Hae Rul Blong Jeova Mo Kingdom Blong Hem

‘Jeova, yu yu hae we yu hae, mo yu gat olgeta paoa. Nem blong yu i hae, mo yu yu gud tumas. Yu yu king we yu rul long paoa blong yu. . . . [“Kingdom i blong yu,” NW].’—1 Kronikel 29:11.

 1. ?From wanem Jeova i gat raet blong rul antap long heven mo wol?

‘JEOVA, hem i King. Hem i stap long ples blong hem long heven, mo i stap rul long olgeta samting.’ (Ol Sam 103:19) Ol tok blong man ya we i raetem Sam ya i soemaot wan stamba trutok long saed blong fasin blong rul. From we Jeova God i wokem olgeta samting, hem i gat raet blong rul antap long heven mo wol.

 2. ?Olsem wanem Daniel i eksplenem ples long heven we Jeova i stap long hem?

² Blong wan man i save rul, i mas gat ol man we bambae hem i rul long olgeta. Long stat olgeta, Jeova i rul long ol spirit man we hem i wokem—faswan blong olgeta, hemia stret Pikinini blong hem, mo biaen, hem i rul long fulap enjel. (Kolosi 1:15-17) Longfala taem i pas, nao profet Daniel i luk wan vison we i soemaot sam samting long heven. Hem i eksplenem se: “Taem mi stap lukluk, mi luk sam man oli karem ol spesel jea blong king i kam, nao oli putumrere olgeta i stap wanples. Mo mi luk wan Olfala we i stap fastaem bifo olgeta, mo bambae i stap gogo i no save finis, hem i kam sidaon long wan long ol jea ya. . . . Mo i gat plante taosen man we oli man blong wok blong hem, oli stap long ples ya, mo i gat plante narafala man we oli plante we plante tumas, man i no save kaontem olgeta, oli stap stanap long fes blong hem.” (Daniel 7:9, 10) Blong plante milian yia, “Olfala we i stap fastaem,” hemia Jeova, i rul long ol spirit pikinini blong hem, wan bigfala famle blong “ol man blong wok” blong hem, we oli wok folem oda blong mekem ol samting we hem i wantem.—Ol Sam 103:20, 21.

 3. ?Olsem wanem Jeova i mekem rul blong hem i kavremap olgeta samting long skae mo wol?

³ Biaen, Jeova i rul long plante moa samting, taem hem i wokem fulap planet mo sta mo wol ya wetem evri samting long hem. (Job 38:4, 7) Taem yumi ol man long wol yumi lukluk i go antap long ol sta mo planet long skae, yumi ting se i no nidim wan man blong lidim olgeta no rul long olgeta. Yumi luk se i gat oda i stap finis, i luk olsem we oli stap folem wan program mo i no gat wan i mestem rod blong hem. Nating se i olsem, man blong raetem Sam i talem se: “[Jeova] i mekem olgeta long tok blong hem. Hem i putum loa long ol samting ya, se oli mas stap olwe long ples blong olgeta, mo loa ya bambae i no save lus.” (Ol sam 148:5, 6) Oltaem, stat long taem bifo olgeta, Jeova i stap rul long ol samting long heven mo wol, i stap lidim olgeta, i stap givim oda long olgeta, mo i lukaot long wok blong olgeta.—Nehemaea 9:6.

 4. ?Olsem wanem Jeova i soemaot hae rul blong hem long ol man?

⁴ Taem God i wokem faswan man mo woman, hem i soemaot hae rul blong hem long wan narafala fasin. Hem i givim evri samting we tufala i nidim blong mekem laef blong tufala i hapi mo i gat mining. Mo antap long hemia, Jeova i letem man i rul long ol anamol—i olsem we hem i givim paoa long man we i naf blong hem i save rul antap long sam narafala samting. (Jenesis 1:26-28; 2:8, 9) Taswe, i klia se God i no jes rul long fasin we i kaen mo i mekem i gud long narafala nomo, be hem i ona long olgeta we hem i rul long olgeta mo i leftemap olgeta. Sipos Adam mo Iv i bin glad blong stap aninit long rul blong Jeova olwe, tufala i save gohed blong laef long paradaes long wol, gogo i no save finis.—Jenesis 2:15-17.

