Niufala Wol—?Bambae Yu Stap Long Hem?

“Oltaem long laef ya blong yumi, yumi mas traehad blong stap long gudfala laef, mo blong mekem ol gudfala fasin. I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.”—PRIJA 3:12, 13.

 1. ?From wanem yumi save gat gudfala tingting long saed blong fiuja?

PLANTE man oli gat tingting ya se God we i gat Olgeta Paoa i mekem i strong mo i had tumas long ol man. Be, vas ya we yumi ridim antap, i wan trutok we yu save faenem long Tok blong God. Vas ya i laenap wetem tingting ya se God i wan “hapi God” mo from samting ya hem i putum faswan papa mama blong yumi long wan paradaes long wol. (1 Timoti 1:11; Jenesis 2:7-9) Taem yumi wantem kasem save long saed blong fiuja we God i promes blong mekem long ol man blong hem, yumi no sapraes blong lanem se bambae yumi haremgud blong olwe long ol nambawan fasin.

 2. ?Wanem sam samting we yu save putum tingting blong yu i stap long hem?

² Long faswan stadi, yumi tokbaot tri long ol fofala taem we Baebol i talemaot “niufala heven mo wan niufala wol.” (Aesea 65:17) Wan long ol profet tok ya we yumi save trastem, i stap long Revelesen 21:1. Ol vas we oli kam biaen oli tokbaot taem ya we bambae God we i gat Olgeta Paoa i mekem bigfala jenis i kamaot long ol fasin long wol, blong mekem oli kam gud moa. Bambae hem i ravemaot wota long ae blong ol man we oli krae from ded. Bambae i no moa gat man i ded from we oli kam olfala, oli sik, no oli aksiden. Fasin blong krae from man we i ded, from we man i harem nogud, no from soa, bambae oli finis olgeta. !Hemia wan nambawan hop! Be, ?yumi save sua se promes ya bambae i kamtru? mo ?hop ya i mekem wanem long laef blong yumi naoia?

Ol Risen Blong Trastem Promes Ya

 3. ?From wanem yumi save trastem ol promes we Baebol i talem long saed blong fiuja?

³ Makemgud olsem wanem Revelesen 21:5 i gohed. Vas ya i talemaot tok blong God, we i stap sidaon long bigfala jea blong hem long heven, se: “!Yu luk! Mi mi stap mekem olgeta samting oli kam niuwan bakegen.” Promes ya blong God i moa gud i bitim eni tok we wan kantri i save talemaot taem i kasem independen, mo i bitim eni loa we oli raetem blong givhan long man tede, no eni tingting we man i gat blong wantem wan fiuja we i moa gud. Tok ya, yumi save trastem fulwan, from we hem i kamaot long Man ya we Baebol i talem se hem “i no save giaman.” (Taetas 1:2) From samting ya, maet yu ting se yumi no nidim blong mekem wan samting, yumi jes haremgud long nambawan promes ya mo yumi trastem God. Be yumi no mas ting se i no moa gat wan samting we yumi nidim blong mekem. I gat plante moa samting we yumi save lanem long saed blong fiuja blong yumi.

4, 5. ?Wanem profet tok blong Baebol, we yumi tokbaot finis mo we oli save mekem yumi sua moa long samting we bambae i kam?

⁴ Tingbaot ol samting we yumi lanem long faswan stadi long saed blong ol promes we Baebol i givim long saed blong wan niufala heven mo wan niufala wol. Aesea i talemaot wan niufala fasin blong laef, mo profet tok blong hem i kamtru taem ol man Jiu oli gobak long kantri blong olgeta mo stanemap trufala wosip bakegen. (Esra 1:1-3; 2:1, 2; 3:12, 13) Be, ?profet tok blong Aesea i talemaot samting ya nomo? !No gat! Ol samting we hem i bin talemaot bambae oli mas kamtru i no longtaem, long wan fasin we i bigwan moa. ?From wanem yumi tingting olsem? From ol samting we yumi ridim finis long 2 Pita 3:13 mo Revelesen 21:1-5. Ol vas ya oli tokbaot niufala heven mo wan niufala wol we bambae i givim blesing long olgeta Kristin long fulwol.

