Ol Elda, Yufala i Folem Fasin Blong Nambawan Man Blong Lukaot Long Sipsip

1, 2. (1) ?Wanem samting i kamaot taem man i lukaot gud long ol sipsip? (2) ?Long taem blong Jisas, from wanem ol man oli olsem ol sipsip we i no gat man blong lukaot long olgeta?

Ol SIPSIP oli gat gudfala helt taem man i lukaot gud long olgeta. Wan buk we i tokbaot fasin blong lukaot long sipsip, i talem se sipos man i lego ol sipsip oli go kakae gras, be hem i no lukaot gud long olgeta, bambae long sam yia nomo, ol sipsip ya oli kam slak mo oli sik. Be taem man i lukaot gud long olgeta, evri sipsip ya bambae oli strong.

² Samting ya i tru long saed blong kongregesen. Sipos ol elda oli lukaot gud long ol sipsip blong God mo oli kea long olgeta evriwan, bambae ful kongregesen i strong. Maet yu tingbaot we Jisas i sore long ol man from we “oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Mat. 9:36) ?From wanem ol man ya oli olsem ol sipsip we i no gat man blong lukaot long olgeta? From olgeta we oli gat wok ya blong tijim Loa blong God long ol man, oli strong tumas, oli askem plante samting long ol man, mo oli gat tu fes. Oli no lavem ol man, oli no lukaot gud long olgeta, mo oli mekem i had blong ol man ya oli mekem wok blong God. Ol man oli harem olsem se oli stap karem “ol hevi samting” long solda blong olgeta.—Mat. 23:4.

 3. ?Ol elda oli mas tingbaot wanem?

³ Tede, ol elda oli gat wan wok we i impoten tumas. Oli stap lukaot long ol sipsip blong Jehova mo Jisas. Jisas we hem i “gudfala man ya blong lukaot long sipsip,” hem i lavem tumas ol sipsip ya, nao hem i glad blong givim laef blong hem blong sevem olgeta. Hem i “pemaot” olgeta long ‘blad blong hem we i gud tumas.’ (Jon 10:11; 1 Kor. 6:20; 1 Pita 1:18, 19) Ol elda oli mas tingbaot oltaem se oli wok aninit long Jisas Kraes, we i “nambawan man blong lukaot long ol sipsip.” Taswe, oli mas talemaot long hem se oli lukaot long ol sipsip olsem wanem.—Hib. 13:20.

 4. ?Stadi ya bambae i tokbaot wanem?

⁴ ?Ol Kristin elda oli mas gat wanem fasin long ol sipsip? Baebol i talem se olgeta man long kongregesen oli mas “ona long” ol man we oli lidim olgeta. Be Baebol i talem tu se ol elda oli no mas “kam olsem bigfala masta blong olgeta ya we God i putum olgeta long han” blong olgeta. (Hib. 13:17; ridim 1 Pita 5:2, 3.) ?Ol elda oli mas mekem olsem wanem blong lidim ol sipsip, be oli no kam bigfala masta blong olgeta? Maet yumi save askem se: ?Ol elda oli mas mekem wanem blong oli save lukaot gud long ol sipsip, be long sem taem, oli no yusum paoa we God i givim long olgeta, long fasin we i no stret?

 5. ?Folem Aesea 40:11, yumi lanem wanem long saed blong Jehova?

⁵ Profet Aesea i tokbaot Jehova se: “Hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Man olsem i stap holem ol pikinini blong sipsip, i stap karem olgeta i kam wanples, mo i stap wokbaot sloslo blong lidim ol mama blong olgeta oli biaen long hem.” (Aes. 40:11) Vas ya i soemaot se Jehova i lukaot gud long olgeta long kongregesen we oli no strong. Wan man blong lukaot long sipsip i tingbaot samting we ol sipsip wanwan oli nidim, mo hem i rere oltaem blong givhan long olgeta. Long sem fasin, Jehova i save samting we ol man long kongregesen oli nidim, mo hem i glad blong givhan long olgeta. Mo tu, samtaem wan man blong lukaot long sipsip i karem smol sipsip we i jes bon, mo i holem long jes blong hem. Long sem fasin, Jehova bambae i mekem tingting blong yumi i kamgud mo i lukaot gud long yumi taem yumi kasem wan bigfala trabol. Hem i “Papa blong yumi we i gat sore.”—2 Kor. 1:3, 4.

 6. ?Wan elda i save folem eksampol blong Jehova olsem wanem?

