Ol Kristin We Oli No Joen Long Wol Ya Long Ol Lasdei

“Mi mi no man blong wol ya, mo long sem fasin, olgeta tu oli no man blong wol ya.”—JON 17:16.

1, 2. ?Jisas i talem se ol man blong hem oli gat wanem tingting long saed blong wol ya, mo ol tok blong hem oli pulum yumi blong tingbaot wanem kwestin?

LONG laswan naet we stret man ya Jisas i stap long wol, hem i mekem wan longfala prea wetem ol disaepol blong hem. Long prea ya, hem i talem wan samting we i stret long laef blong olgeta trufala Kristin. Hem i tokbaot ol man blong hem i se: “Mi mi talemaot ol tok blong yu long olgeta. Mo ol man blong wol ya oli no laekem olgeta, oli stap agens long olgeta, from we olgeta oli no man blong wol, olsem we mi mi no man blong wol. Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef. Mi mi no man blong wol ya, mo long sem fasin, olgeta tu oli no man blong wol ya.”—Jon 17:14-16.

² Jisas i talem tu taem se ol man blong hem oli no man blong wol ya. Mo tu, hem i talem se ol man blong wol bambae oli no laekem olgeta, bambae oli agens long olgeta from we oli no joen long wol ya. Be Jeova bambae i lukaotgud long ol Kristin, taswe oli no nid blong wari tumas. (Ol Proveb 18:10; Matiu 24:9, 13) Taem yumi ridim tok ya blong Jisas, maet yumi askem se: ‘?From wanem ol trufala Kristin oli no man blong wol ya? ?I minim wanem se oli no man blong wol ya? ?Sipos ol man blong wol oli no laekem ol Kristin, bambae ol Kristin oli gat wanem tingting long saed blong ol man ya? ?Antap moa, wanem tingting blong ol Kristin long ol gavman blong wol ya?’ Ansa we Baebol i givim long ol kwestin ya i impoten, from we oli joen long laef blong yumi evriwan.

“Yumi Man Blong God”

 3. (a) ?Wanem i mekem se yumi defren long ol man blong wol? (b) ?Wanem ol samting we oli soemaot se wol ya i stap long paoa blong Setan?

³ Wan risen from wanem yumi no man blong wol, hemia from we yumi frengud wetem Jeova. Aposol Jon i raetem se: “Yumi save we yumi ya, yumi man blong God, be olgeta man blong wol ya oli stap long paoa blong Setan.” (1 Jon 5:19) Ol tok ya blong Jon oli klia. Ol rabis fasin olsem faet, brekem loa, kilim man, mekem i strong tumas long narafala, fasin stil mo slip olbaot, oli stap kam antap tumas, mo oli soemaot klia se wol ya i stap long paoa blong Setan, i no long paoa blong God. (Jon 12:31; 2 Korin 4:4; Efesas 6:12) Taem wan man i kam Witnes blong Jeova, hem i no moa save mekem ol fasin ya mo i no moa save agri long ol fasin ya. From samting ya nao, hem i no man blong wol ya.—Rom 12:2; 13:12-14; 1 Korin 6:9-11; 1 Jon 3:10-12.

 4. ?Olsem wanem yumi soem se yumi man blong Jeova?

⁴ Jon i talem se ol Kristin oli defren long ol man blong wol, from we oli “man blong God.” Ol man mo woman we oli givim laef blong olgeta i go long Jeova, oli man blong Hem nomo. Aposol Pol i talem se: “Sipos yumi stap laef, bambae yumi stap laef blong yumi leftemap nem blong [“Jeova,” NW ]. Mo sipos yumi ded, bambae yumi ded blong yumi leftemap nem blong [Jeova]. Nao from samting ya, nating we yumi laef, no yumi ded, be yumi man blong [Jeova].” (Rom 14:8; Ol Sam 116:15) From we yumi man blong Jeova, yumi mekem wosip i go long Hem nomo. (Eksodas 20:4-6) Taswe, wan trufala Kristin i no save yusum ful laef blong hem blong mekem wan wok blong wol ya. Mo tu, hem i no save wosip long flaeg blong kantri, nating se i mekem samting ya long hat blong hem no i bodaon long hem tru. Be hem i respektem flaeg ya. Hem i no save wosip long ol jampion blong spot mo ol narafala we ol man tede oli leftemap olgeta olsem ol aedol. Hem i letem ol narafala oli mekem olsem oli wantem, i no traem blokem olgeta, be hem wan bambae i wosip nomo long Bigman we i Wokem hem. (Matiu 4:10; Revelesen 19:10) Samting ya tu i mekem we hem i no man blong wol ya.

