Japta 96

Jisas Mo Wan Yangfala Lida We i Rij

JISAS i stap yet long ples ya, Perea. Taem hem i stap wokbaot long rod we i go long Jerusalem, wan yang man i resis i kam long hem, i nildaon long hem. Man ya i wan “lida” blong ol man Isrel. Ating hem i holem wan haenem long haos prea long ples ya. No maet hem i wan memba blong kaonsel blong ol man Jyu, Sanhedrin. Mo tu, hem i wan rijman. Nao hem i askem long Jisas se: “Tija, yu yu wan gudfala man. ?Bambae mi mi mas mekem wanem blong kasem laef ya we i no save finis?”

Jisas i talem long hem se: “?Olsem wanem yu talem mi se mi gud? I no gat man we i gud. God nomo, hem i gud.” Ating yang man ya i talem “gudfala man” from we hem i wantem leftemap Jisas. Taswe Jisas i talem long hem se God nomo i gat raet blong tekem nem ya.

Nao Jisas i talem long man ya se: “Sipos yu wantem kasem laef ya, yu mas obei long ol loa blong God.”

Man ya i askem long hem, i se: “?Wanem ol loa ya?”

Nao Jisas i talemaot faef long olgeta Ten Loa we God i givim long ol man Isrel, i se: “Bambae yu no kilim man i ded. Bambae yu no stilim woman. Bambae yu no stil. Bambae yu no gyaman. Bambae yu ona long papa mo mama blong yu.” Mo Jisas i joenem wan loa we i impoten moa, i se: “Bambae yu laekem ol man we oli stap raonabaot long yu, yu mekem i gud long olgeta, olsem we yu stap mekem i gud long yu.”

Naoia man ya i ansa tru long Jisas, i se: “Tija, olgeta loa ya, mi mi stap holem olgeta, i stat long taem we mi pikinini yet, i kam kasem tede.” Nao hem i askem se: “?Wanem samting moa i stap, we mi mi no mekem yet?”

Jisas i laekem man ya, from we hem i luksave se kwestin ya i kamaot long hat blong hem stret. Be tu, Jisas i luksave se man ya i laekem tumas olting blong hem. Nao hem i talemaot long hem samting we hem i mas mekem, i se: “Wan samting nomo yu yu sot long hem. Yu go, yu salemaot olgeta samting blong yu, yu tekem mane blong olgeta, yu go givim long ol puaman, nao bambae yu yu gat plante samting blong yu long heven. Ale yu kam, yu biaen long mi, yu man blong mi.”

Taem man ya i harem samting ya, fes blong hem i kam nogud, mo tingting blong hem i hevi, from we hem i gat plante samting blong hem. Nao hem i gowe long Jisas. Jisas i harem we hem i sore long man ya. Man ya i laekem tumas ol samting blong hem, taswe hem i no luksave ol samting we oli rili impoten. Nao Jisas i talem se: “!Man! Bambae i strong tumas long ol rij man blong oli go insaed long kingdom blong God.” (GNB)

Ol disaepol blong Jisas oli sapraes tumas long tok ya. Be oli sapraes moa long nekis tok blong hem, taem hem i talem se: “I strong blong wan kamel i gotru long ae blong nidel, be i strong moa blong ol rij man bambae oli go insaed long kingdom blong God.” (GNB)

Taem ol disaepol oli harem tok ya, oli askem se: “?Man, be hu bambae i save kasem laef?”

Be Jisas i lukluk long olgeta, i talem stret long olgeta se: “Samting ya, ol man oli no save mekem. God nomo i save mekem, from we hem i save mekem olgeta samting.”

Nao Pita i stap tingbaot we ol disaepol blong Jisas oli no folem rod ya we yang rijman i jusum. Ale hem i girap, i talem se: “?Be olsem wanem long mifala? Mifala i bin livim evri samting blong mifala, blong kam biaen long yu. ?Bambae mifala i kasem wanem?”

Nao Jisas i mekem promes long olgeta, i se: “Long nyufala wol ya we bambae i kam, mi, mi Pikinini blong Man, bambae mi king, mi sidaon long bigfala jea blong mi. Nao long taem ya, yufala twelef we yufala i biaen long mi, bambae yufala tu i king, yufala i save sidaon long ol bigfala jea blong yufala, we oli olsem jea blong king. Nao bambae yufala i hed long ol twelef laen blong ol man Isrel, blong rul long olgeta.” Jisas i stap soemaot se wol bambae i jenis, i kam olsem garen blong Iden bakegen. Mo Pita wetem ol narafala disaepol blong hem oli save kasem praes blong rul wetem Kraes long heven. Oli save rul long ol man we bambae oli stap long Paradaes long wol ya. Taswe taem oli tingbaot bigfala praes ya we bambae oli kasem long heven, i nating nomo we oli mas livim evri samting blong biaen long Jisas.

Be oli save kasem presen naoia tu. Jisas i talem se: “Man we i livim haos blong hem, no brata no sista blong hem, no papa no mama blong hem, no pikinini blong hem, no graon blong hem, from we i man blong mi, no from we i man blong gud nyus blong mi, hem bambae i no save sot long ol samting ya. Tru mi talem long yufala, long wol ya bambae hem i save kasem wan handred taem antap bakegen, wanem samting we hem i livim, olsem haos, no brata no sista no mama no papa no pikinini no graon blong hem. Be ol man bambae oli mekem trabol long hem tu. Be long nyufala wol ya we bambae i kam, hem bambae i gat laef we i no save finis.”

Jisas i promes long ol disaepol blong hem se nomata wanem ples long wol oli wokbaot long hem, be oli blong wan famle nomo. Oli gat ol Kristin brata mo sista long evri ples. Bambae oli harem we oli kolosap moa long olgeta mo oli laekem olgeta moa, i bitim we oli laekem prapa famle blong olgeta. I luk olsem we yang rijman ya we Jisas i storeyan wetem hem, i mestem presen ya. Ale, hem i mestem jans blong kasem laef blong olwe long Kingdom blong God long heven.

Nao Jisas i talem se: “Be plante man we oli stap holem nambawan ples, bambae oli mas godaon long las ples. Mo plante we oli stap long las ples, bambae oli mas kam tekem nambawan ples.” ?Wanem mining blong tok ya blong Jisas?

Hem i minim se plante man we oli “holem nambawan ples” long skul blong olgeta, olsem yang rijman ya, bambae oli no save go insaed long Kingdom blong God. Bambae oli mas godaon long “las ples.” Be plante man, olsem ol disaepol blong Jisas, oli mekem tingting blong olgeta i stap daon. Ol Farisi we oli gat flas fasin oli stap daonem ol disaepol blong Jisas, oli talem se oli stap long “las ples.” Mo oli stap talem se oli man blong graon nomo, no ‵am ha·ʹaʹrets. Be ol disaepol blong Jisas bambae oli kasem “nambawan ples.” Hemia nao taem we bambae oli kasem blesing blong rul wetem Kraes long Kingdom blong hem long heven. Mak 10:17-31; Matyu 19:16-30; Luk 18:18-30.

▪ ?Rij yang man ya hem i wanem kaen lida?

▪ ?From wanem Jisas i no wantem se man ya i talem se hem i gudfala?

▪ ?Olsem wanem store blong rij yang man ya i soemaot se ol rijman oli save kasem trabol?

▪ ?Jisas i promes se ol disaepol blong hem bambae oli kasem wanem praes?

▪ ?Olsem wanem olgeta we oli stap long nambawan ples bambae oli godaon long las ples, mo olgeta we oli stap long las ples bambae oli tekem nambawan ples?