Jeova​—Beswan Eksampol Blong Fasin We i Gud

“!Hae God i gat olgeta paoa! Yumi talem tangkiu long hem, from we hem i gud tumas.”​—JEREMAEA 33:11.

 1. ?From wanem yumi wantem presem God ya we i gud tumas?

FASIN blong Jeova God i gud fulwan. Profet Sekaraea i talemaot se: “Hem i gud we i gud tumas.” (Sekaraea 9:​17, NW ) Yes, olgeta samting we God i wokem taem hem i rerem wol ya blong yumi harem gud long hem, oli soemaot se fasin blong hem i gud tumas. (Jenesis 1:31) Neva bambae yumi naf blong kasem klia save long saed blong olgeta smosmol loa we God i putumap taem hem i wokem heven mo wol. (Prija 3:11; 8:17) Be, smol save ya we yumi gat finis, i pusum yumi blong presem God ya we i gud tumas.

 2. ?Sipos yu wantem talem mining blong fasin we i gud bambae yu eksplenem olsem wanem?

² ?Wanem ya fasin we i gud? Hemia wan nambawan fasin we i laenap wetem ol rul we oli stret. Hem i minim se man i no mekem ol samting we oli nogud. Be i no hemia nomo. Fasin we i gud, i wan long ol frut blong tabu spirit, hem i wan fasin we i gat paoa long laef blong man. (Galesia 5:​22, 23) Yumi soemaot se yumi gat gud fasin taem yumi tekem aksin blong mekem ol samting we oli gud mo givhan long ol narafala. Long wol naoia, fasin we ol man blong wan kantri oli luk se i gud, maet i nogud long lukluk blong narafala man we laef long kantri blong olgeta i defren. Be, sipos yumi wantem harem gud long pis mo glad, yumi mas serem sem tingting long saed blong wanem fasin i gud. ?Hu nomo i naf blong talem stret se wanem fasin i gud?

 3. ?Folem Jenesis 2:​16, 17 olsem wanem man i save fasin we i gud?

³ God nomo i talem wanem fasin we i gud. Jeova i talem long faswan man we i laef long wol ya se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:​16, 17) Yes, ol man oli mas lukluk i go long Hemia we i Wokem olgeta blong save wanem fasin i gud mo wanem fasin i nogud.

God i No Nidim Blong Mekem i Gud Long Man

 4. ?God i mekem wanem long ol man stat taem Adam i sin?

⁴ Taem Adam i sin mo i no wantem we God i talem long hem wanem ya ol gudfala fasin we hem i mas mekem, klosap nomo ol man long wol oli lusum janis ya blong gat wan laef we i hapi mo we i stret gud olgeta, blong olwe. (Jenesis 3:​1-6) Be bifo we Adam i karem pikinini, we bambae oli sin mo oli ded, God i tokbaot finis wan laen we i stretgud olgeta we bambae i kam. Jeova i tok long “snek ya blong bifo,” hemia Devel Setan, i se: “Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu smasem bak blong leg blong hem.” (Revelesen 12:9; Jenesis 3:​15, NW ) Stamba tingting blong Jeova hemia blong pemaot ol man long sin. Jeova i no nidim blong mekem i gud long ol man. Be nating, hem i wokem rod blong sevem olgeta man we oli soem bilif long ransom sakrefaes blong gudfala Pikinini blong hem.​—Matiu 20:28; Rom 5:​8, 12.

 5. ?Nating se yumi bon wetem wan tingting we i wantem mekem rabis fasin, from wanem yumi save wokem ol fasin we i gud?

⁵ I tru se, from sin blong Adam, yumi bon wetem wan tingting we i stap finis long ol rabis fasin. (Jenesis 8:21) Be, yumi hapi se Jeova i givhan long yumi blong yumi save wokem ol fasin we oli gud. Taem yumi gohed blong folem ol tabu tok blong hem yumi kasem “waes” ya we i save sevem yumi. Mo tu, “yumi savegud ol rod blong mekem ol gudfala wok.” Be antap long hemia, yumi save mekem samting olsem we God i wantem. (2 Timoti 3:​14-17) Be sipos yumi wantem kasem blesing from ol tijing blong Baebol mo yumi wantem gat ol fasin we i gud, yumi mas gat sem tingting olsem man ya blong raetem sam we i singsing se: “Yu [Jeova] yu gud, mo yu yu stap mekem i gud. Plis, yu tijim mi long ol rul blong yu.”​—Ol Sam 119:​68, NW.

