Laef Stori

Mifala i Holemtaet Wok We Oli Givim Long Mifala

HERMANN BRUDER I TALEM STORI YA

Mi mas jusum bitwin tufala samting ya: joen long Franis ami we oli kolem Foreign Legion blong faef yia, no go kalabus long Moroko. Bambae mi eksplenem long yu from wanem mi mas tekem wan disisen olsem.

MI MI bon long Oppenau, Jemani, long 1911, tri yia nomo bifo we Wol Wo Wan i stat. Joseph mo Frida Bruder, papa mama blong mi, tufala i gat 17 pikinini. Mi mi namba 13 blong ol pikinini ya.

Mi rimemba we taem mi wan smol boe yet, mi luk wan ban blong ami i stap maj long big rod blong taon blong mifala. Mi laekem tumas tiun blong maj ya, taswe mi stap folem ban ya go kasem stesen blong tren. Mi kasem ples ya long stret taem blong luk Papa mo sam narafala man long yunifom blong ami, oli stap klaem insaed long tren. Taem tren i aot, mi luk sam woman oli stat krae bigwan. Smoltaem biaen, pasta blong mifala i givim wan longfala tok long jos, mo i talemaot nem blong fofala man we oli ded long faet, blong protektem kantri blong olgeta. Pasta i talem se, “naoia, oli stap long heven.” Wan woman klosap long mi i foldaon we ae blong hem i dak.

Taem Papa i stap long faet long Rasia hem i kasem fiva ya we oli kolem typhoid. Hem i sik bigwan taem hem i kambak long haos, mo kwiktaem nomo oli karem hem i go long hospital. Pris i talem long mi se, “I gud yu go long jos klosap long beregraon, mo yu talem Prea blong Masta 50 taem, mo Presem Meri 50 taem tu. Ale papa blong yu i save kam gud bakegen.” Mi folem advaes blong pris ya, be nomata long ol prea blong mi, Papa i ded long nekis dei. Mi wan yangfala boe yet, be faet i mekem mi mi harem nogud.

Olsem Wanem Mi Faenem Trutok

I had blong faenem wok long Jemani long ol yia bitwin long tufala wol wo. Nating se i olsem, long 1928 mi finisim skul, mo mi faenem wan wok olsem man blong wok long garen, long Basel, Swiselan.

Mi mi wan strong Katolik, olsem Papa blong mi. Mi wantem tumas blong wok long India olsem ol pris we oli kolem olgeta ol Capuchin. Long taem ya, Richard, brata blong mi, i wan Witnes blong Jeova finis. Taem hem i harem nius ya, hem i kam long Swiselan blong traem jenisim tingting blong mi. Hem i givim woning long mi se i denja blong trastem ol man, speseli ol lida blong skul, mo i leftemap tingting blong mi blong mi ridim Baebol mo mi trastem Baebol nomo. Nating se mi no bilivim evri samting we Richard i talem long mi, be mi kasem wan Niutesteman mo mi stat ridim hem. Sloslo, mi luk we plante long ol bilif blong mi oli no laenap wetem tijing blong Baebol.

Wan Sande long 1933, mi stap long haos blong Richard long Jemani, mo long ples ya mi mitim wan man wetem waef blong hem, we tufala i Witnes blong Jeova. Taem oli save se mi stap ridim Baebol, oli givim buklet ya long mi, The Crisis.a Mi ridim buklet ya gogo i klosap medel naet. !Yes, mi sua we mi faenem trutok ya!

Ol Witnes blong Jeova long Basel oli givim long mi, tufala buk ya, Studies in the Scriptures* wetem sam magasin mo sam narafala buk tu. Ol samting we mi stap ridim oli gat paoa long mi. Taswe mi go luk pris long eria we mi stap long hem, mo mi askem hem blong i karemaot nem blong mi long rejista blong jos. Pris ya i kros tumas, mo i givim woning long mi se bambae mi lusum bilif blong mi. Be hem i giaman nomo. Naoia we mi save trutok, hem i faswan taem long laef blong mi we mi stat wokem trufala bilif.