“Kingdom Blong Mi i No Blong Wol Ya”

5, 6. ?Olsem wanem yumi defren long ol man blong wol ya from we yumi stap aninit long Kingdom blong God?

⁵ Ol Kristin oli biaen long Jisas Kraes mo oli stap aninit long rul blong Kingdom blong God. Hemia tu i mekem se oli no man blong wol ya. Taem Jisas i stap stanap fored blong Ponjes Paelat we i jajem hem, hem i talem se: “Kingdom blong mi i no blong wol ya. Sipos kingdom blong mi i blong wol ya, bambae ol man blong mi oli save faet blong blokem olgeta ya we oli wantem putum mi long han blong ol man Jiu. Be kingdom blong mi i no kamaot long ples ya.” (Jon 18:36, NW ) Kingdom ya nao we Jeova bambae i yusum blong mekem nem blong hem i tabu, blong mekem hae rul blong hem i win, mo blong mekem ol samting we hem i wantem oli kamaot long wol ya olsem we oli kamaot finis long heven. (Matiu 6:9, 10) Taem Jisas i stap prij, hem i talemaot gud nius blong Kingdom blong God. Mo hem i talem se bambae ol man blong hem oli gohed blong talemaot samting ya gogo kasem en blong wol. (Matiu 4:23; 24:14) Long 1914, profet tok blong Revelesen 11:15 i kamtru se: “Ol kingdom blong wol ya oli kam aninit long paoa blong Hae God blong yumi, wetem Mesaea blong hem. Mo hem i King we bambae i stap rul oltaem gogo i no save finis.” I no longtaem, bambae wan gavman nomo i rul long olgeta man, hemia kingdom ya blong heven. (Daniel 2:44) Wan dei, ol rula blong wol ya tu bambae oli mas luksave bigfala paoa blong kingdom ya.—Ol Sam 2:6-12.

⁶ Ol trufala Kristin tede oli savegud samting ya, taswe oli stap aninit long Kingdom blong God, mo oli folem advaes blong Jisas blong ‘lukaot kingdom blong God fastaem mo stret fasin blong hem.’ (Matiu 6:33, NW ) Hemia i no min se oli agensem kantri we oli stap long hem, nogat. Be i min se long saed blong bilif, oli defren long ol man blong wol ya. Bigfala wok blong ol Kristin tede i sem mak long wok blong ol Kristin long faswan handred yia, hemia blong ‘talemaot Kingdom blong God long olgeta man.’ (Ol Wok 28:23, NW ) I no gat wan gavman blong wol we i gat raet blong blokem wok ya we God i givim long ol man blong hem.

 7. ?From wanem ol trufala Kristin oli no joen nating long ol faet, mo olsem wanem oli bin soemaot fasin ya?

⁷ Yes, ol Witnes oli man blong Jeova, oli biaen long Jisas, mo oli stap aninit long rul blong Kingdom blong God. Taswe, oli no joen nating long ol faet long kantri blong olgeta mo ol faet bitwin long ol defdefren kantri, we oli bin kamaot long ol yia 1900 mo 2000. Oli no tekem saed blong wan kantri agensem narafala kantri, oli no karem masket blong faet agensem ol narafala man, mo oli no mekem plante toktok blong sapotem ol plan blong wol ya. Nating se sam gavman oli agensem olgeta bitim mak, oli soemaot bigfala bilif we i mekem plante man oli sapraes. Oli folem ol rul we oli bin talemaot long ol haeman blong Nasi, long Jemani long 1934: “Mifala i no intres nating long politik, be mifala i ona fulwan long kingdom blong God we Kraes i King blong hem. Bambae mifala i no givim kil no spolem laef blong narafala. Mifala i wantem nomo blong gat pis wetem ol man mo tekem evri janis blong mekem i gud long olgeta.”

