rul ya se ‘wan dei i olsem wan yia’ long saed blong profet tok ya blong Daniel, yumi kaontem 2,520 yia stat long 607 B.K.T. Ale, yumi kasem yia 1914 K.T.—Namba 14:34; Esikel 4:6.

18. ?Smoltaem biaen we Jisas i stat rul long Kingdom hem i mekem wanem, mo from samting ya wanem i kamaot long wol?

¹⁸ ?Jisas i stat blong rul long heven long 1914? Bambae yumi luk olsem wanem Baebol i pruvum samting ya, long japta we i kam biaen. Be taem Jisas i stat rul, i no gat pis i kamaot long wol wantaem nomo. Revelesen 12:7-12 i soem se taem Jisas i stat rul long Kingdom, fastaem hem i sakemaot Setan mo ol rabis enjel blong hem long heven. Samting ya i mekem trabol i kamaot long wol. Be yumi glad blong ridim se Setan i gat “smol taem nomo blong hem i stap yet.” Bambae i no longtaem, yumi save glad tumas, i no from we Kingdom blong God i rul nomo, be tu from we Kingdom ya bambae i karem ol blesing i kam long wol ya, mo long ol man we oli obei long hem. (Ol Sam 72:7, 8) ?Olsem wanem yumi save se samting ya i kolosap?

[Futnot]

JEKEM SAVE BLONG YU

?Wanem ya Kingdom blong God, mo hem i stap wea?

?Hu i rul long Kingdom ya, mo hu ya ol man we oli stap aninit long rul blong hem?

?Olsem wanem Jeova i soem se Kingdom blong hem i wan trufala samting?

?Long wanem yia “taem blong ol hiten man” i stat? ?Mo long wanem yia hem i finis?

[Bokis blong pija long pej 94]

SAM IMPOTEN SAMTING WE OLI JOEN WETEM KINGDOM BLONG GOD

• Jeova i talemaot stampa tingting blong hem blong gat wan “laen” we bambae i smasem Snek ya, Devel Setan.—Jenesis 3:15.

• Long 1943 B.K.T., Jeova i talem se “laen” ya bambae i kamaot long Ebraham.—Jenesis 12:1-3, 7; 22:18.

• Kontrak blong Loa we God i givim long Isrel long 1513 B.K.T. i olsem ‘sado nomo blong ol gudfala samting we bambae oli save kamtru.’—Eksodas 24:6-8; Hibrus 10:1.

• Kingdom blong Isrel long wol i stat long 1117 B.K.T., mo biaen, i gohed tru long laen blong Deved.—1 Samuel 11:15; 2 Samuel 7:8, 16.

• Ol ami oli spolem Jerusalem long 607 B.K.T., mo “taem blong ol hiten man” i stat.—2 King 25:8-10, 25, 26; Luk 21:24.

• Long 29 K.T., God i makemaot Jisas olsem King we bambae hem i putumap, mo Jisas i statem wok blong hem blong prij long wol.—Matyu 3:16, 17; 4:17; 21:9-11.

• Long 33 K.T., Jisas i go antap long heven, mo i wet long raetsaed blong God gogo hem i stat rul.—Ol Wok 5:30, 31; Hibrus 10:12, 13.

• Jisas i kam king long Kingdom blong heven long 1914 K.T., mo “taem blong ol hiten man” i finis.—Revelesen 11:15.

• Hem i sakem Setan mo ol rabis enjel blong hem oli aot long heven oli kamdaon long wol, ale, oli mekem moa trabol long ol man.—Revelesen 12:9-12.

• Jisas i stap lukaot long wok blong talemaot gud nyus blong Kingdom blong God, long olgeta ples long wol.—Matyu 24:14; 28:19, 20.