‘I Gat Wan Masta Nomo Blong Yufala, Hemia Mesaea’

“Yufala i no letem ol man oli singaot yufala se ‘Masta’ [“Lida,” NW], from we yufala i gat wan Masta [Lida] nomo blong yufala, we hemia mi ya, mi Mesaea.”—MAT. 23:10.

 1. ?Ol Witnes blong Jeova oli lukluk i go long hu olsem Lida blong olgeta? ?From wanem?

OL JOS we oli talem se oli Kristin, oli putumap sam man blong oli kam ol lida blong jos, olsem pop blong Rom, mo ol lida blong ol narafala jos bakegen. Ol Witnes blong Jeova oli no putumap wan man blong hem i kam lida blong olgeta. Ol Witnes oli no disaepol blong wan man mo oli no biaenem wan man. Samting we oli mekem i laenap wetem profet tok ya we Jeova i talem long saed blong Pikinini blong hem, se: “Mi mi putumap hem i kam king, mo i kam lida mo komanda blong ol man blong ol narafala kantri, mo mi yusum hem blong soemaot long olgeta we mi mi gat paoa.” (Aes. 55:4) Ful kongregesen blong ol Kristin we tabu spirit i makemaot olgeta, mo ol fren blong olgeta, “ol narafala sipsip,” oli no letem wan narafala man i kam lida blong olgeta. Oli wantem lida ya nomo we Jeova i givim long olgeta. (Jon 10:16) Oli folem tok blong Jisas, we i talem se: “Yufala i gat wan Masta nomo blong yufala, we hemia mi ya, mi Mesaea.”—Mat. 23:10.

Jif Blong Ol Enjel i Givhan Long Isrel

2, 3. ?Wanem wok we Pikinini blong God i mekem long Isrel bifo?

² Plante handred yia bifo we Kristin kongregesen i stanap, Jeova i putumap wan enjel blong i lidim ol man blong hem, hemia ol man Isrel. Afta we Jeova i mekem ol man Isrel oli kamaot long Ijip, Hem i talem long olgeta se: “Mi bambae mi sanem wan enjel blong mi i stap go fastaem long yufala. Hem bambae i stap lukaot long yufala taem yufala i stap wokbaot, mo bambae i lidim yufala i go long kantri ya we mi mi mekem i rere finis blong yufala. Bambae yufala i mas lesin gud long hem, mo yufala i mas obei long hem. Bambae yufala i no mas girap agens long hem, from we hem i kam long nem blong mi, mo bambae hem i no save fogivim man we i girap agens long hem.” (Eks. 23:20, 21) I stret nomo blong talem se enjel ya we ‘i kam long nem blong Jeova,’ hem i fasbon Pikinini blong God.

³ Bifo we Pikinini blong God i bon i kam long wol ya olsem wan man, i luk olsem se hem i karem nem ya Mikael. Long buk blong Daniel, Baebol i singaot Mikael se ‘enjel ya we i stap lukaot long ol laen blong Isrel.’ (Dan. 10:21) Disaepol Jud i talem se taem Daniel i no bon yet, be Mikael i stap finis mo hem i stap givhan long ol man Isrel. Afta we Moses i ded, i luk olsem se Setan i wantem yusum bodi blong hem blong pulum ol man Isrel oli foldaon long sam trap. Ating hem i wantem pulum olgeta blong oli mekem wosip long giaman god. Be Mikael i blokem Setan. Jud i talem se: ‘Taem Mikael, jif blong ol enjel, hem i stap rao wetem Setan from bodi blong Moses, se hu long tufala bambae i tekem, be hem i no save leftemap hem blong i sakem toktok we i nogud long Setan. Hem i talem nomo se, “Hae God bambae i jajem yu.”’ (Jud 9) Smoltaem afta, taem ol man Isrel oli rere blong go long Jeriko, i luk olsem se Mikael nao i kamtru long Josua. Mikael we i ‘komanda blong ol soldia blong Jeova,’ i mekem Josua i save se Jeova i stap wetem hem. (Ridim Josua 5:13-15.) Taem wan enjel blong God i go blong talemaot wan impoten mesej long profet Daniel, wan rabis enjel i traem blokem hem. Nao Mikael, we i jif blong ol enjel, i kam givhan long enjel ya blong God.—Dan. 10:5-7, 12-14.