Ol brata long Basel oli plan blong go prij long Franis, long wiken ya. Wan brata i kaengud wetem mi, i eksplenem long mi se oli no askem long mi blong go prij wetem olgeta, from we mi joen wetem kongregesen i no longtaem. Nomata long ol tok blong hem we oli kaengud, mi talem long hem se mi wantem tumas blong stat joen long wok blong prij. Hem i storian wetem wan narafala elda, mo biaen oli agri se bambae mi go prij long wan teritori long Swiselan. Eli long Sande moning, mi ron long baskel blong mi go kasem wan smol vilej klosap long Basel. Mi karem 4 buk, 28 magasin, mo 20 buklet long basket blong mi. Bighaf blong ol man oli stap long jos taem mi kam long vilej. Nating se i olsem, mi seremaot evri buk blong mi bifo long 11 klok.

Taem mi talem long ol brata se mi wantem tekem baptaes, oli storiangud wetem mi. Oli askem ol dip kwestin long mi long saed blong trutok. Mi sapraes mo mi haremgud taem mi luk we ol brata ya oli wok strong mo oli stap tru long Jeova mo ogenaesesen blong hem. Mi tekem baptaes long wan bigfala besin blong swim long haos blong wan elda, from we long taem ya i koltaem. Mi rimemba se mi harem wan glad we mi no save eksplenem, mo mi harem tingting blong mi i strong. Taem ya we mi tekem baptaes hemia long 1934.

Wok Long Kingdom Fam

Long 1936, mi harem nius se ol Witnes blong Jeova oli pem wan pis graon long Swiselan. Mi talem se mi wantem volontia blong wok olsem wan man blong wok long garen. Mi glad tumas taem oli agri se mi go wok long Kingdom Fam long Steffisburg, we i stap samwe 30 kilometa longwe long Bern. Taem wok blong mi i finis, mi go givhan long ol narafala blong mekem wok blong olgeta long fam. Laef long Betel i tijim mi se i impoten blong gat fasin ya blong wokgud tugeta.

Taem mi stap long Betel, wan impoten samting i hapen long laef blong mi: Brata Rutherford i kam visitim fam long 1936. Taem hem i luk ol tomato we oli bigwan mo oli plante, hem i smael, mo i talem se hem i glad long wok blong mifala. !Hem i wan gudfala brata!

Mi bin wok long fam blong tri yia finis. Wan moning, taem mifala i dring ti, oli ridim wan leta long mifala we i kamaot long hedkwota blong ol Witnes blong Jeova. Leta ya i poenemaot se i impoten blong prij, mo i singaot olgeta man we oli intres blong go mekem wok blong paenia long narafala kantri. Wantaem nomo, mi volontia. Long Mei 1939, oli talem long mi weples bambae mi go prij long hem—!long Brasil!

Long taem ya, mi stap go long ol miting long Kongregesen blong Thun, klosap long Kingdom Fam. Evri Sande, wan grup i go prij long ol bigbigfala hil ya Alps, we i stap longwe olsem tu aoa sipos mifala i go wetem wan baskel. Margaritha Steiner i joen long grup ya. Mi stap tingting se: Taem Jisas i sanem ol disaepol blong hem oli go prij, hem i sanem olgeta oli go tutu. Ale, wan dei mi talem long Margaritha se bambae mi mi go prij long Brasil. Mo hem i ansa se hem tu, i intres blong go prij long ol ples we i gat nid long hem. Mitufala i mared long Julae 31, 1939.

