?Yu Yu Joen Wetem God Long Spel Blong Hem?

“Tok blong God i wan samting we i laef, mo i stap wok.”—HIB. 4:12.

 1. ?Wanem fasin we yumi mas gat tede, blong yumi save joen wetem God long spel blong hem? ?From wanem i no isi blong obei?

LONG las stadi, yumi lanem se yumi save joen wetem God long spel blong hem, sipos yumi obei long hem mo ogenaesesen blong hem. I isi blong talem olsem, be maet i no isi blong mekem. Yu traem tingbaot: Ating i gat wan samting we yumi harem gud tumas blong mekem. ?Be sipos yumi kasem save se Jehova i no glad long samting ya, bambae yumi mekem wanem? Ating fastaem maet yumi no wantem lego samting ya. Long taem ya, yumi soemaot se yumi mas lanem fasin ya blong “rere blong obei.” (Jem. 3:17, NW) Long stadi ya, bambae yumi tokbaot sam samting we oli save kamaot long laef blong yumi, we oli givim janis long yumi blong soemaot sipos yumi rere blong obei no nogat.

2, 3. ?Yumi mas gohed blong mekem wanem, sipos yumi wantem mekem Jehova i glad?

² ?Olsem wanem? ?Taem yu kasem advaes blong Baebol se yu mas jenisim wan samting long laef blong yu, yu yu rere blong obei? Baebol i talem se ol man we God i wantem pulum olgeta oli kam long ogenaesesen blong hem, oli olsem ‘ol gudgudfala samting blong olgeta kantri.’ (Hag. 2:7) Hemia i min se God i jusum ol man we hem i luk se oli olsem ol gudgudfala samting, from we oli wantem mekem samting we i stret. I tru, taem yumi jes stat blong lanem trutok, bighaf blong yumi i stap mekem ol samting we oli no stret. Be from we yumi lavem God mo Pikinini blong hem, mo from we yumi wantem mekem God i glad, yumi mekem sam bigfala jenis long tingting mo fasin blong yumi. Yumi prea plante mo yumi traehad blong mekem ol bigfala jenis ya, nao yumi kam naf blong baptaes mo mekem Jehova i glad.—Ridim Kolosi 1:9, 10.

³ Be yumi sinman yet. Yumi mas mekem plante jenis yet long laef blong yumi, mo yumi mas traehad blong mekem samting we i stret oltaem. Be Jehova i promes se bambae hem i halpem yumi sipos yumi traehad blong mekem hem i glad.

Taem Yumi Mas Mekem Sam Jenis Long Tingting Mo Fasin Blong Yumi

 4. ?Wanem trifala rod we Jehova i save yusum blong soemaot long yumi se yumi mas mekem sam jenis?

⁴ Sipos yumi mas mekem sam jenis, fastaem yumi mas save wanem samting we yumi mas jenisim. Jehova i save yusum ol defren rod blong mekem yumi luksave samting ya. Hem i save yusum wan pablik tok long Haos Kingdom blong mekem yumi luksave se i gat wan samting we i rong long tingting no fasin blong yumi. No maet yumi ridim wan buk blong yumi, we i mekem yumi luksave wan nogud fasin blong yumi. Be sipos yumi no luksave se yumi mas mekem sam jenis taem yumi harem pablik tok ya, no taem yumi ridim buk blong yumi, Jehova i save yusum wan Kristin brata no sista long kongregesen blong stretem yumi long kaen fasin.—Ridim Galesia 6:1.

 5. ?Wanem sam fasin we maet yumi mekem taem yumi kasem advaes blong stretem yumi? ?Be from wanem ol elda oli mas gohed nomo blong traem givhan long yumi?

