Japta 93

Taem Pikinini Blong Man i Kamtru

JISAS i stap yet long not (long Sameria no long Galili). Nao ol Farisi oli askem long hem wetaem bambae Kingdom blong God i kam. Oli ting se bambae i olsem wan bigfala seremoni we ol man oli save luk. Be Jisas i talem long olgeta se: “Hemia, we kingdom blong God i kam, hem i no wan samting we ol man oli save luk long ae blong olgeta. I no gat man i save talem se ‘Yu luk, hemia nao,’ no i se ‘Yu luk, hemia longwe.’ From we kingdom blong God i stap long medel blong yufala finis.” (GNB)

Tok blong Jisas “long medel blong yufala,” samtaem oli tanem i kam “insaed long yufala.” Taswe sam man oli ting se Jisas i minim we Kingdom blong God i stap rul long hat blong ol man blong God. Be long taem ya Jisas i stap tok long ol Farisi we oli no gat bilif nating long Kingdom blong God. Taswe i klia nomo se Kingdom blong God i no save stap insaed long hat blong olgeta. Be i olsem we Kingdom i stap long medel blong olgeta from we Jisas Kraes i stap long medel blong olgeta. Mo Jisas, God i makemaot hem se hem i King blong Kingdom ya.

Ating ol Farisi oli goaot long olgeta nao. Ale Jisas i gohed blong toktok wetem ol disaepol blong hem nomo. Hem i storeyan moa long taem we Kingdom blong God bambae i kam. Hem i stap tingbaot taem we hem bambae i tekem paoa blong hem, nao hem i kam king long Kingdom ya. Taswe hem i givim woning long ol man, i se: “Bambae ol man oli save talem long yufala se ‘Yufala i luk, hemia longwe,’ no ‘Yufala i luk, hemia nao.’ Be i nogud yufala i go. Bambae yufala i no biaen long olgeta [ol gyaman mesaea]. Taem we laetning i laet, hem i saen, i finisim skae olgeta, i stat long wan saed, i go finis long narasaed longwe. Mo long dei blong mi, mi Pikinini blong Man, bambae i olsem.” Taem laetning i saen, i finisim skae olgeta, nao ol man oli save luk hem klia. Long sem fasin, ol saen we oli soemaot se Jisas i stap rul long Kingdom blong hem bambae oli klia nomo long ol man we oli wantem luksave olgeta.

Nao Jisas i tokbaot sam man long taem bifo blong soemaot tingting blong plante man taem hem i tekem paoa long Kingdom blong hem. Hem i eksplenem se: “Olsem we long taem blong Noa, ol man oli no rere, nao long taem blong mi, mi Pikinini blong Man, bambae i olsem. . . . Mo long taem blong Lot i olsem nomo. Ol man oli stap kakae, oli stap dring, oli stap pem ol samting, oli stap salem ol samting, oli stap wokem garen, mo oli stap wokem haos. Be long dei ya we Lot i goaot long Sodom, faea mo salfa i kamaot long skae, i foldaon long olgeta, i bonem olgeta oli lus. Ale, be long taem ya we bambae mi soemaot we mi mi Pikinini blong Man, bambae i olsem.”

Jisas i no stap talem se ol man long taem blong Noa mo long taem blong Lot oli lus from we oli stap kakae, oli stap dring, oli pem ol samting, oli stap salem ol samting, oli stap wokem garen, mo oli stap wokem haos. No gat. Noa mo Lot mo ol famle blong tufala, olgeta ya tu oli stap mekem ol samting ya. ?From wanem ol narafala oli lus? From we oli stap mekem ol samting ya nomo. Oli no luksave ol samting we God i wantem, oli no mekem wan samting nating blong obei long hem. Taem bambae bigfala trabol i kamaot long wol ya, long taem we Jisas i soemaot we hem i Pikinini blong Man, bambae fulap man oli lusum laef blong olgeta from sem samting.

Taem man i luksave ol saen we oli soemaot se Jisas i tekem paoa blong hem finis long Kingdom blong hem, man ya i no mas slou blong tekem disisin blong hem. Jisas i talem se: “Long taem ya, sipos man i stap spel afsaed long haos blong hem, mo olting blong hem oli stap insaed long haos, be bambae hem i no save go tekem olgeta. Mo long sem fasin, sipos man i stap long garen blong hem, be bambae hem i no save gobak long haos. Yufala i mas tingbaot woman blong Lot.”

Taem man i luksave se Kraes i stap rul finis, hem i no mas letem ol samting blong hem oli pulum hem no oli blokem hem, blong hem i no tekem disisin blong hem kwiktaem. Taem woman blong Lot i stap goaot long Sodom, hem i luklukbak long ol samting we hem i livim finis, olsem we hem i wantem gobak long ol samting ya. Taswe sol i folfoldaon i kavremap hem, nao bodi blong hem i kam strong, i stap stanap olsem ston.

Jisas i storeyan moa long ol disaepol blong hem, long ol samting we bambae oli mas kamaot, taem hem i rul long fyuja. Hem i talem se: “Long naet ya bambae i gat man mo woman, tufala i stap slip long wan bed, be bambae mi mi tekem wan, wan i stap. Bambae i gat tu woman i stap wanples blong wokem kakae, be bambae mi mi tekem wan, wan i stap.”

Taem hem i talem se: “Bambae mi mi tekem wan,” hem i min se man ya bambae i sef. I olsem Noa wetem famle blong hem, taem olgeta oli go insaed long sip. Mo i olsem Lot wetem famle blong hem, taem ol enjel oli lidim olgeta oli goaot long Sodom, nao oli stap sef. Be taem Jisas i talem se: ‘Bambae wan i stap,’ hem i min se man ya bambae i lus.

Nao ol disaepol blong Jisas oli askem long hem se: “?Masta, long weples?”

Jisas i ansa long olgeta, se: “Bambae i olsem fasin blong ol pijin ya we oli save kakae dedbodi. Taem i gat dedbodi i stap, oli save kam hivap long hem.” Olgeta we Jisas i “tekem” olgeta, no oli sef, oli olsem ol pijin we oli save lukluk i go longwe, nao oli kam hivap wanples, long ples we “dedbodi” i stap long hem. “Dedbodi” ya i minim trufala Kraes, taem hem i tekem paoa blong hem, we man i no save luk hem long Kingdom blong hem. Mo tu, “dedbodi” ya i minim bigfala lafet long saed blong speret we Jeova i mekem. Luk 17:20-37; Jenesis 19:26.

▪ ?Olsem wanem Kingdom i stap long medel blong ol Farisi?

▪ Jisas i talem se taem hem i tekem paoa blong hem long Kingdom i olsem taem laetning i saen. ?Olsem wanem?

▪ ?Fulap man bambae oli lus from wanem samting we oli mekem taem Kraes i stap rul?

▪ ?Wanem mining blong tok blong Jisas: ‘Bambae mi mi tekem wan, wan i stap’?