 5. ?Yumi save talem wanem long saed blong hae rul blong Jeova?

⁵ ?Ol save ya i soemaot wanem long yumi? Faswan samting se, oltaem, stat long taem bifo olgeta, Jeova i stap rul long olgeta samting we hem i wokem. Seken samting se, taem God i rul long ol man hem i mekem i gud long olgeta mo i leftemap olgeta. Mo laswan samting se, sipos yumi obei long rul blong God mo sapotem rul ya, bambae yumi kasem ol blesing we oli no save finis. I klia long yumi from wanem Deved we i king blong Isrel bifo i talem olsem: ‘Jeova, yu yu hae we yu hae, mo yu gat olgeta paoa. Nem blong yu i hae, mo yu yu gud tumas. Yu yu king we yu rul long paoa blong yu. Olgeta samting long heven mo long wol oli blong yu nomo. [“Kingdom i blong yu,” NW], mo yu rul long olgeta ples.’—1 Kronikel 29:11.

?From Wanem i Nidim Kingdom Blong God?

 6. ?Olsem wanem hae rul blong God i joen wetem Kingdom blong hem?

⁶ ?Sipos Jeova we i King blong heven mo wol i stap soemaot paoa mo haenem blong hem stat long taem we hem i wokem olgeta samting, from wanem i nidim Kingdom blong God? Klosap oltaem, wan king i rul long ol man tru long wan narafala man we king ya i givim paoa long hem. Taswe, Kingdom blong God nao i rod we God i yusum blong rul long evri samting, i olsem we hem i soemaot hae rul blong hem long ol man tru long Kingdom ya.

 7. ?From wanem Jeova i yusum wan niufala rod blong rul long ol man?

⁷ Long ol defren taem long histri, Jeova i yusum ol defren rod blong rul long ol samting we hem i wokem. Long taem blong Adam mo Iv, wan samting i hapen we i mekem se God i yusum wan niufala rod blong rul long man. Long taem ya, wan stronghed pikinini blong God long heven, Setan, i pulum Adam mo Iv blong tufala i no moa obei long rul blong Jeova. Taem Setan i mekem stronghed fasin ya, hem i girap agensem hae rul blong God. ?Olsem wanem hem i girap agensem hae rul blong God? Taem Setan i talem long Iv se ‘hem i no save ded’ sipos i kakae frut ya we God i putum tabu long hem, Setan i stap talem se Jeova i giaman mo se Iv i no save trastem hem. Setan i go moa yet i se: “[God] i talem olsem from we i save se sipos yutufala i kakae frut ya, bambae ae blong yutufala i open, nao bambae yutufala i kam olsem hem, we i save ol fasin we i nogud mo ol fasin we i gud.” Setan i stap talem long Adam mo Iv se bambae laef blong tufala i moagud sipos tufala i no obei long God be tufala i folem prapa tingting blong tufala nomo. (Jenesis 3:1-6) Ol tok ya i agensem raet mo fasin blong God blong rul. ?Ale, Jeova i mekem wanem?

8, 9. (a) ?Wan king bambae i mekem wanem sipos ol man we hem i rul long olgeta oli girap agensem hem? (b) ?Jeova i mekem wanem taem i gat stronghed fasin i kamaot long Iden?