⁵ Olsem yumi lanem finis, Baebol i yusum tok ya “niufala heven mo wan niufala wol” fo taem. Yumi tokbaot tri long olgeta finis mo samting we yumi lanem i leftemap tingting blong yumi. Baebol i talemaot klia nomo se God bambae i finisim ol rabis fasin mo ol narafala samting we oli mekem man i safa, mo bambae hem i blesem ol man long wan niufala fasin blong laef we hem i promes blong mekem.

 6. ?Namba fo profet tok long saed blong “niufala heven mo wan niufala wol” i talemaot wanem?

⁶ I gud we yumi luklukgud long laswan blong fofala tok ya “niufala heven mo wan niufala wol,” long Aesea 66:22-24: “Taem we bambae mi mekem niufala heven mo niufala wol, bambae mi mi holem tufala i stap gud olwe long paoa blong mi. Mo long sem fasin, nem blong yufala wetem ol pikinini we bambae oli stap kamaot biaen long yufala, bambae mi mi holem olgeta oli stap gud olwe. Oltaem nomo, long Lafet blong Niumun, mo long Sabat dei, bambae i gat ol man blong olgeta kantri long wol oli kam mekem wosip long mi long Jerusalem. Mo taem olgeta ya oli aot, oli stap wokbaot blong gohom, bambae oli save luk ol dedbodi blong ol man ya we bifo, oli girap, oli agens long mi. Ol wom we oli stap kakae ol dedbodi ya, neva bambae oli save ded, mo faea we i stap bonem olgeta, neva bambae oli save kilim i ded. Mo taem olgeta man long wol oli luk olgeta ya, bambae oli luk se oli nogud we i nogud. Mi mi Hae God, mo hemia tok blong mi.”

 7. ?Olsem wanem yumi save se bambae Aesea 66:22-24 i mas kamtru bakegen?

⁷ Profet tok ya i kamtru finis long ol man Jiu taem oli gobak long kantri blong olgeta, be hem i mas kamtru bakegen. Hem i mas kamtru plante yia afta we oli raetem seken leta blong Pita mo buk blong Revelesen, from we tufala buk ya i tokbaot wan “niufala heven mo wan niufala wol” long fiuja. Bambae yumi luk nambawan profet tok ya i kamtru fulwan long niufala fasin blong laef. Tingbaot sam long ol gudfala samting we yumi stap wet blong harem gud long olgeta.

8, 9. (a) ?Olsem wanem ol man blong God bambae oli “stap gud olwe”? (b) ?Wanem mining blong profet tok ya se ol man blong Jeova bambae oli wosipim hem “evri manis, olsem long Taem blong Niumun, mo evri wik, olsem long Sabat dei”?

⁸ Revelesen 21:4 i talem se bambae i no moa gat ded. Ol vas long Aesea japta 66 oli agri wetem samting ya. Yumi luk long vas 22 we Jeova i save se niufala heven mo niufala wol i no blong smol taem. Antap long samting ya, ol man blong hem bambae oli stanap strong; bambae oli “stap gud olwe” long fored blong Jeova. Ol samting we God i mekem finis blong givhan long ol man we hem i jusumaot olgeta, i givim gudfala risen long yumi blong trastem ol promes blong hem. Ol man oli bin mekem i nogud tumas long ol trufala Kristin, oli bin traem blong kilimaot olgeta evriwan. (Jon 16:2; Ol Wok 8:1) Be, ol strongfala enemi ya blong ol man blong God tu, olsem Empera Nero blong Rom mo Adolf Hitler, oli no naf blong spolem ol man we oli holemstrong long God mo we oli karem nem blong hem. Jeova i sevem kongregesen blong ol man blong hem, mo yumi save sua se bambae hem i lukaot long kongregesen ya blong i stap olwe.

