Naesfala Waet Hea

!BAMBAE i gud tumas sipos yumi toktok wetem ol man mo woman blong bilif bifo! Traem tingbaot se yu stap toktok long ol man olsem Noa, Ebraham, Moses, mo Jon Baptaes, mo tu long sam woman olsem Sera, Rehab, Rut, mo Debora! ?Yu ting se bambae yu glad blong stap wetem olgeta blong harem ol nambawan store blong bifo we oli bin luk wetem prapa ae blong olgeta?

Tede tu, ?yu ting se bambae yu glad blong harem taem ol olfala we oli bilif, oli talem olsem wanem oli stap holemstrong bilif long God taem oli kasem ol traem, taem ol man oli putum tabu long wok blong olgeta, man i kilim olgeta, mo taem oli bin go long kalabus from stret fasin? !Sua bambae yu glad tumas blong harem! Lav blong yumi long God mo respek blong yumi long ol olfala ya bambae i gru moa taem oli stap tokbaot filing blong olgeta mo antap moa taem oli talem olsem wanem oli haremsave se Jeova i stap lukaotgud olgeta.

Long medel blong ol man blong God, oltaem oli ona long ol olfala man mo woman we oli holemstrong long God from ol ekspiryens, save, mo waes blong olgeta. Yes, tok ya we i kamaot biaen i stap tu long Loa we God i givim long ol man Isrel: “Long fored blong waet hea, yu mas stanap, mo yu mas kea gud long man we i olfala, mo yu mas fraet gud long God blong yu. Mi mi Jeova.” (Levitikas 19:​32) Hibru tok we i minim olfala i kamaot long wan stampa mining se “kam waet” mo tu hem i minim “waet hea.” Taswe ol man Isrel oli mas stanap olsem blong respek long wan olfala, olsemia nao oli stap soem fasin ona mo fraet long God.

?Fasin ya blong ona i stap yet tede? ?Eksampel, ol yangfala oli glad blong openem doa long ol olfala? ?Oltaem ol pikinini no ol yangfala oli stap givim ples long ol olfala insaed long bokis we i stap leftemap man i go long ol rum? ?No ol yangfala oli stap givim ples blong sidaon long ol olfala insaed long bas no long tren? I luk olsem sam Kristin man tu oli no mekem olsem.

Be blong mekem God Jeova i glad, ol Kristin oli mas gat fasin we i laenap wetem tingting blong hem, mo oli no mas gat ol tingting, toktok, mo fasin we i olsem ol man we ‘oli stap tingbaot olgeta nomo, oli no save ona long papa mo mama blong olgeta, oli no man blong talem tangkyu, oli no wantem ol fasin we i gud nomo, oli agens long hem.’ (2 Timote 3:​1-5) ?Be, Tok blong God i talem wanem long saed blong yangtaem mo waet hea?

Paoa Blong Yangfala

Baebol i tokbaot paoa blong yangfala mo ol gud samting long hem, i se: “Naesfala samting long ol yangfala man hemia paoa blong olgeta.” (Proveb 20:​29) Long Isrel bifo ol yangfala Livaet oli yusum paoa blong olgeta long tempel, plante taem oli yusum blong mekem ol wok we oli strong moa. Tede, ol yangfala man mo woman we oli givim paoa mo save blong olgeta blong mekem wok blong Kingdom i go moa, oli stap mekem bighaf blong ol wok long ol faktri, ol haos Betel, mo long ol bilding blong ‘Watch Tower’ Sosaeti. (Matyu 6:​33) Oli glad long ol nambawan wok insaed long wok blong God.

Vas ya long Proveb we yumi jes tokbaot i finis wetem ol tok ya se, “mo waet hea hem i flasemgud ol olfala.” Taem paoa blong yangfala i joen wetem ekspiryens mo waes blong olfala, wan samting i joengud.

