Jehova i Lavem Olgeta We ‘Oli Stanap Strong Mo Karem Frut’

1, 2. (1) ?Olsem wanem ol brata mo sista we oli gohed blong prij long ol man we oli no intres, oli leftemap tingting blong yumi? (Yu luk pija long stat blong stadi.) (2) ?Jisas i talem wanem taem hem i prij long “ol man ples blong hem”? (Yu luk futnot.)

SERGIO mo woman blong hem Olinda, tufala i mekem wok blong paenia long Amerika. Tufala tugeta i gat bitim 80 yia. Naoia, i had blong tufala i wokbaot, from we leg blong tufala i soa oltaem. Nating se i olsem, long 7 klok long moning, tufala i wokbaot i go long wan bisi ples long taon, olsem we tufala i stap mekem plante yia finis. Tufala i go klosap long ples blong stopem bas, mo tufala i givimaot ol buk long ol man we oli pas. Bighaf blong ol man oli no intres, be Sergio mo Olinda i smael long ol man we oli pas. Long medel dei, tufala i wokbaot sloslo i gobak long haos. Long 7 klok long nekis moning, tufala i go long sem ples bakegen. Tufala i mekem olsem sikis dei evri wik.

² I gat plante gudfala brata mo sista olsem Sergio mo Olinda, we oli prij plante yia finis, nating se bighaf blong ol man ples oli no wantem lesin. Maet yu tu yu prij long ol man olsem. Mifala i talem tangkiu long yu, from we yu stanap strong mo yu gohed blong prij, nating se i had.a Eksampol blong yu i stap leftemap tingting blong plante brata mo sista, we maet olgeta tu oli prij plante yia finis. Makem gud tok blong wan eria elda se: “Taem mi prij wetem ol gudfala brata mo sista olsem, eksampol blong olgeta i givim paoa long mi.” Wan narafala eria elda i talem se: “Taem mi luk olsem wanem oli stanap strong long wok ya, samting ya i mekem tingting blong mi i strong blong gohed long wok blong prij.” Mo narawan bakegen i se: “Eksampol blong olgeta i mekem mi mi harem gud tumas.”

 3. ?Bambae yumi tokbaot wanem trifala kwestin, mo from wanem?

³ Long stadi ya, bambae yumi tokbaot trifala kwestin ya: ?Tingting i save foldaon from wanem? ?Karem frut i minim wanem? ?Wanem i save givhan long yumi, blong yumi stanap strong mo gohed blong karem frut? Ansa blong ol kwestin ya i save pulum yumi, blong gohed long wok blong prij we Jisas i givim.

 4. (1) ?Pol i harem olsem wanem taem ol man Jiu oli no wantem lesin? (2) ?From wanem Pol i harem nogud olsem?

⁴ ?Olsem wanem? ?Samtaem tingting blong yu i foldaon from we ol man ples blong yu, oli no wantem lesin long gud nius blong Kingdom? Sipos yes, bambae yu kasem save long filing blong aposol Pol. Hem i gohed blong prij blong 30 yia, mo i givhan long plante man blong oli kam Kristin. (Ol Wok 14:21; 2 Korin 3:2, 3) Nating se i olsem, i no gat plante man ples blong hem, hemia ol man Jiu, we oli kam Kristin. Bighaf blong olgeta oli no wantem lesin long Pol, mo sam oli kilim mo ronem hem. (Ol Wok 14:19; 17:1, 4, 5, 13) ?Pol i harem olsem wanem? Hem i talem se: “Mi mi sore tumas mo oltaem hat blong mi i soa.” (Rom 9:1-3) ?From wanem hem i harem nogud olsem? From we hem i laekem tumas wok blong prij mo i lavem ol man tu. Pol i wantem givhan long ol man Jiu, mo hem i harem nogud taem oli sakemaot fasin sore blong God.

 5. (1) ?From wanem yumi prij? (2) ?From wanem tingting blong yumi i save foldaon samtaem?

⁵ Sem mak long Pol, yumi prij from we yumi lavem ol man mo yumi wantem givhan long olgeta. (Matiu 22:39; 1 Korin 11:1) Yumi save finis se i no gat wan fasin blong laef we i moa gud i bitim we yumi wosipim Jehova. !Mo yumi wantem se ol narafala tu oli luksave samting ya blong oli save harem gud moa long laef blong olgeta! Taswe yumi gohed blong traem tijim olgeta long trutok long saed blong Jehova mo plan blong hem. I olsem we yumi wantem givim wan naes presen nao yumi talem long olgeta se: ‘Plis, yu karem.’ Taem oli no wantem presen ya, yumi harem se ‘hat blong yumi i soa’ olsem Pol. Yumi harem nogud olsem from we yumi lavem ol man, be i no from we bilif blong yumi i slak. Taswe, yumi gohed blong prij, nating se samtaem tingting blong yumi i foldaon. Maet yumi gat sem tingting olsem Elena we i paenia bitim 25 yia finis. Hem i talem se: “Nating se wok blong prij i had, be mi laekem wok ya bitim ol narafala wok.”