Ol Ambasada Blong Kraes Mo Ol Man We Oli Givhan Long Olgeta

8, 9. ?Long wanem fasin ol Witnes blong Jeova tede oli ambasada mo oli man we i givhan long ambasada, mo from samting ya wanem tingting we oli gat long saed blong ol defdefren kantri?

⁸ Pol i tokbaot hem wan wetem ol tabu Kristin brata blong hem se oli ‘ambasada blong Kraes, we God i stap yusum olgeta blong singaot ol narafala man.’ (2 Korin 5:20, NW; Efesas 6:20, NW ) Ol Kristin we tabu spirit i makemaot olgeta oli “man” blong Kingdom blong God. Taswe, afta 1914, i stret blong singaot olgeta se ol ambasada blong Kingdom ya. (Matiu 13:38; Filipae 3:20; Revelesen 5:9, 10) Mo tu, Jeova i stap tekemaot long olgeta kantri “wan bigfala hip” blong “ol narafala sipsip,” hemia ol Kristin we oli gat janis blong laef olwe long wol ya. Olgeta ya oli sapotem ol tabu man we oli wok olsem ol ambasada blong Kingdom. (Revelesen 7:9; Jon 10:16) Yumi save talem se “ol narafala sipsip” ya oli olsem “ol man we oli givhan long ol ambasada” blong Kingdom blong God.

⁹ Wan ambasada mo ol man we oli wok wetem hem, oli no joen nating long bisnes blong kantri we oli wok long hem. Sem mak long ol Kristin, olgeta oli no joen nating long politik blong ol kantri blong wol ya. Oli no tekem saed blong wan kantri no ol man blong wan kala, mo oli no sapotem eni grup blong wol ya we i wok blong mekem ol man oli joengud no blong mekem wol ya i kam antap moa long saed blong mane. (Ol Wok 10:34, 35) Long defren fasin, oli “mekem i gud long olgeta man.” (Galesia 6:10) Yes, ol Witnes blong Jeova oli no joen nating long wol ya. Taswe, sipos wan man i talem se i no wantem lesin long ol Witnes from we oli tekem saed blong ol man blong narafala kala, kantri, no laen, man ya i stap giaman nomo.

Lav i Makemaot Olgeta

10. ?Wanem i soem se lav i wan bigfala fasin blong ol Kristin?

¹⁰ Antap long ol samting ya we yumi tokbaot finis, i gat wan narafala risen from wanem ol Kristin oli no joen nating long wol ya. Hemia from we oli frengud wetem ol narafala Kristin. Jisas i talem long ol man blong hem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Lav long ol brata, hemia wan bigfala fasin we ol Kristin oli mas gat. (1 Jon 3:14) Lav ya, i joen wetem fasin fren we oli gat wetem Jeova mo Jisas, mo hemia nao i mekem se oli frengud wetem ol brata mo sista blong olgeta. Oli no lavem nomo ol brata mo sista we oli stap long kongregesen blong olgeta. Nogat. Oli lavem ‘ol brata long evri ples long wol.’—1 Pita 5:9.

11. ?Lav we ol Witnes blong Jeova oli gat i mekem se oli gat wanem fasin?

