‘Jehova i God Blong Yumi, Mo Hem Wan Nomo i God’

1, 2. (1) ?From wanem plante man oli save ol tok we oli stap long Dutronome 6:4? (2) ?From wanem Moses i talem ol tok ya?

OL MAN Jiu oli yusum ol tok blong Dutronome 6:4 long wan spesel prea blong olgeta, blong plante yia finis. Oli singaot prea ya se Shema, we i wan tok we i kamaot long lanwis Hibru mo tok ya i stap long stat blong prea ya. Plante long ol man Jiu oli talem prea ya evri dei, long moning mo long sapa, taem oli wosipim God.

² Moses i talem ol tok ya long ol laswan toktok blong hem long ol man Isrel. Long yia 1473 bifo Kraes, ol man Isrel oli stap long Moab, mo oli rere blong gokros long Jodan reva mo go insaed long Promes Lan. (Dutronome 6:1) Moses i lidim ol man Isrel blong 40 yia, mo hem i wantem se oli mas gat strong tingting blong fesem ol trabol we bambae oli kasem. Oli mas trastem Jehova we i God blong olgeta, mo oli mas obei long hem. Taswe, Moses i talem ol laswan toktok ya blong mekem tingting blong olgeta i strong. Afta we Moses i tokbaot ol Tenkomanmen mo ol narafala loa blong Jehova, hem i talem long olgeta blong oli no fogetem impoten advaes ya we i stap long Dutronome 6:4, 5. (Ridim.)

 3. ?Wanem ol kwestin we bambae yumi tokbaot long stadi ya?

³ Ol man Isrel oli save se Jehova we i God blong olgeta, “hem wan nomo i God.” Ol man Isrel we oli no lego Jehova, oli wosipim hem nomo olsem ol bubu blong olgeta bifo. Be, ?from wanem Moses i talem long olgeta bakegen se Jehova “hem wan nomo i God”? ?Olsem wanem tingting ya i joen wetem fasin blong yumi blong lavem God long olgeta tingting, laef, mo paoa blong yumi? ?Mo olsem wanem ol tok blong Dutronome 6:4, 5 oli stret gud tu long taem blong yumi tede?

4, 5. (1) ?Wanem mining blong tok ya “hem wan nomo i God”? (2) ?From wanem Jehova i no sem mak long ol god blong ol narafala kantri?

⁴ Hem Nomo i Trufala God. Tok ya “hem wan nomo i God,” i min se Jehova nomo i trufala God, mo i no gat wan we i sem mak long hem. ?From wanem Moses i yusum tok ya? I luk olsem se hem i no talem tok ya blong soemaot se tijing blong triniti i rong. Jehova i wokem heven mo wol, mo hem i King we i rulum olgeta samting. Hem nomo i trufala God mo i no gat wan narafala god we i olsem hem. (2 Samuel 7:22) Taswe, ol tok blong Moses i mekem ol man Isrel oli tingbaot bakegen se oli mas wosipim Jehova nomo. Oli no mas folem fasin blong ol man raonabaot long olgeta, we oli stap wosipim plante giaman god. Ol man ya oli bilif se ol god blong olgeta oli save bos long ol samting raonabaot long yumi.

⁵ Eksampol, ol man Ijip oli wosipim Ra we i god blong san, Nut we i woman god blong skae, Geb we i god blong wol, Hapi we i god blong Nael reva, mo tu oli wosipim plante anamol. Be Jehova i soemaot se hem i strong moa long ol giaman god ya, taem hem i mekem we ten bigfala trabol oli kasem ol man Ijip. Ol man Kenan oli wosipim giaman god ya Bal, mo oli bilif se hem nao i stamba blong laef. Mo tu, oli bilif se hem i god blong skae, ren mo strong win. Long plante ples, ol man oli prea long Bal blong i protektem olgeta. (Namba 25:3) Ol man Isrel oli mas tingbaot se God blong olgeta i trufala God, mo “hem wan nomo i God.”—Dutronome 4:35, 39.

6, 7. ?Tok ya “hem wan nomo i God,” i save minim wanem tu? ?Olsem wanem Jehova i soemaot se “hem wan nomo i God”?