Yumi Presem Jeova From Fasin Blong Hem i Gud

 6. ?Taem King Deved i karem bokis blong kontrak i kam long Jerusalem, ol Livaet oli singsing wan sing we i talem wanem?

⁶ King Deved blong Isrel bifo i luksave se God i gat gud fasin mo hem i wantem we God i lidim hem. Deved i talem se: “From we fasin blong Hae God i stret, mo hem i stap mekem i gud long man, hem i stap tijim ol man nogud blong oli folem rod blong hem.” (Ol Sam 25:8) Long tijing we God i givim long ol man Isrel i gat ten impoten loa we oli kolem ol Ten Komanmen. Oli raetem ol Tenkomanmen ya long tu ston mo oli putum i stap insaed long wan bokis we oli kolem bokis blong kontrak. Afta we Deved i karem Bokis ya i kam long bigfala taon blong Isrel, we hemia Jerusalem, ol Livaet oli singsing wan sing we wan haf blong hem i se: “Talem tangkiu long Jeova, yufala ol man blong hem, from we hem i gud, oltaem nomo hem i soem kaengud fasin wetem lav, gogo i no save finis.” (1 Kronikel 16:​34, 37-41, NW ) !Ating i bin naes tumas blong harem ol tok ya long singsing blong ol Livaet!

 7. ?Wanem i hapen afta we Bokis blong kontrak i kam insaed long Rum ya we i Tabu we i Tabu mo afta we Solomon i prea?

⁷ Ol semfala tok ya blong presem God oli kamaot bakegen long taem we oli openem tempol blong Jeova we Solomon, pikinini blong Deved i wokem. Afta we bokis blong kontrak i kam stanap insaed long Rum ya we i Tabu we i Tabu long niufala haos tempol, ol Livaet oli stat presem Jeova, ‘from we hem i gud tumas, oltaem bambae hem i lavem yumi, gogo i no save finis.’ Long taem ya, wan klaod we i saen we i saen i kam fulap long haos tempol ya, i soemaot we Jeova i stap. (2 Kronikel 5:​13, 14) Taem Solomon i prea finis blong dediketem haos ya, “faea i aot long heven, i kamdaon, i bonem ol sakrefaes ya we oli mekem.” Taem ol man Isrel oli luk samting ya “oli bodaon we fes blong olgeta i godaon kasem graon, nao oli wosipim Hae God mo oli talem tangkiu long hem. Mo oli talem se, ‘Yumi evriwan i presem Hae God, from we hem i gud tumas. Oltaem bambae hem i lavem yumi, gogo i no save finis.’ ” (2 Kronikel 7:​1-3) Afta long lafet ya we i gohed blong 14 dei, ol man Isrel oli gohom “we oli glad we oli glad tumas,” from we “Hae God i mekem i gud tumas long King Deved, mo long King Solomon, mo long olgeta tu.”​—2 Kronikel 7:10.

8, 9. (a) ?Nating se ol man Isrel oli presem God se hem i gud, oli mekem wanem? (b) ?Jeremaea i talemaot wanem long saed blong Jerusalem, mo profet tok ya i kamtru olsem wanem?

