?Yu Yu Rili Nidim Blong Talem Sore?

George Bernard Shaw i talem se: ‘Mi neva talem sore.’ Maet sam narafala oli talem se: ‘Samting we mi mekem, mi mekem.’

Maet yumi no wantem talem se yumi bin mekem wan mastik, from we yumi fraet se bambae ol narafala oli no moa respektem yumi. Maet yumi mekem eskyus, mo putum fol long narafala. No maet yumi wantem talem sore, be yumi letem taem i pas gogo yumi ting se oli fogetem bisnes ya finis.

?Olsem wanem? ?Yu ting se i impoten blong talem sore? ?Sipos yu talem sore, samting ya i rili save givhan?

Lav i Mekem Se Yumi Mas Talem Sore

Fasin blong laekem tumas ol brata mo sista long saed blong bilif, i makemaot ol trufala man blong Jisas Kraes. Jisas i talem se: “From we yufala i stap laeklaekem yufala, bambae olgeta man oli luksave se yufala i man blong mi.” (Jon 13:35) Baebol i talem long ol Kristin blong ‘laekem ol brata blong olgeta long fasin we i stretgud.’ (1 Pita 1:​22) Lav ya we i stretgud i mekem se yumi mas talem sore. ?From wanem? From we yumi sinman, mo plante samting we yumi mekem i spolem filing blong narafala, mo ol filing ya oli save blokem lav, sipos yumi no mekem hem i haremgud bakegen.

Eksampel, maet yumi bin rao wetem wan insaed long Kristin kongregesen.a From samting ya, maet yumi no moa wantem toktok wetem hem. Sipos yu nao yu bin mekem Kristin ya i harem nogud, ?olsem wanem yu save mekem se i gat lav bitwin long yutufala bakegen? Plante taem yumi save mekem olsem, taem yumi talem sore, mo biaen, yumi traehad blong storeyan wetem hem long lav. Kaon we yumi gat long olgeta Kristin brata mo sista blong yumi, i blong soem lav long olgeta. Mo taem yumi talem sore from we yumi bin mekem olgeta oli harem nogud, yumi pembak smol haf blong kaon ya.​—Rom 13:8.

Blong talem wan eksampel: Tufala Kristin woman ya Mari Carmen mo Paqui, tufala i bin frengud blong longtaem. Be, wan dei Mari Carmen i bilivim sam toktok we i goraon, mo from samting ya, hem i no moa wantem fren wetem Paqui. Hem i no talem wan samting, be wantaem nomo, hem i no moa toktok wetem Paqui. Kolosap wan yia biaen, Mari Carmen i faenemaot se tok ya we hem i bilivim, i no tru. ?Hem i mekem wanem? Lav i pusum hem blong go long Paqui mo, wetem tingting daon, hem i talem se hem i sore tumas long nogud fasin we hem i bin mekem. Wora blong ae blong tufala evriwan i ron bigwan, mo stat long taem ya, tufala i frengud bakegen.

Maet yumi harem se yumi no bin mekem wan rong. Be nating, sipos yumi talem sore, samting ya i save stretem nogud filing we i stap bitwin long yumi mo narafala. Manuel i tingtingbak mo i talem se: “Plante yia bifo, mi mo waef blong mi, mitufala i go stap long haos blong wan sista long saed blong speret taem hem i go slip long hospital. Mitufala i traem bes blong mitufala blong halpem hem mo ol pikinini blong hem taem hem i sik. Be taem hem i kamaot long hospital, hem i tok agens long mitufala long wan fren. Hem i talem se mitufala i no bin spenem mane long stret fasin blong pem ol samting long haos.

“Mitufala i go luk hem mo eksplenem se, from we mitufala i yangfala mo mitufala i no gat bigfala save, maet mitufala i no bin mekem ol samting long sem fasin we hem i save mekem. Kwiktaem nomo hem i ansa, i se hem nao i gat kaon long mitufala, mo se hem i tangkyu tumas from bigfala samting we mitufala i mekem long hem. Problem i finis long ples ya. Samting ya i lanem mi se i impoten blong gat tingting daon mo askem narafala blong fogivim yumi, taem nogud filing i kamaot bitwin yumi mo narafala.”