⁶ Hem i No Save Jenis Mo Hem i Holemstrong Promes Blong Hem. Mo tu, tok ya “wan” we i stap long tok ya “hem wan nomo i God,” i min se oltaem yumi save trastem ol plan blong hem mo ol samting we hem i mekem. Jehova i no save jenis mo yumi savegud ol fasin blong hem. Oltaem hem i mekem samting we i stret, hem i no lego ol man blong hem mo hem i mekem ol promes blong hem oli kamtru. Eksampol, hem i promes long Ebraham se ol man we oli kamaot biaen long hem, bambae oli go stap long Promes Lan. Mo Jehova i mekem plante bigfala merikel blong mekem promes blong hem i kamtru. Nating se 430 yia i pas finis we Jehova i mekem promes ya, be tingting blong hem i no jenis.—Jenesis 12:1, 2, 7; Eksodas 12:40, 41.

⁷ Plante yia biaen, Jehova i singaot ol man Isrel se oli ol witnes blong hem mo hem i talem long olgeta se: “Mi nomo mi God. I no gat narafala god i stap. Kam kasem naoia, neva i gat narafala god i stap, mo long fiuja, bambae i no gat narafala god bakegen samtaem.” Mo tu, Jehova i soemaot se plan blong hem i no save jenis taem hem i talem se: “Mi nao mi God, mo bambae mi no save lus samtaem, bambae mi stap olwe nomo.” (Aesea 43:10, 13; 44:6; 48:12) Taswe, i wan bigfala blesing blong ol man Isrel oli wosipim wan God we i no save jenis, mo oli save trastem hem oltaem. Tede tu, yumi harem gud long nambawan blesing ya.—Malakae 3:6; Jemes 1:17.

8, 9. (1) ?Jehova i wantem se ol man blong hem oli mekem wanem? (2) ?Olsem wanem Jisas i soemaot se ol tok blong Moses oli impoten?

⁸ Moses i talem bakegen long ol man Isrel se Jehova bambae i gohed blong lavem olgeta mo kea long olgeta. Taswe, Jehova i wantem se olgeta tu oli wosipim hem nomo, mo oli lavem hem long olgeta tingting, laef mo paoa blong olgeta. Ol papa mo mama oli mas tijim gud pikinini blong olgeta blong save Jehova. Nao bambae ol pikinini tu oli save wosipim Jehova nomo.—Dutronome 6:6-9.

⁹ Jehova i neva jenis, taswe hem i wantem yet se ol man blong hem tede oli folem ol rul blong hem blong wosipim hem. Sipos yumi wantem we Jehova i glad long yumi, yumi mas wosipim hem nomo mo lavem hem long olgeta hat, laef, tingting mo paoa blong yumi. Jisas i talem se loa ya, i hae moa long ol narafala loa. (Ridim Mak 12:28-31.) I gud yumi tokbaot olsem wanem yumi save soemaot long ol fasin blong yumi, se yumi bilif se ‘Jehova i God blong yumi, mo hem wan nomo i God.’

10, 11. (1) ?I minim wanem se yumi mas wosipim Jehova nomo? (2) ?Olsem wanem ol yangfala Hibru long Babilon, oli soemaot se oli wosipim Jehova nomo?

¹⁰ Jehova i God blong yumi mo hem nomo i God. Taswe yumi wantem wosipim hem nomo. Yumi no mas wosipim ol narafala god, no yusum ol giaman tijing long wosip blong yumi. Hem i God ya we i hae moa long ol narafala god, mo hem i gat bigfala paoa i winim ol narafala god. Be i no hemia nomo. Jehova nao hem i trufala God, mo yumi mas wosipim hem nomo.—Ridim Revelesen 4:11.

¹¹ Buk blong Daniel i tokbaot stori blong ol yangfala Hibru ya, Daniel, Hanani, Misael mo Asaria. Olgeta oli soemaot se oli wosipim Jehova nomo taem oli no wantem kakae ol kakae we oli save mekem olgeta oli doti long fes blong God. Mo ol trifala fren blong Daniel oli no wantem wosipim aedol we king Nebukadnesa i wokem long gol. Olgeta oli gat strong tingting blong wosipim Jehova nomo.—Daniel 1:1–3:30.