⁸ Sore tumas we ol man Isrel oli no gohed blong laef olsem we oli bin talem long singsing blong olgeta blong presem God. Yes, sloslou ol man Juda ya oli kam man we oli ‘stap talem se oli mekem wosip long Jeova be ol tok ya blong olgeta i blong nating nomo.’ (Aesea 29:13) Oli no traehad blong mekem laef blong olgeta i laenap wetem ol rul we God i putum long saed blong fasin we i gud. Defren olgeta, oli stat wokem samting we i nogud. ?Wanem ol samting nogud ya we oli stap mekem? !Oli gat fol long fes blong God from fasin blong wosip long ol aedol, fasin blong slip olbaot, fasin blong givim hadtaem long ol puaman, mo plante moa sin we oli nogud tumas! From samting ya, ol man Babilon oli spolem Jerusalem mo tekem ol man Juda oli go kalabus long 607 B.K.T.a

⁹ Long rod ya, God i stretem ol man blong hem. Nating se i olsem, hem i yusum profet Jeremaea blong talemaot se bambae i gat wan voes i kamaot long Jerusalem we i talem se: “!Hae God i gat olgeta paoa! Yumi talem tangkiu long hem, from we hem i gud tumas. Oltaem bambae hem i lavem yumi, gogo i no save finis.” (Jeremaea 33:​10, 11) Yes, tok ya i kamtru. Jerusalem i stap 70 yia we i ples nating nomo, kasem yia 537 B.K.T., taem ol man Jiu oli kambak bakegen long ples blong olgeta. (Jeremaea 25:11; Daniel 9:​1, 2) Oli bildim bakegen olta long ples we tempol i stap long hem fastaem, long Hil ya Moraea, mo oli stat mekem ol sakrefaes blong olgeta long ples ya. Long namba tu yia afta we oli kambak, oli stat putum fandesen blong tempol ya. !Hemia wan taem blong bigfala glad! Esra i talem se: “Nao taem ol man ya oli stat blong putum fandesen blong haos ya, ol pris oli putum ol spesel klos blong olgeta, nao oli holem ol trampet, oli go stanap long ples blong olgeta. Mo ol Livaet we oli laen blong Asaf oli holem ol simbol, oli go stanap long ples blong olgeta. Nao olgeta oli stap presem Hae God, folem fasin we King Deved i bin talem long ol man long taem blong hem. Olgeta ya oli stap singsing, oli stap presem Hae God, mo ol narafala man oli stap joen blong talem se, ‘Hae God i God blong yumi, mo hem i gud tumas. Oltaem bambae hem i lavem yumi gogo i no save finis.’ ”​—Esra 3:​1-11.

10. ?Wanem toktok i statem mo endem Ol Sam 118?

¹⁰ Long Ol Sam yumi save ridim plante tok we oli blong presem Jeova from we hem i gud. Long olgeta ya i gat Sam 118, we ol man Isrel oli singim long wanwan haos blong olgeta taem oli mekem lafet blong Pasova. Sam ya i stat mo i finis wetem ol tok ya: “Yumi talem tangkiu long Hae God, from we hem i gud tumas. Oltaem bambae hem i lavem yumi [“soem kaengud fasin wetem lav,” NW ], gogo i no save finis.” (Ol Sam 118:​1, 29) Ating hemia nao ol laswan tok blong presem God we Jisas Kraes i singim wetem ol aposol blong hem, long naet bifo we hem i ded long 33 K.T.​—Matiu 26:30.

“Plis Mi Wantem We Yu Letem Mi Mi Luk Glori Blong Yu”

11, 12. ?Taem Moses i luk bigfala laet ya blong God, hem i harem wanem tok?

¹¹ Sam handred yia bifo long Esra, ol man oli bin luksave finis we gud fasin blong Jeova i joen wetem kaen fasin mo lav blong hem. Smoltaem afta we God i kilim i ded plante long ol man Isrel from we oli bin wosipim buluk ya we oli wokem long gol, Moses i prea long Jeova se: “Plis mi wantem we yu letem mi mi luk glori blong yu, we i soemaot we yu yu stap.” Jeova i save se sipos Moses i luk fes blong hem bambae hem i ded, taswe hem i ansa se: “Bambae mi mekem we gud fasin blong mi i pas long fored blong yu.”​—Eksodas 33:​13-20, NW.