⁸ ?Wan king bambae i mekem wanem sipos ol man we hem i rul long olgeta oli girap agensem hem? Sam long yumi we yumi savegud histri blong man long ol yia we i pas, bambae yumi tingbaot sam taem we samting ya i bin hapen. Klosap evri taem, nating we king i rul long fasin we i mekem i gud long ol man, be hem i no save letem stronghed fasin ya i gohed. King ya bambae i jajem ol stronghed ya from we oli girap agensem king blong olgeta. Biaen, king bambae i givim paoa long ami blong hem blong oli blokem ol stronghed ya mo mekem pis i stanap bakegen. Long sem fasin, Jeova i soem se hem i save kontrolem samting we i kamaot, taem hem i tekem aksen kwiktaem nomo blong jajem ol stronghed ya. Hem i talem long Adam mo Iv se bambae tufala i no moa kasem presen we hem i wantem givim long tufala, hemia laef we i no save finis. Nao hem i ronemaot tufala long garen blong Iden.—Jenesis 3:16-19, 22-24.

⁹ Taem Jeova i talemaot ol tok panis long Setan, hem i tokbaot wan niufala rod we bambae hem i yusum blong rul. Tru long rod ya, bambae hem i mekem pis mo oda i stap bakegen long ples we hem i rul long hem. God i talem long Setan se: “Bambae mi mi mekem we yu mo woman ya, yutufala i enemi blong yutufala, mo sid blong yu mo sid blong hem bambae tufala i enemi blong tufala. Hem bambae i smasem hed blong yu, mo yu bambae yu givim kil long bak blong leg blong hem daon.” (Jenesis 3:15, NW) Olsem nao, Jeova i soemaot se plan blong hem i blong givim paoa long wan “sid” blong i smasem Setan mo ol man blong hem, mo blong i pruvum se fasin blong God blong rul i stret nomo.—Ol Sam 2:7-9; 110:1, 2.

10. (a) ?“Sid” ya hem i hu? (b) ?Pol i talem wanem long saed blong mining blong faswan profet tok?

¹⁰ “Sid” ya, hemia Jisas Kraes mo wan spesel grup blong man we oli joen wetem hem blong rul. Olgeta ya nao oli Kingdom blong God mo Mesaea blong hem. (Daniel 7:13, 14, 27; Matiu 19:28; Luk 12:32; 22:28-30) Be save ya i no kam klia stret afta we God i talemaot faswan profet tok ya, nogat. Mining blong profet tok ya i stap olsem wan ‘tok haed blong God we i stap haed longtaem.’ (Rom 16:25) Blong plante handred yia, ol man blong bilif oli wantem tumas blong save mining blong “tok haed ya blong God.” Oli wantem luk we faswan profet tok ya i kamtru blong mekem hae rul blong Jeova i win.—Rom 8:19-21.

Sloslou “Tok Haed Ya Blong God” i Kam Klia

11. ?Jeova i givim wanem save long Ebraham?

¹¹ Taem ol yia oli pas, sloslo Jeova i soemaot sam samting long saed blong ‘tok haed blong kingdom blong hem.’ (Mak 4:11, NW) Wan long ol man we Jeova i givim save long olgeta, hemia Ebraham we Baebol i talem se hem i “Fren blong God.” (Jemes 2:23) Jeova i promes long Ebraham se bambae ol pikinini blong hem oli kam “wan strongfala laen.” Biaen, God i givim moa save long Ebraham, i se: ‘Sam long ol pikinini blong yu bambae oli king,’ mo “from laen blong yu, olgeta neson long wol bambae oli blesem olgeta nomo.”—Jenesis 12:2, 3; 17:6; 22:17, 18, NW.

12. ?Olsem wanem sid blong Setan i kamaot klia afta we Bigfala Wota i ron long taem blong Noa?

¹² Long taem blong Ebraham, i gat sam man we oli traem finis blong rul mo bos long ol narafala man. Wan long olgeta ya, hemia Nimrod we bubu blong hem i pikinini blong Noa. Baebol i tokbaot Nimrod se: “Hem i fas man long wol blong kam nambawan man blong faet, we i stap winim ol narafala kantri. . . . Hem i kam wan nambawan man tu blong go lukaot anamol blong kakae, [“mo hem i agensem Jeova,” NW].” (Jenesis 10:8, 9) I klia se, Nimrod mo sam narafala man we olgeta nomo oli putumap olgeta blong oli rul long ol man, oli olsem ol tul long han blong Setan. Olgeta wetem ol man we oli sapotem olgeta, oli kam haf blong sid blong Setan.—1 Jon 5:19.