12. Sipos yumi wantem mekem wosip long Jehova nomo, ?yumi mas lukaot gud long wanem?

¹² Yumi mas putum Jehova long fasples long laef blong yumi. Sipos yumi wantem wosipim hem nomo, yumi mas lukaot gud blong no letem ol narafala samting oli tekem ples blong wosip we yumi mekem long Jehova. ?Wanem ol samting we yumi mas lukaot gud long olgeta? Long Tenkomanmen we Jehova i givim, hem i talem long ol man blong hem blong oli no mas wosipim ol narafala god, mo oli no mas wosipim ol aedol. (Dutronome 5:6-10) Tede, i gat plante samting we oli olsem ol aedol mo i had blong yumi luksave sam long olgeta. Be ol samting we Jehova i wantem oli no jenis. “Hem wan nomo i God.” Bambae yumi luk olsem wanem yumi save blokem fasin ya blong wosipim ol aedol tede.

13. ?Wanem i save mekem se yumi no moa putum Jehova long fasples long laef blong yumi?

¹³ Kolosi 3:5 (ridim), i tokbaot ol samting we oli save spolem fasin blong yumi blong fren gud wetem Jehova. Yumi luk se fasin blong wantem evri samting, i joen wetem fasin blong wosipim ol aedol. ?Yumi save samting ya olsem wanem? Taem yumi wantem tumas wan samting olsem mane, no ol sas samting, samting ya i save kam olsem wan god we i gat bigfala paoa long laef blong yumi. Ol rabis fasin we Kolosi 3:5 i tokbaot, oli joen wetem fasin blong wantem evri samting mo hem i wan rod blong wosipim ol aedol. Taswe, sipos yumi wantem tumas ol samting ya, bambae yumi no moa putum Jehova long fasples long laef blong yumi. Yumi no wantem nating se samting olsem i hapen.

14. ?Aposol Jon i givim wanem woning long yumi?

¹⁴ Aposol Jon i tokbaot bakegen sem samting. Hem i givim woning se man i no mas laekem tumas ol samting blong wol ya. Hem i talem se, sipos “oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat,” bambae “hem i no save lavem Papa blong yumi.” (1 Jon 2:15, 16) Taswe, oltaem yumi mas jekemgud laef blong yumi. Maet yumi gat fasin ya blong wantem tumas ol samting blong wol ya olsem, ol samting blong spel mo pleplei, ol fren mo ol stael blong klos mo hea. No maet yumi wantem gat hae edukesen blong gat wan “gudfala laef.” (Jeremaea 45:4, 5) Niufala wol i stap kam klosap tumas. Taswe, yumi mas tingbaot ol tok we Moses i talem. Sipos yumi kasemsave mo yumi bilif se ‘Jehova i God blong yumi, mo hem wan nomo i God,’ bambae yumi wosipim hem nomo mo yumi mekem ol fasin we hem i wantem.—Hibrus 12:28, 29.

15. ?From wanem Pol i mas talem long ol Kristin blong oli tingbaot bakegen se Jehova hem wan nomo i God?

¹⁵ Tok ya “hem wan nomo i God,” i givhan long yumi blong kasem save se Jehova i wantem we ol man blong hem oli joen gud mo oli gat wan tingting nomo. Long Kristin kongregesen bifo, i gat ol man Jiu, ol man Gris, ol man Rom mo ol man blong ol narafala kantri. Mo tu, fasin blong laef blong olgeta i defdefren. From samting ya, i had blong sam long olgeta oli folem niufala fasin blong wosip we oli lanem. Taswe, Pol i mas talem long ol Kristin blong oli tingbaot bakegen se oli gat wan God nomo, hemia Jehova.—Ridim 1 Korin 8:5, 6.

16, 17. (1) ?Wanem profet tok i stap kamtru long taem blong yumi, mo wanem samting i kamaot from? (2) ?Wanem samting i save spolem fasin blong yumi blong joen gud?

