Baebol i Talem Wanem

?I Stret Blong Yusum Ol Pija Mo Aedol Blong Wosipim God?

“Ol tijing we mi kasem taem mi smol oli mekem mi bilif se ol pija mo aedol oli save mekem mi mi kam klosap moa long God.”—Mack.

“Haos blong mifala i fulap long ol pija mo aedol blong jos. Mifala i ting se samting ya i save mekem God i glad long hom blong mifala.”—Herta.

“Mifala i bodaon long sam pija mo aedol. Be mifala i no tingbaot sipos God i glad long fasin ya.”—Sandra.

?WANEM tingting blong yu long ol toktok ya? Plante man oli ting se ol pija mo aedol oli save halpem olgeta blong wosipim God. ?Olsem wanem? ?Tingting ya i stret? Samting we i moa impoten blong tingbaot, hemia tingting blong God long saed blong fasin ya. Tingbaot wanem we Tabu Tok blong hem, Baebol, i talem long saed ya.

Tingting Blong God Long Saed Blong Ol Pija Mo Aedol

Wan pija no aedol hem i olsem saen blong wan samting we man i lukluk long hem blong givim ona no wosip. Maet hemia kros, ol pija blong sam tabu man no blong ol narafala samting we oli stap long heven mo long wol we man i katem long wud no ston.a Flaeg tu, man i save yusum olsem wan saen blong mekem wosip.

Fasin blong yusum pija no aedol long wosip i stap plante taosen yia bifo finis i kam. Taswe, long 1513 B.K.T.,b taem Jeova i givim ol ten komanmen long neson blong Isrel, hem i soemaot klia tingting blong hem long saed blong ol pija mo aedol. Hem i talem se: “Bambae yufala i no mas mekem pija blong ol samting long heven, no long wol, no long solwota we wol ya i stanap long hem, blong yufala i mekem wosip long hem. Bambae yufala i no mas bodaon long aedol olsem blong mekem wosip long hem, from we mi mi Hae God, mi God blong yufala, mo yufala i man blong mi, nao mi mi no save letem yufala i mekem wosip long narafala god bakegen.”—Eksodas 20:4, 5.

Makem tu poen long loa ya blong God: Faswan, hemia se ol man blong hem oli no mas wokem ol pija no aedol, mo nambatu samting oli “no mas bodaon” long olgeta no mekem wosip long olgeta. ?From wanem God we i Wokem yumi i putum tabu long fasin blong wokem ol pija mo aedol? Wan risen, hemia from we “i no gat man we i luk God samtaem.” Jeova i no olsem yumi we yumi gat mit mo blad, be hem i wan spirit man, mo hem i stap long ples blong ol spirit man. (Jon 1:18; 4:24, NW) Mo wan narafala risen tu, from wanem yumi no mas mekem pija blong enikaen samting blong wosip long hem, hemia from we God i wantem we yumi mekem wosip long hem nomo. Hem i talem se: “Bambae ol man oli no mas leftemap nem blong narafala god, we long semtaem nomo, oli stap leftemap nem blong mi. Bambae oli no mas go mekem wosip long ol aedol ya, we long semtaem nomo, oli stap bodaon blong presem mi.” (Aesea 42:8.) From risen ya, i rong blong wokem ol pija no aedol blong halpem yumi blong mekem wosip long God. Taem Eron, we hem i wan lida blong ol man Isrel, i mekem wan pija olsem, Jeova i harem nogud tumas.—Eksodas 32:4-10.

?From Wanem Yumi No Mas Bodaon Long Olgeta?

Long saed blong ol aedol, Baebol i talem se: “Ol god ya oli gat maot, be oli no save toktok. Oli gat ae, be oli no save lukluk. Oli gat sora, be oli no save harem samting.” Nao hem i givim woning ya se: “I gud ol man we oli mekem ol aedol ya . . . oli kam olsem ol aedol ya nomo,”—oli no gat laef.—Ol Sam 115:4-8.

