Japta 95

Jisas i Tijim Man Long Divos Mo Long Fasin Blong Laekem Ol Pikinini

JISAS wetem ol disaepol blong hem oli stap wokbaot i go long Jerusalem blong mekem Lafet blong Pasova long yia 33 K.T. Oli krosem Jodan Reva, nao oli stap folem rod we i pastru long ples ya, Perea. Sam wik bifo, Jisas i stap long Perea. Nao oli singaot hem blong go long Judia, from we fren blong hem Lasros i sik. Long Perea, hem i toktok wetem ol Farisi long saed blong divos. Naoia oli stanemap kwestin ya bakegen.

Ol Farisi oli gat plante defren tingting long saed blong divos. Moses i talem se man i save mekem divos long woman blong hem sipos “woman i mekem i no stret long hem.” Sam Farisi oli ting se tok ya i minim we woman i mekem i krangke long man blong hem. Be samfala oli ting se samting “we i no stret” i minim ol smosmol samting nomo. Ale, oli askem kwestin long Jisas blong traem hem, oli se: “?I stret long Loa blong yumi blong man i mekem divos long woman blong hem, from evri tok we man i talem, no i no stret olsem?” Nomata wanem ansa Jisas i givim long ol Farisi, oli save mekem trabol mo rao from we olgeta oli gat narafala tingting.

Jisas i waes long ol trik blong ol Farisi. Ale, hem i givim wan nambawan ansa long olgeta. Ansa blong hem i no stanap long tingting blong ol man, be hem i pulum olgeta blong tingtingbak long faswan mared we God i mekem. Hem i talem se: “?Ating yufala i no ridim tok blong Baebol? Hem i talem se ‘God we i mekem olgeta samting, hem i mekem tufala man fastaem, wan we i man, wetem wan we i woman. Nao hem i talem se ‘From samting ya, bambae man i aot long papa mo mama blong hem, i go joen wetem woman blong hem. Nao tufala bambae i kam olsem wan bodi nomo.’ From samting ya, tufala i no moa tu nao, tufala i olsem wan bodi nomo. Nao from we God i joenem tufala olsem, man i mas no brekemaot tufala bakegen.”

Jisas i soemaot se plan blong God fastaem i blong man mo woman tufala i stap tugeta olwe, tufala i no save mekem divos. Be ol Farisi oli askem long hem se: “?Ale, be from wanem Moses i putum loa blong mekem divos we i talem se man i save givim pepa blong divos long woman blong hem, nao hem i save sanemaot hem?”

Jisas i ansa long olgeta, i se: “From we hed blong yufala i strong tumas, taswe Moses i letem long yufala, blong yufala i mekem divos long ol woman blong yufala. Be fastaem i no olsem.” Yes, taem God i mekem faswan mared long garen blong Iden, hem i no mekem wan rod blong tufala i save divos.

Nao Jisas i gohed blong talem long ol Farisi, i se: “Mo mi mi talem long yufala, sipos man i mekem divos long woman blong hem, be woman ya i no bin slip wetem narafala man [Grik, por·neiʹai], nao man ya i go mared long narafala woman, man ya i mekem sin. Hem i mekem i krangke long woman blong hem.” Por·neiʹa i minim rabis fasin long saed blong seks. Jisas i soemaot se from samting ya nomo, man mo woman tufala i save mekem divos. Sipos man i mekem divos long rod ya nomo, God i save agri long hem.

Ale, ol disaepol oli luksave se taem man mo woman tufala i mared, tufala i mas stap tugeta olwe. Mo oli luksave se i gat wan rod nomo blong mekem divos. Taswe oli talem long Jisas se: “Sipos fasin blong mared i strong olsem, i moa gud man i no mared.” I klia nomo we taem wan man i wantem mared, hem i mas tingting hevi long disisin blong hem, from we mared i blong olwe.

Nao Jisas i gohed blong tokbaot fasin we man i no mared, i stap hem wan. Hem i eksplenem se sam man oli no save mared, from we taem oli bon, bodi blong olgeta i olsem. Samfala oli no save mared from we ol man oli bin spolem bodi blong olgeta. Mo sam man oli blokem tingting mo filing blong olgeta taem oli wantem mared, blong oli save mekem moa wok long saed blong Kingdom blong God. Nao Jisas i givim advaes long olgeta, i se: “Be man we i save holem tok ya [livim mared fastaem blong mekem wok blong God], hem i mas holem.”

Nao i gat sam man oli tekem ol pikinini blong olgeta oli kam long Jisas. Be ol disaepol blong Jisas oli blokem olgeta. Oli mekem olsemia from we oli wantem se Jisas i spel lelebet. Be Jisas i talem long olgeta se: “Yufala i mas letem ol pikinini oli kam long mi, yufala i no blokem olgeta. From we Kingdom blong God i blong ol man ya nomo we oli olsem pikinini. Tru mi talem long yufala, ol man we oli no kam olsem pikinini blong kasem Kingdom blong God, oli no save kam insaed long hem.” (NW)

!Ol lesen ya we Jisas i tijim long olgeta oli nambawan tumas! Blong stap aninit long rul blong Kingdom blong God, yumi mas tekem fasin blong ol pikinini. Yumi mas mekem tingting blong yumi i stap daon, mo yumi mas glad blong lanem plante samting. Mo tu, Jisas i soemaot se i impoten tumas we ol papa mama oli spenem taem wetem ol pikinini blong olgeta, blong tijim olgeta. Nao Jisas i soemaot se hem i laekem tumas ol pikinini ya, hem i putum han blong hem i goraon long olgeta, nao hem i blesem olgeta. Matyu 19:1-15; Dutronome 24:1; Luk 16:18; Mak 10:1-16; Luk 18:15-17.

▪ ?Ol Farisi oli gat wanem defren tingting long saed blong divos? ?Olsem wanem olgeta oli traem Jisas?

▪ ?Jisas i ansa olsem wanem long ol Farisi? Hem i talem se i gat wan rod nomo blong mekem divos. ?Wanem rod ya?

▪ ?From wanem ol disaepol blong Jisas oli talem se i moa gud man i no mared? ?Jisas i givim wanem advaes long olgeta?

▪ ?Fasin we Jisas i mekem long ol pikinini i tijim yumi long wanem?