¹¹ Blong soemaot lav long ol Kristin brata blong olgeta, ol Witnes blong Jeova tede oli folem tok blong Aesea 2:4 se: “Ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.” Jeova i stap tijim ol trufala Kristin, taswe oli gat pis wetem Hem mo wetem ol Kristin brata mo sista blong olgeta. (Aesea 54:13) From we oli lavem God mo ol brata blong olgeta, oli no save tingbaot blong karem ol tul blong faet blong go spolem ol Kristin brata blong olgeta mo ol narafala man long ol defdefren kantri. Pis mo fasin joengud i wan impoten haf blong wosip blong olgeta, mo ol fasin ya oli soemaot se tabu spirit blong God i rili stap long olgeta. (Ol Sam 133:1; Maeka 2:12; Matiu 22:37-39; Kolosi 3:14) ‘Long tingting blong olgeta, oli wok had blong mekem pis’ from we oli save se “Hae God i stap lukluk long ol stret man.”—Ol Sam 34:14, 15.

Tingting Blong Ol Kristin Long Saed Blong Wol

12. ?Ol Witnes blong Jeova oli folem wanem fasin we Jeova i gat long ol man blong wol ya, mo olsem wanem oli folem?

¹² Jeova i talemaot finis ol tok panis agensem wol ya, be hem i no jajem ol wanwan man blong hem yet. Bambae hem i yusum Jisas blong mekem wok ya long stret taem blong Hem. (Ol Sam 67:3, 4; Matiu 25:31-46; 2 Pita 3:10) Go kasem taem ya, bambae Hem i gohed blong soemaot bigfala lav long ol man. Hem i givim stret Pikinini blong hem finis, wan nomo we hem i gat, blong olgeta man oli save gat janis blong kasem laef we i no save finis. (Jon 3:16) Yumi ol Kristin, yumi folem fasin ya blong God blong soemaot lav, taswe yumi talemaot long ol man ol samting we God i mekem blong sevem yumi, nating se plante man oli no wantem lesin.

13. ?Wanem tingting we yumi mas gat long ol rula blong wol ya?

¹³ ?Wanem tingting we yumi mas gat long saed blong ol rula blong wol ya? Pol i ansa long kwestin ya taem hem i raetem se: “Yumi evriwan i mas ona long gavman. Ol bigman blong gavman oli stap holem hae nem ya from we God nomo i givim long olgeta. Mo olgeta lida we oli stap, God nomo i putumap olgeta.” (Rom 13:1, 2) Ol man we oli holem “hae nem” (sam oli hae moa sam oli daon moa, be evriwan oli daon moa long Jeova) oli holem hae nem ya nomo from we God ya we i gat olgeta paoa i letem olgeta. Wan Kristin i mas obei long ol haeman blong wol ya from we hemia wan haf blong fasin blong obei long Jeova. ?Be, olsem wanem sipos samting we gavman i talem long yumi blong mekem i agensem samting we God i wantem?

Loa Blong God Mo Sisa

14, 15. (a) ?Daniel i mekem wanem blong blokem trabol taem hem i no save obei long ol haeman? (b) ?Trifala yangfala Hibru oli mekem wanem taem king i talem long trifala blong mekem samting we i agensem loa blong God?

¹⁴ Daniel mo trifala fren blong hem oli soem wan nambawan eksampol olsem wanem blong stap aninit long rul blong God mo ona long gavman tu. Taem ol fo Hibru yangfala ya oli stap kalabus long Babilon, oli obei long ol loa blong kantri ya, mo from samting ya ol haeman blong Babilon oli jusum olgeta blong kasem spesel trening. Daniel i luksave se sam samting long trening ya oli agensem Loa blong Jeova, ale hem i storian long saed ya wetem haeman we i stap bos long olgeta. Nao haeman ya i agri blong jenisim sam samting blong respektem bilif blong ol Hibru boe ya, ale olgeta oli save gohed blong holem wan klin tingting long fored blong God. (Daniel 1:8-17) Ol Witnes blong Jeova oli mekem olsem Daniel. Long kaen fasin, oli eksplenem disisen blong olgeta long ol haeman, nao samting ya i givhan blong blokem plante trabol.

