Faenem Rod Blong Fasin Blong Laekem Tumas Ol Brata

“Ale yufala i mas joenem fasin blong laekem tumas ol brata blong yufala long fasin fasgud long God.”​—⁠2 PITA 1:​5-7, NW.

 1. ?Wanem wan long ol bigfala risen we i mekem se ol man blong Jeova oli stap glad taem oli hivap wanples?

WAN dei wan dokta we i no wan Wetnes blong Jeova i go luk pikinini gel blong hem i finisim skul long ‘Watch Tower Bible School of Gilead’, ples we hem i kasem trening long misinari wok. Hem i laekem tumas fasin glad blong ol hif man we oli stap nao hem i ting se i mas gat smol namba blong olgeta nomo oli stap sik. ?Wanem i mekem ol hif man ya oli hapi tumas? Mo tu, taem ol man blong Jeova oli hivap wan ples, long ol kongregesen, long ol seket asembli, mo long ol distrik asembli, ?wanem i mekem se ol taem olsem oli hapi taem? ?Yu no ting se hem i kamaot from fasin blong laekem tumas ol brata? Si hemia nao, fasin blong laekem tumas ol brata i wan risen we i mekem ol man oli talem se, i no gat ol narafala skul we ol man blong hem oli stap glad, oli hapi, mo haremgud long skul olsem ol Wetnes blong Jeova.

2, 3. ?Wanem tufala Grik wod we oli tokbaot filing we yumi mas gat long narafala, mo wanem samting i defren long tufala wod ya?

² Yumi mas gat tingting blong luk fasin ya blong laekem tumas ol brata olsem tok blong aposol Pita long 1 Pita 1⁠:22 se: “Yufala i mekem laef blong yufala i klin finis long fes blong God, from we yufala i obei long ol trutok finis, nao yufala i save laekem ol brata blong yufala long fasin we i stret gud. Oraet, yufala i mas laeklaekem yufala long olgeta tingting blong yufala, long fasin we i no save jenis.” Wan long ol Grik wod we oli tanem i kam “fasin blong laekem tumas ol brata” hem i phi·liʹa (fasin blong laekem tumas). Mining blong hem i kolosap sem mak long a·gaʹpe, tok ya we oli transletem i kam ‘lav.’ (1 Jon 4:⁠8) Nating se plante taem oli stap jenisim tok ya ‘fasin blong laekem tumas ol brata’ wetem ‘lav’, tufala i gat prapa mining blong tufala. Yumi no mas meksemap tufala, olsem plante man blong transletem Baebol oli mekem. (Long stadi ya mo long narawan biaen, bambae yumi tokbaot tufala tok ya.)

³ Long saed blong ol defren mining blong tufala tok ya, wan man we i save gud long lanwis Grik i talem se phi·liʹa hem i “wan stret tok blong filing mo joengud olsem fren mo fasin blong kaengud long narafala.” Be long saed blong a·gaʹpe, hem i kamaot long tingting. Taswe taem Baebol i talem se yumi mas laekem (a·gaʹpe) ol enemi blong yumi, yumi no gat filing long olgeta olsem fren. ?From wanem? From we “ol stret man nomo, be ol fren blong olgeta we oli no stret, oli save spolem fasin blong olgeta.” (1 Korin 15:33) Mo bakegen ol tok blong aposol Pita oli soem se tufala tok ya oli defren, hem i se: “Yufala i gat fasin blong laekem tumas ol brata blong yufala, ale yufala i mas joenem long fasin blong laekem tumas ol man.”​—⁠2 Pita 1:​5-7; lukluk Jon 21:​15-17.a

Ol Eksampel Blong Nambawan Spesel Fasin Blong Laekem Tumas Ol Brata

 4. ?From wanem Jisas mo Jon tufala i gat spesel filing long tufala?