⁵ I no isi blong agri wetem ol tok we wan narafala sinman i talem blong stretem yumi, nomata se ol tok blong hem i waes mo i kaen gud. Be long Galesia 6:1, Jehova i talem long ol elda se oli mas “givhan” long yumi mo stretem yumi. Mo oli mas mekem samting ya “long kwaet fasin.” Sipos yumi lesin long olgeta, bambae Jehova i luk yumi olsem wan long ol gudgudfala samting blong olgeta kantri. I gat wan samting we i narakaen long saed blong yumi, hemia se taem yumi prea, i isi nomo blong yumi talem long Jehova se yumi sinman. Be taem wan elda i kam luk yumi from wan mastik we yumi mekem, yumi traem mekem eskius, no yumi traem mekem olsem we mastik ya blong yumi i wan smol samting nomo. Maet yumi gat nogud tingting long elda ya we i givim advaes. Maet yumi ting se hem i no laekem yumi, no maet yumi faenem poen long hem se hem i no toktok kaen long yumi. (2 King 5:11) Samtaem yumi save kasem advaes we i stikim yumi stret. Maet ol elda oli talem long yumi se wan famle blong yumi i stap mekem samting we i no stret, no maet oli talem se klos mo hea blong yumi i no stret. Maet oli talem se yumi mas klin moa long bodi blong yumi, no maet oli talem se yumi mas sakemaot wan pleplei we yumi laekem, mo yumi mas jusum wan narafala pleplei we Jehova i glad long hem. Nao yumi kros, mo yumi talem sam tok we i no stret blong talem. Biaen, yumi harem nogud long yumi wan bakegen, mo brata we i stap traem blong givhan long yumi, hem tu i harem nogud. Be taem yumi no moa kros, yumi agri se advaes we hem i givim long yumi i stret nomo.

 6. ?Wanem samting we Baebol i mekem long man, blong ‘ol tingting mo ol samting we hem i wantem’ oli kam long klia ples?

⁶ Stamba vas blong stadi ya i talem se tok blong God i “stap wok.” Yes, tok blong God i stap wok blong jenisim ol fasin blong yumi. Bifo we yumi baptaes, tok ya i wok blong jenisim fasin blong yumi. Be i no hemia nomo. Afta we yumi baptaes tu, hem i save mekem sem wok. Long leta we Pol i raetem long ol Hibru Kristin, hem i talem se tok blong God i “save go insaed long ples we tingting blong man i joen long laef blong hem,” mo se “tok blong God i save jajem olgeta tingting blong man, mo ol samting we man i wantem long tingting blong hem.” (Hib. 4:12) Long vas ya, “laef” i minim ol fasin blong yumi we yumi soemaot long ol man, samting we oli luk long yumi. “Tingting” i minim samting we i stap long hat blong yumi, we ol man oli no save luk. Ale Pol i stap talem se taem yumi kasem save long Baebol mo long samting we God i wantem, ol aksen blong yumi bambae oli soemaot se yumi wanem kaen man long hat blong yumi. ?Olsem wanem? ?Samting we yumi soemaot long ol man i defren long samting we i stap long hat blong yumi? (Ridim Matiu 23:27, 28.) I gud yu traem tingbaot se bambae yu yu mekem wanem sipos yu fesem ol samting we ol paragraf biaen oli tokbaot.

Gohed Wetem Ogenaesesen Blong Jehova

7, 8. (a) ?From wanem sam Hibru Kristin oli holemtaet Loa blong Moses? (b) ?From wanem yumi save talem se oli stap go agensem stamba tingting blong God?

⁷ Plante long yumi oli save baehat ol tok long Ol Proveb 4:18, se: “Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.” Tok ya i min se, sloslo yumi kasem save moa long samting we Jehova i wantem blong yumi mekem, mo yumi kam gud moa blong mekem ol samting we hem i glad long olgeta.

⁸ Long las stadi, yumi tokbaot se afta long ded blong Jisas, plante Hibru Kristin oli harem se i had blong lego Loa blong Moses. (Wok 21:20) Nating we Pol i eksplenem gud se ol Kristin oli no moa stap aninit long Loa ya, be samfala oli no wantem harem tok ya we tabu spirit i pulum Pol blong talem. (Kol. 2:13-15) Maet oli harem se sipos oli gohed blong holem sam long ol Loa blong Moses, bambae ol man we oli folem skul blong ol man Isrel oli no save agensem olgeta mo mekem i nogud long olgeta. Nating se i olsem wanem, be long leta we Pol i raetem long ol Hibru Kristin ya, hem i talem klia se, sipos oli no wantem wok folem stamba tingting blong God, oli no save joen wetem hem long spel blong hem.a (Hib. 4:1, 2, 6; ridim Hibrus 4:11.) Sipos oli wantem we Jehova i glad long olgeta, oli mas luksave se hem i wantem we oli mekem wosip long hem long wan narafala rod.

 9. ?Yumi mas gat wanem fasin taem slef we i stret mo waes i givim sam niufala save long wan tijing blong Baebol, nao yumi mas jenisim tingting blong yumi?