⁹ Long sem fasin, olgeta we oli stap tru long God mo we oli haf blong niufala wol, hemia grup blong ol trufala man blong wosip we bambae oli laef long niufala graon, wanwan long olgeta ya bambae oli stap gud olwe. Hemia from we oli mekem klin wosip i go long Man ya we i Wokem olgeta samting. Wosip ya i no wan wosip we oli mekem wan wantaem nomo, olsem we oli wantem. No gat. Loa blong God, we Moses i givim long Isrel, i talem long olgeta blong mekem sam spesel fasin blong wosip evri manis, olsem long taem blong niumun, mo evri wik, olsem long sabat dei. (Levitikas 24:5-9; Namba 10:10; 28:9, 10; 2 Kronikel 2:4) Taswe Aesea 66:23 i tokbaot wosip we i gohed oltaem, evri wik mo evri manis. Long taem ya, bambae i no moa gat ol man we oli no bilif long God wetem ol man blong skul we oli gat tu fes. “Ol man blong olgeta kantri long wol bambae oli kam mekem wosip long” Jeova.

10. ?From wanem yu save sua se i no gat rabis man blong spolem niufala wol?

¹⁰ Aesea 66:24 i talem klia se bambae i neva gat wan samting i spolem pis mo stret fasin blong niufala wol. Bambae i no gat rabis man blong spolem niufala wol ya. Tingbaot 2 Pita 3:7. Vas ya i talem se “dei we God bambae i jajem ol man we oli no obei long hem,” i stap klosap nomo. Olgeta we bambae oli lus oli ol man we oli no save ona long God. Ol man we oli no gat fol bambae oli no lus. Samting ya i defren olgeta long ol faet blong man, we oli kilim i ded moa man we oli no joen long faet i winim namba blong ol soldia. Bigfala Jaj i promes se long dei blong hem, ol man we bambae oli lus, hemia ol man we oli no ona long hem.

11. ?Aesea i soemaot se ol man we oli agensem God mo wosip blong hem bambae oli gat wanem kaen fiuja?

¹¹ Ol stret man we oli sef long taem ya bambae oli luk se profet tok blong God i tru. Vas 24 i talemaot se “ol dedbodi blong ol man ya we bifo oli girap, oli agens” long Jeova bambae oli stap olsem pruf blong jajmen blong hem. Maet ol klia tok ya we Aesea i yusum oli mekem sam man i sek. Be, samting ya i laenapgud wetem wanem we i hapen long histri bifo. Afsaed long ol stonwol blong Jerusalem bifo, i gat wan ples we ol man oli stap sakem doti long hem. Mo, wan wantaem, oli sakem dedbodi blong man tu i go long ples ya, hemia ol man we oli bin brekem loa mo i no stret blong berem olgeta.a Long ples ya, kwiktaem nomo ol wom mo faea bambae oli spolem ol doti mo ol dedbodi ya. Taswe pijatok we Aesea i yusum i soemaot klia se jajmen blong Jeova long ol man nogud i blong olwe.

Ol Samting We Hem i Promes Blong Mekem

12. ?Aesea i talem wanem moa long saed blong laef long niufala wol?

¹² Revelesen 21:4 i tokbaot sam samting we bambae i no moa gat long niufala fasin blong laef we i stap kam. Be, ?wanem ol samting we bambae oli stap long taem ya? ?Laef bambae i olsem wanem? ?I gat wan samting we yumi save trastem blong faenem ansa blong ol kwestin ya? Yes. Profet tok long Aesea japta 65 i tokbaot ol samting we bambae yumi harem gud long olgeta sipos Jeova i agri long yumi blong laef long taem ya we bambae hem i wokem niufala heven mo niufala wol. Olgeta we oli kasem blesing blong kam haf blong niufala wol ya blong olwe, bambae oli no kam olfala mo bambae oli no save ded. Aesea 65:20 (NW) i talem se: “Long ples ya, bambae i no moa gat ol smol pikinini we oli laef long sam dei nomo, nao oli ded, nogat. Mo tu bambae i no moa gat ol olfala we oli ded bifo we oli kasem olgeta dei blong laef blong olgeta. From we sipos wan man i ded long wan handred yia, be bambae hem i olsem smol pikinini nomo. Mo man we i mekem sin, nating se hem i kasem wan handred yia blong hem, be ol man bambae oli singaot trabol i kam long hem.”

