Wan Kwestin

Taem aposol Pol i talem se hem i ‘fogetem ol samting we oli stap long bak blong hem, nao i stap traehad oltaem blong kasem ol samting we oli stap long fes blong hem,’ ?hem i minim wanem? (Filipae 3:​13) ?Wan man i save fogetem ol samting wantaem nomo?

No gat. Plante taem yumi no save karemaot samting we i stap long tingting blong yumi, wantaem nomo. Trutok hemia se, yumi fogetem plante samting we yumi wantem rimemba, mo yumi rimemba plante samting we yumi wantem fogetem. Taswe, ?Pol i minim wanem taem hem i raetemdaon tok blong Filipae 3:​13? Ol vas we oli stap raonabaot oli halpem yumi blong kasem save long tok ya.

Long Filipae japta 3, Pol i eksplenem se hem i gat ‘raet blong putum tingting blong hem long ol samting blong bodi blong man nomo.’ Hem i tokbaot se hem i man Isrel stret, mo se hem i strong blong folem Loa​—hemia ol samting we oli save givim raet long hem blong kam wan haeman long nesen blong Isrel. (Filipae 3:​4-6; Ol Wok 22:​3-5) Be, hem i tanem baksaed blong hem long ol jans ya, mo i sakemaot olgeta olsem we oli nating nomo. ?From wanem? From we hem i faenem wan samting we i moagud​—‘nambawan save long saed blong Jisas Kraes.’​—Filipae 3:​7, 8.

Samting we Pol i wantem moa bitim we hem i kasem haenem long wol ya, hemia se ‘hem i stap wetem ol faswan man we God i mekem olgeta oli laef bakegen long ded.’ (Filipae 3:​11, 12) Taswe, hem i raetem se: “Mi fogetem ol samting we oli stap long bak blong mi, nao mi stap traehad oltaem blong kasem ol samting we oli stap long fes blong mi. I olsem we mi stap resis i go stret long mak, we i gat praes blong man we i win. Mo praes ya, hemia we God i singaot yumi blong yumi joen long Jisas Kraes, yumi go stap antap long ples blong hem.” (Filipae 3:​13, 14) Taem Pol i talem se hem i ‘fogetem ol samting we oli stap long bak blong hem,’ hem i no minim se hem i bin ravemaot long tingting blong hem ol “samting we oli stap long bak blong hem.” I klia se hem i stap rimemba olgeta yet, from we hem i jes bin tokbaot olgeta samting ya. Mo tu, long Grik lanwis, hem i yusum wan tok we i soemaot wan aksin we i stap gohed yet, we i no finis. Hem i talem se “mi fogetem,” i no se “mi fogetem finis.”

Grik tok we oli tanem se “fogetem” (e·pi·lan·thaʹno·mai) i gat plante smosmol mining, wan long ol mining ya se “blong no wari long saed ya,” mo “blong no moa tingbaot.” Folem toktok blong Exegetical Dictionary of the New Testament (we Horst Balz mo Gerhard Schneider i raetem), hemia nao prapa mining blong “fogetem” long Filipae 3:​13. Pol i no stap tingbaot oltaem ol samting we hem i bin lego. Hem i lanem blong luk ol samting ya olsem we oli no impoten. Oli olsem “rabis nomo” taem hem i skelem wetem hop ya blong go long heven.​—Filipae 3:8.

?Olsem wanem ol tok blong Pol oli stret long yumi tede? Maet, wan Kristin i lego sam samting we hem nomo i wantem, olsem Pol, blong mekem wok blong God. Maet hem i lego wan gudfala wok we hem i winim plante mane long hem, blong joen long wok blong prij fultaem. No maet hem i stap long wan famle we i rij, be olgeta ya oli no wantem givim wan mane long hem blong givhan long hem, from we oli agensem trutok. I gud tumas we yumi bin lego ol samting olsem, we yumi nomo i wantem, be yumi no mas stap tingting long olgeta ya oltaem. Wan Kristin i “fogetem,” hem i no moa wari, long ‘ol samting we oli stap long bak blong hem.’ Hem i stap tingbaot nambawan fyuja we i stap fored long hem.​—Luk 9:​62.

Advaes we i stap insaed long ol tok blong Pol i save givhan long wan narafala rod tu. ?Olsem wanem long wan Kristin we i bin mekem plante fasin we oli no stret, bifo we hem i save God? (Kolosi 3:​5-7) Mo tu, tingbaot sipos wan man i kam wan Kristin, nao biaen, hem i mekem wan bigfala sin mo kongregesena i stretem hem. (2 Korin 7:​8-​13; Jemes 5:​15-​20) Sipos hem i rili tanem tingting blong hem from sin ya mo i jenisim fasin blong hem, God i save ‘wasemaot ol sin ya blong mekem hem i klin.’ (1 Korin 6:​9-​11) Samting we i hapen i pas finis. Maet hem i neva rili fogetem samting ya we hem i bin mekem​—yes, hem i waes sipos hem i lanem wan samting from trabol we hem i kasem, mo i no mekem sin ya bakegen. Be, hem i save ‘fogetem’ long fasin ya we hem i no gohed blong daonem hem wan oltaem from samting ya. (Skelem wetem Aesea 65:17.) From we God i fogivim hem tru long sakrifaes blong Jisas, hem i traehad blong tanem baksaed long ol samting we oli hapen finis.

Long Filipae 3:​13, 14, Pol i tokbaot hem wan olsem wan man we i stap ron long wan resis, mo we i stap “traehad oltaem blong kasem” ol samting we oli stap long fored blong hem. Wan man blong resis i stap lukluk i go long fored nomo, i no stap lukluk i go biaen. Long sem fasin, wan Kristin i mas lukluk i go long ol blesing we oli stap long fyuja, i no long ol samting we hem i lego i stap biaen. Pol i talem tu, se: “Sipos sam long yufala i gat narafala tingting, God bambae i mekem samting ya i moa klia long olgeta.” (Filipae 3:​15) Taswe, yu mas prea i go long God blong i halpem yu blong gat stret tingting. Fulumap tingting blong yu wetem ol tingting blong God we oli stap long Baebol. (Filipae 4:​6-9) Tingting dip long lav we Jeova i gat long yu mo ol blesing we yu kasem from. (1 Jon 4:​9, 10; 17-​19) Ale, tru long tabu speret, bambae Jeova i halpem yu blong no wari tumas long ol samting we yu livim biaen. Be, olsem Pol, bambae yu lukluk i go long nambawan fyuja we i stap long fored blong yu.​—Filipae 3:​17.

[Futnot]