Japta 32

?Oli Gat Raet Blong Mekem Wanem Long Sabat Dei?

LONG wan narafala Sabat dei bakegen, Jisas i go insaed long wan haos prea kolosap long bigfala lugun blong Galili. Nao i gat wan man i stap long ples ya, we hem i no save stretem raet han blong hem. Nao ol tija blong Loa mo ol Farisi oli stap wajem Jisas blong traem faenem sam poen long hem. Oli wantem luk sipos hem i mekem man ya i gud bakegen long Sabat dei, no i no save mekem olsem. Olgeta oli askem long Jisas, se: “?Olsem wanem? ?I stret blong yumi mekem bodi blong man i gud bakegen long Sabat dei, no i no stret long Loa olsem?”

Ol lida blong skul blong ol man Jyu oli bilif se sipos man i sik tumas we hem i save ded, i oraet blong mekem hem i gud bakegen long Sabat dei. Be sipos hem i brekem wan bun nomo no hem i kasem smol kil nomo, oli bilif se i no stret blong mekem hem i kamgud bakegen long Sabat dei. Oli talem se samting ya i brekem Loa. Ale, ol tija blong Loa mo ol Farisi ya oli askem kwestin ya long Jisas blong traem faenem poen long hem nomo.

Be Jisas i save tingting blong olgeta. Mo tu, hem i luksave se tingting blong olgeta long saed blong ol wok we man i save mekem long Sabat dei i no laenap wetem Baebol. Tingting blong olgeta i strong tumas. Taswe Jisas i mekem wan bigfala samting stret long fes blong olgeta. Hem i talem long man ya we i no save stretem han blong hem, i se: “Yu kam stanap ia long medel.”

Nao Jisas i tok long ol tija blong Loa mo ol Farisi, i se: “?Sipos man i gat wan sipsip nomo blong hem, nao sipsip ya i foldaon long hol long Sabat dei, yu ting se man ya i no save go pulum sipsip ya i kam antap bakegen? ?Hu long yufala i save mekem olsem?” Tru ya, wan sipsip i wan sas samting. Taswe oli no save livim hem i stap wan fuldei long hol, from we hem i save kam sik, mo hem i save ded from. Mo tu Baebol i talem se: “Stret man i stap lukaotgud long ol anamol blong hem.”

Nao Jisas i soemaot we pija tok ya i stret long man ya, i se: “Be man i gud moa, i winim sipsip. From samting ya i stret nomo long Loa, blong yumi mekem ol wok blong givhan long Sabat dei.” Ol lida blong skul blong ol man Jyu oli no save talem wan samting. Oli stap kwaet nomo, from we tok blong Jisas i stret nomo, mo hem i sore long man ya.

Nao Jisas i lukraon long olgeta, i kros long olgeta. Hem i harem nogud from we hed blong olgeta i strong tumas. Ale hem i talem long man ya, i se: “Yu stretem han blong yu.” Man ya i stretem han blong hem, nao han blong hem i kamgud bakegen.

Be ol Farisi oli no glad we han blong man ya i kamgud bakegen. Oli go afsaed, oli go mekem kampani wetem olgeta we oli biaen long Herod. Nao oli stap tokrere blong traem faenem rod blong kilim Jisas. Insaed long politik-­pati ya blong Herod i gat sam memba blong skul blong ol Sadusi. Long ol narafala samting, politik-­pati ya i agensem ol Farisi. Be long saed blong bisnes ya blong kilim Jisas i ded, olgeta oli gat wan tingting nomo. Matyu 12:9-14; Mak 3:1-6; Luk 6:6-11; Proveb 12:10; Eksodas 20:8-10.

▪ ?Jisas i mekem wanem bigfala samting, stret long fes blong ol lida blong skul blong ol man Jyu?

▪ ?Wanem bilif blong ol lida ya long saed blong fasin blong mekem sikman i kamgud bakegen long Sabat dei?

▪ ?Jisas i yusum wanem pija tok blong ansa long ol rong tingting blong olgeta?