Yumi Mas Obei Long Ol Man Blong Lukaot Long Sipsip

1, 2. ?From wanem Jehova i talem se hem i olsem wan man blong lukaot long sipsip?

JEHOVA i talem se hem i olsem wan man blong lukaot long sipsip. (Esik. 34:11-14) Tok blong hem i givhan long yumi blong kasem save long fasin blong hem. Wan man we i lukaot long ol sipsip, hem i lavem ol sipsip blong hem, i lukaot gud long olgeta, mo i kea long olgeta. Hem i lidim olgeta oli go long ol ples we i gat gudfala gras mo wota long hem. (Sam 23:1, 2) Hem i lukaot long olgeta long dei mo long naet. (Luk 2:8) Hem i blokem ol wael anamol blong oli no kam kakae olgeta. (1 Saml. 17:34, 35) Hem i karem ol pikinini sipsip. (Aes. 40:11) Hem i go lukaotem ol sipsip we oli lus mo i keagud long olgeta we oli kasem kil.—Esik. 34:16.

² Bighaf blong ol man blong Jehova bifo, oli wokem garen mo oli lukaot long ol anamol. Taswe oli kasem save from wanem Jehova i talem se hem i olsem wan man blong lukaot long sipsip. Oli save se ol sipsip oli nidim we man i lukaot gud mo i kea long olgeta, blong oli save gat gudfala helt, mo oli save laef. Long sem fasin, ol man oli nidim we Jehova i kea mo i lidim olgeta. (Mak 6:34) Sipos Jehova i no lukaot gud long olgeta, bambae oli harem nogud. Bambae oli no save se wanem i stret mo wanem i no stret, mo oli olsem “ol sipsip we i no gat man blong lukaot long olgeta.” (1 King 22:17) Be ol man we oli letem Jehova i lukaot gud long olgeta, oli gat evri samting we oli nidim.

 3. ?Bambae yumi tokbaot wanem long stadi ya?

³ Yumi tu yumi kasem save from wanem Jehova i olsem wan man blong lukaot long sipsip. Yumi luk we hem i lukaot gud long ol man blong hem tede. Bambae yumi tokbaot se hem i lidim yumi olsem wanem mo i lukaot gud long ol nid blong yumi olsem wanem. Biaen, bambae yumi tokbaot samting we yumi mas mekem, blong yumi harem gud long samting we Jehova i mekem.

 4. ?Jisas i mekem wanem blong givhan long ol sipsip blong Jehova?

⁴ Jehova i putumap Jisas blong hem i Hed blong Kristin kongregesen. (Efes. 1:22, 23) Jisas we i “gudfala man ya blong lukaot long sipsip,” hem i mekem i sem mak long Papa blong hem. Hem i lavem ol sipsip mo i keagud long olgeta. Hem i givim laef blong hem tu blong sevem ol sipsip. (Jon 10:11, 15) !Sakrefaes blong hem i karem bigfala blesing long olgeta man! (Mat. 20:28) Stamba tingting blong Jehova se olgeta man we oli bilif long Jisas “bambae oli no save lus, oli gat laef we i no save finis.”—Jon 3:16.

5, 6. (1) ?Jisas i putumap hu blong i lukaot long ol sipsip blong hem? ?Ol sipsip oli mas mekem wanem blong oli save harem gud long plan ya? (2) ?Wanem bigfala risen we i pulum yumi blong obei long ol elda?

⁵ ?Ol sipsip oli mekem wanem blong soemaot se Jisas Kraes hem i man ya we i stap lukaot long olgeta? Jisas i talem se: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi.” (Jon 10:27) Ol sipsip oli harem voes blong Gudfala Man blong lukaot long sipsip, taem oli obei long hem long evri samting. Hemia i min se oli obei tu long ol man we Jisas i putumap olgeta blong oli givhan long hem blong lukaot long ol sipsip. Long taem blong ol fas Kristin, Jisas i jusum ol aposol mo ol disaepol blong hem, blong oli lukaot long ol man blong hem. Hem i talem se oli mas tijim mo givim kakae long “ol smol sipsip” blong hem. (Mat. 28:20; ridim Jon 21:15-17.) Taem gud nius i stap goaot long plante moa ples, plante moa man oli kam disaepol blong Kraes. Taswe Jisas i mekem plan se i mas gat ol Kristin elda blong oli lukaot long ol kongregesen.—Efes. 4:11, 12.