¹² Long nekis dei, Jeova i soemaot gud fasin ya blong hem long Bigfala Hil ya Sinae. Long taem ya, Moses i luk bigfala laet blong God mo i harem tok ya: “Jeova, Jeova, God we i gat sore mo gladhat, hem i slou blong kam kros, mo hem i fulap long lav wetem kaengud fasin, mo trutok. Hem i stap soem lav wetem kaengud fasin long plante taosen man, mo i stap fogivim olgeta from ol mastik, ol rong, mo ol sin blong olgeta. Be taem man i mas kasem panis, bambae hem i no blokem panis ya nating. Bambae hem i mekem we panis from fol blong ol papa i kasem ol pikinini mo ol smol bubu blong olgeta, gogo namba tri laen, no namba fo laen blong ol pikinini, biaen long olgeta.” (Eksodas 34:​6, 7, NW ) Ol tok ya oli soemaot we Jeova i mekem i gud from we hem i gat lav mo ol narafala fasin ya. Sipos yumi tingting gud long ol fasin ya bambae i givhan long yumi blong soemaot fasin we i gud. Be, fastaem, i gud we yumi tingbaot wan fasin we i kamaot tu taem long tok ya blong presem God.

“God We . . . i Fulap Long Lav Wetem Kaengud Fasin”

13. ?Long toktok ya we i presem gud fasin blong God, wanem fasin i kamaot tu taem, mo from wanem hemia i stret?

¹³ “Jeova [i wan] God we . . . i fulap long lav wetem kaengud fasin . . . i stap soem lav wetem kaengud fasin long plante taosen man.” Hibru tok we oli tanem long ples ya se “lav wetem kaengud fasin” i save minim tu “lav we i stap tru oltaem.” Fasin ya nomo i kamaot tu taem long tok ya we God i talemaot long Moses. !Hemia i stret nomo from we lav nao hem i nambawan fasin blong Jeova! (1 Jon 4:8) Tok ya blong presem Jeova we i se ‘hem i gud tumas, oltaem bambae hem i lavem yumi [soem kaengud fasin wetem lav] gogo i no save finis’ i makemaot klia nambawan fasin ya blong God.

14. ?Hu i save harem gud from we God i mekem i gud long olgeta mo i soem lav wetem kaengud fasin long olgeta?

¹⁴ Tok ya hem “i fulap long lav wetem kaengud fasin” i wan pruf se Jeova i stap mekem i gud tumas. Hemia i kam klia taem yumi luk olsem wanem hem i kea gud long ol man blong wok blong hem long wol. (1 Pita 5:​6, 7) Ol Witnes blong Jeova oli save talem se i tru, God i “stap soem lav wetem kaengud fasin” long olgeta man we oli lavem hem mo we oli mekem wok blong hem. (Eksodas 20:6) Be nesen blong Isrel i no moa kasem lav wetem kaengud fasin blong Jeova, minim se hem i no moa soem lav we i stap tru, from we olgeta ya oli sakemaot Pikinini blong hem. Nating se i olsem, God bambae i gohed blong mekem i gud mo soem lav we i tru long olgeta Kristin blong evri nesen we oli holem bilif long hem, gogo i no save finis.​—Jon 3:36.

Jeova i Gat Sore Mo Gladhat

15. (a) ?Toktok we Moses i harem long Bigfala Hil blong Sinae i stat wetem wanem tok? (b) ?Sore i joen wetem wanem?

¹⁵ Toktok blong Moses long Bigfala Hil ya Sinae i stat wetem ol tok ya: “Jeova, Jeova, God we i gat sore mo gladhat.” Hibru tok we long ples ya oli tanem i kam “sore” oli save yusum tu blong tokbaot “bel” mo hem i klosap sem mak long tok we oli yusum blong tokbaot “basket blong pikinini.” Taswe, sore i joen wetem ol strong filing we oli stap dip insaed long wan man, mo oli kamaot from we man ya i harem save soa blong narafala. Be sore i no minim nomo se man i harem save soa blong narafala. Filing ya i stap pusum man blong mekem wan samting blong karemaot trabol soa blong narafala. Eksampol, ol Kristin elda we oli gat lav oli luksave se oli mas soem filing blong sore long ol narafala Kristin brata sista. Taem i stret blong mekem olsem, oli mas “givhan long narafala man, . . . we oli mas glad nomo blong mekem.”​—Rom 12:8; Jemes 2:​13; Jud 22, 23.

