“Mi Bambae Mi Stap Wetem Yufala”

“Profet i talemaot bakegen . . . we Hae God i talem se, ‘Mi bambae mi stap wetem yufala.’ ”​—HAGAE 1:13.

 1. ?Jisas i tokbaot wanem tufala samting we i sem mak long taem blong yumi?

YUMI stap laef long wan taem we i impoten tumas. Ol profet tok blong Baebol oli soemaot se stat long 1914 finis i kam, yumi stap long “dei ya blong Masta.” (Revelesen 1:10) Maet yumi gat save finis long saed blong ol profet tok ya. Ale, from samting ya maet yumi save we Jisas i bin talem se ‘taem ya we Pikinini blong Man i kamtru’ long paoa blong Kingdom bambae i sem mak olsem “taem blong Noa bifo” mo “taem blong Lot.” (Luk 17:​26, 28) Ol tok ya blong Baebol oli soemaot se ol samting we oli bin hapen long taem blong Noa mo Lot oli olsem profet tok blong ol samting we bambae oli hapen long taem blong yumi. Be i gat wan narafala stori we i olsem wan profet tok blong yumi mo i gud tu blong tinghevi long stori ya.

 2. ?Jeova i givim wanem wok long Hagae mo Sekaraea?

² Naoia bambae yumi tokbaot samting we i hapen long taem blong profet Hagae mo profet Sekaraea. Tufala ya i man Isrel. ?Wanem mesej we tufala profet ya tufala i talemaot we i stret blong ol man blong Jeova tede? Hagae mo Sekaraea tufala i man blong karem tok blong Jeova i go long ol man Jiu afta we ol man Jiu ya oli aot long Babilon, oli gofri. Tufala i mas talemaot long ol man Isrel se God i stap wetem olgeta long wok ya blong bildim bak tempol. (Hagae 1:13; Sekaraea 4:​8, 9) Nating se buk blong Hagae mo buk blong Sekaraea i smol nomo, be oli haf blong “olgeta tok blong Baebol [we] oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.”​—2 Timoti 3:16.

Tinghevi Long Tok Blong Tufala Profet Ya

3, 4. ?From wanem yumi intres long ol tok blong Hagae mo Sekaraea?

³ I sua se toktok we Hagae mo Sekaraea tufala i talem long taem blong tufala i bin givhan long ol man Jiu, mo i sua tu se profet tok we tufala i talemaot i kamtru. ?Olsem wanem yumi save se tufala buk ya tufala i impoten long yumi tede? Yumi faenem samting ya long Hibrus 12:​26-29. Long vas ya aposol Pol i yusum bakegen ol tok we i stap long Hagae 2:​6, we i talem se God i stap ‘mekem heven mo wol ya i seksek.’ God i stap seksekem ol samting ya gogo ‘olgeta kantri we oli gat king blong olgeta, bambae hem i spolem olgeta evriwan, mo bambae i finisim paoa blong olgeta.’​—Hagae 2:22.

⁴ Pol i yusum bakegen ol tok blong Hagae taem i tokbaot samting we bambae i hapen long ‘ol king blong olgeta kantri’ ya. Mo hem i tokbaot Kingdom ya we i no save lus, we ol tabu Kristin bambae oli kasem. (Hibrus 12:28) Ol tok ya blong Pol oli soemaot se ol profet tok blong Hagae mo Sekaraea oli tokbaot samting we bambae i kamtru long fiuja, mo ol toktok ya oli no kamtru yet long taem ya we Pol i raetem buk blong Hibrus long faswan handred yia. Tede long wol, i gat wan smol grup blong ol tabu Kristin we i stap yet, we olgeta ya bambae oli go long Kingdom blong Mesaea, wetem Jisas. Taswe ol tok blong Hagae mo Sekaraea oli stret long taem blong yumi.

5, 6. ?Wanem ol samting we oli hapen bifo we God i sanem Hagae mo Sekaraea?