⁶ Biaen, Pol i talem long ol elda long kongregesen blong Efesas se tabu spirit i putumap olgeta oli kam elda blong oli ‘lukaot long ol man blong kongregesen blong God, olsem we man blong lukaot long sipsip i stap lukaot long ol sipsip blong hem.’ (Wok 20:28) Tabu spirit i putumap ol elda tede tu. ?From wanem yumi talem olsem? From we olgeta ya oli folem ol fasin we Baebol i talem se ol elda oli mas gat. Tabu spirit nao i pulum ol man blong oli raetemdaon ol fasin ya long Baebol. Taswe, taem yumi obei long ol elda, yumi soemaot se yumi respektem Jehova mo Jisas, tufala bigfala man blong lukaot long sipsip. (Luk 10:16) Hemia bigfala risen we i pulum yumi blong obei long ol elda. Be i gat sam narafala risen we i soemaot se i waes blong obei long ol elda.

 7. ?Ol elda oli mekem wanem blong givhan long yu blong yu fren gud wetem Jehova?

⁷ Ol elda oli leftemap tingting blong yumi, mo oli givim advaes we i kamaot long Baebol, no i stanap long ol rul blong Baebol. Be oli no wantem bos long laef blong ol brata mo sista. (2 Kor. 1:24) Oli wantem givhan long olgeta blong oli mekem ol desisen blong olgeta folem ol rul blong Baebol. Long rod ya, ol elda oli givhan long kongregesen blong i joen gud mo i gat pis. (1 Kor. 14:33, 40) Baebol i talem se ol elda oli ‘stap lukaot long laef’ blong ol Kristin. Hemia i min se oli wantem givhan long evri Kristin blong oli fren gud wetem Jehova. Taswe sipos oli luk se wan brata no sista i mekem wan rong desisen, no i wantem mekem wan rong desisen, oli go givhan long hem kwiktaem. (Gal. 6:1, 2; Jud 22) !Hemia ol gudfala risen blong yumi “obei long” olgeta we oli stap lidim yumi!—Ridim Hibrus 13:17.

 8. ?Ol elda oli mekem wanem blong lukaot gud long kongregesen?

⁸ Aposol Pol tu i wan elda. Hem i givim woning long ol brata blong hem long Kolosi, se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.” (Kol. 2:8) Woning ya i givhan long yumi blong tingbaot wan narafala risen blong yumi obei long ol elda. Oli lukaot gud long ol sipsip taem oli givim woning long ol brata sista long eni samting we i save spolem bilif blong olgeta. Aposol Pita i givim woning se ol ‘giaman profet’ mo ol ‘giaman tija’ bambae oli traem blong pulum ol Kristin we oli no strong, blong oli no obei long Jehova. (2 Pita 2:1, 14) Tede ol elda oli mas givim ol sem kaen woning taem i nidim. Olgeta oli ol Kristin we oli waes, mo oli save plante samting long saed blong laef. Bifo we oli kam elda, oli soemaot se oli kasem save gud long Baebol. Mo oli soemaot se oli naf gud blong tijim ol man long ol trutok blong Baebol. (1 Tim. 3:2; Taetas 1:9) Olgeta oli bigman long tingting, oli gat stret tingting, mo oli gat waes we i kamaot long Baebol. Taswe oli naf blong lidim gud ol brata mo sista blong olgeta.

 9. ?Tede, Jisas i lidim mo i fidim Kristin kongregesen olsem wanem?