⁴ Tok blong God i givim long yumi sam gudfala eksampel blong nambawan spesel fasin blong laekem tumas ol brata. Spesel filing ya i no kamaot from we yu nomo yu wantem be hem i kamaot from yu luksave ol gudfala fasin blong narafala. Yes nambawan eksampel hemia filing blong Jisas Kraes long aposol Jon. I tru, Jisas i soem fasin blong laekem tumas ol brata long olgeta aposol blong hem we oli stap holem strong, mo hem i mekem olsem from gudfala risen. (Luk 22:28) Wan rod we hem i soem samting ya taem hem i wasem leg blong olgeta, olsemia nao hem i tijim olgeta long fasin blong gat tingting daon. (Jon 13:​3-16) Be Jisas i gat wan spesel filing long Jon, we oltaem Jon i stap tokbaot. (Jon 13:23; 19:26; 20:⁠2) Nating se Jisas i gat risen blong soem filing long ol disaepol mo ol aposol blong hem, Jon i mekem se Jisas i gat spesel filing long hem from Jon i gat fasin tangkyu moa long Jisas. Yumi luk samting ya long ol raeting blong hem, olsem long Gospel blong hem mo ol leta blong hem. !Oltaem hem i tokbaot lav long ol raeting ya! Yumi save luk bigfala fasin tangkyu blong Jon long ol fasin blong Jisas long saed blong speret long ol tok we hem i raetem long Jon japta 1 mo 13 kasem 17, mo tu long ol toktok we oltaem hem i tokbaot laef blong Jisas bifo we hem i kam laef long wol olsem man.​—⁠Jon 1:​1-3; 3:13; 6:​38, 42, 58; 17:5; 18:⁠37.

 5. ?Yumi save talem wanem long saed blong spesel filing we Pol mo Timote tufala i gat long tufala?

⁵ Mo tu, yumi no wantem mestem spesel fasin blong laekem tumas ol brata we aposol Pol mo Kristin fren blong hem Timote tufala i gat long tufala, we rili i kamaot from tufala i luksave ol fasin blong tufala. Pol i talem ol gudfala toktok long saed blong Timote long ol raeting blong hem, olsem hemia se: “I no gat narafala man long ples ya we i gat sem tingting we Timote i gat, we hem i stap tingbaot yufala tumas. . . . Yufala i save we hem i soemaot fasin blong hem finis, from we hem i wok wetem mi long ol wok blong gud nyus blong Kraes, olsem we pikinini i stap wok wetem papa blong hem.” (Filipae 2:​20-22) I gat plante toktok long leta blong hem we oli go stret long Timote we oli soem filing we Pol i gat long Timote. Eksampel, makem 1 Timote 6:20 se: “Timote, yu mas holemgud olgeta samting ya we God i putum long han blong yu finis.” (Lukluk tu long 1 Timote 4:​12-16; 5:23; 2 Timote 1:5; 3:​14, 15.) Samting ya i tru moa taem yumi skelem ol leta blong Pol long Timote wetem leta blong hem long Taetas, we i soem spesel filing long yangfala man ya. Ating Timote tu i gat sem filing long fasin fren blong tufala, olsem yumi luk long ol tok blong Pol long 2 Timote 1:​3, 4: “Nao long dei mo long naet, taem mi stap prea, oltaem mi stap tingbaot yu, nao mi stap talem tangkyu long God from yu. Mi stap tingbaot taem ya we yu yu krae from mi, nao mi wantem tumas blong kam luk yu bakegen, blong bambae mi save harem gud bakegen.”

6, 7. ?Wanem filing Deved mo Jonatan tufala i gat long tufala, mo from wanem?

⁶ Hibru haf blong Baebol i soem ol gudfala eksampel, olsem hemia blong Deved mo Jonatan. Yumi ridim se afta we Deved i kilim ded Golaeat, “laef blong Jonatan i joen wetem laef blong Deved, mo Jonatan i stat blong laekem Deved olsem we hem i laekem hem wan.” (1 Samuel 18:⁠1) Jonatan i gat spesel filing long Deved from hem i luksave eksampel blong Deved we hem i gat strong tingting long nem blong Jeova mo we hem i no fraet blong go faetem bigfala Golaeat.

⁷ Jonatan i gat filing olsem long Deved we i mekem se kolosap hem i lusum laef blong hem taem hem i stap haedem Deved long King Sol. Neva Jonatan i jelas from Jeova i jusum Deved blong hem i kam nekiswan king blong Isrel. (1 Samuel 23:17) Deved tu i gat sem filing long Jonatan, olsem yumi save luk long tok we hem i talem taem hem i stap krae from ded blong Jonatan: “Mi mi harem nogud tumas from yu, brata blong mi Jonatan, yu yu kaen tumas long mi. Lav blong yu long mi i nambawan tumas bitim lav blong woman.” Yes, trufala fasin tangkyu i makem fasin fren blong tufala.​—⁠2 Samuel 1:⁠26.

 8. ?Hu ya tufala woman we tufala i soem spesel filing long tufala, mo from wanem?