13. ?Jeova i givim wanem save long Jekob long saed blong samting we bambae i kamtru?

¹³ Nating we Satan i stap traehad blong putumap ol man blong oli rul long ol narafala, be Jeova i gohed nomo blong mekem plan blong hem i kamtru. Jekob, smol bubu blong Ebraham, i kasem moa save long saed ya, taem Jeova i talem se: “Wokingstik blong king bambae i no save aot long Juda, mo wokingstik blong komanda i mas stap bitwin long tufala leg blong hem, gogo Silo i kamtru. Nao ol neson bambae oli obei long hem.” (Jenesis 49:10, NW) Tok ya “Silo” i minim “Hemia We i Gat Raet” no “Hemia We Samting Ya i Blong Hem.” Taswe, profet tok ya i soemaot se bambae wan man i kamtru we hem i gat raet blong kasem “wokingstik blong king,” i min se, bambae hem i gat raet blong kam king blong “ol neson.” Mo hem i gat raet blong kasem ‘wokingstik blong komanda,’ i min se bambae hem i gat raet blong rul long ol man. ?Hu ya man ya?

“Gogo Silo i Kamtru”

14. ?Jeova i mekem wanem kontrak wetem Deved?

¹⁴ Long laen blong Juda, faswan we Jeova i jusum blong kam king long ol man blong hem, hemia wan boe blong lukaot long sipsip, Deved, we hem i pikinini blong Jese.a (1 Samuel 16:1-13) Nating se Deved i mekem sam mastik mo sin, be Jeova i laekem hem from we hem i neva tanem baksaed long hae rul blong Jeova. Jeova i mekem wan kontrak wetem Deved, mo long taem ya, hem i givim moa save long saed blong profet tok we hem i talem long Iden. Hem i talem long Deved se: “Sipos yu ded, . . . bambae mi mekem wan long ol pikinini blong yu i kam king, mo bambae mi stap lukaot gud long kingdom blong hem blong i stanap strong oltaem.” Jeova i no stap tokbaot Solomon nomo, we i pikinini blong Deved mo i tekem ples blong Deved olsem king. Yumi save samting ya from we kontrak we God i mekem wetem Deved i talem se: “Oltaem, ol man we bambae oli kam king blong yufala, bambae oli stap kamaot long olgeta ya we bambae oli stap kamaot biaen long hem.” Kontrak ya wetem Deved i soemaot klia se “sid” no Kingdom we God i promes blong stanemap, bambae i kamtru long laen blong Deved.—2 Samuel 7:12, 13.

15. ?From wanem kingdom blong Juda i olsem wan pija blong Kingdom blong God?

¹⁵ Deved i faswan long wan longfala laen blong ol king. Evriwan long olgeta, hae pris i kafsaedem tabu oel long olgeta blong putumap olgeta. From samting ya, yumi save talem se oli ol mesaea, no ol man we God i makemaot olgeta. (1 Samuel 16:13; 2 Samuel 2:4; 5:3; 1 King 1:39) Baebol i talem se olgeta ya oli sidaon long jea blong Jeova, hemia from we oli rul long nem blong Jeova long Jerusalem. (2 Kronikel 9:8) Taswe, kingdom blong Juda i pija blong Kingdom blong God, rod ya we Jeova i yusum blong rul long ol man.

16. ?Wanem i hapen taem ol king blong Juda oli rul?