⁹ Jehova i yusum ogenaesesen blong hem blong tijim mo lidim ol Kristin brata raon long wol. Plante long ol advaes blong Baebol we yumi kasem, oli stap long ol buk mo magasin blong yumi. Mo tu, samtaem ogenaesesen i givim sam save long ol elda long kongregesen. Ol elda oli kasem ol save ya long ol leta, no long ol tijing we ol eria elda oli givim long olgeta. Long rod ya, ol sipsip oli kasem save gud samting we oli mas mekem.

10. ?Wanem wok we ol elda oli mas mekem taem wan brata no sista i lego kongregesen?

¹⁰ Ol man we oli lukaot long sipsip oli gat wok ya blong protektem mo kea long ol sipsip. Ol Kristin elda oli wari moa long olgeta we bilif blong olgeta i kam slak mo olgeta we oli mekem ol bigfala mastik. (Ridim Jemes 5:14, 15.) Maet samfala oli lego kongregesen mo oli no moa mekem wok blong God. Sipos i olsem, ?wan elda i mas mekem wanem? Bambae hem i mekem evri samting we hem i naf blong mekem, blong lukaotem ol sipsip ya mo pulum olgeta oli kambak long kongregesen. Jisas i talem se: “Papa blong yufala long heven, hem i no wantem we bambae wan long ol pikinini ya i lus.”—Mat. 18:12-14.

11. ?From wanem maet samfala oli harem se i had blong oli obei long ol elda?

¹¹ Jehova mo Jisas tufala i stret gud olgeta. Be ol brata we tufala i putumap olgeta blong oli lukaot long kongregesen, oli no stret gud. Samting ya i save mekem se i had long samfala blong oli obei long ol elda. Maet ol man ya oli talem se: “Ol elda ya oli sinman nomo olsem yumi. ?From wanem yumi mas lesin long advaes blong olgeta?” I tru se ol elda oli no stret gud. Be yumi no mas tingting tumas long ol slak fasin mo ol mastik blong olgeta.

12, 13. (1) ?Bifo, wanem mastik we ol man we Jehova i putumap olgeta blong lidim ol narafala, oli mekem? (2) ?From wanem Jehova i wantem se ol man oli raetemdaon ol mastik ya long Baebol?

¹² Baebol i talemaot klia ol mastik blong ol man we Jehova i yusum olgeta blong oli lidim ol man blong hem bifo. Jehova i jusum Deved blong hem i king, be biaen, Deved i mekem sin. Hem i slip wetem woman blong narafala man mo i kilim man blong woman ya i ded. (2 Saml. 12:7-9) Mo i gat aposol Pita tu. Nating se hem i gat bigfala wok long kongregesen, be hem tu i mekem wan bigfala mastik. (Mat. 16:18, 19; Jon 13:38; 18:27; Gal. 2:11-14) Evri man stat long Adam mo Iv i kam, oli sinman. Jisas nomo i stret gud.

¹³ ?From wanem Jehova i pulum ol man blong oli raetemdaon ol mastik blong sam man we hem i putumap olgeta blong oli lidim ol man blong hem? Wan risen, hemia blong soemaot se hem i save yusum ol sinman blong oli lidim ol man blong hem. Blong talem stret, hem i stap mekem olsem finis. Taswe, yumi no mas yusum slak fasin blong ol elda olsem wan eskius blong toktok smosmol agensem olgeta, mo blong no obei long olgeta. Jehova i wantem se yumi respektem ol brata ya mo yumi obei long olgeta.—Ridim Eksodas 16:2, 8.

14, 15. ?Yumi save lanem wanem long fasin ya we Jehova i givim save long ol man blong hem bifo?