⁵ Buk blong Esra i givim sam save long saed blong sam samting we oli hapen bifo we Hagae mo Sekaraea tufala i raetem buk blong tufala. Afta we ol man Jiu oli kam fri long Babilon long 537 B.K.T.,a Hed Gavman Serubabel mo Hae Pris Josua (nara nem blong hem Jesua) tufala i lidim wok blong wokem fandesen blong niufala tempol long 536 B.K.T. (Esra 3:​8-13; 5:1) Hemia wan samting we i mekem ol man Jiu oli glad bigwan, be i no longtaem oli fraet. Esra 4:4 i talem se sam man oli stap agensem olgeta, “ol enemi ya blong olgeta oli stap traem blong mekem tingting blong olgeta i foldaon, mo blong mekem olgeta oli fraet, blong oli no moa wokem haos ya.” Ol enemi ya, we plante long olgeta hemia ol man Sameria, oli talem sam giaman tok agensem ol man Jiu. Ol giaman toktok ya blong olgeta i pulum tingting blong king blong Pesia blong i blokem wok blong bildim tempol.​—Esra 4:​10-21.

⁶ Strongfala tingting we ol man Jiu oli bin gat blong bildim tempol i godaon. Ale oli gobak long prapa bisnes blong olgeta wanwan. Be long 520 B.K.T., hemia 16 yia afta we oli putum fandesen blong tempol, Jeova i sanem Hagae mo Sekaraea blong pulum ol man Jiu oli stat wok long tempol bakegen. (Hagae 1:1; Sekaraea 1:1) Toktok blong tufala man ya, we i klia nomo se God nao i sanem tufala, i pulum ol man Jiu blong oli wok bakegen long haos tempol, ale oli finisim haos ya long 515 B.K.T.​—Esra 6:​14, 15.

 7. ?Olsem wanem ol samting long taem blong ol profet bifo i sem mak long tede?

⁷ ?Yu yu luksave olsem wanem ol samting ya oli laenap wetem yumi tede? Wok blong yumi i blong talemaot “gud nius ya blong Kingdom.” (Matiu 24:​14, NW ) Yumi stat wok strong moa long wok ya afta long Wol Wo Wan. Ol man blong Jeova oli fri long Bigfala Babilon, hemia ol giaman skul blong wol, olsem we ol man Jiu bifo oli bin gofri long kalabus long Babilon. Ol tabu man blong God oli putum save mo paoa blong olgeta i go long wok blong prij, tijim man, mo lidim olgeta i kam long trufala wosip. Wok ya i stap gohed yet tede, mo i kam antap bigwan, maet yu tu yu stap joen long wok ya. !Naoia i taem blong mekem wok ya, from we i no longtaem bambae rabis wol ya i lus olgeta! Wok ya we God i putum long han blong yumi i mas gohed gogo kasem taem we Jeova i kam stretem ol bisnes blong man, hemia long taem blong “bigfala trabol.” (Matiu 24:21) Samting ya bambae i finisim rabis fasin mo letem trufala wosip i fulumap wol ya.

 8. ?Wanem i mekem yumi sua se God i stap sapotem wok blong yumi?

⁸ Olsem ol profet tok blong Hagae mo Sekaraea oli soemaot, yumi save sua se bambae Jeova i sapotem mo i blesem yumi taem yumi joen fulwan long wok blong hem. Nating se sam man oli traehad blong spolem ol man blong God no stopem wok we oli mas mekem, i no gat wan gavman yet we i naf blong blokem fulwan wok blong talemaot gud nius. Tingbaot olsem wanem Jeova i blesem ol wok blong Kingdom long ol yia biaen long Wol Wo Wan kam kasem tede. Be i gat plante wok yet blong mekem.

 9. ?Wanem samting we i hapen bifo, we i gud yumi tingbaot, mo from wanem?