Lida Ya We Ol Profet Oli Tokbaot, i Kamtru

 4. ?Wanem profet tok we enjel i talemaot long saed blong Mesaea we bambae i kam?

⁴ Jeova i sanem enjel blong hem, Gabriel, i go long profet Daniel blong talemaot ol tok long saed blong “Lida ya, Mesaea.” (Dan. 9:21-25, NW)a Stret long taem we profet tok ya i talemaot, hemia long en blong yia 29 K.T., Jon i baptaesem Jisas. Tabu spirit i kamdaon long Jisas, i makemaot hem, nao hem i kam Mesaea no Kraes. (Mat. 3:13-17; Jon 1:29-34; Gal. 4:4) Taem Jisas i kam Mesaea, hem i kam wan Lida we i moa gud olgeta long ol narafala lida.

 5. ?Olsem wanem Kraes i wok olsem wan Lida taem hem i stap prij long wol ya?

⁵ Taem Jisas i jes statem wok blong prij long wol ya, hem i soemaot klia se hem i “Lida ya, Mesaea.” Sam dei nomo afta we hem i statem wok blong hem long wol ya, hem i stat blong hivimap sam man blong oli kam ol disaepol blong hem, mo hem i mekem faswan merikel blong hem. (Jon 1:35–2:11) Ol disaepol ya oli folem hem long evri ples we hem i go long hem, blong talemaot gud nius blong Kingdom. (Luk 8:1) Jisas i trenem olgeta long wok blong prij, mo hem i soemaot eksampol long olgeta taem hem tu i go prij mo i tijim ol man. (Luk 9:1-6) I gud we ol Kristin elda tede oli folem fasin ya blong Jisas.

 6. ?Olsem wanem Jisas i soemaot se hem i Man blong Lukaot long sipsip mo wan Lida?

⁶ Jisas i tokbaot wan narafala haf blong wok blong hem olsem wan Lida. Hem i talem se hem i olsem wan man we i lukaot long ol sipsip blong hem wetem lav. Long ol kantri blong Is, ol man blong lukaot long sipsip oli go fored blong lidim ol sipsip blong olgeta. Wan man we nem blong hem William M. Thomson, i raetem long buk blong hem (The Land and the Book) se: “Man blong lukaot long sipsip i wokbaot long fored blong ol sipsip. Hem i no jes soem rod long ol sipsip, be hem i meksua tu se rod ya i gud mo i sef blong oli wokbaot long hem. . . . Hem i yusum stik blong hem blong bos long olgeta mo blong lidim olgeta oli go long ples we i gat plante gras long hem. Hem i yusum stik ya tu blong protektem olgeta taem wan enemi i kam blong spolem olgeta.” Ol tok blong Jisas i soemaot se hem i rili wan Man blong Lukaot long sipsip mo wan Lida, i se: “Mi nao, mi olsem gudfala man ya blong lukaot long sipsip. Gudfala man ya blong lukaot long sipsip, hem i glad nomo blong i ded blong sevem ol sipsip blong hem. . . . Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi.” (Jon 10:11, 27) Stret olsem we Jisas i talem, hem i givim laef blong hem olsem wan sakrefaes blong sevem ol sipsip blong hem. Biaen, Jeova i mekem hem i laef bakegen, “blong hem i Haeman [“Lida,” NW] mo i Sevia blong yumi.”—Wok 5:31; Hib. 13:20.

Man We i Lukaot Long Kristin Kongregesen

 7. ?Wanem samting we Jisas i yusum blong lidim Kristin kongregesen?

