Japta 46

Wan Woman i Tajem Klos Blong Jisas

JISAS i aot long Dekapolis, i kambak bakegen long Kapaneam. Taem ol man oli harem nyus ya, fulap long olgeta oli hivap long soa blong welkamem hem. Oli harem finis we hem i blokem bigfala win long lugun ya, mo we hem i ronemaot ol devel long tufala man ya. Nao taem Jisas i gosoa, plante man oli kam, oli raon long hem, oli wantem luk hem mo storeyan wetem hem.

Wan lida blong skul blong ol man Isrel, nem blong hem Jaeras, hem i wantem tumas blong luk Jisas. Nao taem hem i kam long Jisas, hem i nildaon long hem, i krae long hem, i se: “Smol gel blong mi i sik tumas, kolosap hem i ded. Plis yu kam putum han blong yu long hem blong hem i gud bakegen, i no ded.” Jaeras i gat wan pikinini blong hem nomo, hemia gel ya we i gat 12 yia blong hem. Taswe Jaeras i laekem tumas gel ya.

Ale, Jisas i biaen long Jaeras, tufala i go. Mo i gat plante man tumas oli biaen long tufala, oli go. Traem tingbaot glad blong ol man we oli stap folem Jisas, from we oli save se bambae Jisas i mekem wan moa merikel bakegen. Be i gat wan woman we i stap wetem olgeta we hem i trabol tumas.

Woman ya, sik blong woman i stap long hem oltaem long 12 yia, i no gat spel. Hem i pas long plante dokta finis, i lusum ol mane blong hem, be sik blong hem i no go daon, i stap kam bigfala moa.

Sik ya blong woman ya i mekem bodi blong hem i slak tumas. Mo antap long samting ya, hem i sem tumas from sik ya. Wan woman we i gat sik olsem i no save talemaot sik ya long plante man. Mo tu, Loa blong Moses i talem se taem woman i gat sik blong hem, hem i no klin. Ale sipos wan man i tajem hem no kaliko blong hem we i gat blad long hem, man ya i mas swim, mo hem i no klin tu gogo san i godaon.

Woman ya i harem we Jisas i mekem plante merikel finis, nao hem i go faenem hem. From we woman ya i no klin, hem i traem haed long hif blong ol man. Be long semtaem, hem i traehad blong kasem Jisas. Long tingting blong hem, hem i talem se: “Sipos mi save tajem klos nomo blong hem, be sik ya blong mi bambae i finis.” Nao hem i kam long bak blong Jisas, i pusum han blong hem, i tajem en blong klos blong hem nomo. Wantaem nomo, blad blong hem i no moa ron, mo hem i save we sik blong hem i finis.

Taem hem i tajem Jisas, semtaem nomo, Jisas i askem se: “?Hu i tajem klos blong mi?” !Woman i sek long tok blong Jisas! ?Olsem wanem Jisas i save se wan man i tajem klos blong hem? Pita i ansa long Jisas i se: “!Yu luk! Yumi paspas tumas ya. ?Olsem wanem yu stap askem se ‘?Hu i tajem mi?’?”

Be Jisas i stap luklukraon long olgeta blong faenem man ya we i tajem hem, nao hem i talem se: “No, be wan man i tajem mi, from we mi mi haremsave se paoa blong mi i wokem wan samting.” Tru ya, taem woman ya i tajem hem, wan bigfala samting i hapen, from we Jisas i haremsave se paoa i goaot long bodi blong hem.

Nao woman ya i fraet tumas, i seksek, i kam long Jisas, i nildaon long hem. Long fored blong olgeta man, hem i tok tru long Jisas, i talemaot olgeta store blong sik blong hem. Hem i talem se hem i haremsave we sik blong hem i finis taem hem i jes tajem klos blong Jisas nomo.

Taem Jisas i harem tok blong woman ya, hem i sore tumas long hem. Nao hem i talem long hem se: “Dota blong mi, bilif blong yu i mekem yu yu gud bakegen. Yu go, tingting blong yu i stap kwaet. Sik blong yu i finis nao.” Yumi glad tumas we God i jusumaot wan man olsem Jisas blong rulum olgeta man long wol. Yumi luksave se hem i tingbaot mo i kea long narafala man, hem i gat sore long ol man, mo paoa blong hem i naf blong givhan long olgeta. Matyu 9:18-22; Mark 5:21-34; Luk 8:40-48; Levitikas 15:25-27.

▪ ?Jaeras hem i hu? ?From wanem hem i kam luk Jisas?

▪ ?Woman we i stap lukaot Jisas, sik blong hem i olsem wanem? ?From wanem i no isi long woman ya blong askem Jisas blong mekem sik blong hem i finis?

▪ ?Olsem wanem sik blong woman ya i finis? ?Olsem wanem Jisas i soemaot sore long hem?