⁹ ?Olsem wanem buk blong Hagae mo Sekaraea i save pulum yumi blong yumi wantem moa blong obei long oda we God i givim blong prij mo tijim man? Ale, i gud yumi tokbaot sam lesen we yumi lanem long tufala buk ya blong Baebol. Tingbaot sam samting we oli hapen long taem ya we ol man Jiu oli gobak long ples blong olgeta nao oli mas bildim tempol bakegen. Olsem yumi tokbaot finis, ol man Jiu we oli aot long Babilon blong go stap long Jerusalem oli no gohed strong long wok blong bildim tempol. Afta we oli putum fandesen finis, oli kam slak long wok ya. ?Wanem rong tingting we i kasem olgeta? ?Mo stori blong olgeta i save tijim yumi long wanem samting?

Gat Tingting We i Stret

10. ?Wanem kaen tingting ol man Jiu oli gat mo wanem frut i kamaot from?

¹⁰ Ol man Jiu ya we oli kam stap long Jerusalem bakegen, oli stap talem se: “I no taem yet.” (Hagae 1:2) Taem ol man Jiu oli stat bildim tempol bakegen, mo oli putum fandesen blong hem long 536 B.K.T., oli no stap talem tok ya se “i no taem yet.” Be sloslo taem ol man raonabaot oli stat agensem olgeta mo oli pulum ol man blong gavman tu blong lukluk long bisnes ya, ale tingting blong ol man Jiu i stap jenis. Oli stat tingting moa long prapa haos blong olgeta mo prapa laef blong olgeta blong harem gud. Jeova i luk se oli wokemgud ol haos blong olgeta long beswan wud, be haos blong hem i stap we i no finis nating, nao hem i askem se: “?From wanem yufala i stap slip long ol gudgudfala haos, be haos blong mi i stap we i nogud yet?”​—Hagae 1:4.

11. ?From wanem Jeova i mas tok long ol man Jiu long taem blong Hagae?

¹¹ Yes, tingting blong ol man Jiu i jenis. Samting we fastaem i moa impoten, hemia plan blong Jeova blong wokem tempol bakegen. Be naoia, ol man Jiu oli putum narafala samting fastaem, hemia prapa laef mo haos blong olgeta. Oli no moa tingbaot wok long haos wosip blong God. Taswe tok blong Jeova long Hagae 1:5 (NW ) i leftemap tingting blong ol man Jiu se oli mas “putum hat blong olgeta long ol rod blong olgeta.” Jeova i wantem talem long olgeta se oli mas stop long ol fasin ya mo tingting dip long samting we oli stap mekem mo oli mas tingbaot olsem wanem fasin ya blong no putum wok blong tempol fastaem i save spolem olgeta.

12, 13. ?Hagae 1:6 i tokbaot laef blong ol man Jiu se i olsem wanem, mo vas ya i minim wanem?

¹² Ating yu save finis se, from we ol man Jiu oli putum samting we i no rili impoten i stap fasples long laef blong olgeta, fasin ya i spolem olgeta. Ridim tingting blong God long saed ya, long Hagae 1:6: “Yufala i stap planem plante kakae long ol garen blong yufala, be smol kakae nomo i stap kamaot long hem. Yufala i stap kakae, be kakae ya i no naf long yufala. Yufala i stap dring waen, be waen ya tu i no naf blong mekem yufala i harem gud long hem. Yufala i gat klos blong yufala, be ol klos ya i no naf blong mekem yufala i wom. Mo man blong wok i stap wok had blong kasem mane, be mane ya we i stap kasem i no naf blong holem hem, from we oltaem nomo poket i stap brok.”

