Jeova i Rili Kea Long Ol Olfala We Oli Mekem Wok Blong Hem

“Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.”—HIB. 6:10.

1, 2. (a) ?Taem yu luk wan man no woman we i gat waet hea, samting ya i mekem yu yu tingbaot wanem? (b) ?Wanem tingting blong Jeova long ol olfala Kristin?

?TAEM yu luk wan olfala insaed long kongregesen we i gat waet hea, yu yu tingbaot wan vas blong Baebol long buk blong Daniel? Long wan vison we Jeova i givim long Daniel, Jeova i tokbaot hem wan se hem i gat waet hea. Daniel i raetem se: “Nao taem mi stap lukluk, mi luk sam man oli karem ol spesel jea blong king i kam, nao oli putumrere olgeta i stap wanples. Mo mi luk wan Olfala we i stap fastaem bifo olgeta, mo bambae i stap gogo i no save finis, hem i kam sidaon long wan long ol jea ya. Olfala ya, ol klos blong hem i waet we i waet, mo hea blong hem i waet gud, olsem koten we i klin gud.”—Dan. 7:9.

² Tok ya ‘hea we i waet gud, olsem koten’ mo taetel ya “Olfala we i stap fastaem” i pulum tingting blong yumi blong tingbaot God se hem i laef longtaem mo hem i waes tumas. From samting ya, yumi mas soem bigfala respek long Hem. ?Be, Olfala ya we i stap fastaem, Jeova God, hem i gat wanem tingting long ol olfala man mo woman we oli stap tru long hem? Tok blong God i talem se: “Waet hea i olsem wan hat we i naes tumas long man we i mekem stret fasin.” (Prov. 16:31, NW) Yes, sipos wan Kristin i stap tru long God longtaem nao hem i kam olfala we hea blong hem i grei no i waet, samting ya i naes tumas long ae blong God. ?Yu yu gat sem tingting olsem Jeova long saed blong ol olfala brata mo sista?

?From Wanem Yumi Mas Tinghae Long Olgeta?

 3. ?From wanem yumi tinghae long ol olfala brata mo sista blong yumi?

³ Long olgeta olfala ya we Jeova i laekem olgeta mo we oli mekem wok blong Hem, i gat ol memba blong Hed Kampani blong ol Witnes blong Jeova, olgeta we oli bin mekem mo stap mekem wok blong seket elda, ol paenia we oli wok strong long wok blong Jeova mo ol pablisa blong Kingdom we oli bigman long saed blong spirit. Olgeta ya oli ol brata mo sista we oli gohed blong wok long ol kongregesen blong yumi wetem strong bilif. Maet yu save samfala we oli wok strong blong talemaot gud nius blong plante yia mo we gudfala eksampol blong olgeta i givim paoa long plante yangfala mo halpem olgeta blong oli tekem ol gudfala desisen long laef blong olgeta. Sam long ol olfala ya, oli mekem sam bigfala wok mo oli stanap strong taem oli fesem fasin agens from gud nius. Jeova mo “slef we i stret mo waes,” oli glad tumas long ol wok we olgeta ya oli mekem bifo mo naoia yet blong sapotem ol wok blong Kingdom.—Mat. 24:45, NW.

 4. ?From wanem yumi mas soem respek long ol olfala Kristin mo prea from olgeta?

⁴ I stret we ol narafala man blong Jeova oli soem tangkiu mo respek long ol olfala ya. Tru ya, Loa we God i givim long Moses blong talemaot long ol man Isrel, i joenem fasin blong tinghae long ol olfala mo respektem olgeta wetem fasin ya blong fraetgud long Jeova. (Lev. 19:32, NW) Yumi mas prea oltaem from ol olfala ya we oli stap tru long Jeova mo talem tangkiu long God from ol wok we oli mekem wetem lav. Aposol Pol i prea from ol fren blong hem we oli yang mo olgeta we oli olfala tu.—Ridim 1 Tesalonaeka 1:2, 3.