⁶ !Hemia wan nambawan samting we wan elda i save lanem long saed blong Jehova! Hem i mas save gud samting we ol sipsip oli nidim. Sipos elda ya i save trabol we ol brata oli fesem mo samting we oli nidim, bambae hem i naf blong leftemap tingting blong olgeta mo givhan long olgeta. (Prov. 27:23) Hemia i min se hem i mas tekem taem blong toktok gud wetem ol brata mo sista, mo i lesin long olgeta. Hem i intres long ol samting we hem i luk mo i harem long kongregesen, be hem i lukaot se hem i no pusum nus blong hem long bisnes blong ol brata mo sista. Mo from we hem i lavem olgeta, hem i tekem taem blong “givhan long olgeta we oli no strong.”—Wok 20:35; 1 Tes. 4:11.

 7. (1) Long taem blong Esikel mo Jeremaea, ?ol man oli stap mekem wanem long ol sipsip blong God? (2) ?Yumi save lanem wanem long fasin blong Jehova blong sakemaot ol man we oli no lukaot gud long ol man blong hem?

⁷ Yumi save tingbaot fasin blong ol man we oli lidim ol man blong God long taem blong Esikel mo Jeremaea. Ol man ya oli mas lukaot gud long ol sipsip blong God, be oli no mekem, ale Jehova i sakemaot olgeta. Jehova i talem se: “Ol wael anamol oli stap ronem ol sipsip blong mi, oli stap kilim olgeta, oli stap kakae, from we i no gat man blong lukaot long olgeta. Be yufala i no traem nating blong go lukaot olgeta. Yufala i no lukaot gud long olgeta nating, yufala i stap tingbaot yufala nomo.” Ol man oli harem nogud from we ol lida blong olgeta oli tingbaot olgeta nomo mo oli griri. (Esik. 34:7-10; Jer. 23:1) Long sem fasin, God i sakemaot ol lida blong skul we oli talem se oli Kristin. ?Wanem impoten lesen we ol elda oli save lanem, long fasin blong Jehova blong sakemaot ol man we oli no lukaot gud long ol man blong hem? Oli mas lavem ol sipsip blong Jehova mo oli mas givim ol samting we oli nidim.

 8. ?Ol elda oli save folem eksampol blong Jisas olsem wanem?

⁸ Ol man oli no stret gud olgeta, taswe maet samfala long kongregesen oli slo blong kasem save long samting we Jehova i wantem blong oli mekem. Maet oli mekem ol desisen we i no laenap wetem ol rul blong Baebol, no maet oli mekem sam samting we i soemaot se oli no bigman yet long ol Kristin fasin. ?Long taem olsem, ol elda oli mas mekem wanem? Oli mas gat longfala tingting, olsem we Jisas i gat longfala tingting long ol disaepol blong hem. Ol disaepol oli raorao plante se hu long olgeta i hae moa long Kingdom, be Jisas i neva kros long olgeta. Hem i gohed blong tijim olgeta, mo i givim advaes long fasin blong gat tingting daon. (Luk 9:46-48; 22:24-27) Hem i wasem leg blong olgeta tu, blong soemaot long olgeta se i minim wanem blong putum tingting i stap daon. Tede tu, ol elda oli mas soemaot se oli gat tingting daon.—Ridim Jon 13:12-15; 1 Pita 2:21.

 9. ?Wanem tingting blong ol aposol we Jisas i mas stretem?

⁹ Aposol Jemes mo Jon tufala i ting se man we i lukaot long sipsip, hem i bos long olgeta. Tufala i askem long Jisas blong i givim wan spesel ples long tufala long Kingdom. Be Jisas i stretem tingting blong tufala, i talem se: “Yufala i save finis we ol haeman blong ol hiten man oli stap mekem i strong tumas long ol man blong olgeta, mo ol bos blong olgeta oli stap mekem olgeta oli stap aninit long paoa blong olgeta. Be i no stret blong yufala i mekem olsem. Sipos wan long yufala i wantem kam haeman blong yufala, hem i mas kam olsem man blong wok blong yufala.” (Mat. 20:25, 26) Ol aposol oli mas blokem tingting ya blong wantem “mekem i strong tumas” long ol brata blong olgeta. Hemia i min se oli no mas talem oltaem ol samting we ol brata blong olgeta oli mas mekem.

10. ?Jisas i wantem se ol elda oli mekem wanem long ol sipsip? ?Mo Pol i soemaot wanem eksampol?