¹³ Ol man Jiu oli stap long graon we God i givim long olgeta, be graon ya i no stap karem ol kakae olsem we oli wantem. Jeova i stap holembak blesing blong hem, olsem we hem i bin talem se bambae hem i mekem sipos oli no obei. (Dutronome 28:​38-48) From we Jeova i no blesem olgeta, ol man Jiu oli save sakem hamas sid be kakae we oli kasem long garen hem i smol nomo mo i no naf blong fidim gud olgeta. From we Jeova i no blesem olgeta, oli no gat gudfala klos blong putum we i blokem bodi blong olgeta long kolkol. Mo tu taem oli winim mane, mane ya i no naf nating blong givhan long olgeta, i olsem we oli stap putum mane ya long wan poket we i gat plante hol long hem. ?Olsem wanem long tok ya: “Yufala i stap dring waen, be waen ya tu i no naf blong mekem yufala i harem gud long hem”? Hemia i no minim se fasin blong drong i wan blesing blong God. God i putum tabu long fasin blong drong. (1 Samuel 25:36; Ol Proveb 23:​29-35) Defren nao, tok ya i blong soemaot nomo wan narafala samting we God i no blesem. Sipos ol man Jiu oli wokem waen, be waen ya bambae i sot nomo bambae i no plante inaf blong man i dring gogo i lusum hed.

14, 15. ?Wanem lesen we yumi lanem long ol tok blong Hagae 1:6?

¹⁴ Ol save ya long saed blong ol man Jiu i no blong tijim yumi olsem wanem blong flasem haos blong yumi. Nogat. Longtaem bifo we ol man Jiu oli go kalabus, profet Amos i bin tok finis agensem ol rijman long Isrel we oli stap wokem ‘ol bigbigfala haos we oli flasem long tut blong elefen’ mo ‘ol bed ya we oli flasemgud long tut blong elefen.’ (Amos 3:15; 6:4) Ol haos ya we oli wokem i naes, oli no save stap longtaem, mo ol samting we oli putum insaed long ol haos ya blong flasem, olgeta tu oli no stap longtaem. Taem ol man Babilon oli kam, oli spolem olgeta samting ya evriwan. Be, samting ya i no naf yet blong tijim ol man blong God. Afta we oli bin kalabus 70 yia long Babilon, oli kambak long ples blong olgeta mo oli mekem sem mastik bakegen. ?Olsem wanem long yumi? I gud yumi askem long yumi wan se: ‘?Olsem wanem? ?Mi mi tingting tumas long haos blong mi mo ol samting we mi save putum long hem blong flasem? ?Mi mi wantem skul moa blong kamgud long wan wok, be maet samting ya bambae i tekem plante yia mo i blokem mi blong putum ol impoten samting long saed blong spirit fasples?’​—Luk 12:​20, 21; 1 Timoti 6:​17-19.

¹⁵ Samting we yumi ridim long Hagae 1:6 i mas mekem yumi luksave se yumi nidim blesing blong God long laef blong yumi. Ol man Jiu oli no gat blesing blong God mo, from samting ya, oli harem nogud. Maet yumi gat plante samting blong bodi no maet yumi gat smol nomo, be sipos yumi no kasem blesing blong Jeova, hemia i min se maet yumi lusum fasin fren blong yumi wetem God. (Matiu 25:​34-40; 2 Korin 9:​8-12) ?Be olsem wanem blong kasem blesing blong Jeova?

Jeova i Yusum Tabu Spirit Blong Halpem Yumi

16-18. ?Wanem mining blong ol tok blong Sekaraea 4:6 long taem blong ol man Jiu?

¹⁶ Sekaraea we i mekem wok blong profet long taem blong Hagae i tokbaot olsem wanem Jeova i givim strong tingting long ol man blong hem mo i blesem olgeta. Mo samting ya i soem olsem wanem bambae hem i blesem yu tu. Yumi ridim tok blong hem se: “[Jeova] i talem long hem se, . . . ‘Bambae yu yu win, be i no long paoa blong ol soldia blong yu, mo i no long paoa blong yu. Bambae yu win long paoa blong Spirit blong mi nomo.” (Sekaraea 4:6) Ating yu harem ol tok blong vas ya plante taem. ?Be ol tok ya oli mekem wanem long ol man Jiu long taem blong Hagae mo Sekaraea? ?Mo oli save givhan long yumi olsem wanem?