 5. ?Yumi save kasem wanem gudfala frut taem yumi kampani wetem ol olfala man blong Jeova?

⁵ Mo tu, evriwan long kongregesen oli save kasem gudfala frut taem oli kampani wetem ol olfala Kristin. Taem ol olfala man blong Jeova oli stadi, mo oli pastru long ol defren samting we oli hapen long laef blong olgeta, hemia i mekem se oli kasem wan save we i sas tumas. Oli lanem blong soemaot longfala tingting mo sore, mo oli serem wanem we oli lanem long olgeta we oli bon biaen long olgeta. Samting ya i mekem ol olfala ya oli glad bigwan. (Sam 71:18) Ol yangfala, yufala i mas waes mo yusum save we yu lanem long ol olfala ya, olsem we yu karem wota long wan wel.—Prov. 20:5.

 6. ?Olsem wanem yu save soemaot long ol olfala se yu tinghae long olgeta?

⁶ ?Fasin blong yu i soemaot long ol olfala se yu yu lavem olgeta olsem we Jeova i lavem olgeta? Wan rod blong mekem samting ya, hemia blong talem long olgeta se yu lavem olgeta from we oli stap tru long Jeova mo yu tinghae long ol tingting blong olgeta. Antap moa, taem yu mekem samting folem wanem we yu lanem long olgeta, yu soemaot se yu rili gat respek long olgeta. Plante olfala Kristin oli save tingtingbak long taem we oli bin yangfala mo ol waes advaes we oli kasem long ol olfala Kristin we oli stap tru long Jeova. Mo tu oli tingbaot se taem oli folem ol advaes ya, hem i givhan bigwan long laef blong olgeta.a

Mekem Sam Samting Blong Soem Se Yu Rili Kea

 7. ?Jeova i givim wok ya blong lukaot long ol olfala long hu fastaem?

⁷ God i givim wok ya blong lukaot long ol olfala, long prapa famle blong olgeta fastaem. (Ridim 1 Timoti 5:4, 8.) Jeova i glad taem ol famle ya oli lukaotgud long ol olfala we oli prapa famle blong olgeta. Ol famle we oli mekem olsem, oli soemaot se oli kea long ol olfala ya sem mak olsem we Jeova tu i kea long olgeta. God i givhan long ol famle ya mo i blesem olgeta from traehad blong olgeta mo from olgeta sakrefaes we oli mekem.b

 8. ?From wanem kongregesen i mas tingbaot ol olfala Kristin?

⁸ Mo tu, Jeova i glad taem kongregesen i givhan long ol gudfala olfala we oli gat nid from we oli no gat wan famle blong olgeta we i bilif no ol famle oli no wantem lukaot long olgeta. (1 Tim. 5:3, 5, 9, 10) Taem ol brata sista long kongregesen oli mekem olsem long ol olfala, oli soemaot se oli ‘gat sore, oli lavem narafala olsem we oli wan brata nomo, mo oli mekem i gud long narafala.’ (1 Pita 3:8) Pol i eksplenem gud olsem wanem olgeta long kongregesen oli mas givhan long ol olfala memba blong kongregesen, taem hem i tokbaot se sipos wan haf blong bodi blong man i nogud, “be bambae olgeta bodi . . . i mas harem nogud.” (1 Kor. 12:26) Taem yumi mekem sam samting blong mekem i gud long ol olfala, yumi soemaot bigfala tingting long advaes ya blong Pol se: “Yufala i mas stap givgivhan long yufala long ol trabol blong yufala. Long fasin ya, bambae yufala i save mekem ol samting we loa blong Kraes i talem.”—Gal. 6:2.

 9. ?Wanem trabol we wan man i kasem taem hem i kam olfala?