Eksampel: Wan yangfala kapenta we oli askem hem blong nilim sam samting hem i traem blong mekem wok ya wetem paoa blong yangfala taem blong hem. Wan olfala, we i gat plante moa ekspiryens long wok blong kapenta i luksave se nating we yangfala i gat paoa, yangfala fren blong hem i stap tekem moa taem blong kilim nil i go insaed long wud. Olfala ya i talem long yangfala se i gud moa blong holem hama kolosap long en blong handel, bitim we hem i holem kolosap long medel blong handel. Samting ya i save givhan long yangfala blong kilimgud nil, rod ya i kwik mo i sevem paoa blong yangfala ya.

Sem mak, wan yangfala woman we i gat paoa i save lanem long ol hadwok mo ol mastik blong hem se hem i save spolem sam klos sipos hem i no wasem olgeta folem ol advaes we i stap. Be wan olfala woman we i gat ekspiryens i save se i gud blong tekem taem blong seraotem ol klos mo wasem sam kaen klos olgeta nomo. Hem i save tu se blong no aenem sam kaen klos, hem i mas benem ol klos taem hem i tekemaot olgeta long waea no long mesin blong mekem klos i drae.

Fasin blong lanem samting long olgeta we oli gat ekspiryens i save mekem laef i isi moa. Be, i gat taem we ol man we oli gat ekspiryens oli no save mekem sam wok we oli naf blong mekem sam yia bifo. Wan man blong raetem buk i talem se: “Bambae i gud moa sipos ol yangfala oli gat save, mo ol olfala oli gat paoa.” Be i gud tumas taem ol olfala oli luksave paoa blong ol yangfala mo oli soem sam ekspiryens we oli kasem long plante yia finis long ol yangfala​—⁠!mo ol yangfala oli gat tingting daon blong akseptem ol advaes! Long rod ya, tufala tugeta, hemia ol olfala mo ol yangfala oli save kasem blesing from.

Kasem Naesfala Samting

I no naf blong gat plante yia. Yangfala man Elaehu i talem se, “I no se olgeta nomo we oli gat plante yia oli waes, no olgeta we oli olfala oli save luksave fasin blong stretem man.” (Job 32:​9; Eklesiastis 4:​13) Blong man i rili kam waes from olfala, olfala ya i mas yusumgud laef blong hem bitim we hem i stap les mo spenem blong lukluk televisin, go luk ol spot, no hem i stap spel oltaem. Mo tu long olfala taem blong hem, hem i mas gohed blong lanem sam samting.

Sam man oli tokflas from ol samting we olgeta nomo oli stap mekem, no oli talem se: “Lan from ekspiryens hem i gud moa.” Be, Tok blong God i givim advaes se: “Man we i waes, bambae hem i lesin long ol tok we oli save tijim hem, mo i holem gud olgeta. Mo man we i save kasem dip save, bambae hem i kasem gudhan blong bos long ol samting.” (Proveb 1:​5; lukluk 1 Korin 10:​11.) Oltaem ekspiryens i no nambawan samting blong lan long hem, yumi save lan long mastik blong narafala man blong yumi no save mekem sem mastik. Mo tu, wan Kristin i wantem tingbaot se “waet hea i naes olsem hat blong King blong flasem hed blong man, sipos man ya i stap folem wei blong stret fasin.” (Proveb 16:​31) Man we i spenem laef blong hem blong mekem wok blong Jeova hemia naes samting long lukluk blong God mo hem i save winim respek blong ol narafala man olsem we hem i wan gudfala eksampel. Yes, lanem sam samting long saed blong God mo gat ekspiryens long “wei blong stret fasin” i save stat taem yu yangfala mo hem i no samting blong stopem samtaem.​—⁠Rom 11:​33, 34.

Wan ekspiryens blong wan smol boe blong Swiden we i gat seven yia i soemaot samting ya. Hem i askem elda blong kongregesen we i lukaot Tiokratik Skul sipos hem i save joen long skul. Elda we i lukaot long skul i askem hem se, “?From wanem?” Nao yangfala i ansa se: “!Yumi no save westem laef blong yumi long nating!” (Eklesiastis 12:​1) !Hemia wan gudfala eksampel long ol yangfala mo ol olfala tu!