⁸ Mo tu long Hibru haf blong Baebol yumi gat wan nambawan eksampel blong spesel filing we tu woman i soem, Naomi wetem Rut, waef blong pikinini boe blong hem we i ded finis. Tingbaot ol tok we Rut i talem long Naomi se: “Yu no stap askem mi blong livim yu, blong mi tanraon mi no moa kampani wetem yu; long weples yu go bambae mi mi mas go wetem yu, mo long weples yu slip long hem bambae mi mas slip tu long ples ya wetem yu. Ol man ples blong yu bambae oli man ples blong mi, mo God blong yu bambae hem i God blong mi.” (Rut 1:16) Yumi sua se fasin blong Naomi mo storeyan blong hem long saed blong Jeova i givhan blong mekem Rut i gat fasin tangkyu blong toktok olsem.​—⁠Lukluk Luk 6:⁠40.

Eksampel Blong Aposol Pol

 9. ?Wanem i soem se Pol i givim gudfala eksampel long saed blong fasin blong laekem tumas ol brata?

⁹ Olsem yumi bin luk, aposol Pol i soem spesel fasin blong laekem tumas ol brata long Timote. Be tu hem i givim nambawan eksampel long fasin blong laekem tumas olgeta brata. Hem i talem long ol elda long Efesas se “long tri fulyia, long dei mo long naet, mi mi stap tijim yufala we mi no save spel, mo we wora blong ae blong mi i stap ron from yufala.” ?Hemia fasin blong laekem tumas ol brata? !Yes! Mo olgeta oli gat sem filing ya tu long Pol. Taem oli harem se bambae oli no moa save luk Pol, “nao olgeta oli stap krae tumas, oli stap holem Pol, oli stap kis long hem blong talem tata long hem.” (Ol Wok 20:​31, 37) ?Yu ting se hemia fasin blong laekem tumas ol brata we i kamaot from fasin tangkyu? !Yes! Yumi save luk fasin ya we hem i laekem tumas ol brata long ol tok blong hem long 2 Korin 6:​11-13: “Ol fren long Korin, mifala i tok stret nomo long yufala. Mifala i talemaot tingting blong mifala long yufala. Mifala i no satem tingting blong mifala long yufala. Yufala nomo i satem tingting blong yufala long mifala. Mi mi tok long yufala naoia, olsem we yufala i pikinini blong mi. Plis yufala i mekem long mifala olsem we mifala i mekem long yufala. Plis yufala i talemaot olgeta tingting blong yufala long mifala.”

10. ?Olsem wanem ol brata long Korin oli no gat fasin ya blong laekem tumas ol brata, mekem se Pol i tokbaot ol trabol blong hem long 2 Korin japta 11?

¹⁰ I klia se, plante long ol man Korin oli no gat fasin tangkyu blong soem se oli laekem tumas aposol Pol. Taswe, sam long olgeta oli komplen se: “Ol tok blong Pol long ol leta ya blong hem oli strong tumas, oli hevi tumas. Be taem hem i stanap long fes blong yumi, hem i no wan strong man, mo ol tok blong hem i nating nomo.” (2 Korin 10:10) From samting ya Pol i tokbaot ‘ol aposol we oli stap talem se oli nambawan’ mo samting ya i pusum hem blong talemaot ol trabol we hem i kasem, olsem i stap long 2 Korin 11:​5, 22-33.

11. ?Wanem tok i soem se Pol i gat filing long ol Kristin long Tesalonaeka?

¹¹ Yumi save luk filing blong Pol long ol man ya we hem i stap prij long olgeta long ol tok blong hem long 1 Tesalonaeka 2:8: “Mifala i no tingbaot blong talemaot gud nyus ya nomo long yufala. Mifala i rere tu blong lego long laef blong mifala, from we mifala i laekem yufala tumas, mifala i wantem tumas blong givhan long yufala.” Yes, hem i gat filing ya long ol nyufala brata mekem se hem i no moa save wet longtaem​—⁠hem i wantem tumas blong save olsem wanem long olgeta long taem blong trabol​—⁠hem i sanem Timote, we hem i givim wan gudfala ripot we i mekem Pol i harem gud tumas. (1 Tesalonaeka 3:​1, 2, 6, 7) I tru olsem Insight on the Scriptures i talem, i se: “Wan gudfala fasin blong laekem tumas ol brata i stap bitwin Pol mo ol man ya we hem i stap prij long olgeta.”

Fasin Tangkyu​—⁠Stampa Blong Fasin Blong Laekem Tumas Ol Brata

12. ?From wanem yumi mas laekem tumas ol brata blong yumi?