⁹ ?Wanem trabol we ol olfala oli gat? Plante long olgeta oli stap taed kwiktaem. Oli harem se oli no naf nating blong mekem ol isi samting olsem, go long dokta, pem telefon, laet mo wota, klinim haos, rerem kakae. Taem oli stap kam moa olfala, oli no moa wantem kakae mo dring, ale, maet oli ting se i no nid blong oli kakae mo dring plante olsem we oli nidim. Oli save gat semfala tingting long ol kakae long saed blong spirit. From we maet ae mo sora blong olgeta i no moa gud, oli faenem i had blong rid mo lesin long ol miting. Oli harem se i wan hadwok jes blong rere blong go long ol Kristin miting. ?Wanem samting we ol narafala oli save mekem blong givhan long ol olfala ya?

?Olsem Wanem Yu Save Givhan?

10. ?Ol elda oli save mekem wanem blong meksua se ol olfala oli kasem samting we oli nidim?

¹⁰ Plante kongregesen oli kea long ol olfala mo oli givim wan gud eksampol long saed ya. Ol brata mo sista oli halpem olgeta blong go pem samting long stoa, blong kuk mo klinim haos. Oli halpem ol olfala ya blong stadi, blong rere from ol miting mo blong oli joen oltaem long wok blong prij. Olgeta Witnes we oli strong long bodi, oli givhan long ol olfala ya blong wokbaot i go long ol miting no wok blong prij mo ol brata sista we oli gat trak oli givhan tu blong karem ol olfala ya i go long ol miting. Sipos wan olfala i no save aot long haos, ol brata oli mekem wan rod blong olfala ya i save lesin long ol miting long telefon no long ol kaset we oli rikodem ol miting long olgeta. Ol elda oli traem bes blong olgeta blong meksua se evriwan i folem ol gudfala plan we kongregesen i bin stanemap blong halpem ol olfala.c

11. Tokbaot olsem wanem wan famle i halpem wan olfala brata.

¹¹ Wanwan Kristin tu i save soemaot kaen fasin mo i save glad blong givim samting long ol olfala. Afta we waef blong wan olfala brata i ded, olfala brata ya i no moa naf blong pem renhaos blong hem from we hem i no moa kasem mane we gavman i stap givim long waef blong hem. Brata ya mo waef blong hem, oli bin stadi Baebol wetem wan famle—wan papa, mama mo tu yangfala gel. Famle ya i gat wan bigfala haos. Oli givim tu rum blong brata ya i stap long tufala. Brata ya i stap wetem olgeta blong 15 yia mo long ol taem ya, hem i kakae wetem olgeta, oli gat gudtaem tugeta mo oli lavem olgeta olsem we oli wan famle nomo. Famle ya i lanem plante samting from bilif mo ol ekspiriens blong olfala brata ya. Mo gudtaem we brata ya i gat blong kampani wetem famle ya, i givhan bigwan long hem. Olfala brata ya i laef wetem olgeta kasem we hem i ded taem hem i gat 89 yia. Famle ya i gohed yet blong talem tangkiu long God from plante blesing we oli kasem long ol taem ya we olfala brata ya i bin stap wetem olgeta. Olgeta ya oli ‘mas gat pei blong olgeta’ from oli halpem wan disaepol blong Jisas Kraes.—Mat. 10:42.d

12. ?Yu save mekem wanem blong soem se yu rili kea long ol olfala brata mo sista?

¹² Maet yu no save givhan long wan olfala brata no sista olsem we famle ya i mekem, be maet yu naf blong givhan long wan olfala Kristin blong kam long ol miting mo go long wok blong prij. Yu save singaotem olgeta tu blong oli kam long haos blong yu mo sipos yu mekem wan sot wokbaot i go samples, yu save singaot olgeta tu blong oli kam wetem yu. Yu save visitim olgeta speseli taem oli sik, oli no save wokbaot no oli no save aot long haos blong olgeta. Antap long ol samting ya, oltaem, taem yu stap mekem wan samting blong givhan long olgeta, yu mas tingbaot olgeta olsem ol narafala bigman. Sipos ol olfala Kristin oli naf yet blong yusum tingting, i gud we olgeta oli talem tingting blong olgeta long saed blong ol desisen we oli gat paoa long laef blong olgeta. Nating se tingting blong sam olfala Kristin i no moa klia, oli save harem save yet sipos yumi mekem samting long olgeta wetem ona mo respek.

