Japta 56

?Wanem i Save Mekem Man i Doti?

PLANTE man oli agensem Jisas nao. Fulap disaepol blong Jisas oli ronwe long hem. Mo long Judia, sam man Isrel oli stap lukaot hem blong kilim hem i ded, olsem we oli bin mekem long Jerusalem long taem blong Pasova long 31 K.T.

Naoia hem i taem blong Lafet blong Pasova long 32 K.T. Loa blong God i talem se ol man Jyu oli mas hivap evri yia long lafet ya. Taswe Jisas i wokbaot i go long Jerusalem blong joen blong lafet ya. Be hem i mas lukaot gud from we ol man Jyu oli wantem kilim hem i ded. Ale hem i go, mo biaen long lafet ya, hem i kambak long Galili.

Ating Jisas i stap long Kapaneam taem sam Farisi wetem sam tija blong loa oli aot long Jerusalem, oli kam luk hem. Nao oli stap lukaot sam poen long Jisas blong oli save agensem hem from. Ale, oli askem long hem, se: “?From wanem ol man blong yu oli stap brekem kastom blong ol lida blong skul blong yumi bifo? Oli stap kakae, be oli no wasem han blong olgeta fastaem.” Hemia i no wan loa blong God. Hemia kastom blong ol lida blong ol man Jyu bifo nomo. Nao ol Farisi oli ting se i wan bigfala rong we oli stap kakae, be oli no folem kastom blong olgeta. Oli no wasem han blong olgeta fulwan, i go kasem antap.

Jisas i no ansa long kwestin blong olgeta. Be hem i askem wan kwestin long olgeta bakegen blong soemaot rabis fasin blong olgeta mo fasin blong brekem loa blong God we olgeta i stap mekem. Hem i talem se: “?Be yufala tu, from wanem yufala i stap brekem loa blong God blong holem ol kastom blong yufala? God i talem se ‘Yu mas ona long papa mo mama blong yu.’ Mo hem i talem se ‘Man we i tok nogud long papa mo mama blong hem, yufala i mas kilim hem i ded.’ Be yufala i stap tijim ol man se ‘Sipos wan man i talem long papa no mama blong hem se ol samting ya we hem i save yusum blong givhan long tufala oli tabu, oli blong God, bambae i no moa gat tok se hem i mas ona long papa blong hem.’ ”

Hemia nao tijing blong ol man Farisi. Oli talem se sipos oli makemaot mane, graon, no wan narafala samting se hemia wan presen long God, nao samting ya i blong haos prea blong God nomo, oli no save yusum long wan narafala rod. Be oli no rili givim presen ya i go, oli holem i stap nomo. Oli talem nomo se mane no graon blong olgeta i olsem “koban”. Tok ya i minim wan presen we oli makemaot blong givim i go long God no long haos prea blong hem. Nao man ya i no moa save yusum samting ya blong givhan long olfala papa mama blong hem, nating we tufala i gat bigfala nid.

Jisas i harem nogud long fasin blong ol Farisi ya we oli stap jenisim loa blong God. Taswe hem i talem se: “Long fasin ya, yufala i mekem tok ya blong God i nating nomo, blong yufala i save holem kastom blong yufala. !Yufala i gat tu tingting ya! Taem profet Aesea bifo i talemaot tok we God i givim long hem, hem i makem gud yufala, long tok ya we God i talem se ‘Ol man ya oli stap ona long mi long ol toktok nomo blong olgeta, be tingting blong olgeta i stap longwe long mi yet. Oli stap mekem wosip long mi blong nating nomo, from we taem oli tij, oli talem se tok blong God ya, be i tok blong man nomo.’ ”

Ating ol man we oli stap lesin fastaem, oli stanap longwe lelebet long Jisas nao, blong livim ol Farisi oli ansa long kwestin blong Jisas. Nao taem ol Farisi oli no save ansa long strong tok we Jisas i talem long olgeta, Jisas i singaot ol man blong oli kambak bakegen long hem. Nao hem i talem long olgeta se: “Yufala i lesin gud, yufala i mas haremsave tok blong mi. I no kakae we i go insaed long maot blong man we i save mekem hem i doti long fes blong God. Ol tok we i kamaot long maot blong hem, hemia nao i save mekem hem i doti.”

Biaen, taem oli go insaed long haos, ol disaepol blong Jisas oli talem long hem se: “?E, yu save we ol Farisi oli harem nogud tumas from ol tok ya we yu yu talem?”

Jisas i ansa, i se: “Olgeta samting ya we Papa blong mi long heven i no planem, bambae hem i pulumaot. Yufala i no harem nogud long olgeta ya. Olgeta oli lida, be oli blaen nomo. Mo sipos wan blaenman i stap lidim wan narafala blaenman, bambae tufala i mas foldaon long hol.”

Taem Pita i askem Jisas blong eksplenem moa long saed blong ol samting we oli save mekem man i doti, Jisas i sapraes. Nao hem i talem se: “?Olsem wanem? ?Ating hed blong yufala tu i strong yet? Yufala i mas save. Ol samting ya we man i stap kakae oli go long bel blong hem nomo, nao biaen, oli goaot long bodi blong hem. Be ol tok ya we man i talemaot long maot blong hem, hem i kamaot long tingting blong hem fastaem, nao hemia i save mekem man i doti. From we long tingting blong man i gat ol rabis tingting i kamaot. Man i save kilim man. Man i save stilim woman blong narafala man, mo woman we i mared finis i save go slip wetem narafala man. Man i save mekem nogud wetem gel, i save stil, i save gyaman, mo i save tok nogud blong spolem nem blong narafala man. Hemia ol fasin we oli save mekem man i doti long fes blong God. Be fasin ya we man i kakae be i no wasem han blong hem fastaem, hem i no save mekem man i doti olsem.”

Tok blong Jisas i no min se man i no nidim blong stap klin long bodi blong hem. Hem i no stap talem se man i no nidim blong wasem han blong hem bifo we hem i kakae no bifo we hem i mekemrere kakae. No gat. Jisas i tok agens long ol lida blong skul ya from we olgeta oli gat tu fes. Olgeta i stap yusum ol tok blong man mo ol kastom blong olgeta nomo olsem wan eskyus, blong blokem olgeta, blong oli no save obei long ol stret loa blong God. Yes, ol rabis fasin nao oli save mekem man i doti long fes blong God. Mo Jisas i soemaot se ol rabis fasin ya oli kamaot long hat mo tingting blong man nomo. Jon 7:1; Dutronome 16:16; Matyu 15:1-20; Mak 7:1-23; Eksodas 20:12; 21:17; Aesea 29:13.

▪ ?Hu i agensem Jisas nao?

▪ ?Ol Farisi oli sakem wanem strong tok long Jisas? ?Be Jisas i talem wanem blong soemaot se ol Farisi oli stap brekem loa blong God?

▪ ?Wanem i save mekem man i doti long fes blong God?