Ol Samting We Profet Tok i Talem Se Bambae Oli Kamtru i No Longtaem

TAEM aposol Pita i tokbaot fiuja blong man mo fiuja blong wol, hem i talem se: “God i promes finis blong putum niufala [heven] mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.” (2 Pita 3:13) Faswan profet tok we i tokbaot “niufala heven mo niufala wol” i stap long buk blong Aesea. (Aesea 65:17; 66:22) Taem Pita i yusum profet tok ya, hem i soem se long taem blong hem, profet tok ya i no kamtru fulwan yet.

Sam yia biaen, long 96 K.T.,a buk blong Revelesen, we aposol Jon i raetem, i joenem “niufala wol” wetem ol blesing we bambae oli kamtru aninit long rul blong Kingdom blong God. (Revelesen 21:1-4) Tok blong Jisas mo aposol Pol long saed blong ol samting we bambae oli kamtru long wol ya jes bifo we Kingdom blong God i kam, oli stap kamtru naoia. Taswe, yumi save gat strong tingting se klosap nao, Kingdom ya bambae i mekem niufala wol i kamtru. ?Niufala wol ya bambae i olsem wanem? Buk blong Aesea long Baebol i talem samting ya long yumi.

Ol Blesing Blong Niufala Wol

Pis Long Fulwol Mo Ol Man Oli Joengud Long Trufala Wosip. “Long taem ya, ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.”—Aesea 2:2-4.

Ol Man Mo Ol Anamol Oli Stap Long Pis. “Wael dog mo pikinini blong sipsip bambae tufala i save stap wanples nomo, we tufala i fren gud. Bigfala puskat ya leped we i stap kakae nani, bambae i save go ledaon wetem pikinini blong nani, we tufala i save slip gud long wan yad nomo. Ol pikinini blong buluk mo ol pikinini blong laeon bambae oli stap kakae wanples nomo, mo smol pikinini nomo bambae i naf blong lukaot long olgeta. Ol kao mo ol bea bambae oli kakae wanples, mo ol pikinini blong olgeta bambae oli slip kwaet long wan yad nomo, mo laeon bambae i kakae gras nomo, olsem buluk. . . . Long . . . tabu hil blong Hae God, bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.”—Aesea 11:6-9.

Plante Kakae Blong Evri Man. “[Jeova] i gat olgeta paoa, mo long tabu hil ya Saeon, hem bambae i mekemrere wan bigfala lafet blong yumi, we bambae i singaot ol man blong ol narafala kantri long wol blong oli kam joen. Long lafet ya, bambae yumi kakae ol nambawan kakae, mo yumi dring ol waen we i beswan.”—Aesea 25:6.

I No Moa Gat Ded. “Hem [God] bambae i mekem we ded bambae i go lus olgeta. Bambae hem i ravemaot wota blong ae blong yufala, mo bambae i tekemaot sem we yufala evriwan i stap kasem. Hem i Hae God, mo hemia tok blong hem.”—Aesea 25:8.

Ol Dedman Oli Laef Bakegen. “Ol man blong yumi we oli ded, oli stap slip long beregraon, bambae oli laef bakegen. . . . Bambae oli girap, oli laef bakegen. Olgeta ya bambae oli wekap, oli glad, oli stap singsing. . . . Hae God bambae i mekem olgeta ya oli laef bakegen.”—Aesea 26:19.

Mesaea i Jajem Man Wetem Stretfasin. “Sipos hem i jajem man, bambae hem i no save luk long ol samting ya nomo we ol man oli save luk long ae blong olgeta, bambae hem i no save tingbaot ol samting ya nomo we ol man oli stap talem long hem. Bambae hem i stretem bisnes blong ol man we trabol i kasem olgeta, mo bambae i mekem long fasin we i stret olgeta. Bambae hem i mekem rod blong ol puaman oli save kasem ol samting we oli gat raet blong kasem.”—Aesea 11:3, 4.

Olgeta We Oli Blaen Mo Olgeta We Sora Blong Olgeta i Fas, Oli Kamgud Bakegen. “Ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen.”—Aesea 35:5.

Ol Flaoa Bambae Oli Gru Long Draeples. “Draeples bambae i harem gud, i glad. Ples we ol samting i no save gru long hem, ol flaoa bambae oli stap gru long hem. Draeples bambae i glad, i singsing, bambae hem i glad tumas, we i stap singaot bigwan from.”—Aesea 35:1, 2.

Wan Niufala Wol. “Bambae mi mi mekem niufala heven [wan niufala gavman long heven] mo niufala wol [wan niufala grup blong stret man long wol] . . . Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta. Bambae yufala i glad tumas long ol niufala samting ya we bambae mi mi mekem, mo bambae yufala i harem gud, gogo i no save finis. . . . Man we i wokem haos blong hem [long niufala wol we God i promes], hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. Ol man we bambae oli stap long ples ya, oli man blong mi we mi mi jusumaot olgeta finis, mo bambae oli save stap longtaem, olsem tri we i save stap longtaem. Ol samting we olgeta oli hadwok long hem, bambae oli save harem gud long hem longtaem. Ol wok we bambae oli stap mekem, bambae oli save go gud, mo bambae i no gat trabol i kasem ol pikinini blong olgeta. Mi bambae mi blesem olgeta, wetem ol pikinini blong olgeta we bambae oli stap kamaot biaen long olgeta, gogo i no save finis. Long taem ya, nating we oli no singaot long mi yet, be mi mi harem olgeta finis, mo nating we oli stap prea long mi yet, be mi mi mekem finis, olsem we oli talem.” “Taem we bambae mi mekem niufala heven mo niufala wol, bambae mi mi holem tufala i stap gud olwe long paoa blong mi. Mo long sem fasin, nem blong yufala wetem ol pikinini we bambae oli stap kamaot biaen long yufala, bambae mi mi holem olgeta oli stap gud olwe.”—Aesea 65:17-25; 66:22.

Profet Tok Long Saed Blong Nambawan Fiuja

I no buk blong Aesea nomo we i talemaot ol blesing blong fiuja. Baebol i fulap long ol profet tok we oli tokbaot ol nambawan samting we God bambae i mekem tru long Kingdom blong hem we i stap long han blong Kraes.b ?Olsem wanem? ?Yu yu wantem gat wan gudfala laef olsem long paradaes? !Yu yu save gat laef olsem! I gud we yu wan yu faenemaot se Baebol i tijim wanem long saed blong ol gudfala samting we God i wantem mekem long fiuja, mo yu lanem olsem wanem yu yu save kasem ol gudfala samting ya. Ol Witnes blong Jeova bambae oli glad blong givhan long yu.

[Ol futnot]

[Tok blong pija long pej 8]

Ol man bambae oli gat pis wetem ol narafala man mo wetem ol anamol

[Tok blong pija long pej 9]

Ol dedman bambae oli laef bakegen

[Tok blong pija long pej 10]

Fulwol bambae i kam wan paradaes