Jeova Bambae i No Fogetem Ol Wok Blong Yu

13. ?From wanem i impoten blong soemaot se yumi kea long filing blong ol olfala Kristin?

¹³ I impoten blong soemaot se yumi kea long filing blong ol olfala. Plante taem ol olfala oli harem nogud from oli no moa save mekem sam samting we oli bin naf blong mekem taem oli yang mo oli gat paoa. Tingbaot wan sista we i mekem wok blong Jeova samwe 50 yia mo i bin wan fultaem paenia. Hem i kasem wan strong sik we i mekem se sloslo, hem i lusum paoa blong hem blong mekem samting, nao, hem i faenem i had tumas blong go long ol miting. Taem hem i skelem ol wok blong Jeova we hem i bin mekem bifo wetem wanem we hem i naf blong mekem naoia, hem i harem nogud mo i stap krae. Hem i benem hed blong hem mo hem i stap krae i talem se: “Mi harem se samting we mi mekem naoia i nating nomo.”

14. ?Olsem wanem ol tok blong Ol Sam i save leftemap tingting blong ol olfala we oli mekem wok blong Jeova?

¹⁴ ?Sipos yu yu olfala, yu yu gat ol filing olsem? ?Samtaem yu harem olsem se Jeova i lego yu? Maet man blong raetem Ol Sam tu i gat filing olsem taem hem i kam olfala, from we hem i prea long Jeova i se: “Naoia mi mi kam olfala. Plis yu no tanem baksaed long mi. Naoia mi mi no moa strong. Plis yu no lego mi. Naoia mi mi olfala, hea blong mi i waet. . . . Plis yu stap wetem mi, yu no lego mi.” (Sam 71:9, 18) Tru ya, Jeova i no gat tingting blong lego man ya blong raetem Sam, mo bambae hem i no lego yu tu. Long wan narafala Sam, Deved i talemaot strong tingting we hem i gat se Jeova bambae i givhan long hem. (Ridim Ol Sam 68:19.) Yu save gat strong tingting se sipos yu yu wan olfala Kristin we i stap tru long Jeova, bambae Jeova i stap wetem yu mo bambae i gohed blong givhan long yu evri dei.

15. ?Wanem i save halpem ol olfala Kristin blong oli holem gudfala tingting oltaem?

¹⁵ Oltaem Jeova i stap tingbaot olgeta samting we yufala ol olfala Witnes blong hem i bin mekem mo stap mekem naoia blong leftemap nem blong hem. Baebol i talem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.” (Hib. 6:10) From samting ya, yufala i no mas gat nogud tingting ya se from we yufala i olfala, Jeova i no moa save yusum yufala. Traehad blong sakemaot ol nogud tingting we oli mekem tingting blong yufala i foldaon mo putum tingting blong yufala i stap long ol gudfala samting. !Haremgud long ol blesing we yufala i kasem mo hop we yufala i gat long fiuja! Yumi gat “wan fiuja mo wan hop”—hemia we i beswan—mo hemia samting we Man ya we i Wokem yumi i promes blong givim long yumi. (Jer. 29:11, 12, NW; Wok 17:31; 1 Tim. 6:19) Tingbaot hop we yufala i gat mo wok strong blong stap olsem wan yangfala long hat mo long tingting blong yufala. !Yufala i neva mas ting nating long wok we yufala i mekem long kongregesen! !Yufala i sas tumas long ol brata sista!e

16. ?From wanem wan olfala brata i ting se hem i mas stop blong wok olsem wan elda, be olsem wanem ol narafala elda oli leftemap tingting blong hem?

