Japta 42

Jisas i Tok Strong Long Ol Farisi

JISAS i jes talem long ol Farisi se sipos hem i ronemaot ol devel from paoa blong Setan, hemia i min se Setan nomo i agens long hem wan. Nao hem i gohed i se: “Sipos tri i gud, bambae frut blong hem i gud. Be sipos tri i nogud, bambae frut blong hem i nogud. Yufala i save makem tri long frut blong hem.”

Gudfala frut we i kamaot long wok blong Jisas taem hem i ronemaot ol devel i no save kamaot from Setan. I krangke nomo blong talem olsem. Sipos frut blong wan tri i gud, tri ya i mas gud tu. Be rabis frut blong ol Farisi, we oli tok nogud long Jisas mo oli agens long hem, i pruvum se olgeta oli nogud nomo. Taswe Jisas i talem long olgeta se: “!Yufala i olsem snek, yufala i man blong mekem trik! !Yufala i man nogud! ?Bambae yufala i save tok gud olsem wanem? From we taem man i tok, hem i stap talemaot ol samting we tingting blong hem i fulap long hem.”

Ol samting we oli kamaot long maot blong yumi oli soemaot wanem i stap long hat blong yumi. Taswe God i save jajem yumi long ol samting we yumi stap talem. Jisas i talem se: “Mi mi talem long yufala, long Lasdei ya we God bambae i jajem olgeta man, ol man oli mas talemaot long hem, from wanem oli bin talem ol tok olbaot. From we God bambae i save jajem yufala long ol tok blong yufala, blong makem yufala, se yufala i stret man, no yufala i mas panis.”

Nating we Jisas i mekem plante merikel finis, be ol tija blong Loa mo ol Farisi oli talem se: “Tija, mifala i wantem blong yu yu mekem wan saen blong mifala i luk paoa blong yu.” Maet olgeta ya we oli jes kam long Jerusalem oli no bin luk sam merikel blong Jisas. Be oli save se Jisas i mekem ol merikel ya from we oli harem nyus long ol man we oli luk ol gudfala wok blong hem. Taswe Jisas i talem long ol lida blong Isrel i se: “Yufala man blong naoia, yufala i wantem luk saen. Be yufala i man nogud, yufala i stap mekem i krangke long God, olsem woman we i stap mekem i krangke long man blong hem. Bambae yufala i no gat saen. Saen blong profet Jona bifo, hemia nomo God i save givim long yufala.”

Nao Jisas i eksplenem mining blong ol tok ya blong hem, i se: “Olsem we Jona i stap tri dei mo tri naet long bel blong bigfala fis, ale, long sem fasin, mi mi Pikinini blong Man, bambae mi stap tri dei mo tri naet insaed long graon.” Taem bigfala fis i solemdaon Jona, hem i stap tri dei insaed long bel blong fis ya. Taem hem i kamaot long bel blong hem, i olsem we hem i kamaot long beregraon. Ale, Jisas i talem long olgeta se hem tu bambae i ded, mo tri dei biaen, bambae hem i girap bakegen. Be ol lida blong Isrel oli no wantem luksave “saen blong profet Jona.” Mo taem Jisas i laef bakegen long ded, olgeta oli no wantem luksave yet.

Ale, Jisas i talem se ol man Nineve bifo, oli tanem tingting blong olgeta from sin blong olgeta. Taswe olgeta oli save stanap, taem God bambae i jajem ol man, nao oli save talemaot poen long ol man Isrel we oli sakem Jisas. Mo tu, hem i yusum eksampel blong kwin blong Siba. Hem i aot long narasaed wol, i wokbaot i kam blong harem waes tok blong king Solomon bifo. Mo hem i sapraes tumas long samting we hem i luk i mo harem. Jisas i talem long olgeta se: “Be yufala i luk, mi mi waes moa long Solomon.”

Nao Jisas i storebaot wan man we devel i goaot long hem. Be biaen, ples ya we devel i aot long hem, hem i stap emti, from we man ya i no fulumap ol gudfala samting long hem wan. Ale devel ya i tekem seven narafala devel we oli nogud moa long hem oli kam wetem hem, nao oli gobak insaed long man ya. Ale, laef blong man ya i kam moa nogud bitim bifo. Jisas i talem se: “Fasin ya bambae i kamtru long laef blong ol man blong naoia tu we oli stap mekem i nogud.” Nesen blong ol man Isrel oli jenisim plante nogud fasin, ale oli kam klin long fes blong God. I olsem we rabis devel i goaot long olgeta. Be biaen, olgeta oli mekem nogud long ol profet blong God, gogo taem Jisas i kam, oli agens long hem tu. Ale, samting we oli stap mekem long taem blong Jisas i moa nogud i winim ol samting we oli mekem fastaem.

Taem Jisas i stap toktok yet long ol man, ol brata blong hem wetem mama blong hem oli kamtru, oli stap stanap afsaed long haos. Nao wan long ol man i talem long Jisas, i se: “E, mama blong yu wetem ol brata blong yu oli stap stanap afsaed, oli wantem toktok wetem yu.”

Be Jisas i ansa, i se: “?Hu i mama blong mi? ?Mo hu i brata blong mi?” Nao hem i stretem han blong hem, i poen long ol man blong hem, i talem se: “Olgeta ya oli mama blong mi, mo brata blong mi. From we man we i stap mekem ol samting we Papa blong mi long heven i wantem, hemia nao i brata blong mi, mo sista blong mi, mo mama blong mi.” Jisas i laekem tumas ol famle blong hem. Be hem i tok olsem blong soemaot se hem i laekem moa ol disaepol blong hem. Matyu 12:33-50; Mak 3:31-35; Luk 8:19-21.

▪ ?From wanem Jisas i talem long ol Farisi se “tri” mo “frut” i nogud?

▪ ?Wanem “saen blong profet Jona”? ?Olsem wanem ol man Isrel oli no luksave saen ya?

▪ ?Olsem wanem nesen blong ol man Isrel long taem blong Jisas oli olsem man ya we devel i goaot long hem?

▪ ?Olsem wanem Jisas i makem long tingting blong ol disaepol blong hem se hem i laekem tumas olgeta?