¹⁵ Be biaen, ol Hibru yangfala oli no save blokem trabol we i kamaot taem king blong Babilon i givim wan oda we trifala i no save obei long hem. King i stanemap wan bigfala aedol long levelples blong Dura, nao hem i singaot ol bigman blong hem, wetem ol haeman blong olgeta distrik, oli kam wanples blong mekem wan seremoni blong putumap aedol ya. Long taem ya, trifala fren blong Daniel oli wok olsem ol haeman long distrik blong Babilon, ale trifala ya tu i mas kam. Wan haf blong seremoni we oli mekem, se olgeta man we oli hivap oli mas bodaon long fored blong aedol ya. Be ol Hibru ya oli save se sipos oli mekem olsem, bambae oli brekem loa blong God. (Dutronome 5:8-10) Ale, ol narafala oli bodaon, be trifala ya oli stanap i stap nomo. Trifala ya oli save se sipos oli no obei long king, hem i save kilim olgeta i ded long wan fasin we i nogud tumas, be trifala i jusum blong ded bitim we oli brekem loa blong Jeova. Ale, wan merikel i sevem laef blong trifala ya.—Daniel 2:49 kasem 3:29.

16, 17. ?Ol aposol oli mekem wanem taem ol haeman oli talem long olgeta blong no moa prij, mo from wanem oli mekem olsem?

¹⁶ Long faswan handred yia, ol lida blong ol man Jiu long Jerusalem oli singaot ol aposol blong Jisas Kraes, nao oli talem long olgeta blong no moa talemaot ol tok long nem blong Jisas. ?Ol aposol ya oli mekem wanem? Jisas i bin talem long olgeta blong go long ol man blong olgeta kantri mo pulum olgeta oli kam man blong hem. Hemia i minim Judia tu. Mo Jisas i talem long olgeta blong talemaot hem long Jerusalem mo long olgeta narafala ples blong wol. (Matiu 28:19, 20; Ol Wok 1:8) Ol aposol ya oli luksave se ol tok blong Jisas i stap soemaot samting we God i wantem olgeta blong mekem. (Jon 5:30; 8:28) Taswe, oli talem se: “Mifala i mas obei long God, mifala i no save obei long man.”—Ol Wok 4:19, 20; 5:29.

¹⁷ Ol aposol ya oli no stap mekem stronghed. (Ol Proveb 24:21) Be, oli no save obei long ol haeman ya we oli wantem blokem olgeta blong mekem samting we God i talem se oli mas mekem. I no gat narafala rod, oli mas talem se, ‘Mifala i mas obei long God, i no ol man.’ Jisas i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Mak 12:17) Sipos yumi no obei long tok blong God from we wan man i talem long yumi blong no obei, yumi stap givimbak long man ya samting we i blong God. Yumi no mas mekem olsem. I tru, yumi mas givimbak samting we i blong Sisa i go long Sisa, be yumi mas luksave se Jeova i hae moa long Sisa. Hem i King blong heven mo wol, hem i Bigman we i Wokem yumi, mo i no gat wan man i save kasem haenem mo paoa sipos Hem i no letem.—Revelesen 4:11.

Bambae Yumi Stanap Strong

18, 19. ?Wanem nambawan fasin we plante Kristin brata blong yumi oli stap folem, mo olsem wanem yumi save mekem olsem olgeta ya?

¹⁸ Plante gavman blong wol oli luksave se ol Witnes blong Jeova oli no joen long politik, be oli no agensem ol Witnes from. Yumi talem tangkiu long olgeta. Be long sam kantri, gavman i mekem bigfala trabol long ol Witnes. Long ol yia 1900 kam kasem naoia, sam Kristin brata mo sista oli kasem hadtaem, be oli gohed nomo blong stanap strong. Yes, ‘oli traehad blong gohed gud long Kristin laef blong olgeta, olsem man we i traehad long resis blong hem i win.’—1 Timoti 6:12.

¹⁹ ?Olsem wanem yumi save stanap strong olsem olgeta ya? Faswan samting: Yumi no mas fogetem se, bambae yumi mas kasem trabol. Yumi no mas sek mo sapraes taem oli agensem yumi. Pol i givim woning long Timoti se: “Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:12; 1 Pita 4:12) Long wol ya we Setan i bos long hem, yumi save se i mas gat samfala we oli agensem yumi. (Revelesen 12:17) Sipos yumi strong blong holem bilif blong yumi, oltaem i mas gat samfala we oli ‘sapraes tumas long fasin blong yumi, mo oli tok nogud long yumi.’—1 Pita 4:4.