Ona Long Ol Olfala

Wan nogud fasin blong tede se ol man oli stap leftemap lukluk blong man mo ol man blong spot mo oli lukluk daon long ol olfala. ?Wanem tingting ol Kristin oli mas gat long ol olfala insaed long kongregesen?

I nogud blong fogetem ol olfala Kristin, yumi mas tingbaot olgeta mo spenem taem wetem olgeta. Eksampel, evri wik long ol miting blong ol Wetnes blong Jeova long Haos Kingdom, ?yu yu traem blong talem halo long ol olfala? Oli rili laekem ol halo blong ol yangfala pikinini mo ol narafala. !Mo ol olfala oli glad tu blong stap long sam kakae wetem ol narafala fren blong bilif we oli gat ol defren yia! Ating ol yangfala we i jes mared oli gat sem intres wetem ol narafala man we oli mared finis, be i gud blong askem ol olfala tu blong stap wetem olgeta long ol gudfala taem olsem.​—⁠1 Tesalonaeka 3:​12; 5⁠:⁠15.

!I impoten tumas blong gat fasin ona long ol olfala taem yumi toktok wetem olgeta! Taem wan olfala we i spenem 40 yia finis long wok blong Jeova i toktok wetem narafala elda sipos hem i save mekem sam wok long kongregesen, elda ya we i no olfala tumas i talem se: “Yu yu no naf blong givhan.” !Tok ya i no kaen nating! Olfala brata ya i no gat bigfala paoa olsem bifo, haoa blong hem long wok blong prij i stap godaon, mo naoia maet i hadwok long hem blong hem i mekem wok blong lukaot; be, i gat plante samting we hem i save givim. Hem i kasem waes mo ekspiryens long wei blong stret fasin long plante yia finis. From we ol olfala olsem oli bin wok strong olsem man blong talemaot Kingdom, winim ol trabol, karem ol bigfala Kristin responsabiliti, oli trenem ol narafala, ol man blong God naoia oli haremgud long wan strong ogenaesesen we speret blong hem i sapotem. Taswe i gud yumi soem fasin ona long ol olfala olsem we oli waes man blong givim advaes, oli gudfala man blong lukaot long sipsip, mo oli karem frut long wok blong olgeta olsem ol tija.

I gat gudfala risen tu from wanem yumi mas tingtinggud long ol advaes we ol olfala oli stap givim. Eksampel, wan brata we i gat ekspiryens i talem se i nogud doa blong wan Haos Kingdom i fesem saed ya we san i stap godaon long hem. Ol yangfala brata we oli tingting moa long saed blong naes lukluk blong bilding oli no folem advaes blong hem. Be afta long sam yia, oli mas jenisim doa ya from we oltaem win mo ren we i kam long saed ya we san i stap godaon long hem i spolem doa ya. Waes blong ekspiryens we man i kasem i bitim ol samting we man i save lukluk. Sipos ol yangfala oli stap ona long ol olfala, nao oli lesin long tingting mo waes blong olgeta, samting ya bambae i sevem taem mo mane. Mo tu sipos oli no folem advaes blong man we i olfala moa, oli save ona long hem sipos oli talem long hem se oli stap tingbaot wanem hem i talem, be ol narafala samting i mekem se oli folem narafala disisin.​—⁠Lukluk Proveb 1:​8.

Lukluk i Go Fored, i No Go Biaen

Sam olfala man oli stap talem se: “Naoia i no olsem bifo taem yumi yangfala.” I gud moa blong leftemap tingting blong ol olfala olsem blong oli lukluk i go fored long taem ya we bambae oli save kasem pei blong olgeta long heven no kasem bakegen paoa blong yangtaem blong olgeta, aninit long rul blong Kingdom blong God, bitim we oli stap tingting long ol samting we i pas finis. Naoia, i gud blong oli mas luksave ol prapa mak blong olgeta from we oli olfala. Fasin luksave ya mo fasin glad oli impoten tumas taem oli no kasem ol gudfala wok insaed long kongregesen.