Fasin ya blong wosipim ol aedol i wan fasin we i no stret. I gud yu tingbaot se: ‘?Bambae mi harem olsem wanem sipos mi givim wan sas presen long pikinini blong mi, nao pikinini ya i girap i go talem tangkiu from presen ya long wan strenja no wan samting we i no gat laef?’ Ating samting ya bambae i halpem yu blong kasem save long filing blong God we i wokem yumi mo we i givim laef long yumi, taem hem i luk we yumi stap leftemap narafala samting, olsem ol aedol we oli no gat laef, mo yumi wosip long olgeta, i bitim we yumi leftemap mo wosipim hem.—Revelesen 4:11.

!Mo tu, tingbaot se fasin ya we man i wosipim wan pija no aedol we i no gat laef, i daonem man, from we God i wokem man blong i tekem fasin blong hem! (Jenesis 1:27) Profet Aesea i raetem wan tok long saed blong ol man we oli stap mekem ol pija olsem i se: “Ples blong olgeta i fulap long ol giaman god. Oli stap bodaon long ol samting we olgeta nomo oli wokem long han blong olgeta. Mo man blong wol i bodaon, i daonem hem wan, mo yu [Jeova God] bambae yu no save fogivim olgeta.”—Aesea 2:8, 9, NW.

Samting we i mekem God i harem nogud moa, se, taem ol man oli wosipim ol aedol mo pija, wosip ya i stap go long Setan mo ol rabis enjel blong hem—olgeta ya oli enemi blong God Taem ol man Isrel oli lego Jeova blong go wosipim ol aedol, Dutronome 32:17 (NW) i talem se “oli mekem sakrefaes i go long ol rabis enjel nomo, i no long God.”

?Olsem wanem? ?Ol faswan man we oli biaenem Jisas Kraes oli ona long ol pija mo oli yusum ol pija long wosip blong olgeta? !Nogat! Jon we i wan aposol blong Jisas, i raetem se: “Ol smol pikinini, yufala i mas lukaot gud blong no mekem wosip long ol aedol.” (1 Jon 5:21, NW) Buk ya Early Church History to the Death of Constantine i talem se: “Long tingting blong ol faswan disaepol, fasin ya blong wosip long ol pija mo aedol i daonem God moa, i bitim eni narafala samting.”

Rod We i Stret Blong Mekem Wosip Long God

Jisas i talem se: “Ol man blong mekem trufala wosip, bambae oli mekem wosip long Papa blong yumi long spirit mo trutok, from we, tru ya, Papa blong yumi i stap lukaot ol man olsemia, blong oli mekem wosip long hem.” (Jon 4:23, NW) Yes, God i wantem we yumi savegud hem olsem we yumi save wan man—samting we hem i laekem mo samting we hem i no laekem, ol loa blong hem, mo stamba tingting blong hem long saed blong yumi. (Jon 17:3) From ol risen ya nao hem i yusum ol man bifo blong oli raetem Baebol. (2 Timoti 3:16) Mo tu, from we God “i no stap longwe tumas long yumi,” yumi save prea long hem enitaem, long eniples, we yumi no nidim ol pija mo aedol.—Ol Wok 17:27.

Sandra, we yumi tokbaot hem long stat, i talem se: “Fastaem we mi go long Haos Kingdom blong ol Witnes blong Jeova, mi no luk wan pija no aedol nating we oli yusum blong mekem wosip long hem. Ol Witnes oli yusum Baebol blong soem long mi ol fasin blong God mo ol samting we hem i wantem yumi blong mekem. Long rod ya, mi lanem blong prea long God long wan fasin we hem i save harem mi. Naoia mi filim se mi savegud Man ya we i Wokem yumi mo mi harem se mi stap klosap moa long hem.” Yes, Sandra i lanem olsem wanem ol trutok blong Baebol oli rili save mekem man i harem gud mo i fri. (Jon 8:32) Yu tu yu save mekem olsem.

[Ol futnot]

?YU YU BIN TINGBAOT?

◼ ?From wanem yumi no mas yusum ol pija mo aedol blong mekem wosip?—Ol Sam 115:4-8; 1 Jon 5:21, NW.

◼ ?Olsem wanem yumi save wosipim trufala God?—Jon 4:24, NW.

◼ ?Olsem wanem yu save lanem trutok long saed blong God, mo olsem wanem samting ya bambae i givhan long laef blong yu?—Jon 8:32; 17:3.