Japta 30

Hem i Ansa Long Ol Man We Oli Agensem Hem

OL LIDA blong ol man Isrel oli agensem Jisas, oli talem se hem i brekem loa blong Sabat dei. Nao Jisas i ansa long olgeta, i se: “Oltaem Papa blong mi i stap wok, mo mi tu mi mas wok.”

Nating we ol Farisi oli stap tok agens long Jisas, be wok we hem i mekem i no brekem loa blong Sabat dei. God nomo i givim wok ya long Jisas blong tij mo blong mekem ol sikman oli gud bakegen. Ale hem i folem rod we God i soemaot, hem i gohed evri dei long wok ya. Be ansa blong Jisas i mekem ol lida ya oli kros moa, ale oli strong moa blong kilim hem i ded. ?From wanem?

Oli ting se Jisas i brekem loa blong Sabat dei. Be i no hemia nomo. Taem hem i tok olsem we God i stret Papa blong hem, olgeta oli ting se hem i no gat respek long God. Be Jisas i no fraet long olgeta. Hem i gohed blong storeyan moa long poen ya, se hem i stret pikinini blong God. Hem i se: “Papa blong mi, hem i laekem mi tumas, mo hem i stap soemaot long mi olgeta samting we hem i stap mekem.”

Hem i go moa, i se: “Olsem we Papa blong mi i save mekem ol dedman oli laef bakegen long ded, oraet long sem fasin, mi, mi Pikinini blong hem, mi save givim laef long olgeta man we mi wantem mekem olsem long olgeta.” !Tru ya, Pikinini ya blong God i stap givim laef bakegen long plante man, long saed blong speret! Taswe hem i talem se: “Man we i harem tok blong mi, mo i bilif long hem we i sanem mi, . . . hem i aot finis long ded, hem i kam long laef. Tru mi talem long yufala, i gat taem i stap kam, yes, taem ya i kam finis, we ol dedman oli save harem voes blong mi, mi Pikinini blong God. Mo olgeta we oli harem mi bambae oli kasem laef.”

Baebol i no talem se Jisas i bin givim laef bakegen long sam man finis. Be Jisas i stap talem long ol man we oli agensem hem se long fyuja bambae hem i mekem man i laef bakegen. Hem i se: “I nogud yufala i sapraes long samting ya, from we i gat taem i stap kam we ol dedman we oli stap long beregraon, bambae oli harem voes blong mi, nao bambae oli aot long beregraon.”

Kam kasem taem ya, Jisas i neva talemaot klia long ol man olsem wanem ol wok blong hem oli joen long plan blong God. Be i no ol tok ya blong Jisas nomo we oli talemaot hem long ol man we oli agensem hem. Jisas i talem long olgeta se: “Bifo ya, yufala i sanem ol man blong yufala blong oli harem tok blong Jon Baptaes. Mo hem i talemaot tok blong hem finis blong leftemap trutok.”

Tu yia bifo, Jon Baptaes i bin talem long ol lida blong ol man Isrel se bambae i gat wan Man we i kam biaen long hem. Bifo we Jon Baptaes i kalabus, ol lida ya oli tinghae long hem. Taswe Jisas i pulum tingting blong olgeta bakegen, i se: “Bifo, blong smoltaem, yufala i glad blong harem gud long laet blong hem.” Jisas i talem samting ya blong traem givhan long olgeta, yes blong traem sevem olgeta. Be Jisas i no dipen long wetnes we Jon i givim nomo.

Jisas i gohed, i se: “Ol wok ya blong mi [mo merikel ya we hem i jes mekem nomo] oli stap talemaot mi, mo oli stap soemaot we Papa blong mi i sanem mi.” Be i gat moa yet. Hem i talem se: “Mo Papa blong mi, hem tu i stap talemaot mi.” Tru ya, God i talemaot Jisas taem Jisas i tekem baptaes. Long taem ya, God i talem se: “Hemia pikinini blong mi, we mi laekem hem tumas.”

Taswe ol man we oli no wantem Jisas, oli agensem hem, oli no gat eskyus. Oli talem se oli stap stadi Baebol. !Be Baebol ya hem i stap talemaot Jisas! Taswe long las tok blong Jisas, hem i talem se: “Sipos yufala i bilif long tok blong Moses, bambae yufala i save bilif long mi, from we tok ya we hem i raetem, hem i stap tokbaot mi, be yufala i no bilif long ol tok blong hem, taswe. Mo from we yufala i no save bilif long tok we hem i raetem, yufala i no gat rod nating blong bilif long mi.” Jon 5:17-47; 1:19-27; Matyu 3:17.

▪ ?From wanem ol wok we Jisas i stap mekem i no agensem loa blong Sabat dei?

▪ ?Olsem wanem Jisas i tokbaot bigfala wok blong hem we i joen long plan blong God?

▪ ?Jisas i talem se hu ya i givim wetnes se hem i stret Pikinini blong God?