Eksampel, maet bifo, oltaem oli stap yusum wan olfala brata blong givim tok long distrik asembli. Naoia i gat plante elda we oli naf mo oli jusum olgeta we oli gat gudhan blong tij. Nating se oli yangfala, sam long ol elda ya oli soem se oli gat strong tingting mo oli gat gudhan, oli save tijgud mo oli save givim ol gudfala toktok long narafala, mo leftemap tingting blong ol narafala. (1 Tesalonaeka 5:​12, 13; 1 Timote 5:​17) From samting ya, wan olfala brata we i no givim tok long asembli maet i ting se oli no tingbaot hem mo maet hem i harem nogud taem oli givim wok ya long ol yangfala elda. Be, hem i save winim nogud tingting ya, tingting i kamaot from yumi no stretgud olgeta. Yes, evriwan long kongregesen oli save givhan long ol olfala ya taem oli talem long olgeta se oli nidim olgeta, se oli laekem olgeta from we oli holemstrong bilif blong olgeta, mo oli luksave tingting blong olgeta.

Tru ya, wan olfala i mas tingbaot se hem i mas ona long ol narafala fren we oli stap wosip long God olsem we hem i wantem narafala i givim ona long hem. (Matyu 7:​12; Rom 12:​10) I nogud blong ol olfala oli ting se oli stap fosem olgeta blong livim wok blong olgeta mo oli harem nogud long nogud tingting blong olgeta, ol olfala oli mas glad long ol yia we oli bin mekem wok blong God. Mo tru ya, yumi evriwan yumi mas glad from blesing blong Jeova, we i mekem se namba blong ol man we oli naf blong lukaot i stap gru blong oli serem ol wok mo karem ol responsabiliti blong kongregesen, taem bigfala hif blong “narafala sipsip” oli stap kam long Kristin ogenaesesen.​—⁠Jon 10:​16; Aesea 60:​8, 22; 2 Timote 2:​2.

From trabol soa long bodi, sik, mo narafala samting bakegen, samtaem ol olfala we hea blong olgeta i waet oli save kros long ol smosmol samting. From samting ya ol memba blong famle no kongregesen oli mas luksave mo gat fasin sore long olgeta. Mo tu ol olfala oli mas wok strong blong holem gudfala tingting, blong oli stap yangfala long hat mo tingting blong olgeta. Taem wan fren we i stap wetem olfala memba blong Hed Kampani blong ol Wetnes blong Jeova i aot long Betel sam yia bifo, hemia we i olfala moa i askem hem blong talem hu nao i stret blong tekem ples blong hem mo hemia we i olfala moa i talem se, hem i laekem moa sipos hemia we bambae i stap wetem i wan brata we i bigman long saed blong speret mo i yangfala moa long hem blong givhan long hem blong hem i stap yangfala mo gohed blong wok. Olfala brata ya we tabu speret i makemaot hem i no wantem finis long wok no hem i wantem mekem smol wok nomo, no gat, from hem i gat wok blong mekem. !Hemia wan gudfala eksampel blong lukluk i go fored mo holem wan stret tingting!

Yes i tru, “naesfala samting long ol yangfala man hemia paoa blong olgeta, mo waet hea hem i flasemgud ol olfala.” !I gud tumas taem ol yangfala oli yusum paoa blong olgeta mo ol olfala oli yusum waes blong olgeta blong stap gohed long rod ya blong stret fasin! Ol olfala mo ol yangfala Kristin oli haremgud taem oli joen blong leftemap trufala wosip long Jeova God, hemia “Olfala ya blong bifo we bifo olgeta.”​—⁠Daniel 7:​13.

[Tok Blong Pija Long Pej 29]

Ol Kristin we oli gat waet hea finis oli gat plante samting blong givim blong givhan long ol narafala