13. ?Olsem wanem Aesea 65:20 i mekem yumi sua se ol man blong God bambae oli harem sef?

¹³ Taem profet tok i kamtru fastaem long ol manples blong Aesea, hem i minim se ol smol pikinini long kantri ya oli sefgud. I no gat ol enemi olsem ol man Babilon we oli kam blong karem ol smol pikinini oli go kalabus no we oli kam blong karemaot laef blong olgeta we oli yangfala yet. (2 Kronikel 36:17, 20) Long niufala wol we bambae i kam, ol man bambae oli sefgud, bambae oli rili haremgud long laef we oli gat. Sipos wan man i jusum blong rebel agensem God, bambae hem i no save gohed blong laef. God bambae i tekemaot hem. ?Be olsem wanem sipos sinman ya we i rebel i gat wan handred yia finis? Sipos yu skelem wetem laef foreva, bambae hem i ded “olsem smol pikinini nomo.”—1 Timoti 1:19, 20; 2 Timoti 2:16-19.

14, 15. Olsem toktok blong Aesea 65:21, 22, ?wanem samting we yu yu wantem tumas blong luk long fiuja?

¹⁴ Aesea i no gohed blong tokbaot olsem wanem God bambae i tekemaot wan sinman long taem ya. Be hem i tokbaot ol fasin blong laef we bambae i kam antap bigwan long niufala wol ya. Traem tingbaot sipos yu yu stap long taem ya. Ating faswan samting we yu luk long tingting blong yu, hemia ol samting we long laef blong yu, yu gat intres long olgeta. Aesea i tokbaot ol samting ya long vas 21 mo 22, se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. Ol man we bambae oli stap long ples ya, oli man blong mi we mi mi jusumaot olgeta finis, mo bambae oli save stap longtaem, olsem tri we i save stap longtaem. Ol samting we olgeta oli hadwok long hem, bambae oli save harem gud long hem longtaem.”

¹⁵ Sipos yu no save yet olsem wanem blong bildim haos no wokem garen, profet tok blong Aesea i soemaot se bambae yu gat jans blong lanem ol samting ya. Be, ?bambae yu yu glad blong letem ol man we oli gat save long saed ya oli tijim yu? Maet olgeta ya oli ol man we oli stap raonabaot long yu we oli gat kaen fasin mo we oli glad blong givhan long yu. Aesea i no talem sipos haos blong yu bambae i gat ol bigfala glas windo blong yu save lukluk i go afsaed long ol defren taem blong yia we weta i jenis. No hem i no talem tu sipos haos blong yu bambae i no gat glas long windo blong yu save harem gud long freswin. ?Bambae yu mekem plan blong bildim wan haos we ruf blong hem i sap, blong mekem se ren mo sno we i foldaon long ruf i save go stret long graon? No ?maet weta long ples blong yu i mekem se bambae yu wokem wan ruf we i flat—olsem ol haos long Medel Is? ?Maet yu wokem wan ruf we yu mo famle blong yu, yufala i save go antap long hem blong joen wanples blong kakae mo storian tugeta?—Dutronome 22:8; Nehemaea 8:16.

16. ?From wanem yu save tingbaot niufala wol olsem wan ples blong harem gud olwe?

¹⁶ Naoia, yumi no save ansa blong ol kwestin olsem. Be, impoten samting we yumi save long hem, hemia se bambae yumi wanwan i gat prapa haos blong yumi. Bambae haos ya i blong yu—i no olsem tede we maet yu hadwok blong bildim haos be wan narafala i laef long hem. Aesea 65:21 i talem tu se bambae yu planem sid long garen mo bambae yu kakae frut blong hem. Yes, tok ya i soemaot klia laef long taem ya. Bambae yu harem gud tumas from we yu kakae frut blong ol hadwok blong yu. Mo bambae yu save mekem samting ya long wan longfala laef—“olsem tri we i save stap longtaem.” !Hemia nao pija blong taem ya we “olgeta samting oli kam niuwan”!—Ol Sam 92:12-14.