¹⁶ ?Olsem wanem long ol Kristin kongregesen tede? Profet Aesea i talem se “i gat taem i stap kam,” we ol man blong olgeta kantri bambae oli joen blong wosipim Jehova. Bambae oli talem se: “Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot.” (Aesea 2:2, 3) Yumi glad tumas blong luk we profet tok ya i stap kamtru tede. Ol brata mo sista blong yumi oli kamaot long ol defdefren kantri, oli toktok defren lanwis, mo oli gat defren fasin blong laef. Nating se i olsem, yumi evriwan i joen gud blong wosipim Jehova. Be from we yumi defdefren, samtaem maet i save gat sam problem i kamaot.

¹⁷ Eksampol. Maet long kongregesen blong yu i gat ol brata mo sista we oli gat defren kalja, lanwis, stael blong klos, fasin mo kakae we oli defren long blong yu. ?Wanem tingting blong yu long olgeta? ?Yu yu stap go joen wetem olgeta, no yu go joen nomo wetem ol narafala we oli blong ples blong yu? ?Yu yu glad blong joen wetem ol elda we oli yang moa long yu? ?Yu yu glad blong joen wetem ol elda we oli blong defren kantri? Sipos yumi no lukaot gud long ol tingting we yumi gat long ol narafala, bambae oli save spolem yumi nao yumi no moa save joen gud blong wosipim Jehova.

18, 19. (1) ?Wanem advaes i stap long Efesas 4:1-3? (2) ?Yumi save mekem wanem blong kongregesen i joen gud oltaem?

¹⁸ ?Olsem wanem yumi save blokem ol tingting ya blong oli no spolem yumi? Pol i givim ol gudfala advaes long ol Kristin we oli stap long Efesas. Long taon ya, i gat plante man we oli kamaot long ol defren kantri mo oli gat defren fasin blong laef. (Ridim Efesas 4:1-3.) Pol i talem long olgeta blong oli gat tingting daon, oli mas kwaet man, oli mas gat longfala tingting mo oli mas lavlavem olgeta. Ol fasin ya oli olsem ol strong pos blong holemtaet wan haos. Be man i mas wok had tu blong mekem se haos ya i stap gud oltaem. Pol i wantem se ol Kristin long Efesas oli wok had blong mekem “evriwan i joen gud.”

¹⁹ Yumi evriwan i mas wok had blong mekem kongregesen i joen gud oltaem. ?Olsem wanem yumi save mekem samting ya? Fastaem, yumi mas traehad blong wokem ol gudfala fasin we Pol i tokbaot. Yumi mas gat tingting daon, kwaet fasin, longfala tingting mo yumi mas lavem ol narafala. Mo tu, yumi mas wok had blong ‘holem pis mo blong yumi save joen gud oltaem.’ Taem i gat wan smol problem, yumi mas wok had blong mekem se oltaem i gat pis mo yumi joen gud. Hemia i olsem we yumi stap fiksimap ol smosmol krak long wol blong haos.

20. ?Olsem wanem yumi soemaot se ‘Jehova i God blong yumi, mo hem wan nomo i God’?

²⁰ ‘Jehova i God blong yumi, mo hem wan nomo i God.’ !Toktok ya i gat bigfala paoa! Ol tok ya oli mekem tingting blong ol man Isrel i strong, blong winim ol trabol we bambae oli kasem taem oli stap go insaed long Promes Lan. Ol tok ya oli save mekem tingting blong yumi tu i strong, blong yumi gotru long bigfala trabol, mo go insaed long niufala wol. Taswe, i gud we yumi gohed blong wosipim Jehova nomo. Yumi mas lavem Jehova mo mekem wok blong hem long olgeta hat, tingting, mo paoa blong yumi. Mo yumi mas wok had blong mekem se oltaem i gat pis wetem ol brata mo sista, mo yumi joen gud. Sipos yumi mekem olsem, Jisas bambae i jajem yumi olsem ol sipsip mo yumi save kasem nambawan promes ya we hem i talem se: “Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam, we hem i king long hem.”​—Matiu 25:34.