⁷ Smoltaem bifo we Jisas i gobak long heven, hem i talem long ol disaepol blong hem se: “God i givim olgeta paoa long mi, long olgeta samting long heven mo long wol.” (Mat. 28:18) Jeova i mekem se Jisas i givim tabu spirit long ol disaepol blong hem, blong oli kam strong long trutok. (Jon 15:26) Long dei blong Pentekos long yia 33 K.T., Jisas i kafsaedem tabu spirit ya long ol faswan Kristin. (Wok 2:33) Taem tabu spirit i kamdaon long olgeta, samting ya i makem stat blong Kristin kongregesen. Jeova i putumap Pikinini blong hem long heven, blong i kam hed blong kongregesen blong hem long fulwol. (Ridim Efesas 1:22; Kolosi 1:13, 18.) Jisas i yusum tabu spirit blong Jeova blong lidim Kristin kongregesen, mo ol enjel we “oli stap ona long hem,” oli givhan long hem blong mekem wok ya.—1 Pita 3:22.

 8. ?Long faswan handred yia, Jisas i yusum wanem samting long wol ya blong lidim ol disaepol blong hem? ?Mo tede, hem i stap yusum hu?

⁸ Mo tu, Jisas i yusum tabu spirit blong givim sam man oli go long kongregesen olsem “ol presen.” Ol man ya oli gat wok olsem ol man blong lukaot long sipsip mo ol “tija.” (Efes. 4:8, 11, NW) Aposol Pol i toktok long ol Kristin elda, se: “Yufala i mas lukaot gud long yufala, mo long ol man ya we Tabu Spirit i putum olgeta oli stap finis long han blong yufala. Yufala i mas lukaot long ol man blong jos [“kongregesen,” NW] blong God, olsem we man blong lukaot long sipsip i stap lukaot long ol sipsip blong hem.” (Wok 20:28) Long taem we Kristin kongregesen i jes stanap, olgeta elda ya oli ol Kristin man we tabu spirit i makemaot olgeta. Ol aposol mo ol elda long kongregesen long Jerusalem, oli wok tugeta olsem wan hed kampani. Jisas i yusum hed kampani ya, blong lidim fulwan grup blong “ol brata” blong hem long wol we tabu spirit i makemaot olgeta. (Hib. 2:11; Wok 16:4, 5) Long taem blong en, Jisas i putum “olgeta samting blong hem” long han blong ‘slef ya we i stret mo waes’ mo Hed Kampani we i wok long nem blong slef ya. ‘Olgeta samting blong Jisas,’ hemia ol samting long wol ya we oli joen wetem Kingdom blong God. (Mat. 24:45-47, NW) Tede, Hed Kampani i stap lidim olgeta we tabu spirit i makemaot olgeta, mo ol fren blong olgeta, hemia ol narafala sipsip. Olgeta evriwan ya oli luksave se taem oli folem Hed Kampani ya, be oli stap folem Lida blong olgeta tu, hemia Jisas.

Jisas i Statem Wok Blong Prij

9, 10. ?Olsem wanem Jisas i lidim wok ya blong talemaot gud nius blong Kingdom, blong mekem i go kasem plante moa man?

⁹ Jisas hem wan i lidim wok blong prij mo blong tijim ol man, taem wok ya i jes stat long wol. Hem i soemaot rod we ol narafala bambae oli folem, blong talemaot gud nius blong Kingdom long olgeta man long wol. Taem Jisas i stap prij, hem i talem long ol aposol blong hem se: “Bambae yufala i no go long olgeta we oli no laen blong Isrel, mo yufala i no go insaed long ol taon blong ol man Sameria tu. Yufala i mas go long ol laen blong Isrel. Olgeta ya oli olsem ol sipsip we oli lus. Mo taem yufala i go, yufala i mas talemaot se, ‘Taem blong God i kam King blong olgeta man long wol, i kam klosap finis [“Kingdom blong heven i kam klosap finis,” NW].’” (Mat. 10:5-7) Ol man blong hem oli obei long hem. Oli prij long ol man Jiu mo long ol man blong ol narafala laen we oli joen long skul blong ol man Jiu. Ol disaepol ya oli wok strong long wok blong prij, speseli afta long dei blong Pentekos, long yia 33 K.T.—Wok 2:4, 5, 10, 11; 5:42; 6:7.