¹⁶ Taem king mo ol man oli obei long hae rul blong Jeova, hem i protektem mo blesem olgeta. Rul blong Solomon i wan taem blong pis mo plante gudfala samting, i bitim ol narafala taem. Samting ya i soemaot wanem we bambae i kamaot taem Kingdom blong God i rul, nao Setan i no moa gat paoa nating, mo hae rul blong Jeova i win fulwan. (1 King 4:20, 25) Sore tumas, bighaf blong ol king long laen blong Deved oli no mekem samting we Jeova i wantem. Nao ol man we ol king ya oli rul long olgeta oli foldaon long fasin ya blong wosip long ol aedol, mo oli mekem rabis fasin long saed blong seks. Long yia 607 B.K.T.,b Jeova i letem ol ami blong Babilon oli kam spolem kingdom ya. Long taem ya, maet i luk olsem se Setan i win long ol traehad blong hem blong daonem hae rul blong Jeova.

17. ?Wanem i soemaot se Jeova i rul yet nating se ol ami oli spolem kingdom blong Deved?

¹⁷ Ol ami oli winim kingdom blong Isrel long not mo biaen oli winim kingdom blong Deved tu, be hemia i no soemaot se rul blong Jeova i slak no i nogud, nogat. Hemia i soemaot ol trabol we i kamaot taem Setan i gat paoa long ol man mo taem ol man oli seraot long God. (Ol Proveb 16:25; Jeremaea 10:23) Jeova i soemaot se hem i stap rul yet taem hem i givim tok ya long profet Esikel blong talemaot long king: “Tekemaot kaliko ya we i stap fasem hed blong yu. Tekemaot hat blong king ya we i stap long hed blong yu. . . . Bambae mi spolem hem, we mi spolem, we mi spolem. Mo samting ya tu, bambae hem i no go long han blong wan man, gogo man ya i kam we i gat raet long hem, nao mi bambae mi givim long hem.” (Esikel 21:26, 27, NW) Ol tok ya oli soemaot se “sid” we God i promes blong sanem mo we “i gat raet” blong rul, i no kamtru yet.

18. ?Enjel Gabriel i talem wanem long Meri?

¹⁸ Ale yumi kam kasem yia 2 B.K.T. Long taem ya, enjel Gabriel i go luk Meri, wan yangfala gel long taon ya Nasaret, long distrik blong Galili long not Palestaen. Gabriel i talem long hem se: “Bambae yu yu gat bel, mo bambae yu save bonem wan pikinini boe blong yu, mo bambae yu putum nem blong hem, se Jisas. Hem bambae i wan haeman, mo ol man bambae oli save singaot hem, se Pikinini blong God ya we i hae we i hae. Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.”—Luk 1:31-33.

19. ?Taem i kam klosap blong luk wanem nambawan samting?

¹⁹ Nao stret taem blong soemaot “tok haed ya blong God” i kam klosap. Man we i impoten moa i bitim ol narawan long “sid” ya we God i promes blong sanem, bambae i kamtru. (Galesia 4:4; 1 Timoti 3:16) Setan bambae i givim kil long Man ya long leg blong hem daon. Be “sid” ya bambae i smasem hed blong Setan, ale Setan wetem ol man blong hem bambae oli no moa gat paoa nating. Mo tu, Man ya bambae i givim witnes se Kingdom blong God bambae i tekemaot ol trabol we Setan i mekem mo hae rul blong Jeova bambae i win. (Hibrus 2:14; 1 Jon 3:8) ?Olsem wanem Jisas i mekem samting ya? ?Hem i givim wanem eksampol blong yumi folem? Bambae yumi faenem ansa blong ol kwestin ya long nekis stadi.

[Ol futnot]

?Yu Yu Save Eksplenem?

• ?From wanem Jeova i gat raet blong rul long heven mo wol?

• ?From wanem Jeova i mekem plan blong putumap wan Kingdom?

• ?Olsem wanem Jeova i soemaot sloslo, mining blong ‘tok haed ya blong hem’?

• ?Wanem i soemaot se Jeova i gohed blong rul nating se ol ami oli spolem kingdom blong Deved?

[Tok blong pija long pej 5]

?Jeova i talemaot wanem samting we bambae i kamtru long laen blong Ebraham?

[Tok blong pija long pej 7]

?Taem ol ami oli spolem kingdom blong Deved, from wanem samting ya i no soemaot se hae rul blong Jeova i nogud?