Mifala i Sek Blong Stap Long Ples Ya

Long en blong Ogis 1939, mifala i tekem wan sip we i livim Le Havre, long Franis, blong go long Santos, Brasil. Olgeta rum we oli naf blong holem tu man oli fulap finis, taswe mi mo Margaritha, mitufala i mas stap long tu defren rum. Sip i stap ron yet taem mifala i kasem nius se Inglan mo Franis, tufala i talemaot se tufala i rere blong faet agensem Jemani. I gat wan grup blong 30 man Jemani i stap long sip, mo taem oli harem nius ya, oli singsing nasnal singsing blong Jemani. Kapten blong sip i harem nogud tumas from samting ya. Taswe, hem i jenisim rod blong sip i goso long Safi, Moroko. Olgeta man we oli holem paspot blong Jemani mo oli stap long sip ya oli gat faef menet blong goaot long sip. Hemia i minim we mitufala tu i mas aot.

Wan ful dei, oli holem mifala long polis stesen. Biaen, oli putum mifala evriwan long wan smol bas we i olfala finis mo i muvmuf plante, nao oli sanem mifala i go long kalabus long Marrakech, klosap 140 kilometa longwe long Safi. Ol dei we oli kam biaen oli had we oli had. I gat plante tumas man i stap long ol smol rum blong kalabus, mo ol rum ya oli tudak. I gat wan toelet nomo we evri man i save yusum—wan hol long floa—be hem i fas oltaem nomo. Mifala evriwan i kasem wan doti bag blong slip long hem, mo long naet, ol rat oli stap kakae baksaed blong leg blong mifala. Tu taem long wan dei, oli givim smol kakae long mifala long wan tin we i roten.

Wan ofisa blong ami i eksplenem se oli save letem mi mi aot long kalabus, sipos mi agri blong wok blong faef yia long Franis ami we oli kolem Foreign Legion. From we mi no wantem, oli putum mi long wan blak hol we i nogud olgeta blong 24 aoa. Long bighaf blong taem we mi spenem long hol ya, mi prea long Jeova.

Eit dei biaen, ol haeman blong kalabus oli letem mi mi luk Margaritha bakegen. Hem i bunbun tumas, mo i stap krakrae we i no save stop. Mi traem bes blong mi blong leftemap tingting blong hem. Oli askem plante kwestin long mifala, mo oli sanem mifala i go long Casablanca long wan tren. Long ples ya oli letem Margaritha i gofri. Oli sanem mi mi go long kalabus long Port Lyautey (we tede oli kolem Kenitra), we i stap raonabaot 180 kilometa longwe. Ambasada blong Swiselan long Moroko i talem long Margaritha se i moagud sipos hem i gobak long Swiselan. Be hem i stap tru long mi, i talem se hem i no save gobak sipos mi mi stap. Mi stap long Port Lyautey blong tu manis. Mo long tufala manis ya, Margaritha i aot long Casablanca evri dei blong kam visitim mi mo karem kakae i kam long mi.

Wan yia bifo we samting ya i hapen, ol Witnes blong Jeova oli bin wokem wan buk we nem blong hem Kreuzzug gegen das Christentum (Krused Agensem Kristin Skul) blong ol man oli luksave se ol Witnes oli no tekpat long politik blong ol Nasi. Taem mi stap long kalabus, Branj Ofis blong ol Witnes blong Jeova long Bern i raet i go long Franis gavman, mo i sanem buk ya i go long hem tu. Hemia i blong pruvum se mifala i no joenem ol Nasi. Margaritha tu i mekem wan gudfala wok. Hem i go visitim ol haeman blong gavman, mo i traem pruvum long olgeta se mifala i no mekem wan samting we i rong. Ale, long en blong 1939, oli letem mitufala i aot long Moroko.

Mifala i klaem long sip bakegen blong go long Brasil, mo mifala i stap finis long sip taem mifala i harem wan nius: ol sabmarin blong Jemani oli stap sutum ol sip we oli gokros long Atlantik, mo oli wantem sutum sip blong mifala tu. Nating se sip ya we nem blong hem Jamaique, i blong karem ol man wetem ol kago nomo, be hem i gat ol bigfala masket long fored mo long bak blong hem. Long dei, kapten i mekem sip i go long lef, afta i go long raet, mo oltaem hem i stap sutum ol bigbigfala bolet. Long naet, mifala i kilim evri laet long sip mo mifala i no gat raet blong yusum radio, blong ol man Jemani oli no save faenem mifala. !Mifala i haremgud tumas taem mifala i goso long Santos, Brasil, long Februari 6, 1940, bitim faef manis afta we mitufala i bin livim Yurop!