17. ?Wanem promes we i leftemap tingting blong ol papa mama?

¹⁷ Sipos yu wan papa no wan mama, ol tok ya bambae oli kasem hat blong yu: “Ol wok we bambae oli stap mekem, bambae oli save go gud, mo bambae i no gat trabol i kasem ol pikinini blong olgeta. Mi bambae mi blesem olgeta, wetem ol pikinini blong olgeta we bambae oli stap kamaot biaen long olgeta, gogo i no save finis. Long taem ya, nating we oli no singaot long mi yet, be mi mi harem olgeta finis, mo nating we oli stap prea long mi yet, be mi mi mekem finis, olsem we oli talem.” (Aesea 65:23, 24) ?Yu yu harem soa finis from we “trabol i kasem ol pikinini” blong yu? Yumi save finis olgeta problem we maet oli kasem ol pikinini mo we oli mekem papa mama mo ol narafala tu oli harem nogud. Wan narafala samting we i joen long bisnes ya, hemia ol papa mama we oli bisi tumas long wok blong olgeta, ol pleplei, no narafala samting bakegen, mekem se oli no spenem inaf taem wetem pikinini blong olgeta. Defren olgeta, Jeova i talem se bambae hem i harem yumi mo i givim ol samting we yumi nidim, nating se yumi no askem hem yet blong mekem olsem.

18. ?From wanem bambae yu harem gud wetem ol anamol long niufala wol?

¹⁸ Taem yu stap tingbaot wanem we bambae yu harem gud long hem long graon ya we bambae i kam niuwan, traem pijarem wanem we profet tok blong God i talem: “ Long taem ya, wael dog wetem smol sipsip, bambae tufala i save kakae wanples, mo laeon bambae i save kakae gras olsem buluk nomo, mo rabis snek bambae i no moa save kakae man. Long Saeon ya, tabu hil blong mi, bambae i no moa gat man we i save mekem i no gud long narafala man, mo i no moa gat wan samting we i save spolem man. Mi mi Hae God, mo hemia tok blong mi.” (Aesea 65:25) Ol man oli traem blong pentem pija olsem, be vas ya i no jes tokbaot wan pija we i kamaot long tingting blong man nomo. Ol samting ya bambae oli rili kamtru. Bambae pis i stap long medel blong ol man mo ol anamol tu. Ol man we oli stadi long ol laef samting mo ol man we oli laekem ol anamol tu, oli spenem bighaf blong laef blong olgeta blong stadi long sam anamol, no long wan anamol nomo. Be nao, tingbaot ol samting we bambae yu save lanem taem ol anamol oli no moa fraet long man. Long taem ya, bambae yu save kam klosap long ol pijin, mo ol smosmol anamol we oli laef long bus—yes, bambae yu save lukluk olgeta, lan long olgeta, mo harem gud long kampani blong olgeta. (Job 12:7-9) Bambae i no gat denja, bambae yu sefgud wetem ol man mo ol anamol tu. Jeova i talem se: “Long Saeon ya, tabu hil blong mi, bambae i no moa gat man we i save mekem i nogud long narafala man, mo i no moa gat wan samting we i save spolem man.” !Hemia i defren olgeta long ol samting we yumi luk mo fesem tede!

19, 20. ?From wanem ol man blong God oli defren long bighaf blong ol man tede?

