?Yumi Tokbaot Wanem Long Ol Magasin?

Wajtaoa Eprel 1

“Ol man oli save gud ol Witnes blong Jehova from wok ya blong talemaot gud nius. ?Yu yu stap tingbaot from wanem mifala i mekem wok ya? [Yu letem man i ansa.] Yu traem luk olsem wanem Baebol i eksplenem samting ya. [Yu save ridim Matiu 24:14.] Wajtaoa ya i givim ansa long ol kwestin ya se: ?Gud nius ya i long saed blong wanem? ?Wanem ya Kingdom blong God? ?Lasdei no en, hem i minim wanem?”

Wekap! Eprel-Jun

Taem yu stap storian wetem wan yangfala, i gud yu soemaot pej 26. Yu soemaot long hem fas smol stamba tok, mo yu askem se, “?Yu ting se ol save ya i tru no i giaman? [Yu letem man i ansa. Biaen yu ridim 2 Korin 7:1.] Haf ya i tokbaot ol samting we yu mas save long saed blong fasin blong smok, mo wanem we yu mas mekem blong lego.”

Wajtaoa Mei 1

“Plante man oli gat ol defdefren bilif long saed blong Jisas. ?Yu ting se i impoten blong yumi save trutok long saed blong Jisas? [Yu letem man i ansa. Biaen yu ridim Jon 17:3.] Magasin ya i eksplenem wanem we Baebol i talem long saed blong Jisas se, hem i kamaot long weples, laef blong hem i olsem wanem, mo from wanem hem i ded.”

Wekap! Eprel-Jun

“Taem wan we yumi lavem hem tumas i ded, trabol ya i mekem yumi harem nogud moa, i bitim ol narafala trabol we yumi save fesem long laef blong yumi. ?Yu yu agri long samting ya? [Yu letem man i ansa.] Plante man oli faenem se advaes ya i givhan gud long olgeta. [Yu ridim Ol Sam 55:22.] Wekap! ya i tokbaot sam samting we yumi save mekem taem yumi harem nogud from wan we i ded, mo olsem wanem yumi save putum ol trabol blong yumi long God.” Yu save soemaot haf we i stat long pej 11.