¹⁶ Tingbaot Johan, we nating se hem i gat 80 yia blong hem, be hem i spenem fultaem blong hem blong lukaot long waef blong hem, Sannief we tede hem i handikap. I gat wan stret taem we ol sista wanwan oli kam stap wetem Sannie, olsem nao, Johan i save go long ol miting mo long wok blong prij. Be i no longtaem i pas, Johan i harem nogud long filing blong hem mo i stap tingting se bambae hem i no moa mekem wok olsem wan elda long kongregesen. Hem i krae mo i askem se: “?From wanem mi mi stap olsem wan elda? Mi mi no moa save mekem samting blong givhan long kongregesen.” Ol narafala elda oli soemaot long hem se oli nidim save mo waes we hem i gat from we hem i pastru long plante samting mo oli nidim fasin blong hem blong lukluk long ol defren bisnes long kongregesen. Oli leftemap tingting blong hem blong gohed blong wok olsem wan elda, nating sipos hem i mekem smol nomo long wok ya. Ol brata oli leftemap tingting blong Johan bigwan, mekem se hem i gohed blong wok olsem wan elda mo hemia wan blesing long kongregesen.

Jeova i Rili Kea

17. ?Baebol i givim wanem promes long ol olfala Kristin?

¹⁷ Baebol i talem klia se ol olfala oli save gohed yet blong karem frut long wok blong Jeova nating se oli gat ol trabol blong olfala. Man blong raetem Sam i talem se: “Ol man we fasin blong olgeta i stret oli stap oltaem long haos blong hem. . . . Oltaem oli stap kam strong moa, olsem ol tri we man i planem long gudfala graon. . . . Olgeta [“we hea blong olgeta i waet,” NW] oli strong olsem olfala tri we lif blong hem i stap grin oltaem mo i stap karem plante frut yet.” (Sam 92:13, 14) Aposol Pol we i bin fesem ol traem long bodi, i no letem ‘tingting blong hem i kam nogud’ nating se ‘bodi blong hem i stap kam nogud moa oltaem.’—Ridim 2 Korin 4:16-18.

18. ?From wanem ol olfala Kristin mo olgeta we i lukaot long ol olfala, oli nidim we narafala i halpem olgeta?

¹⁸ Plante eksampol tede oli soemaot se ol olfala oli “stap kam strong moa.” Be ol trabol blong sik mo olfala oli save mekem man i fraet mo i wari, nating sipos oli gat famle we oli lavem olgeta mo oli wok strong long halpem olgeta. Olgeta we oli lukaot long wan olfala, oli save kam taed tu. Kongregesen i kasem blesing mo nambawan wok ya blong soemaot lav blong olgeta long ol olfala mo long olgeta we oli stap lukaot long ol olfala ya. (Gal. 6:10) Fasin blong givhan olsem i soemaot se yumi no stap talem nomo long wan olfala blong i go ‘putum klos blong hem i wom, mo hem i kakae,’ be yumi no mekem samting blong givhan long hem. Nogat.—Jem. 2:15-17.

19. ?From wanem ol gudfala olfala Kristin oli save tingbaot fiuja wetem strong bilif?

¹⁹ Samtaem, taem man i kam olfala, samting ya i jenisim ol wok we hem i save mekem olsem wan Kristin, be taem i no jenisim lav we Jeova i gat long ol olfala we oli stap tru long hem. Defren olgeta, ol gudfala olfala Kristin ya oli sas long ae blong Hem mo bambae hem i neva lego olgeta. (Sam 37:28; Aes. 46:4) Jeova bambae i givhan mo lidim olgeta long taem ya we oli kam olfala.—Sam 48:14.

[Ol futnot]

?Bambae Yu Yu Ansa Olsem Wanem?

• ?From wanem yu tingbaot ol gudfala olfala Kristin se oli sas?

• ?Olsem wanem yumi save soemaot se yumi rili kea long ol olfala brata mo sista?

• ?Wanem i save halpem ol olfala man blong Jeova blong oli holem gudfala tingting?