 6. ?Bambae yumi ansa long wanem kwestin?

⁶ ?From wanem yumi evriwan i save karem frut, nomata weples yumi prij? Blong ansa long impoten kwestin ya, bambae yumi tokbaot tu pijatok we Jisas i talem, blong soemaot se yumi mas ‘karem frut.’ (Matiu 13:23) Fas pijatok, hem i rop blong grep.

 7. (1) Long pijatok blong Jisas, ?hu ya “man ya we i planem grep,” “rop blong grep,” mo ‘ol han blong rop ya’? (2) ?Yumi mas faenem ansa long wanem narafala kwestin?

⁷ Ridim Jon 15:1-5, 8. Long pijatok ya, Jisas i eksplenem se “man ya we i planem grep” hemia Jehova, “rop blong grep” hemia Jisas, mo ‘ol han blong rop ya’ hemia ol disaepol blong Jisas.b Afta, Jisas i talem long ol aposol se: “Taem yufala i gohed blong karem plante frut mo yufala i pruvum se yufala i disaepol blong mi, samting ya i leftemap nem blong Papa blong mi.” Ale, ?karem frut i minim wanem? Long pijatok ya, Jisas i no talem stret se frut i minim wanem, be hem i talem wan samting we i soemaot ansa blong kwestin ya.

 8. (1) ?From wanem “karem frut” i no min se yumi mekem ol niufala disaepol? (2) ?Jehova i askem long yumi blong mekem wanem?

⁸ Jisas i talem se Papa blong hem bambae ‘i katemaot evri han we oli no karem frut.’ Hemia i min se, yumi mas karem frut sipos yumi wantem stap olsem wan man blong Jehova. (Matiu 13:23; 21:43) ?Olsem wanem? ?Karem frut i min se yumi mas mekem ol niufala disaepol? Nogat. (Matiu 28:19) ?From wanem? From we plante Witnes oli wok strong be oli no bin pulum wan man i kam disaepol. ?Yu ting se olgeta oli olsem ol han blong rop we oli no karem frut? !Nogat, from we yumi no save fosem ol man blong oli kam disaepol! Jehova i gat lav. Hem i askem long yumi, blong yumi mekem samting we yumi naf blong mekem, be i no samting we yumi no naf blong mekem.—Dutronome 30:11-14.

 9. (1) ?Karem frut i minim wanem? (2) ?Bambae yumi tokbaot wanem parabol?

⁹ Ale, ?karem frut i minim wanem? I mas minim wan samting we yumi evriwan i save mekem. ?Jehova i givim wanem wok long olgeta man blong hem? Wok blong talemaot gud nius blong Kingdom.c (Matiu 24:14) Parabol blong man we i sakem sid i soemaot samting ya i klia nomo. Naoia bambae yumi tokbaot parabol ya.

10. (1) Long parabol blong Jisas, ?wanem mining blong sid mo graon? (2) ?Wan stik blong wit i karem wanem frut?

¹⁰ Ridim Luk 8:5-8, 11-15. Long parabol blong man we i sakem sid, Jisas i eksplenem se sid i minim “tok blong God” o gud nius blong Kingdom. Graon, hemia hat blong man. Sid we i foldaon long gudfala graon i gat rus, i gru, i kam bigwan, nao i “karem frut wan handred taem antap bakegen.” Sipos sid ya i gru i kam wan stik blong wit, ?bambae i karem wanem frut? Bambae i no karem wan stik blong wit bakegen, be bambae i karem ol sid we oli save gru i kam ol stik blong wit. Long parabol ya, wan sid i karem 100 sid. ?Hemia i soemaot wanem long saed blong wok blong prij?

11. (1) ?Parabol blong man we i sakem sid, i soemaot wanem? (2) ?Olsem wanem yumi karem ol niufala sid?

¹¹ Taem wan Witnes o Papa mo Mama i talemaot tok blong Kingdom long yumi, i olsem we oli planem wan sid long gudfala graon. Oli glad tumas taem oli luk we yumi bilif long tok ya. Ale, sid i gru i kam bigwan mo i karem frut. Be frut we yumi karem i no ol niufala disaepol, olsem we stik blong wit i no karem niufala stik. Frut we yumi karem, hemia ol sid, olsem we stik blong wit i karem ol sid.d ?Olsem wanem yumi mekem samting ya? Evritaem we yumi talemaot Kingdom long narafala, yumi stap sakem moa sid, olsem sid ya we oli planem long hat blong yumi. (Luk 6:45; 8:1) Taswe sipos yumi gohed nomo blong talemaot Kingdom blong God, yumi stap ‘stanap strong mo karem frut.’

12. (1) ?Pijatok blong rop mo parabol blong man we i sakem sid, i tijim yumi long wanem? (2) ?Samting ya i mekem yu yu harem olsem wanem?