¹² Tru ya, stampa blong fasin ya blong laekem tumas ol brata hem i fasin tangkyu. ?Yu ting se olgeta man blong Jeova we oli bin givim laef blong olgeta long hem oli gat ol gudfala fasin we yumi save gat fasin tangkyu from, oli pulum filing blong yumi, mekem se yumi laekem olgeta? Yes, yumi evriwan yumi stap lukaot fastaem Kingdom blong God mo stret fasin blong hem. Yumi evriwan yumi stap mekem wan strong faet agensem ol trifala enemi blong yumi: Setan wetem ol devel blong hem, rabis fasin blong wol ya we Setan i bos long hem, mo slak fasin blong tingbaot yumi nomo we yumi bon wetem. Oltaem yumi mas tingbaot se ol brata blong yumi oli stap traehad blong winim ol samting ya. Evri man long wol oli stap long wan long tufala saed ya, long saed blong Jeova no long saed blong Setan. Ol brata mo ol sista blong yumi we oli givim laef blong olgeta finis long God, oli stap long saed blong Jeova, yes long saed blong yumi, taswe i stret blong yumi laekem tumas ol brata ya blong yumi.

13. ?From wanem yumi mas laekem tumas ol elda?

¹³ ?Be olsem wanem long fasin tangkyu long ol elda blong yumi? ?Yu ting se i stret blong yumi mas laekem tumas olgeta from we oli stap wok strong long ol intres blong kongregesen? Yes, olgeta oli olsem yumi, oli mas wok blong lukaot long olgeta wanwan mo ol famle blong olgeta. Olgeta tu oli mas mekem prapa stadi blong olgeta olsem yumi, oli mas go long ol miting blong kongregesen, mo joen long wok blong prij. Antap moa, oli gat sam haf long ol miting blong oli mekem rere, oli givim ol pablik tok, mo oli lukaot long sam problem we oli kamaot long kongregesen, we samtaem oli spenem plante haoa blong mekem kot komiti blong jajem sam bisnes. Tru ya, yumi wantem blong “onagud long ol man olsem.”​—⁠Filipae 2:⁠29.

Soem Fasin Blong Laekem Tumas Ol Brata

14. ?Wanem vas long Baebol i talem se yumi mas gat fasin ya blong laekem tumas ol brata?

¹⁴ Blong mekem Jeova i glad long yumi, yumi mas soem filing ya we yumi laekem tumas ol brata blong yumi we oli man blong bilif, olsem Jisas mo Pol tufala i mekem. Yumi ridim se: “Yufala i mas laeklaekem yufala olsem we yufala i wan brata nomo.” (Rom 12:​10, Kingdom Interlinear) “Long saed blong fasin ya blong laekem tumas ol brata blong yumi, i no nid blong mi raetem tok i go long yufala, from we God i tijim yufala finis, se yufala i mas laeklaekem yufala.” (1 Tesalonaeka 4:​9, Int) “Yufala i mas stap laeklaekem yufala, olsem we yufala i wan brata.” (Hibrus 13:​1, Int) Yes Papa blong yumi long heven i glad taem yumi soem fasin ya blong laekem tumas ol brata long ol pikinini blong hem long wol.

15. ?Wanem sam rod blong soem fasin ya we yumi stap laekem tumas ol brata blong yumi?

¹⁵ Long taem blong ol aposol, ol Kristin oli gat fasin blong ‘kiskis long olgeta’ blong talem halo. (Rom 16:16; 1 Pita 5:14) !Tru ya hemia i soem fasin blong laekem tumas ol brata! Tede, long plante ples long wol, i stret moa blong soem fasin ya wetem smael mo sekhan. Long ol kantri long saot Amerika, olsem Meksiko tu, oli stap holholem olgeta blong talem halo, tru ya hemia i soem fasin blong laekem tumas ol brata. Maet fasin ya blong ol brata blong soem filing blong olgeta i mekem se namba blong ol man we oli joenem kampani blong olgeta i stap gru bigwan long kantri blong olgeta.

16. ?Wanem jans yumi gat long Haos Kingdom blong soem fasin blong laekem tumas ol brata?

¹⁶ ?Taem yumi go insaed long Haos Kingdom yumi soemaot fasin we yumi stap laekem tumas ol brata blong yumi? Bambae fasin ya i pusum yumi blong talem sam toktok blong leftemap tingting, antap moa olgeta ya nao we i luk olsem se tingting blong olgeta i foldaon. Baebol i talem long yumi blong “mas mekem tingting blong ol man ya we oli fraet, i strong bakegen.” (1 Tesalonaeka 5:14) Hemia wan rod we yumi save soem fasin ya we yumi laekem tumas ol brata. Wan narafala rod hem i blong soem fasin tangkyu long wan nambawan pablik tok, wan haf blong miting we wan brata i mekem gud, fasin traehad blong wan studen long Tiokratik Skul, mo sam narafala samting olsem.

17. ?Olsem wanem wan elda i pulum olgeta long kongregesen blong oli soem fasin blong laekem tumas ol brata?