Gobak Long Kalabus

Faswan ples we mitufala i go prij long hem, hemia Montenegro, wan taon long saot blong Rio Grande do Sul, wan stet long Brasil. I luk olsem se ol lida blong jos oli save finis se bambae mitufala i kam. Mitufala i bin prij tu aoa nomo, nao polis i arestem mitufala. Oli tekemaot ol disk blong mitufala we i gat ol tok blong Baebol long olgeta, wetem ol buk blong mitufala, mo ol basket blong mitufala we oli wokem long skin blong kamel tu, we mitufala i bin pem long Moroko. Wan pris mo wan narafala man blong skul we i toktok lanwis Jemani, tufala i stap wet long mitufala long polis stesen. Jif blong polis i tekem wan disk we i gat tok blong Brata Rutherford long hem, i putum long gramafon blong mitufala, (we hem tu oli bin karemaot long mitufala) mo pris wetem narafala man ya tufala i stap lesin long tok. !Brata Rutherford i tok stret nomo mo i no haedem wan samting! Wan haf blong tok blong hem i tokbaot Vatikan. Taem pris i lesin long haf ya, fes blong hem i kam red fulwan, hem i kros tumas, mo i wokbaot i goaot wantaem.

Bisop blong Santa Maria i askem long polis blong oli sanem mitufala i go long Pôrto Alegre, wan bigfala taon blong stet ya. Smoltaem biaen oli letem Margaritha i gofri. Ale hem i go long ofis blong ambasada blong Swiselan, blong oli halpem mitufala. Ambasada i talem se i moa gud sipos hem i gobak long Swiselan. Bakegen, Margaritha i no wantem lego mi. Oltaem, Margaritha i bin stap tru long mi. Teti dei i pas, nao oli askem plante kwestin long mi, mo oli letem mi mi gofri. Polis i talem se mitufala i mas jusum: mitufala i mas livim kantri bifo ten dei i pas, sipos no bambae mitufala “i mas fesem hadtaem.” Mitufala i folem advaes blong hedkwota, ale, mitufala i muv i go long Rio de Janeiro.

“Plis Yu Ridim Kad Ya”

!Nating se faswan wok blong prij blong mitufala long Brasil i no statgud, be mitufala i glad! Mitufala i laef yet, ol basket blong mitufala oli fulap long ol buk, mo mitufala i gat bigfala teritori ya Rio de Janeiro blong prij long hem. ?Be olsem wanem bambae mitufala i save prij sipos mitufala i no save toktok lanwis Potugal? Mitufala i yusum ol kad we i gat mesej blong Baebol i stap long hem. Faswan tok we mitufala i lanem long lanwis Potugal, hemia se, “Por favor, leia este cartão” (“Plis yu ridim kad ya”). !Mitufala i faenem plante man we oli intres! Long wan manis nomo, mitufala i seremaot bitim 1,000 buk. Plante long ol man we oli akseptem ol buk we oli tokbaot Baebol, oli kam long trutok biaen. Blong talem tru, ol buk we mitufala i seremaot oli gat moa paoa long ol man i bitim eni tok we mitufala i save talem. Samting ya i soem long mi se i impoten we ol man we oli intres oli kasem ol buk blong mifala.

Long taem ya, Rio de Janeiro i bigfala taon blong Brasil, mo olgeta we oli stap wok long ol bilding blong gavman oli glad blong kasem mesej blong mifala. Mi gat janis blong talemaot gud nius long minista blong faenans, mo long minista blong ami tu. Long taem olsem, mi luksave we tabu spirit blong Jeova i stap wok.