⁹ Long taem blong yumi, samtaem slef we i stret mo waes i givim save long yumi long wan tijing blong Baebol, mo maet save ya i defren lelebet long save we yumi gat fastaem. Yumi mas harem gud long ol jenis ya, from we oli soemaot se Jehova i stap yusum slef ya we i stret mo waes blong i tijim yumi long trutok. Samtaem Hed Kampani we i wok long nem blong “slef ya we i stret mo waes,” i jekem bakegen save we yumi gat long wan trutok blong Baebol. Sipos Hed Kampani i luksave se yumi mas stretem no jenisim tingting blong yumi long wan tijing, hem i no fraet blong givim niufala save no blong mekem save i kam klia moa. Grup ya i save se bambae samfala oli tok agens long ol jenis ya, be hemia i no impoten. Samting we i impoten long tingting blong olgeta long Hed Kampani, se oli mas wok folem stamba tingting blong Jehova. ?Olsem wanem long yu? ?Yu yu harem olsem wanem taem slef we i stret mo waes i mekem sam save blong Baebol i kam klia moa, nao yu mas jenisim tingting blong yu?—Ridim Luk 5:39.

10, 11. ?Sam Kristin brata oli mekem wanem taem oli kasem save se oli mas traem sam niufala fasin blong prij? ?Yumi lanem wanem from?

¹⁰ Yumi traem tingbaot wan narafala samting bakegen. Klosap wan handred yia i pas finis, sam Kristin brata we oli givim ol nambawan pablik tok, oli ting se fasin ya blong givim ol tok i bes rod blong prij. Ol brata ya oli laekem blong givim ol tok long fored blong plante man. Mo sam long olgeta oli harem gud tumas, taem ol man oli leftemap olgeta from ol gudfala tok blong olgeta. Be biaen, ol man blong Jehova oli kasem save se Jehova i wantem we oli prij long ol haos wanwan, i no long ol pablik tok nomo. Sam long ol brata ya we oli givim ol gudfala tok long fored blong ol man, oli no wantem nating blong traem niufala rod ya. Ol man we oli lesin long ol gudfala tok blong ol brata ya, oli ting se ol brata ya oli lavem Jehova mo oli obei gud long hem. Be samting we ol brata ya oli mekem long taem ya, i soemaot se oli no lavem Jehova mo oli no obei long hem. Yumi save se Jehova i no glad long olgeta. Biaen, oli lego ogenaesesen blong Jehova.—Mat. 10:1-6; Wok 5:42; 20:20.

¹¹ Plante long ol narafala brata mo sista long taem ya, olgeta tu oli harem se i had blong prij long ol haos wanwan, speseli taem oli jes stat. Nating se i olsem, oli obei long God mo ogenaesesen blong hem. Nao sloslo, oli no moa fraet blong prij long ol haos wanwan. Jehova i blesem olgeta bigwan. ?Yu yu mekem wanem taem slef we i stret mo waes i talem long yu blong yu traem wan fasin blong prij we yu neva mekem bifo? ?Yu yu obei, nating se niufala fasin ya i had long yu?

Taem Wan We Yumi Lavem Hem i Lego Jehova

12, 13. (a) Jehova i talem se kongregesen i mas putumaot ol man we oli no tanem tingting blong olgeta from bigfala sin. ?From wanem hem i talem olsem? (b) ?Wanem samting i traem sam Kristin papa mama?

¹² Yumi evriwan i agri long ol tok blong Baebol se sipos yumi wantem mekem Jehova i glad, yumi mas klin long saed blong bodi, fasin, mo wosip. (Ridim Taetas 2:14.) Be samtaem wan samting i save hapen we i mekem i had blong yumi obei long ol tok ya. Yu traem tingbaot wan gudfala Kristin man mo woman, we tufala i gat wan boe nomo blong tufala, nao boe ya i lego trutok. Boe ya i wantem moa blong ‘stap hapi long fasin blong sin blong smoltaem,’ i bitim we hem i fren gud wetem Jehova mo papa mama blong hem. Boe ya i no moa stret blong stap long kongregesen, ale kongregesen i mas putumaot hem.—Hib. 11:25.

