LESEN 51
Toktok Blong Yumi i Save Mekem Jehova i Glad
Taem Jehova i wokem yumi, hem i givim nambawan presen ya blong toktok. ?Yu ting se hem i intres blong save olsem wanem yumi yusum presen ya? !Si, hem i intres! (Ridim Jemes 1:26.) ?Olsem wanem yumi save toktok long fasin we Jehova i glad long hem?
1. ?Olsem wanem yumi save yusumgud presen ya?
Baebol i talem se “yufala i mas gohed blong leftemap tingting blong yufala, mo yufala i mas givgivhan long yufala blong mekem yufala i strong.” (1 Tesalonaeka 5:11) ?Yu tingbaot sam man we yu save enkarejem olgeta? ?Yu save mekem wanem blong oli haremgud? Talem long olgeta se yu yu stap tingbaot olgeta. Maet yu save talem sam samting we yu laekem long saed blong olgeta. ?Yu yu tingbaot wan vas we yu save yusum blong enkarejem wan fren? I gat plante gudfala vas we yu save yusum. Mo tu, tingbaot se fasin blong talem ol toktok mo ol toktok we yumi yusum oli save afektem ol narafala. Taswe oltaem yu mas traem blong toktok long fasin we i kaen.—Ol Proveb 15:1.
2. ?Wanem kaen toktok we yu no mas talem?
Baebol i talem se: “Long ol toktok blong yufala, yufala i no mas talem ol tok we oli roten.” (Ridim Efesas 4:29.) Hemia i minim se yumi no yusum ol tokswea o ol tok we i mekem narafala i harem nogud, o i spolem filing blong narafala. Mo tu, yumi no mas gosip mo giaman blong spolem narafala.—Ridim Ol Proveb 16:28.
3. ?Wanem bambae i halpem yumi blong toktok gud long ol narafala?
Plante taem ol samting we yumi talem, oli soemaot ol samting we i stap long hat o tingting blong yumi. (Luk 6:45) Taswe yumi nidim blong fokas oltaem long ol gudfala samting, olsem ol samting we oli stret, oli klin, oli mekem man i gat lav, mo olgeta samting we God i laekem. (Filipae 4:8) Blong tingbaot ol samting ya, yumi mas jusum gud ol entatenmen mo ol fren blong yumi. (Ol Proveb 13:20) Hemia bambae i givhan long yumi tu blong tingting gud bifo we yumi toktok. Tingbaot olsem wanem ol toktok blong yu oli save afektem ol narafala. Baebol i talem se: “Toktok blong man we i no tingting gud, i stikim man olsem naef blong faet, be tang blong man we i waes, i save hilim man.”—Ol Proveb 12:18.
DIGIM MOA
Lanem olsem wanem blong toktok long fasin we i mekem Jehova i glad mo i leftemap tingting blong ol narafala.
4. Kontrolem ol toktok blong yu
Samtaem yumi talem sam samting we biaen yumi sori from. (Jemes 3:2) Ridim Galesia 5:22, 23, mo tokbaot ol kwestin ya:
Ol fasin ya oli save givhan blong kontrolem ol toktok blong yu, ?weswan long olgeta we bambae yu prea from? ?Olsem wanem ol fasin ya oli save halpem yu?
Ridim 1 Korin 15:33, mo tokbaot kwestin ya:
?Olsem wanem ol fren mo ol entatenmen we yu jusum oli save afektem ol toktok blong yu?
?Wanem i save afektem fasin blong yu blong toktok?
Ridim Prija 3:1, 7, mo tokbaot kwestin ya:
?Wetaem i waes blong stap kwaet mo wet long stret taem blong toktok?
5. Talem ol gudfala toktok long saed blong ol narafala
?Olsem wanem blong no talem ol tok we i no kaen o we i spolem ol narafala? Plei VIDEO, mo tokbaot ol kwestin ya.
Long video ya, ?from wanem brata ya i wantem jenisim fasin blong hem blong tokbaot ol narafala?
?Hem i mekem wanem blong jenisim fasin ya?
Ridim Prija 7:16, mo tokbaot kwestin ya:
?Yu mas tingbaot wanem, bifo we yu tok nogud long saed blong ol narafala?
Ridim Prija 7:21, 22, mo tokbaot kwestin ya:
Taem narafala i tokbaot nogud yu, ?olsem wanem ol vas ya oli save halpem yu blong no kros?
6. Toktok kaen long famle blong yu
Jehova i wantem se yumi toktok long famle blong yumi, long fasin we i kaen mo i soem lav. Plei VIDEO, mo tokbaot kwestin ya.
?Wanem bambae i halpem yu blong toktok kaen long famle blong yu?
Ridim Efesas 4:31, 32, mo tokbaot kwestin ya:
?Wanem kaen toktok i save mekem famle i haremgud?
Jehova i talemaot filing blong hem long saed blong Pikinini blong hem, Jisas. Ridim Matiu 17:5, mo tokbaot kwestin ya:
?Olsem wanem yu save folem fasin blong Jehova, taem yu toktok wetem famle blong yu?
Tekem janis blong talem ol gudfala toktok long ol narafala
SAM MAN OLI SE: “Mi toktok olsem ya nao, sipos oli no laekem, hemia problem blong olgeta.”
?Yu yu agri long toktok ya? ?From wanem yu talem olsem?
SAMARI
Ol tok blong yumi oli save afektem ol narafala. Taswe yumi mas tingting gud long samting we yumi wantem talem, wetaem blong talem mo olsem wanem blong talem.
Tingtingbak
?Wanem sam tok we yumi save talem blong halpem ol narafala?
?Wanem kaen toktok we yu no mas talem?
?Wanem i save halpem yumi blong toktok kaen oltaem mo enkarejem narafala?
FAENEMAOT
?Wanem i save givhan long yumi blong talem ol gudfala toktok?
Luk wanem i save givhan long yu blong no talem ol rabis tok.
Luk olsem wanem yu save blokem fasin ya blong gosip.
Luk olsem wanem Jehova i givhan long wan man we i wantem stop blong tok swea.
“I Began to Think Seriously About Where My Life Was Headed” (Wajtaoa, 1 Ogis 2013)