¹⁴ I impoten tumas we yumi obei long ol elda. ?From wanem? Yumi traem tingbaot olsem wanem Jehova i givim advaes long ol man blong hem bifo, blong oli save stap laef long taem blong trabol. Taem ol man Isrel oli aot long Ijip, God i givim sam impoten save long Moses mo Eron blong tufala i talemaot long ol man Isrel. Mo tu, sipos oli wantem laef taem God i mekem namba ten panis i kasem Ijip, oli mas obei long oda blong hem. Hem i talem se oli mas mekemrere wan spesel kakae, oli mas kilim wan sipsip, mo oli mas ravem sam blad blong hem antap long doa blong haos blong olgeta mo long tufala pos blong doa. ?God i talemaot ol save ya stret long ol man? Nogat. Olgeta oli mas lesin long ol olfala man Isrel. Moses i talemaot oda ya long ol olfala ya, mo olgeta nao oli go talemaot long ol man. (Eks. 12:1-7, 21-23, 29) Long rod ya, Jehova i yusum Moses mo ol olfala man long taem ya, blong oli lidim ol man Isrel. Tede, Jehova i yusum ol elda blong oli mekem wok ya.

¹⁵ Maet yu tingbaot plante stori long Baebol we oli soemaot se Jehova i talemaot ol save blong hem long ol man no long ol enjel, blong oli go talemaot long ol man. Plante taem, ol save ya oli sevem laef blong ol man. Long evri stori ya, God i jusum sam narafala blong oli go toktok long nem blong hem, mo blong oli talem ol samting we ol man blong hem oli mas mekem long taem blong trabol. Yumi gat evri risen blong tingbaot se bambae Jehova i mekem sem samting long ol man blong hem long Amagedon. Ol elda tede we oli gat wok ya blong toktok long nem blong Jehova mo long nem blong ogenaesesen blong hem, oli mas lukaot gud se oli no yusum paoa blong olgeta long fasin we i no stret.

16. ?Yumi mas lesin gud long wanem tok?

¹⁶ Ol man blong Jehova oli olsem ‘wan kampani blong ol sipsip’ we oli gat “wan man nomo blong lukaot long olgeta,” hemia Jisas Kraes. (Jon 10:16) Jisas i talem se bambae hem i stap wetem ol disaepol blong hem gogo kasem en blong rabis wol ya. (Mat. 28:20) Jisas i King finis long heven, taswe hem i kontrolem gud evri samting we bambae oli hapen bifo we hem i kam blong spolem wol blong Setan. ?Yumi mas mekem wanem blong yumi evriwan i save stap joen gud long ogenaesesen blong God mo yumi stap sef? Baebol i ansa se: “Bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’” Tok ya i minim ol samting we Jehova i tijim long yumi long Baebol, mo ol tok we hem mo Jisas, tufala i givim long ol man we tufala i putumap olgeta olsem ol man blong lukaot long sipsip, blong oli talemaot long yumi.—Ridim Aesea 30:21; Revelesen 3:22.

17, 18. (1) ?Hu i save spolem ol sipsip? ?Be wanem samting i mekem se yumi no fraet? (2) ?Bambae yumi tokbaot wanem long nekis stadi?

¹⁷ Baebol i talem se Setan i stap raon long yumi “olsem wan laeon we i stap singaot bigwan, i stap lukaot man blong i kakae.” (1 Pita 5:8) Hem i olsem wan wael anamol we i hanggri tumas. Hem i stap folfolem kampani blong ol sipsip, i wet blong jam long wan sipsip we i slak, no i gowe long ol narafala. Hemia i wan gudfala risen blong yumi stap klosap long kongregesen oltaem, mo long Jehova we i “man blong lukaot long sipsip, we hem i prapa man blong lukaot long laef” blong yumi. (1 Pita 2:25) Revelesen 7:17 i tokbaot ol man we bambae oli no ded long taem blong bigfala trabol, se Jisas “bambae i lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.” !Hemia wan nambawan promes!

¹⁸ Wok ya we ol Kristin elda oli gat blong lukaot long kongregesen, i impoten tumas. ?Olsem wanem ol elda ya oli save meksua se fasin we oli mekem long ol sipsip blong Jisas, i stret nomo? Bambae yumi tokbaot ansa blong kwestin ya long nekis stadi.