¹⁰ Jisas i wantem se ol elda oli mas lukaot long ol sipsip blong hem, long sem fasin we hem i lukaot long olgeta. Oli mas glad blong mekem ol wok blong givhan long ol brata mo sista blong olgeta, be oli no mas mekem olsem se oli bos blong olgeta. Aposol Pol i gat tingting daon olsem Jisas, mo hem i mekem ol wok blong givhan long ol narafala. Hem i talem long ol elda long Efesas se: “Yufala i save fasin blong mi finis, we mi stap mekem oltaem nomo taem mi stap wetem yufala, i stat long taem ya we mi kamtru long Esia fastaem go kasem taem we mi aot bakegen. Mi stap mekem ol wok ya from we mi mi man blong wok nomo blong Masta blong yumi, we tingting blong mi i stap daon.” Pol i wantem se ol elda oli gat tingting daon mo oli wok had from ol brata blong olgeta. Hem i talem se: “Mi mi soemaot long yufala long olgeta rod, we yumi mas hadwok olsem, blong givhan long olgeta we oli no strong.” (Wok 20:18, 19, 35) Hem i talem long ol Kristin long Korin se hem i no wantem bos long bilif blong olgeta. Be hem i gat tingting daon, mo hem i wantem givhan long olgeta blong oli glad blong mekem wok blong God. (2 Kor. 1:24) Pol i soemaot wan gudfala eksampol long ol elda tede, blong oli gat tingting daon mo oli wok strong.

11, 12. Sipos wan brata i wantem mekem wan desisen, ?wan elda i save givhan long hem olsem wanem?

¹¹ Wan elda i mas givim advaes we i stanap oltaem long Baebol. (Taetas 1:9) Mo hem i mekem olsem “long kwaet fasin.” (Gal. 6:1) Wan gudfala elda bambae i no traem blong fosem ol brata long kongregesen, blong oli folem wan kaen fasin. Be hem i traem blong givhan long olgeta blong oli mekem desisen we i stanap long lav we oli gat long Jehova mo long Tok blong hem. Ating wan brata i wantem mekem wan impoten desisen, ale maet wan elda i soemaot ol rul blong Baebol we hem i mas tingbaot. Maet tufala i save lukluk bakegen long sam haf blong ol buk no magasin blong yumi we oli tokbaot poen ya. Mo maet elda ya i pulum brata ya blong i tingbaot ol defdefren samting we oli save mekem hem i no moa fren gud wetem Jehova. Elda ya i save makem strong long tingting blong brata ya se i impoten tumas we hem i prea blong God i lidim hem. (Prov. 3:5, 6) Afta we elda i tokbaot ol samting ya, hem i letem brata ya i mekem prapa desisen blong hem.—Rom 14:1-4.

¹² Ol elda oli gat raet blong talem ol samting we oli kamaot long Baebol nomo. Taswe, i impoten tumas we oli yusum gud Baebol mo oli mekem advaes blong olgeta i stanap oltaem long Baebol. Sipos oli mekem olsem, oli no yusum paoa blong olgeta long fasin we i no stret. Olgeta oli man blong lukaot nomo long ol sipsip blong Jisas. Mo evri memba blong kongregesen bambae i talemaot risen blong desisen blong hem long fes blong Jehova mo Jisas.—Gal. 6:5, 7, 8.

13, 14. ?Wanem sam samting we wan elda i mas mekem, blong soemaot eksampol long ol sipsip?

¹³ Aposol Pita i tok strong long ol elda long kongregesen blong oli no ‘kam olsem bigfala masta blong olgeta we God i putum olgeta long han blong olgeta.’ Biaen hem i pulum olgeta blong oli ‘soemaot ol stret fasin long ol man blong oli save folem.’ (1 Pita 5:3) ?Oli mas mekem olsem wanem? Yumi save tingbaot tu fasin we wan brata i mas gat, blong hem i save mekem wok blong elda. Faswan fasin, hemia se “tingting blong hem i mas klia.” Hemia i min se hem i kasem save gud ol rul blong Baebol, mo i save olsem wanem blong folem ol rul ya long laef blong hem. Sipos wan trabol i kamaot long kongregesen, hem i stap kwaet mo i tingting gud bifo we hem i mekem wan desisen. Nambatu fasin, hemia se hem i “save lukaot gud long famle blong hem.” Hemia i min se sipos wan elda i gat famle blong hem, hem i mas soemaot gudfala eksampol, from we ?sipos hem i no save lukaot gud long famle blong hem, be bambae hem i save lukaot gud long kongregesen blong God, olsem wanem? (1 Tim. 3:1, 2, 4, 5, NW) Ol brata mo sista long kongregesen oli harem se oli save trastem ol elda we oli gat ol fasin ya.