¹² ?Pijatok blong rop blong grep mo parabol blong man we i sakem sid, i tijim yumi long wanem? Tufala i tijim yumi se, nating we ol man oli no wantem lesin taem yumi prij, be yumi “karem frut.” Karem frut i min se, yumi gohed nomo blong prij. Pol tu i talem samting ya, i se: ‘Evriwan bambae oli kasem blesing we i stret long wok we olgeta wanwan oli mekem.’ (1 Korin 3:8) Jehova bambae i givim blesing from ol wok blong yumi, i no from risal blong wok ya. Matilda, we i paenia 20 yia finis, i talem se: “Mi mi glad blong save se Jehova i blesem yumi from hadwok blong yumi.”

13, 14. Folem Rom 10:1, 2, ?from wanem Pol i gohed blong prij?

¹³ ?Wanem i save givhan long yumi, blong yumi ‘stanap strong mo karem frut’? I gud yumi lukluk bakegen long eksampol blong Pol. Yumi save se Pol i harem nogud taem ol man Jiu oli no wantem lesin long tok blong Kingdom. Be hem i gohed nomo blong prij, hem i no stop. Hem i tokbaot filing blong hem long ol man Jiu se: “Samting we mi wantem tumas long hat blong mi mo mi stap prea long God from, hemia blong God i sevem olgeta. Mi mi save talem se olgeta ya oli traehad blong mekem God i glad, be oli no mekem folem stret save.” (Rom 10:1, 2) ?From wanem Pol i gohed blong prij?

¹⁴ Fastaem Pol i talem se hem i prij from we ‘hem i wantem tumas long hat blong hem.’ Hem i wantem se God i sevem ol man Jiu. (Rom 11:13, 14) Afta, hem i talem se hem i ‘stap prea long God from olgeta.’ Pol i askem long Jehova blong i givhan long sam man Jiu blong oli bilif long ol tok blong Kingdom. Mo bakegen, Pol i talem se: “Oli traehad blong mekem God i glad.” Pol i traem faenem wan gudfala samting long ol man, mo i wantem se oli kam ol man blong Jehova. Hem i save se olgeta we oli traehad blong mekem God i glad, oli save kam ol disaepol blong Kraes, olsem hem.

15. ?Olsem wanem yumi save folem fasin blong Pol? Talem sam eksampol.

¹⁵ ?Olsem wanem yumi save folem fasin blong Pol? Fas samting, yumi wantem tumas blong faenem olgeta we oli “stret blong kasem laef.” Namba tu samting, yumi askem long Jehova blong i pulum ol man we hat blong olgeta i stret, blong oli lesin. (Ol Wok 13:48; 16:14) Silvana, we i paenia klosap 30 yia finis, i mekem olsem. Hem i talem se: “Bifo we mi go prij long wan haos, mi prea long Jehova blong mi gat gudfala tingting long ol man long haos ya.” Mo tu, yumi prea se ol enjel bambae oli givhan long yumi, blong yumi save faenem ol man we oli wantem lesin. (Matiu 10:11-13; Revelesen 14:6) Robet, we i paenia bitim 30 yia, i talem se: “I gud tumas blong wok wetem ol enjel we oli save samting we i stap hapen long laef blong ol man.” Namba tri samting, yumi traem faenem wan gudfala samting long ol man, mo yumi wantem se oli kam ol man blong Jehova. Kal, we i wan elda mo i baptaes bitim 50 yia, i talem se: “Mi lukaot ol smosmol saen we oli save soemaot se hat blong man i stret, maet hem i smael, i tok kaen, o i askem wan gudfala kwestin.” Sipos yumi mekem ol samting ya, yumi save ‘stanap strong mo karem frut’ olsem Pol.

16, 17. (1) ?Prija 11:6 i tijim yumi long wanem? (2) ?Ol man we oli lukluk yumi taem yumi prij oli save gat wanem tingting?

¹⁶ Yumi no mas fogetem se wok blong prij we yumi mekem, i save gat paoa long plante man nating se oli no lesin. (Ridim Prija 11:6.) Oli stap wajem yumi. Oli luk se yumi jenis gud, yumi gat respek, mo yumi kaen. Maet oli sapraes, nao sloslo, oli jenisim nogud tingting we oli gat fastaem long yumi. Sergio mo Olinda i luksave samting ya.

¹⁷ Sergio i talem se: “From we mitufala i sik, mitufala i no moa go long taon. Taem mitufala i stat bakegen, plante man oli askem se: ?Yutufala i go wea? Mifala i misim yutufala.’” Olinda i smael mo i talem se: “Plante man blong draevem bas oli sakem han mo oli singaot se: ‘!Gudfala wok ya!’ Samfala oli askem magasin tu.” Sergio mo Olinda i sapraes bigwan taem wan man i kam long troli mo i givim ol flaoa blong talem tangkiu from wok blong tufala.

18. ?From wanem yu wantem tumas blong ‘stanap strong mo karem frut’?

¹⁸ Sipos yu gohed blong talemaot Kingdom mo “planem ol kakae long garen,” yu stap joen long impoten wok ya blong “witnes long olgeta neson.” (Matiu 24:14) Mo tu, yu save glad tumas from we yu stap mekem Jehova i glad. !Hem i lavem olgeta we “oli stanap strong mo oli karem frut”!