16. ?From wanem yumi save talem se Jeova i gat gladhat?

¹⁶ Fasin blong God blong mekem i gud i kamaot from we hem i gat gladhat tu. Man we i gat gladhat i “soemaot se hem i tingbaot filing blong narafala” mo i klia we hem i ‘kea mo i kaengud long narafala, antap moa long olgeta we oli daon moa long hem.’ Jeova hem i beswan eksampol blong soem gladhat long ol man blong hem we oli holemstrong long bilif. Long gladhat blong hem, hem i yusum ol enjel blong givim paoa long olfala profet Daniel. Mo bakegen hem i yusum wan enjel blong talemaot long vejin Meri se hem nao we God i jusum blong bonem Jisas. (Daniel 10:19; Luk 1:​26-38) Yumi ol man blong Jeova, yumi tangkiu tumas we long gladhat blong hem, hem i toktok long yumi tru long Baebol. Yumi presem hem from we hem i mekem i gud long yumi mo yumi lukaot rod tu blong soem we yumi tingbaot narafala mo soem gladhat long olgeta. Taem ol brata we oli gat wok insaed long kongregesen, oli stretem wan Kristin brata no sista “long kwaet fasin,” i minim se oli kaen gud mo oli tingbaot filing blong hem.​—Galesia 6:1.

Wan God We i Slou Blong Kam Kros

17. ?From wanem yumi tangkiu tumas se Jeova i “slou blong kam kros”?

¹⁷ ‘God we i . . . slou blong kam kros.’ Ol tok ya oli pulum yumi blong tingbaot wan narafala wei we Jeova i soemaot se hem i mekem i gud long man. Jeova i gat longfala tingting blong no hareap blong panisim yumi taem yumi mekem mastik. Hem i givim taem long yumi blong winim ol slak fasin blong yumi mo blong gru long saed blong spirit. (Hibrus 5:​12–6:3; Jemes 5:​14, 15) Mo tu, from we God i gat longfala tingting hem i stap mekem i gud long ol man we oli no tekem disisen yet blong wosipim hem. Ol man ya oli gat taem yet blong lesin long mesej blong Kingdom mo tanem tingting long sin blong olgeta. (Rom 2:4) Be, nating se Jeova i gat longfala tingting, hem i wantem mekem i gud long man, taswe samtaem hem i mas soemaot kros blong hem. Hemia nao wanem we hem i bin mekem long ol man Isrel we oli wosipim wan buluk we oli wokem long gol taem oli stap long Bigfala Hil ya Sinae. I no longtaem, God bambae i soemaot kros blong hem long fasin we i bigwan moa, taem we bambae hem i finisim rabis wol ya blong Setan.​—Esikel 38:​19, 21-23.

18. ?Long saed blong trutok, olsem wanem Jeova i defren olgeta long ol lida blong wol?

¹⁸ ‘Jeova [i wan] God we i . . . fulap long lav wetem kaengud fasin mo trutok.’ !Jeova i defren olgeta long ol lida blong wol we oli stap mekem ol bigfala promes we oli no naf nating blong holem! Defren olgeta, ol man we oli wosipim Jeova oli save trastem evri samting we hem i talem long Tok blong hem. From we God i fulap long trutok, yumi save trastem promes blong hem oltaem. Papa blong yumi long heven i mekem i gud tumas long yumi from we hem i ansarem ol prea blong yumi blong kasem moa save long ol trutok blong Baebol.​—Ol Sam 43:3; 65:2.

19. ?Wanem i soemaot se Jeova i stap mekem i gud tumas long ol man we oli tanem tingting blong olgeta from sin blong olgeta?