¹⁷ Toktok we tabu spirit i putum long maot blong Hagae mo Sekaraea oli karem gudfala frut long laef blong ol man long taem ya. Samting we tufala profet ya tufala i talem i givim paoa bakegen long ol man Jiu we oli gat bilif. Hagae i stat mekem wok blong profet long namba sikis manis blong yia 520 B.K.T. Sekaraea i stat mekem wok blong profet long namba eit manis blong semfala yia ya. (Sekaraea 1:1) Nao taem yumi ridim Hagae 2:​18, yumi luksave se ol man Jiu oli statem wok blong bildim tempol bakegen wetem fulhat blong olgeta long namba naen manis blong yia ya. Yes, toktok we ol man Jiu oli harem i pusum olgeta blong tekem aksin, mo oli obei long Jeova from we oli trastem se bambae hem i halpem olgeta. Taswe ol tok we oli stap long Sekaraea 4:6 oli blong soemaot se God i stap biaen long ol man blong hem.

¹⁸ Taem ol man Jiu oli gobak long hom blong olgeta long 537 B.K.T., oli no gat ol strong man blong faet. Be Jeova i protektem olgeta mo i lidim olgeta long trip ya aot long Babilon kam kasem Jerusalem. Mo tabu spirit blong hem i lidim ol man Jiu blong stat wokem tempol smoltaem afta we oli kasem ples blong olgeta. Taswe, naoia we ol man Jiu oli stat wok bakegen wetem fulhat blong olgeta, bambae Jeova i yusum tabu spirit blong hem blong halpem olgeta.

19. ?Spirit blong God i winim wanem strong paoa we i stap traem blokem ol man Jiu?

¹⁹ Sekaraea i luk eit vison, we long eit vison ya Jeova i promes se bambae hem i stap wetem ol man blong hem, nao from samting ya bambae ol man Jiu oli wok gogo oli finisim tempol. Namba fo vison we i stap long japta 3, i soem se Setan i traehad blong agensem wok blong ol man Jiu blong bildim tempol. (Sekaraea 3:1) Setan bambae i no glad nating blong luk se Hae Pris Josua i mekem ol wok insaed long niufala haos tempol blong givhan long ol man Jiu. Nating se Setan i stap bisi blong traem blokem ol man Jiu blong bildim tempol, spirit blong Jeova bambae i karemaot ol samting ya we i save blokem olgeta mo bambae i givim paoa long ol man Jiu blong oli gohed long wok ya gogo oli finisim.

20. ?Olsem wanem tabu spirit i halpem ol man Jiu blong obei long oda we God i givim blong bildim tempol?

²⁰ Ol man blong gavman oli bin win, nao oli putum tabu long wok blong ol man Jiu. Fasin agens blong ol man ya i luk olsem wan bigfala hil we bambae i no save muf. Be, Jeova i promes se samting ya we i luk olsem wan “bigfala hil” bambae i “lus nomo“ i kam level ples. (Sekaraea 4:7) !Ol samting oli kamaot stret olsem we Jeova i talem! King Darias 1 i faenem hanraet we Sirus i bin raetem we i givim raet long ol man Jiu blong bildim haos tempol bakegen. Ale, Darias i kanselem tabu we i stap long wok blong ol man Jiu nao hem i sanem mane i go long ol man Jiu ya blong pem ol samting we oli nidim blong gohed long wok ya. Wantaem nomo ol samting oli jenis bakegen. ?Olsem wanem? ?Spirit blong God i lidim bisnes ya? Yes yumi sua long samting ya. Tempol i finis long 515 B.K.T., long namba sikis yia we Darias 1 i king.​— Esra 6:​1, 15.