20. ?Wanem ol trutok we oli save mekem tingting blong yumi i strong?

²⁰ Namba tu samting se, yumi bilif strong we Jeova mo ol enjel blong hem oli stap sapotem yumi. Long taem bifo, Elisa i bin talem se: “Olgeta long saed blong yumi oli plante moa, i winim olgeta ya.” (2 King 6:16; Ol Sam 34:7) Maet Jeova i gat wan gudfala risen blong letem ol man oli stap agensem yumi longtaem lelebet. Nating se i olsem wanem, oltaem bambae hem i givim paoa we yumi nidim blong stanap strong. (Aesea 41:9, 10) Sam Kristin oli bin lusum laef blong olgeta, be samting ya i no mekem yumi fraet. Jisas i talem se: “Bambae yufala i no fraet long olgeta ya we oli save kilim yufala i ded, be oli no save kilim [“sol,” NW ] blong yufala. Yufala i mas fraet long God, we hem nomo i gat raet blong mekem bodi mo [“sol,” NW ] blong yufala, tufala i lus wantaem long [“Gehena,” NW ].” (Matiu 10:16-23, 28) Yumi stap olsem “ol man we oli no gat hom blong olgeta” long wol ya. Yumi stap yusum taem blong yumi long rabis wol ya blong “kasem laef ya we i prapa wan,” hemia laef we i no save finis long niufala wol we God bambae i mekem. (1 Pita 2:11; 1 Timoti 6:19) I no gat wan man we i save tekemaot presen ya long yumi sipos yumi holemstrong long God.

21. ?Oltaem yumi mas tingbaot wanem?

²¹ Taswe, yumi no mas fogetem nambawan blesing we yumi gat blong stap olsem fren blong Jeova God. Mo yumi mas gat tangkiu from blesing ya blong stap olsem man blong Kraes mo blong stap aninit long rul blong Kingdom. Yumi mas lavem ol Kristin brata mo sista blong yumi wetem fulhat blong yumi, mo yumi mas haremgud oltaem long lav we oli soemaot long yumi. Antap moa, yumi mas obei long tok blong Sam ya se: “Yumi mas trastem Hae God, mo yumi mas bilif long hem. Yumi no mas letem tingting blong yumi i foldaon, oltaem yumi mas trastem hem.” (Ol Sam 27:14; Aesea 54:17) Sipos yumi mekem ol samting ya, bambae yumi olsem fulap Kristin we oli laef bifo long yumi. Bambae yumi stanap strong wetem wan tingting we i sua long saed blong fiuja blong yumi. Yes, bambae yumi ol gudfala Kristin we oli no joen nating long wol ya.

?Yu Yu Save Eksplenem?

• ?Olsem wanem fasin blong yumi blong fren wetem Jeova i mekem se yumi no joen nating long wol ya?

• ?Olsem wanem ol man we oli stap aninit long Kingdom blong God oli no joen nating long wol ya?

• ?Olsem wanem lav we yumi gat long ol Kristin brata blong yumi i mekem se yumi no joen nating long wol ya?

[Tok blong pija long pej 15]

?Taem yumi obei long Kingdom blong God, yumi mekem wanem fasin long ol man blong wol?

[Tok blong pija long pej 16]

Wan Hutu mo wan Tutsi, we tufala i glad tumas blong wok wanples

[Tok blong pija long pej 17]

Ol Jiu mo ol Arab we oli Kristin brata

[Tok blong pija long pej 17]

Ol Kristin blong Sebia, Bosnia, mo Kroasia, oli harem gud blong kampani tugeta

[Tok blong pija long pej 18]

?I stret blong mekem wanem taem ol haeman oli talem long yumi blong brekem loa blong God?