Japta 62

Jisas i Tijim Ol Blong Oli Holem Tingting Daon

KOLOSAP long ples we nem blong hem Siseria Filipae, Jisas i ronemaot wan devel long wan boe. Nao Jisas i wantem gobak long Kapaneam. Be Jisas i wantem se ol disaepol blong hem nomo oli wokbaot wetem hem, from we hem i wantem storeyan moa wetem olgeta long saed blong ded blong hem mo ol wok we oli mas mekem biaen long ded blong hem. Nao hem i eksplenem long olgeta, i se: “Mi, mi Pikinini blong Man, bambae olgeta oli putum mi mi go long han blong ol man we bambae oli kilim mi mi ded. Be biaen long namba tri dei, bambae God i mekem mi mi laef bakegen.”

Jisas i storebaot samting ya finis wetem ol disaepol blong hem. Mo trifala aposol blong hem oli stap taem bodi blong hem i jenis i kam narakaen, nao olgeta oli bin storebaot we bambae Jisas i mas ‘goaot’ long wol ya. Nating we i olsemia, be ol disaepol blong hem oli no kasem save yet long mining blong tok blong hem. Nao taem Jisas i talem bakegen se bambae hem i mas ded, i no gat wan long olgeta we i traem blokem tok blong hem olsem Pita i bin mekem lastaem. Be olgeta oli sem blong askem sam moa kwestin long hem long saed ya.

Nao oli kamtru long Kapaneam. Hemia ples blong Pita mo sam narafala aposol blong Jisas tu. Mo long ol yia we Jisas i mekem minista wok blong hem, hem tu i stap long taon ya, mo hem i stap goaot long ol ples raonabaot blong tijim ol man. Nao long Kapaneam, ol man blong tekem mane blong takis, we i blong pem ol samting blong haos blong God long Jerusalem, oli kam long Pita. Maet oli wantem traem trikim Jisas blong hem i brekem wan kastom blong olgeta. Nao oli askem long Pita se: “?Olsem wanem? ?Masta blong yu i no save pem takis ya?”

Pita i talem se: “Si, hem i save pem.”

Biaen, Jisas i kam insaed long haos ya, be hem i save finis ol samting we i bin kamaot. Taswe fastaem hem i tok, i talem long Pita se: “Saemon, yu traem tingbaot. ?Ol king blong wol ya oli stap tekem takis long hu? ?Oli stap kasem mane blong olgeta long hu? ?Long ol man blong olgeta, no long ol strenja we oli stap long ples blong olgeta?”

Pita i talem se: “Long ol strenja.”

Nao Jisas i talem long hem, i se: “Yes, mo ol man blong king oli no save pem.” Papa blong Jisas hem i King blong olgeta ples long wol. Mo oli stap yusum haos blong hem blong mekem wosip long hem. Taswe oli no save fosem pikinini blong hem blong pem takis long haos blong God. Be hem i gohed i talem long Pita se: “Be from we yumi no wantem mekem ol man ya blong tekem mane blong takis oli trabol, i gud yu godaon long bigfala lugun ya, yu sakem huk. Nao yu tekem fas fis we i kakae huk blong yu, yu openem maot blong hem. Nao long maot blong hem bambae yu save faenem wan selva mane we i naf blong pem takis blong yumitufala wantaem. Nao yu tekem, yu go pem takis blong yumitufala long hem.”

Nao taem ol disaepol blong Jisas oli kam wanples long Kapaneam, ating long haos blong Pita nomo, oli askem long Jisas se: “?[Long kingdom blong heven, GNB], hu man we i hae moa long olgeta?” Jisas i luksave tingting blong olgeta, from we taem oli biaen long hem long rod, oli stap kambak long Siseria Filipae, hem i harem we olgeta oli stap rao. Nao hem i askem long olgeta i se: “?Wanem samting ya we yufala i stap rao from long rod?” Be ol disaepol blong hem oli sem blong ansa long hem, from we long rod, oli stap rao from wan kwestin blong olgeta se: ‘?Hu man long yumi we i hae moa?’

Kolosap tri yia finis, Jisas i stap tijim ol disaepol blong hem. ?Weswe oli save rao from wan kwestin olsem? Samting ya i soemaot se sin i gat bigfala paoa long ol man. Mo tu, i hadwok samtaem blong jenisim sam fasin we man i lanem long skul blong hem. Skul blong ol man Jyu we ol disaepol blong Jisas oli bin stap long hem bifo, hem i stap makem long tingting blong ol man se oli mas hae moa long ol narafala man. Mo tu, maet Pita i ting se i hae moa long ol narafala aposol from we Jisas i bin promes long hem se bambae hem i givim “ol ki” blong Kingdom long hem. Mo maet Jemes mo Jon tufala i ting se tufala i hae moa from we tufala i bin stap wetem Jisas taem bodi blong Jisas i jenis, i kam narafala.

Nating se i olsem wanem, be Jisas i mekem wan samting nao blong traem stretem tingting blong olgeta. Hem i singaot wan pikinini i kam long hem. Nao hem i putum hem i stanap long medel blong olgeta, hem i putum han blong hem i goraon long pikinini ya, nao i talem long olgeta, i se: “Tru mi talem long yufala, sipos yufala i no jenisim fasin blong yufala blong kam olsem pikinini ya, bambae yufala i no save [go insaed long kingdom blong heven, GNB]. Be man we i mekem tingting blong hem i stap daon olsem smol pikinini ya, hem i hae moa, i winim olgeta narafala man [long kingdom blong heven, GNB]. Man we i tekem wan pikinini olsem hemia i kam insaed long haos blong hem from we i ona long mi, i olsem we hem i tekem mi mi kam insaed.”

!Jisas i yusum nambawan rod blong stretem ol disaepol blong hem! Hem i no kam kros long olgeta. Hem i no tok strong long olgeta se oli flas, no oli gat fasin blong kasem hae ples nomo. No gat. Blong stretem mo tijim ol disaepol blong hem, Jisas i yusum eksampel blong ol smol pikinini. Ol pikinini oli no tinghae long olgeta, oli no traehad blong winim ol narafala, mo oli no wantem kasem ples we i hae moa long ol narafala. Ale Jisas i soemaot long ol disaepol blong hem se oli mas gat ol fasin ya olsem ol pikinini we tingting blong olgeta i stap daon. Nao Jisas i finisim store blong hem, i se: “Prapa man long yufala we i hae moa long yufala, hemia man ya long yufala we i daon moa long yufala evriwan.” Matyu 17:22-27; 18:1-5; Mak 9:30-37; Luk 9:43-48.

▪ ?Taem Jisas i gobak long Kapaneam, hem i store bakegen long wanem samting wetem ol disaepol blong hem? ?Taem ol disaepol oli harem tok ya, oli mekem wanem?

▪ ?From wanem oli no save fosem Jisas blong pem takis long haos blong God? ?Be from wanem hem i pem?

▪ ?Wanem tingting i pulum ol disaepol blong Jisas blong rao? ?Olsem wanem Jisas i stretem olgeta?