¹⁰ Biaen, Jisas i yusum tabu spirit blong lidim wok blong talemaot Kingdom, blong mekem i go kasem ol man Sameria mo ol man we oli no laen blong Isrel. (Wok 8:5, 6, 14-17; 10:19-22, 44, 45) Jisas i wantem se ol man blong hem oli mekem gud nius i go kasem plante moa man long olgeta neson. Taswe, hem wan i kamtru long Sol blong Tasas, blong pulum hem i kam wan Kristin. Jisas i talem long Ananaeas we i wan disaepol blong hem, se: “Yu girap, yu go long rod ya we nem blong hem ‘Stret rod’. Nao yu go long haos blong Judas, yu askem wan man Tasas, nem blong hem Sol. . . . Yu go, from we mi mi jusumaot hem finis, blong hem i man blong wok blong mi. Hem bambae i talemaot nem blong mi long ol man we oli no laen blong Isrel, mo long ol king, mo long ol laen blong Isrel tu.” (Wok 9:3-6, 10, 11, 15) “Man” ya i kam aposol Pol.—1 Tim. 2:7.

11. ?Olsem wanem Jisas i yusum tabu spirit blong lidim wok blong prij i go kasem plante moa man?

¹¹ Kraes i wantem se ol man we oli no laen blong Isrel oli harem gud nius blong Kingdom. Ale hem i yusum tabu spirit blong lidim Pol blong mekem ol misinari trip long Esia Maena mo long Yurop. Long buk blong Ol Wok, Luk i raetem se: “Nao wan taem, olgeta [ol Kristin profet mo tija long kongregesen long Antiok, we i stap long kantri ya Siria] oli livim kakae, mo oli stap mekem wosip long Hae God, nao Tabu Spirit i talem long olgeta se, ‘Mi mi wantem yufala i putumap Banabas mo Sol blong tufala i mekem wok ya we mi mi singaot tufala from.’ Nao bakegen, olgeta oli livim kakae, oli prea, nao oli putum han blong olgeta long hed blong tufala blong putumap tufala, nao oli sanem tufala i go blong mekem wok.” (Wok 13:2, 3) Jisas nao i jusumaot Sol blong Tasas, blong hem i kam ‘man blong wok blong hem,’ mo blong karem nem blong hem i go long ol man blong ol narafala laen. Taswe Jisas we i Lida blong kongregesen, hem nao i mekem niufala plan ya se yumi mas prij long ol man blong ol narafala laen tu. Taem Pol i mekem nambatu misinari trip blong hem, hem i luksave se Jisas i yusum tabu spirit blong lidim hem long wok ya. Baebol i tokbaot ‘spirit blong Jisas,’ hemia i min se Jisas i yusum tabu spirit blong lidim Pol mo ol fren blong hem. Spirit ya i lidim tingting blong olgeta blong oli save weples oli mas go long hem mo wetaem oli mas go. Mo oli luk wan vison we i lidim olgeta oli go long Yurop.—Ridim Ol Wok 16:6-10.

Wok We Jisas i Mekem Blong Lidim Kongregesen

12, 13. ?Olsem wanem buk blong Revelesen i soemaot se Jisas i luk mo i save ol samting we oli stap hapen long ol kongregesen wanwan?

¹² Long faswan handred yia, Jisas i luk evri samting we i hapen insaed long kongregesen blong ol man blong hem we tabu spirit i makemaot olgeta. Hem i save gud sipos ol kongregesen ya wanwan oli strong no oli slak. Yumi kasem save long samting ya taem yumi ridim Revelesen japta 2 mo japta 3. Long tufala japta ya, Jisas i talem nem blong seven kongregesen we oli stap long Esia Maena. (Rev. 1:11) Yumi sua se hem i save gud ol narafala kongregesen long taem ya tu, se oli strong no oli slak.—Ridim Revelesen 2:23.