Wan dei, mi stap prij long wan ples long medel blong Rio, mo mi go insaed long Bigfala Kot Haos. Mi no save olsem wanem, be mi go long wan rum we i fulap long ol man we oli werem ol blak klos. I olsem se oli stap mekem wan funrol sevis. Mi go klosap long wan man we i luk olsem se hem i wan impoten man, mo mi givim kad we i gat mesej blong Baebol, long hem. Nao mi faenemaot se hemia i no wan funrol ya. Mi mi stopem olgeta long medel blong wan kot kes, mo mi stap toktok wetem jaj ya. Jaj i laf nomo, mo i talem long ol gad blong oli no wari. Hem i kaen tumas mo i agri blong tekem wan kopi blong buk ya, Childrenb mo i givim presen mane. Taem mi aot, wan gad i soem long mi wan notis we i stap long klia ples long doa. Notis ya i talem se: Proibida a entrada de pessoas estranhas (Tabu Blong Ol Strenja i Kam Insaed).

I gat wan narafala teritori we i karem plante frut, hemia teritori blong haba. Wan dei, mi storian wetem wan boskru mo hem i glad blong tekem sam buk bifo we hem i gobak long si. Biaen, mi luk hem bakegen long wan asembli. Ful famle blong hem i kam long trutok, mo hem tu i stap gohedgud long saed blong spirit. Samting ya i mekem mitufala i haremgud tumas.

Be i no oltaem we ol samting oli isi olsemia. Visa blong mitufala we i las sikis manis i finis finis, mo mitufala i fraet we gavman i sakemaot mitufala long kantri. Afta we mitufala i raetem wan leta i go long hedkwota blong eksplenem samting ya, Brata Rutherford i sanem wan naesfala leta long mitufala. Hem i leftemap tingting blong mitufala blong mitufala i gohed, mo i givim sam advaes blong mitufala i save stap long kantri. Mitufala i wantem tumas blong stap long Brasil, mo mitufala i askem help long wan loea. Ale, long 1945 mitufala i kasem visa blong stap oltaem long Brasil.

Mifala i Stap Long Brasil Blong Prij

Be bifo long samting ya, Jonathan, boe blong mitufala, i bon long 1941, Ruth i bon long 1943, mo Esther i bon long 1945. Taswe mi mas faenem wan wok blong lukaot long nid blong famle blong mifala we i kam bigwan. Margaritha i gohed long fultaem wok blong prij go kasem taem we namba tri pikinini blong mitufala i bon.

Stat wetem fasbon blong mitufala, mifala i joen tugeta olsem wan famle long wok blong prij long ol pablik ples long taon, long ol stesen blong tren, long ol rod, mo long ol ples blong bisnes. Evri Sarede long naet, mifala i seremaot ol Wajtaoa mo Wekap!, mo ful famle i haremgud blong mekem samting ya.

Long haos, evri pikinini i gat prapa wok blong hem. Jonathan i mas klinim oven mo kijin tu. Tufala gel i klinim aesbokis, i brumum yad, mo i klinim sus blong mifala. Samting ya i givhan long olgeta blong oli no olbaot, mo oli naf blong mekem wok olgeta nomo. Tede, ol pikinini blong mitufala oli man mo woman we oli wokhad, oli lukaotgud long famle blong olgeta wanwan mo long olting blong olgeta. Mi wetem Margaritha, mitufala i glad blong luk samting ya.

Mo tu, mitufala i wantem se ol pikinini oli gat gud fasin taem oli go long ol miting. Bifo we program i stat, oli dring wan glas wota mo oli go long toelet. Long taem blong miting, Jonathan i sidaon long lefsaed blong mi, Ruth i stap long raetsaed blong mi klosap long Margaritha, mo long raetsaed blong Margaritha, i gat Esther i stap. Olsemia, oli save tingting dip mo tekem ol kakae long saed blong spirit taem oli yang yet.

Jeova i blesem ol traehad blong mitufala. Olgeta pikinini blong mitufala oli gohed yet long wok blong Jeova mo oli glad tumas blong joen long wok blong prij. Tede Jonathan i wok olsem wan elda long Kongregesen blong Novo Méier, long Rio de Janeiro.