¹³ !Papa mama blong boe ya, tufala i harem nogud bitim mak! Tufala i save ol tok blong Baebol long saed blong ol man we kongregesen i putumaot olgeta, se: “Yufala i no mas go joen wetem ol man ya we oli stap talem se oli brata blong yumi, be oli stap mekem ol sin ya. Sipos oli stap mekem ol fasin nogud wetem woman, no oli stap wantem tumas samting, no oli stap prea long ol narafala god, bambae yufala i no go joen wetem olgeta. Sipos oli stap spolem nem blong narafala man, no oli stap dring we oli lusum hed, no oli stap stil, bambae yufala i no go joen wetem olgeta. Bambae yufala i no go sidaon wetem ol man olsem blong kakae wetem olgeta.” Mo tu, Baebol i talem se: “Man we i stap mekem sin oltaem, yufala i mas putumaot hem, blong hem i no moa save stap wetem yufala.” (1 Kor. 5:11, 13) Ale papa mama blong boe ya, tufala i luksave se “ol man ya we oli stap talem se oli brata blong yumi” we vas ya i tokbaot, hemia ol famle blong tufala tu we oli no stap long haos blong tufala. !Be tufala i lavem tumas boe blong tufala! From samting ya, maet tufala i stap tingting se: ‘?Sipos mitufala i no moa joen wetem boe blong mitufala, bambae mitufala i givhan long hem olsem wanem blong i kambak long Jehova? I moa gud we mitufala i toktok wetem hem oltaem, hemia bambae i givhan long hem moa.’b

14, 15. ?Wanem samting we ol papa mama oli mas tingbaot, taem oli mekem desisen se bambae oli toktok long pikinini blong olgeta we kongregesen i putumaot hem, no nogat?

¹⁴ Yumi sore tumas long papa mama ya. Boe blong tufala i gat wan jus blong mekem. Be hem i jus nogud. Hem i jus blong ronem ol fasin we oli no stret nating long wan Kristin, i bitim we hem i gohed blong joen gud wetem papa mama blong hem mo kongregesen. Papa mama blong hem, tufala i wantem givhan long hem, be tufala i no save mekem desisen ya long ples blong hem. !Yumi kasem save from wanem tufala i harem nogud bitim mak!

¹⁵ ?Gudfala papa mama ya, bambae tufala i mekem wanem? ?Bambae tufala i obei long ol klia tok we Jehova i talem? ?No bambae tufala i joen plante wetem boe blong tufala we kongregesen i putumaot hem, nao tufala i mekem eskius se tufala i mas tokbaot sam “impoten famle bisnes” wetem hem? Taem tufala i mekem desisen long saed ya, tufala i mas tingbaot se, desisen blong tufala bambae i mekem Jehova i glad no nogat. Tingting blong Jehova, hemia se ogenaesesen blong hem i mas stap klin. Taswe hem i talem se kongregesen i mas putumaot man we i mekem bigfala sin be i no tanem tingting blong hem. Mo tu, Jehova i wantem pulum man we i mekem nogud, blong i jenisim fasin blong hem mo i kambak insaed long kongregesen. ?Ol Kristin papa mama oli save mekem wanem blong folem tingting ya blong Jehova?

16, 17. ?Taem yumi tingting dip long samting we Eron i fesem, yumi lanem wanem?

¹⁶ Brata blong Moses we nem blong hem Eron, i fesem hadtaem from tufala boe blong hem. Tufala boe ya, Nadab mo Abihu, tufala i bonem insens i go long Jehova, long wan fasin we Jehova i no glad long hem. Nao wantaem nomo, Jehova i mekem faea i kamaot long heven blong kilim tufala i ded. Yu traem tingbaot. Eron i mas harem nogud bitim mak. Hem i no moa save toktok wetem tufala, from we tufala i ded. Be i no hemia nomo. Moses i talem long Eron mo tu narafala boe blong hem, se Jehova i no wantem we trifala i harem nogud. Moses i talem se: “Yutrifala i no mas terem klos blong yutrifala [blong sore long tufala], mo yutrifala i mas komem hea blong yutrifala. Sipos yutrifala i mekem ol fasin ya blong sore, bambae yutrifala i ded from, mo Hae God bambae i kros long yumi evriwan.” (Lev. 10:1-6) Tingting we i stap insaed long ol vas ya i klia nomo. Yumi mas lavem Jehova moa, i bitim we yumi lavem ol famle blong yumi we oli no wantem obei long Hem.