¹⁴ Ol elda oli save soemaot gudfala eksampol tu long ol Kristin, taem oli lidim wok blong prij, olsem we Jisas i mekem bifo. Wok blong talemaot gud nius blong Kingdom i wan impoten haf blong laef blong Jisas, taem hem i stap long wol. Mo hem i tijim ol disaepol blong hem blong oli mekem wok ya. (Mak 1:38; Luk 8:1) Tede, ol pablisa oli glad blong prij wetem ol elda. Oli luk se ol elda oli wok strong long impoten wok ya, mo oli save lanem plante samting long fasin blong olgeta blong tij. Taem ol elda oli yusum taem mo paoa blong olgeta oltaem long wok blong talemaot gud nius, nating se laef blong olgeta i bisi tumas, samting ya i pulum evriwan long kongregesen blong oli gat strong tingting blong prij. Ol elda oli save soemaot gudfala eksampol tu long ol brata blong olgeta, taem oli rerem gud ol miting blong olgeta, oli givim ansa, mo oli mekem sam wok olsem klinim mo riperem Haos Kingdom.—Efes. 5:15, 16; ridim Hibrus 13:7.

15. ?Wanem sam risen we i mekem se ol elda oli go visitim ol sipsip?

¹⁵ Wan gudfala man blong lukaot long sipsip i kwik blong givhan long wan sipsip we i kasem kil no i sik. Long sem fasin, ol elda oli mas kwik blong givhan long wan man long kongregesen we i harem nogud no i nidim help. Maet ol olfala mo olgeta we oli sik oli nidim we narafala i givhan long olgeta long saed blong bodi, be oli nidim moa we narafala i yusum ol tok blong Baebol blong mekem bilif blong olgeta i kam strong, mo blong leftemap tingting blong olgeta. (1 Tes. 5:14) Maet ol yangfala long kongregesen oli stap traehad blong blokem “ol krangke fasin blong ol yangfala, we oli wantem tumas ol samting we i no stret.” (2 Tim. 2:22) Ol elda oli givhan long evriwan long kongregesen, taem oli visitim ol sipsip. Taem oli go visitim ol brata mo sista, oli traem blong kasem save long ol hadtaem we oli stap fesem mo oli yusum ol advaes blong Baebol blong leftemap tingting blong olgeta. Sipos ol elda oli kwik blong givim ol samting we ol brata oli nidim, hemia i save blokem plante trabol.

16. Taem wan brata long kongregesen i gat wan bigfala problem, ?ol elda oli mas mekem wanem?

¹⁶ Be sipos wan brata long kongregesen i gat wan bigfala problem, mo klosap hem i no moa fren gud wetem Jehova, ?olsem wanem long hem? Disaepol Jemes i raetem se: ‘?I gat wan long yufala we i sik? I gud hem i singaot ol elda blong [kongregesen] blong oli kam luk hem. Nao olgeta oli save prea long hem, mo oli save kafsaedem oel i go long hem long nem blong Masta blong yumi. Mo prea blong man we i bilif bambae i hilim sikman ya. Masta blong yumi bambae i mekem bodi blong hem i strong bakegen, mo sipos hem i bin mekem sam sin, Masta blong yumi bambae i fogivim hem from.’ (Jem. 5:14, 15) Nating sipos wan Kristin we i sik long saed blong spirit i no “singaot ol elda,” be oli mas go givhan long hem kwiktaem taem oli save se hem i gat wan problem. Oli mas prea wetem ol brata mo oli mas prea from olgeta, mo oli mas givhan long olgeta long taem blong trabol. Sipos oli mekem olsem, oli soemaot se oli ol gudfala man blong lukaot long sipsip we oli stap leftemap tingting blong ol brata blong olgeta, blong oli glad blong mekem wok blong God.—Ridim Aesea 32:1, 2.

17. Taem ol elda oli folem fasin blong “nambawan man blong lukaot sipsip,” ?samting ya i givhan olsem wanem long kongregesen?

¹⁷ Ol Kristin elda oli wok had blong folem fasin blong “nambawan man blong lukaot sipsip,” Jisas Kraes, long evri samting we oli mekem long ogenaesesen blong Jehova. Ol elda ya oli givhan long ol sipsip blong oli kam strong mo blong oli gohed blong mekem wok blong Jehova. Yumi talem tangkiu long ol elda ya we oli lavem yumi, mo long nambawan man blong lukaot long sipsip, hemia Jehova.