¹⁹ ‘Jeova [i wan] God we i . . . stap fogivim olgeta from ol mastik, ol rong, mo ol sin blong olgeta.’ From we Jeova i wantem mekem i gud long man, hem i rere blong fogivim eni man we i tanem tingting blong hem long sin. I sua se yumi tangkiu bigwan long Papa blong yumi long heven from we hem i wokem rod blong fogivim yumi tru long sakrefaes blong Jisas (1 Jon 2:​1, 2) Yes, yumi glad tumas se evri man we i soem bilif long ransom ya oli gat janis blong frengud wetem Jeova, mo oli gat janis ya tu blong kasem wan laef we i no save finis long niufala wol we hem i promes blong mekem. !Hemia ol nambawan risen we oli mas pusum yumi blong presem Jeova from we hem i mekem i gud tumas long yumi ol man!​—2 Pita 3:13.

20. ?Wanem i pruvum se God i no ting nating long ol rabis fasin?

²⁰ ‘Taem man i mas kasem panis, bambae [Jeova] i no blokem panis ya nating.’ Hemia wan narafala risen blong presem Jeova we i mekem i gud tumas long yumi. ?From wanem? From we wan narafala impoten haf blong fasin ya blong mekem i gud long man, hemia se hem i no ting nating long ol rabis fasin. Yes, “long taem ya we Jisas, Masta blong yumi, bambae i aot long heven, i kamtru long yumi, wetem ol strong enjel blong hem,” God bambae i mas givim panis long “olgeta we oli no save ona long God, mo long olgeta we oli no save obei long gud nius.” Olgeta ya bambae oli kasem ‘panis we i no save finis samtaem.’ (2 Tesalonaeka 1:​6-9) Ol man blong Jeova we bambae oli laef tru long jajmen ya, bambae oli save harem gud fulwan long laef blong olgeta. Bambae i no gat man blong mekem nogud long olgeta, yes bambae i no moa gat ol man ya we oli “no wantem ol fasin ya we i gud.”​—2 Timoti 3:​1-3.

Folem Fasin Blong Jeova Blong Mekem i Gud

21. ?From wanem yumi mas mekem fasin we i gud?

²¹ I klia we yumi gat plante risen blong presem Jeova mo talem tangkiu long hem from we hem i gud. ?From we yumi man blong hem, yumi mas traehad blong soemaot fasin ya? Yes, aposol Pol i pulum ol Kristin brata blong hem se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem.” (Efesas 5:1) Papa blong yumi long heven i stap mekem i gud oltaem long ol man, mo yumi mas mekem sem mak.

22. ?Bambae yumi tokbaot wanem long nekis stadi?

²² Sipos disisen we yumi mekem blong givim laef blong yumi long Jeova i kamaot long hat blong yumi, bambae yumi wantem tumas blong folem fasin blong hem blong mekem i gud. Be from we yumi pikinini blong sin man ya Adam, yumi no faenem se i isi blong mekem i gud. Long nekis stadi bambae yumi luk olsem wanem yumi save kam naf blong mekem ol fasin we oli gud. Mo tu, bambae yumi tokbaot ol defren rod we yumi save folem mo we yumi mas folem, blong mekem olsem Jeova​—we hem i beswan eksampol blong fasin we i gud.

[Futnot]

?Bambae Yu Yu Ansa Olsem Wanem?

• ?Wanem mining blong fasin we i gud?

• ?Wanem tok blong Baebol we i mekem gud fasin blong God i kam long klia ples?

• ?Wanem sam fasin we oli soemaot se Jeova i gud?

• ?From wanem yumi mas folem fasin blong Jeova blong mekem i gud?

[Tok blong pija long pej 12]

Jeova i stretem ol man blong hem bifo from we laef blong olgeta i no laenap wetem toktok we oli talem blong presem hem

[Tok blong pija long pej 12]

Wan smol grup blong ol man blong God oli gobak long Jerusalem

[Tok blong pija long pej 13]

Moses i harem wan nambawan tok we i talemaot se God i gud

[Tok blong pija long pej 15]

Yumi luksave se Jeova i gud from we hem yusum Baebol blong toktok long yumi