¹⁷ Taem wan man i brekem loa blong Jehova tede, Jehova i no kilim man ya i ded wantaem nomo. From bigfala lav blong hem, hem i givim janis long man ya blong i tanem tingting blong hem from ol nogud fasin we hem i mekem. Be sipos wan papa mama i gohed blong toktok wetem pikinini blong tufala we kongregesen i putumaot hem, tufala i stap traem Jehova. ?Yu ting se samting ya bambae i mekem Jehova i harem olsem wanem?

18, 19. ?Wanem blesing i save kamaot taem evriwan long famle oli obei long Jehova long saed blong ol man we kongregesen i putumaot olgeta?

¹⁸ Plante brata mo sista we kongregesen i putumaot olgeta mo we oli kambak finis, oli talem klia se taem ol fren mo famle blong olgeta oli obei long Jehova mo oli no moa toktok wetem olgeta, samting ya i givhan long olgeta blong oli tanem tingting blong olgeta. Wan yang woman we i kambak insaed long kongregesen, i talem long ol elda se, wan risen from wanem hem i stretem laef blong hem, hemia from samting we stret brata blong hem i mekem. Brata blong hem i obei long Jehova mo i folem ol tok we Jehova i talem long saed blong ol man we kongregesen i putumaot olgeta. Samting ya i mekem se woman ya i wantem kambak insaed long kongregesen.

¹⁹ ?Yumi lanem wanem long stori ya? Yumi lanem se yumi mas obei long Jehova oltaem, nomata wanem i kamaot long laef blong yumi. Samtaem i no isi blong mekem olsem, from we yumi sinman. Be yumi mas bilif strong se samting we Jehova i talem long yumi blong mekem, oltaem hem i bes rod blong folem.

“Tok Blong God i Wan Samting We i Laef”

20. ?Hibrus 4:12 i stap tokbaot wanem tufala samting? (Lukluk futnot.)

²⁰ Pol i raetem long Hibrus 4:12 se “tok blong God i wan samting we i laef.” Taem hem i talem olsem, hem i no minim nomo Tok blong God, Baebol.c Ol narafala vas long japta ya oli soemaot se Pol i stap tokbaot ol promes blong God. Pol i stap talem se God i no save fogetem ol promes we hem i mekem. Jehova i soemaot samting ya taem hem i talem se: “Tok blong mi bambae i . . . mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.” (Aes. 55:11) Taswe, taem ol promes oli no kamtru kwik olsem yumi wantem, yumi mas gat longfala tingting. Jehova i “stap wok” blong mekem stamba tingting blong hem i kamtru fulwan.—Jon 5:17.

21. ?From wanem Hibrus 4:12 i save leftemap tingting blong ol olfala we oli holemstrong long Jehova longtaem finis?

²¹ Plante olfala brata mo sista long “bigfala kampani,” oli holemstrong long Jehova longtaem finis i kam. (Rev. 7:9, NW) Olgeta oli bin ting se en blong rabis wol ya bambae i kamtru bifo we oli kam olfala. Be i no hapen olsem. Nating se samting ya we oli wantem tumas i no kamtru, tingting blong olgeta i no foldaon, oli stap gohed strong yet long wok blong Jehova. (Sam 92:14) Olgeta oli luksave se tok blong God i wan samting we i laef, mo se ol promes blong Jehova bambae oli kamtru. Jehova i stap wok blong mekem stamba tingting blong hem long saed blong wol ya mo ol man, i kamtru. Stamba tingting blong God i wan samting we i impoten tumas long hem. Taswe, taem yumi mekem stamba tingting ya i stap long fas ples long tingting mo laef blong yumi, God i glad we i glad. Yes, Jehova i stap spel long namba seven dei ya, be i no gat wan samting we i save blokem stamba tingting blong hem. Bambae hem i mekem stamba tingting ya i kamtru. Mo hem i save se ol man blong hem olsem wan grup, bambae oli wok blong givhan long stamba tingting ya. ?Olsem wanem long yu? ?Yu yu joen wetem God long spel blong hem?

[Ol futnot]

?Yu Yu Tingbaot?

• ?Tede, yumi mas mekem wanem blong joen wetem God long spel blong hem?

• ?Taem yumi kasem save long samting we God i wantem, folem ol tok blong Baebol, yumi mas mekem wanem blong Hem i glad long yumi?

• ?Wetaem maet i had blong obei long Jehova? ?Be from wanem yumi mas obei?

• ?Hibrus 4:12 i stap tokbaot wanem tufala samting?

[Tok blong pija long pej 31]

!Papa mama ya, tufala i harem nogud bitim mak!