¹³ Jisas i talem ol gudfala tok long sam kongregesen, from we tingting blong olgeta i longfala, oli stanap strong long taem blong trabol, oli holemstrong long tok blong hem, mo oli sakemaot ol man we oli tok agensem trutok. (Rev. 2:2, 9, 13, 19; 3:8) Mo tu, hem i givim strong advaes long plante kongregesen, from we oli no moa lavem hem olsem we oli lavem hem fastaem, oli letem fasin blong wosipim giaman god mo ol rabis fasin i stap long kongregesen, mo oli letem we kongregesen i seraot long ol smosmol grup. (Rev. 2:4, 14, 15, 20; 3:15, 16) Be Jisas i lavem ol man we hem i lidim olgeta blong mekem wosip long God. Nating se hem i tok strong long sam man blong hem, be hem i talem long olgeta evriwan se: “Long olgeta man we mi lavem olgeta, mi mi stap tok strong long olgeta, mo mi stap givim panis long olgeta. From samting ya, yufala i mas traehad blong tanem tingting blong yufala from ol sin blong yufala.” (Rev. 3:19) Nating se Jisas i stap long heven, be hem i yusum tabu spirit blong lidim kongregesen blong ol disaepol blong hem long wol ya. Taem hem i toktok finis long ol kongregesen ya, hem i talem long olgeta se: “Man we i gat sora, hem i mas lesin gud long tok we Tabu Spirit i stap talem long ol jos [“kongregesen,” NW].”—Rev. 3:22.

14-16. (a) ?Olsem wanem Jisas i soemaot se hem i wan Lida blong ol man blong Jeova long wol ya, we hem i no fraet nating? (b) ?Wanem frut i kamaot from we Jisas i “stap wetem” ol disaepol blong hem “gogo kasem ol laswan dei blong rabis wol ya”? (c) ?Bambae yumi tokbaot wanem long nekis stadi?

¹⁴ Yumi tokbaot finis se enjel ya Mikael (Jisas) i yusum bigfala paoa blong hem blong lidim ol man Isrel. Mo biaen tu, Jisas i lidim gud ol faswan disaepol blong hem, hem i no fraet nating. Hem i lukaotgud long olgeta wetem lav, olsem wan Man blong Lukaot long sipsip. Hem i lidim olgeta long wok blong prij. Mo afta we hem i laef bakegen, hem i lidim wok blong talemaot gud nius blong Kingdom, blong i go kasem plante moa man.

¹⁵ Jisas i yusum tabu spirit blong mekem se wok blong prij bambae i go kasem olgeta ples long wol. Bifo we hem i gobak long heven, hem i talem long ol disaepol blong hem se: “Taem tabu spirit i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Wok 1:8; ridim 1 Pita 1:12.) From we Jisas i lidim wok blong talemaot gud nius, wok ya i gohed bigwan long faswan handred yia.—Kol. 1:23.

¹⁶ Be Jisas i soemaot tu se wok ya bambae i mas gohed gogo kasem long taem blong en. Afta we hem i talem long ol man blong hem blong oli go prij mo pulum ol man blong oli kam ol man blong hem, hem i promes long olgeta se: “Mi mi stap wetem yufala oltaem gogo kasem ol laswan dei blong rabis wol ya.” (Mat. 28:19, 20, NW) Stat long taem we hem i kasem paoa blong rul olsem king long yia 1914, Jisas i “stap” wetem ol disaepol blong hem, mo i wok strong olsem Lida blong olgeta. Long nekis stadi, bambae yumi tokbaot bigfala wok we hem i mekem, stat long yia 1914.

[Futnot]

Tingtingbak

• ?Olsem wanem Pikinini blong God i wok strong blong lidim ol man Isrel bifo?

• ?Olsem wanem Kraes i lidim kongregesen blong hem long wol?

• ?Olsem wanem Jisas i lidim wok ya blong talemaot gud nius, blong mekem i go kasem plante moa man?

• ?Wanem samting i soemaot se Jisas i stap lukluk ol kongregesen wanwan, mo i savegud sipos oli strong no oli slak?

[Tok blong pija long pej 25]

“Bambae mi sanem wan enjel blong mi i stap go fastaem long yufala”

[Tok blong pija long pej 26]

Olsem bifo, Jisas i yusum “ol man” we oli olsem “ol presen,” blong lukaot gud long ol sipsip blong hem