¹⁷ ?Olsem wanem, yumi save invaetem ol defren brata sista oli kam long haos blong yumi blong kakae no dring ti nomo afta long wan miting sipos hem i no let tumas? ?Yu ting se i stret blong letem advaes blong Jisas long Luk 14:​12-14 i lidim yumi? ?Wan dei oli putumap wan brata we bifo hem i wan misinari blong i lukaot long wan kongregesen we evriwan insaed oli blong defren laen? Hem i harem se i no gat fasin blong laekem tumas ol brata insaed long kongregesen ya, nao hem i mekem sam plan blong stretem samting ya. ?Olsem wanem? Evri Sande hem i invaetem ol defren famle blong oli kam kakae wetem hem. Go kasem long en blong yia, evriwan oli soem fasin ya blong laekem tumas ol brata long hem.

18. ?Olsem wanem yumi save soem fasin blong laekem tumas ol brata long ol sik brata mo ol sik sista blong yumi?

¹⁸ Taem wan brata no wan sista i sik, i stap long haos no long hospital, fasin blong laekem tumas ol brata bambae i pusum yumi blong soem se yumi tingbaot hem. ?No olsem wanem long olgeta ya we oli stap long spesel hospital blong ol sikman no ol olfala? I gud blong visitim olgeta, telefon long olgeta, no sanem wan kad blong talemaot filing blong yumi long olgeta.

19, 20. ?Olsem yumi save soem se fasin blong yumi blong laekem tumas ol brata i kam bigwan moa?

¹⁹ Taem yumi soem fasin olsem blong laekem tumas ol brata, yumi save askem yumi wanwan se, ‘?Fasin blong mi blong laekem tumas ol brata i fulwan no no gat? ?I gat sam samting olsem kala blong skin, edukesen, no olting blong olgeta i spolem mi blong mi no soem fasin blong laekem tumas ol brata? ?Mi mi nidim blong go moa long fasin ya blong laekem tumas ol brata, olsem aposol Pol i askem ol Kristin long Korin blong oli mekem?’ Fasin blong laekem tumas ol brata bambae i mekem se yumi gat stret tingting long ol brata blong yumi, gat fasin tangkyu long olgeta from ol gudfala poen blong olgeta. Fasin blong laekem tumas ol brata bambae i halpem yumi tu blong yumi glad long wan brata we i gohed gud long saed blong speret be yumi no stap jelas from.

²⁰ Fasin ya blong laekem tumas ol brata i mas wekemap yumi tu blong yumi halpem ol brata blong yumi long minista wok. Hem i mas olsem wan long ol singsing blong yumi (Namba 92) i tokbaot, i se:

“Givhan long ol man we oli kam slak,

Blong oli no fraet long wok blong prij.

Givhan long ol pikinini tu,

Blong oli gru strong, blong oli no fraet.”

21. ?Bambae ol man oli mekem wanem long yumi sipos yumi stap soem fasin blong laekem tumas ol brata?

²¹ Taswe i gud yumi no mas fogetem se taem yumi soem fasin ya blong laekem tumas ol brata, yumi mas folem rul ya we Jisas i talem long tok blong hem antap long hil, i se: “Yufala i mas givim olting blong yufala i go nomo long narafala man, nao God bambae givim olting i go nomo long yufala. Bambae God i givim long yufala olsem we man i fulumap bag, i seksekem, i ramem gogo i fulap gud, i stap kafsaed i folfoldaon. Fasin we yufala i folem blong givim presen long narafala man, hemia fasin we God bambae i folem blong givim presen long yufala.” (Luk 6:38) Yumi stap mekem i gud long yumi wanwan taem yumi soem fasin blong laekem tumas ol brata, yumi soem ona long olgeta ya we oli man blong Jeova olsem yumi. Tru ya olgeta ya we oli glad blong soem fasin blong laekem tumas ol brata bambae oli save haremgud.

[Futnot]

?Yu Ansa Olsem Wanem?

◻ ?Wanem ol Grik wod we oli tokbaot ol filing blong yumi, mo olsem wanem oli defren?

◻ ?Wanem ki blong fasin ya blong laekem tumas ol brata?

◻ ?Wanem eksampel long Baebol we oli soem spesel filing no fasin blong laekem tumas ol brata?

◻ ?From wanem yumi mas laekem tumas ol brata blong yumi mo ol elda?

[Tok Blong Pija Long Pej 15]

Aposol Pita i askem strong long ol brata blong hem blong oli joenem fasin blong laekem tumas ol brata long bilif blong olgeta mo long ol narafala Kristin fasin