¹⁹ Olsem we yumi talem finis, nating se ol man oli wari long saed blong niufala mileniam, oli no naf blong talemaot stret wanem we bambae i hapen long fiuja. Samting ya i mekem se plante man oli harem nogud, tingting blong olgeta i fasfas, mo oli no moa gat hop. Peter Emberley, we hem i daerekta blong wan yunivesiti blong Kanada, i talem se: “Plante [bigman] oli stap tingbaot sam impoten kwestin long saed blong laef blong olgeta. ?Mi mi hu? ?Mi stap traehad long laef blong mi blong kasem wanem? ?Bambae mi livim wanem blong olgeta we bambae oli kam biaen long mi? Ol bigman ya oli traehad long ol medel yia blong olgeta blong faenem pis mo mining long laef blong olgeta.”

²⁰ Yumi kasem save from wanem plante man oli harem olsem. Maet oli traem harem gud long laef taem oli joen long ol kaen spot no tru long sam pleplei. Be, oli no save wanem bambae i hapen long fiuja, mo from samting ya laef blong olgeta i olsem nating nomo, i no gat pis, mo i no gat mining. Naoia traem skelem tingting blong olgeta ya wetem tingting we yu yu gat long saed blong laef, folem ol samting we yumi lanem finis. Yu save se long niufala heven mo niufala wol we Jeova i promes blong mekem, bambae yumi lukluk raonabaot long yumi mo yumi save talem wetem fulhat blong yumi se, ‘!I tru ya, God i mekem olgeta samting oli niuwan bakegen!’ !Bambae yumi harem gud long ol samting ya!

21. ?Wanem semfala poen we yumi faenem long Aesea 65:25 mo Aesea 11:9?

²¹ Yumi no stap mekem flas taem yumi traem tingbaot laef long niufala wol blong God. Hem i singaot yumi, yes i pulum yumi blong wosip long hem wetem trutok naoia, mo mekem yumi naf blong kasem laef long taem ya we ‘bambae i no moa gat man we i save mekem i nogud long narafala, mo i no moa gat wan samting we i save spolem man long tabu hil blong hem.’ (Aesea 65:25) Be, ?yu luksave se long wan vas bifo, Aesea i talem sem samting ya mo i ademap wan poen we i impoten tumas blong mekem se yumi save harem gud long niufala wol? Aesea 11:9 i talem se: “Long Saeon ya, tabu hil blong God, bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya [“wol,“ NW] bambae i fulap gud long ol man we oli save gud Hae God, olsem we solwota i fulap gud long ples blong hem.”

22. ?Stadi long saed blong ol fofala profet tok ya blong Baebol i mas mekem tingting blong yumi i strong moa blong mekem wanem?

²² “Save gud Hae God.” Yes, taem God i mekem olgeta samting oli kam niuwan bakegen, ol man long wol bambae oli gat stret save blong hem mo ol samting we hem i wantem yumi blong mekem. Samting ya i minim moa bitim we yumi stadi long ol anamol we God i wokem. Hem i minim se yumi mas stadi long Tok blong hem tu. Eksampel, tingbaot olgeta samting we yumi lanem long fofala profet tok ya long saed blong “niufala heven mo niufala wol.” (Aesea 65:17; 66:22; 2 Pita 3:13; Revelesen 21:1) Yumi gat gudfala risen blong ridim Baebol evri dei. ?Hemia wan haf blong program blong yu? Sipos no, ?yu save jenisim sam samting long laef blong yu, blong ridim wanem we God i talem evri dei? Bambae yu faenem se, yu no tingting nomo long taem ya we bambae yu harem gud long niufala wol, be bambae yu glad moa long laef blong yu naoia, olsem man ya blong raetem Sam.—Ol Sam 1:1, 2.

[Futnot]

?Bambae Yu Yu Ansa Olsem Wanem?

• ?Olsem wanem yumi save se Aesea 66:22-24 i tokbaot samting we bambae i mas kamtru yet?

• ?Wanem samting long Aesea 66:22-24 mo Aesea 65:20-25 we yu wantem tumas blong luk?

• ?Wanem ol risen we i mekem yu yu sua long fiuja blong yu?

[Tok blong pija long pej 15]

Aesea, Pita, mo Jon oli talemaot sam haf blong “niufala heven mo wan niufala wol”