Jeova i blesem man ya mo waef blong hem from we tufala i soem lav mo ‘folem fasin we i save mekem pis.’ (Rom 14:19) Lav i minim tu se yumi mas tingbaot filing blong ol narafala. Pita i givim advaes se yumi mas ‘gat filing long ol Kristin brata mo sista blong yumi.’ (1 Pita 3:8) Sipos yumi gat filing long ol brata mo sista blong yumi, bambae yumi luksave soa we yumi mekem long olgeta, taem yumi talem no mekem samting bifo we yumi tingtinggud. Mo bambae hat blong yumi i pusum yumi blong talem sore.

“Yufala i Mas Mekem Tingting Blong Yufala i Stap Daon”

Maet samtaem, ol gudfala Kristin elda tu oli sakem sam strong tok long ol narafala elda. (Skelem wetem Ol Wok 15:​37-​39.) Long ol taem olsem, i save givhan bigwan sipos oli talem sore. ?Be wanem bambae i halpem ol elda mo ol narafala Kristin we oli faenem se i had blong talem sore?

Tingting daon nao, hemia bigfala samting. Aposol Pita i givim advaes ya se: “Yufala i mas mekem tingting blong yufala i stap daon.” (1 Pita 5:5) I tru se, taem i gat rao bitwin tu man, plante taem tufala evriwan i gat fol. Be Kristin we i gat tingting daon, i luksave ol rong blong hem wan, mo i rere blong talemaot olgeta.​—Proveb 6:​1-5.

Sipos wan man i talem sore long yu, i gud yu mekem tingting blong yu i stap daon mo akseptem. Blong eksplenem, maet yumi talem se tufala man oli stap stanap antap long tu defren hil. Tufala i no save storeyangud from we i gat bigfala klif i seraotem tufala. Be, taem wan i godaon long saed blong hil mo narawan i folem eksampel blong hem, bambae i isi long tufala blong storeyangud long flat ples daon. I sem mak sipos tufala Kristin i mas stretem wan problem bitwin tufala. I gud we wanwan long tufala i gat tingting daon, nao i olsem we tufala i godaon long saed blong hil blong mitim tufala daon, mo talem sore long tufala.​—1 Pita 5:6.

Talem Sore i Givhan Bigwan Insaed Long Mared

Taem wan man mo woman we tufala i no stretgud olgeta, i mared, i klia se i mas gat plante jans blong talem sore. Mo sipos hasban mo waef blong hem, tufala wanwan i tingbaot filing blong narawan, samting ya bambae i pusum tufala blong talem sore, sipos wan long tufala i talem no mekem wan samting we narawan i harem nogud from. Proveb 12:18 i talem se: “I gat man we i stap tok, we i no tingtinggud fastaem. Tok blong hem i olsem naef blong faet we i stikim man. Be wan waesman i yusum tang blong hem blong mekem man i haremgud bakegen.” Yumi no save tekembak ‘tok we i stikim man.’ Be yumi save mekem soa blong hem i godaon taem yumi talem sore we i kamaot long hat blong yumi. I tru, samting ya i minim se yumi mas lukaotgud mo traehad oltaem.

Susanb i tokbaot mared blong hem se: “Mi mo Jack,c mitufala i mared 24 yia finis. Be mitufala i stap lanem yet sam nyufala samting long saed blong wanwan long mitufala. Sore tumas, sam taem i pas finis, mitufala i seraot blong sam wik. Be, mitufala i lesin long ol advaes blong Baebol we ol elda oli givim, mo mitufala i joen bakegen. Naoia, mitufala i luksave se prapa fasin blong mitufala i defren olgeta, taswe samtaem rao i mas kamaot. Taem rao i kamaot, kwiktaem nomo, mitufala i talem sore mo rili traehad blong kasem save long tingting blong narawan. Mi mi glad blong talem se mared blong mitufala i kam moagud.” Jack i ademap se: “Mitufala i lanem tu blong luksave ol taem we mitufala i save kam kros. Long ol taem olsem, wanwan long mitufala i soem moa filing long narawan.”​—Proveb 16:⁠23.