21. (a) ?Long taem bifo, olsem wanem God i seksekem ‘ol kantri,’ mo olsem wanem “ol gudgudfala samting” oli kamaot? (b) ?Olsem wanem profet tok ya i kamtru long taem blong yumi?

²¹ Long Hagae 2:​5, profet i mekem ol man Jiu oli tingbaot bakegen kontrak ya we God i bin mekem wetem olgeta long Hil ya Sinae taem “bigfala hil ya i stap seksek tumas.” (Eksodas 19:18) Long taem blong Hagae mo Sekaraea, bambae Jeova i mekem sam samting oli seksek bakegen, hemia pijatok we Hagae i tokbaot long japta 2 vas 6 mo 7. Gavman blong ol man Pesia bambae i lusum paoa blong hem, be wok blong tempol bambae i gohed gogo kasem we i finis. Ol man we oli no man Jiu bambae oli kam, olsem ‘ol gudgudfala samting blong narafala kantri,’ nao bambae oli presem God wetem ol man Jiu long haos tempol blong olgeta. Tede tu, God i seksekem ‘ol kantri’ taem i sanem yumi, yumi go prij. Nao ol “gudgudfala samting blong olgeta” oli kamaot, oli kam wosipim God wetem smol grup blong ol Kristin we tabu spirit i makemaot olgeta. Yes, ol tabu Kristin ya wetem ol narafala sipsip oli stap fulumap haos blong Jeova wetem glori. Olgeta ya we oli wosipim God long fasin we i tru, oli bilif fulwan se i gat taem i stap kam we bambae Jeova i mas ‘mekem heven mo wol ya i seksek’ long wan fasin we i defren. Bambae hem i mekem samting ya blong sakemaot mo finisim fulwan olgeta kingdom gavman blong ol kantri long wol.​—Hagae 2:22.

22. ?Wanem nao i stap ‘seksekem’ ol neson, mo wanem i kamaot from? ?Mo wanem samting yet we bambae i mas kamtru?

²² Tru ya i gat defdefren grup no ogenaesesen we ‘heven mo wol mo solwota’ i pija blong olgeta, we oli stap seksek. Wan long olgeta ya hemia Devel Setan mo ol rabis enjel blong hem, taem we Jisas i sakemaot hem mo ol enjel ya oli aot long heven oli kamdaon long wol. (Revelesen 12:​7-12) Antap long hemia, wok blong prij we ol tabu Kristin oli stap lidim i stap seksekem wol ya we i minim fasin blong laef blong ol man tede. (Revelesen 11:18) Nating se i olsem, wan “bigfala kampani blong man” we oli olsem ol gudgudfala samting blong narafala kantri, oli kam joen wetem Isrel long saed blong spirit, nao olgeta evriwan oli wosipim Jeova wanples. (Revelesen 7:​9, 10, NW ) Bigfala kampani ya i wok tugeta wetem ol tabu Kristin, blong talemaot gud nius ya se i no longtaem bambae God i seksekem ol neson long Amagedon. Afta long taem ya, trufala wosip bambae i kasem mak blong hem we i fulumap wol.

[Futnot]

?Yu Yu Tingbaot?

• ?Wetaem Hagae mo Sekaraea tufala i mekem wok blong profet mo laef i olsem wanem long taem ya?

• ?Olsem wanem yu save mekem tok we yu kasem long Hagae mo Sekaraea i wok?

• ?From wanem yu ting se Sekaraea 4:6 i leftemap tingting?

[Tok blong pija long pej 7]

Buk blong Hagae mo Sekaraea i mekem yumi sua se God i stap wetem yumi

[Tok blong pija long pej 9]

“?From wanem yufala i stap slip long ol gudgudfala haos, be haos blong mi i stap we i nogud yet?”

[Tok blong pija long pej 10]

Ol man blong Jeova oli go lukaotem ‘ol gudgudfala man long olgeta narafala kantri’