Long 1970, ol pikinini blong mitufala oli mared mo oli lego haos finis. Taswe, mi wetem Margaritha mitufala i tekem disisen blong muv i go wok long wan ples we i gat bigfala nid long hem. Faswan ples we mitufala i go long hem, hemia Poços de Caldas, long Stet blong Minas Gerais. Long taem ya i gat 19 pablisa i stap long smol grup ya. Mi harem nogud tumas taem mi luk ples we oli mekem ol miting long hem. Ples ya i wan rum, aninit long graon, we i no gat windo long hem, mo i gat plante samting we mifala i mas fiksimap. Kwiktaem nomo, mifala i stat lukluk blong faenem wan Haos Kingdom we i moa gud. Ale mifala i faenem wan naesfala bilding,

long wan gudfala ples. !Haos Kingdom ya i defren olgeta! Bitim fo yia i pas, mo namba blong pablisa i gru kasem 155 man. Long 1989 mitufala i muv i go long Araruama, long Rio de Janeiro, mo mitufala i stap wok long ples ya blong naen yia. Long taem ya, mitufala i luk tu niufala kongregesen i stanap.

Ol Blesing From Wok Blong Mitufala

Long 1998, mitufala i stat gat smol problem long helt mo mitufala i wantem stap klosap long ol pikinini blong mitufala. Taswe mitufala i muv i go long São Gonçalo, Rio de Janeiro. Mi stap wok yet olsem wan elda long kongregesen ya. Mitufala i traem bes blong mitufala blong joen oltaem long wok blong prij. Margaritha i glad blong prij long ol man long wan bigfala stoa, klosap long haos blong mitufala. Mo tu, kongregesen i kaen wetem mitufala, i givim sam teritori we i stap klosap long haos blong mitufala. Olsem nao, i moa isi long mitufala blong go prij long ol teritori ya, taem helt blong mitufala i oraet.

Mi wetem Margaritha, mitufala i bin mekem wok blong Jeova bitim 60 yia finis. Long laef blong mitufala, mitufala i luksave klia se ‘i no gat sam haeman, no sam narafala paoa long heven, i no gat wan samting we i stap finis, no wan samting we bambae i kam, i no gat samting blong ples blong God, mo i no gat samting long Hom blong ol Dedman, we i save tekemaot yumi long hem. I no gat wan samting nating long olgeta samting we God i mekem, we i save tekemaot yumi long God, we hem i lavem yumi ya tumas, we yumi joen long Jisas Kraes, Masta blong yumi.’ (Rom 8:38, 39) !Mo mitufala i haremgud tumas blong joen long wok blong hivimap “ol narafala sipsip,” we oli gat nambawan hop ya blong laef foreva long wan wol we i stretgud, wetem ol naesfala samting we God i wokem! (Jon 10:16) Long 1940 taem mitufala i kam long Rio de Janeiro, i gat wan kongregesen nomo wetem 28 pablisa long hem. Tede i gat klosap 250 kongregesen, wetem bitim 20,000 man blong talemaot Kingdom.

Sipos mitufala i wantem, mitufala i bin gat janis blong gobak long Yurop, long ol famle blong mitufala. Be Jeova i sanem mitufala blong mitufala i kam prij long ples ya, long Brasil. !Mitufala i glad tumas blong holemtaet wok we oli bin givim long mitufala!

[Ol Futnot]

[Tok blong pija long pej 21]

Long Kingdom Fam, Steffisburg, Swiselan, long en blong ol yia 1930 (mi stap long lefsaed olgeta)

[Tok blong pija long pej 23]

Jes bifo long mared blong mitufala, 1939

[Tok blong pija long pej 23]

Casablanca long ol yia 1940

[Tok blong pija long pej 23]

Mifala i stap prij olsem wan famle

[Tok blong pija long pej 24]

Tede mitufala i gohed yet long wok blong prij