?Olsem wanem sipos yu ting se i no fol blong yu? ?Bambae yu mas talem sore? Taem wan samting i spolem dip filing blong yumi, i hadwok blong luksave klia hu nao i gat fol. Be impoten samting, hemia pis insaed long mared. Tingbaot Abigel, wan woman Isrel we hasban blong hem i mekem i no stret long Deved. Nating se woman ya i no gat fol from krangke fasin blong hasban blong hem, hem i talem sore. Hem i talem se: “Plis, yu fogivim sin blong gel blong wok blong yu.” From samting ya, Deved i mekem i gud long hem, i talem wetem tingting daon se sipos Abigel i no bin toktok wetem hem, bambae hem i mekem blad blong ol man we oli no gat fol i ron.​—1 Samuel 25:​24-28, 32-​35.

I sem mak, June, wan Kristin woman we i mared 45 finis, i bilif se, sipos man mo woman oli wantem gat wan gudfala mared, tufala evriwan i mas rere blong talem sore fastaem. Hem i talem se: “Mi talem long mi wan se mared blong mitufala i moa impoten bitim ol prapa filing blong mi. Taswe, taem mi talem sore, mi harem se mi stap givhan long mared blong mitufala.” Wan olfala man we nem blong hem Jim, i talem se: “Mi talem sore long waef blong mi from ol smosmol mastik tu. Stat long taem we ol dokta oli katem hem from wan bigfala sik, i isi nomo blong hem i harem nogud long tingting blong hem. Taswe, oltaem mi putum han blong mi i goraon long hem, mo mi talem se, ‘Sore tumas, gudfala waef blong mi. Mi no minim blong mekem yu yu harem nogud.’ Wantaem nomo, hem i haremgud bakegen, olsem wan flaoa we yu putum wora long hem.”

Sipos yumi mekem hemia we yumi laekem hem moa bitim ol narafala, i harem nogud, i save givhan bigwan sipos yumi talem sore kwiktaem. Milagros i agri wetem fulhat blong hem. Hem i talem se: “Mi mi gat fasin ya we mi no tinghae long mi wan, mo sipos hasban blong mi i tok strong long mi, mi harem nogud tumas. Be taem hem i talem sore, mi haremgud bakegen kwiktaem nomo.” Baebol i talem tru nomo se: “Gudfala toktok i olsem eg blong sugabag, hem i swit mo i save mekem bodi blong man i strong.”​—Proveb 16:⁠24.

Lanem Blong Gat Gudhan Blong Talem Sore

Sipos yumi folem fasin blong talem sore taem i stret blong mekem olsem, bambae yumi luk se ol man oli ansa long yumi long gudfala fasin. Mo maet olgeta tu, bambae oli talem sore. Sipos yumi ting se maet yumi bin mekem wan man i harem nogud, i moagud blong talem sore long hem, bitim we yumi yusum plante toktok mo mekem eskyus from we yumi no wantem talem se yumi gat fol. Maet ol man blong wol oli ting se man we i talem sore i wan slak man. Be taem wan Kristin i talem sore, samting ya i rili pruvum se hem i bigman long saed blong speret. I tru, yumi no wantem kam olsem ol man we oli talemaot rong blong olgeta be oli traem mekem olsem we rong ya i nating nomo. Eksampel, ?samtaem yumi talem sore we yumi no rili minim? Sipos yumi kamtru let long haos blong narafala mo yumi talem bigfala sore, ?yumi rili traehad blong kam long stret taem long fyuja?

Oraet, ?yumi rili nidim blong talem sore? Yes, yumi nidim. Hemia samting we yumi mas mekem, blong yumi haremgud mo blong narafala i haremgud tu. Fasin blong talem sore bambae i daonem soa we yumi mekem long narafala from we yumi no stretgud olgeta, mo hem i save mekem olgeta we oli seraot oli frengud bakegen. Evri taem we yumi talem sore, yumi stap lanem tingting daon, mo yumi stap trenem yumi blong tingbaot filing blong narafala moa. From samting ya, ol Kristin brata mo sista, ol hasban mo waef, mo ol narafala, bambae oli luk yumi olsem wan we i stret blong laekem mo trastem. Bambae yumi gat pis long tingting blong yumi, mo Jeova God bambae i blesem yumi.

[Ol futnot]

[Tok blong pija long pej 23]

Taem yumi talem sore wetem fulhat blong yumi, samting ya i mekem Kristin lav i kam strong moa