?God i Jenisim Yu Finis?

1, 2. ?Ol fasin we yumi gruap wetem oli save gat paoa long yumi olsem wanem?

YUMI evriwan, yumi mekem ol fasin we yumi gruap wetem mo ol fasin we ol fren blong yumi, kastom blong yumi, mo ol man raonabaot long yumi, oli gat. Taswe yumi laekem sam kaen kakae, sam stael blong klos, mo yumi folem wan kaen fasin.

² Be i gat sam samting we oli moa impoten i bitim fasin blong yumi blong putum klos mo samting we yumi kakae. Taem yumi stap gruap, yumi lanem se sam samting oli stret mo sam samting oli no stret. Be ol man oli gat defdefren tingting long saed blong samting we i stret mo samting we i no stret. Samting we yumi jusum i save soemaot tu se tingting blong yumi i olsem wanem. Baebol i talem se plante taem, ‘olgeta ya we oli no save Loa ya, oli gohed long tingting blong olgeta nomo, nao oli stap mekem ol samting olsem we Loa ya i talem, i olsem we olgeta oli gat Loa ya finis.’ (Rom 2:14) Be sipos i gat sam samting we i no gat loa blong God long olgeta, ?yu ting se yumi save folem tingting blong famle blong yumi nomo no blong ol man raonabaot long yumi?

 3. ?Wanem tufala risen we i mekem se ol Kristin oli no folem fasin blong ol man blong wol?

³ Ol Kristin oli no mekem olsem from tu risen. Faswan, Baebol i talem se: “I gat rod i stap we man i ting se i stret gud, be hem i rod blong ded nomo.” (Prov. 16:25) Yumi sinman, taswe yumi no naf blong luksave stret rod we bambae i givhan long yumi. (Prov. 28:26; Jer. 10:23) Sekenwan, Baebol i talem se Setan i “rabis god blong wol ya.” Hem i bos long ol man blong wol mo i pulum olgeta blong oli folem prapa tingting blong olgeta long samting we i stret mo i no stret. (2 Kor. 4:4; 1 Jon 5:19) Sipos yumi wantem se Jehova i glad long yumi mo i blesem yumi, yumi mas obei long tok we i stap long Rom 12:2.—Ridim.

 4. ?Bambae yumi tokbaot wanem long stadi ya?

⁴ Long stadi ya, bambae yumi tokbaot tri impoten poen long Rom 12:2. Trifala poen ya hemia: (1) ?From wanem God i mas “jenisim” yumi? (2) ?Yumi mas jenisim wanem? (3) ?God i jenisim tingting blong yumi olsem wanem?

 5. ?Ol tok blong Pol long Rom 12:2 i go long hu?

⁵ Taem Pol i raetem leta long ol man Rom long yia 56, hem i no raet i go long olgeta man we oli stap long Rom. Hem i raet i go long ol Kristin we tabu spirit i makemaot olgeta. (Rom 1:7) Hem i pulum olgeta blong oli letem God i jenisim olgeta, mo blong oli ‘no letem fasin blong olgeta i kam olsem fasin blong ol man long wol.’ Tok ya i min se ol Kristin long Rom oli no mas folem ol rul, ol kastom, ol fasin, mo stael blong klos blong ol man Rom. Pol i yusum tok ya ‘no letem,’ from we sam long ol Kristin ya oli stap folem yet fasin mo tingting blong ol man Rom. ?Samting ya i gat paoa long olgeta olsem wanem?

6, 7. Long taem blong Pol, ?from wanem i no isi blong wan man i kam Kristin long Rom?

⁶ Taem ol turis oli go long Rom tede, oli save luk ol olfala ston blong ol tempol, ol gref, mo ol bigbigfala haos we ol man Rom oli bildim plante taosen yia bifo. Ol olfala haos ya oli soemaot fasin blong laef blong ol man Rom bifo, mo wosip blong olgeta. Ol buk blong histri tu oli tokbaot ol gem we ol man oli faet wetem ol anamol long ol bigfala stadium, ol man oli resis long ol kat we hos i pulum, mo ol pleplei mo miusik we samtaem oli tokbaot rabis fasin blong man wetem woman. Rom i wan taon we i rij, mo ol man oli gat plante janis blong winim plante mane.—Rom 6:21; 1 Pita 4:3, 4.

⁷ Ol man Rom oli gat plante tempol mo oli wosipim plante god. Be bighaf blong olgeta oli no traem blong fren gud wetem ol god ya. Ol man Rom oli wosip nomo taem i gat ol spesel kastom, olsem taem bebi i bon, taem man i mared, mo taem man i ded. Oli folem ol kastom ya oltaem. Taswe, i no isi blong wan man i kam Kristin long Rom. Plante long olgeta oli gruap wetem fasin ya blong wosipim ol giaman god, taswe oli mas jenis blong oli save kam Kristin. Nating sipos oli baptaes finis, be oli mas gohed yet blong jenis.

 8. ?From wanem wol tede i save spolem ol Kristin?

⁸ Long sem fasin, wol tede i save spolem ol Kristin. ?From wanem? From we spirit blong wol i stap long evri ples. (Ridim Efesas 2:2, 3; 1 Jon 2:16.) Ol man blong wol oli traem pulum yumi blong wantem tumas ol samting blong wol, mo blong yumi gat ol fasin mo tingting blong wol. Mo sipos yumi no lukaot gud, yumi tu yumi save folem fasin blong olgeta. Taswe yumi mas obei long advaes ya blong ‘no letem fasin blong yumi i kam olsem fasin blong ol man long wol,’ mo blong yumi letem God i “jenisim” yumi. ?Olsem wanem blong mekem samting ya?

 9. ?Wanem jenis we plante man oli mekem blong oli naf blong baptaes?

⁹ Taem wan man i stadi Baebol mo i folem long laef blong hem, hem i stat blong kam klosap long Jehova. Hem i lego ol giaman skul mo i jenisim sam samting long laef blong hem. Hem i traehad blong wokem ol Kristin fasin mo blong folem eksampol blong Jisas. (Efes. 4:22-24) Yumi glad tumas blong luk plante taosen man oli traehad olsem evri yia, mo oli givim laef blong olgeta long Jehova, mo oli baptaes. Samting ya i mekem Jehova i glad. (Prov. 27:11) ?Be yu ting se man i mas jenisim ol samting ya nomo?

10. Taem yumi jenis, ?from wanem hemia i no minim nomo se fasin blong yumi i kamgud?

¹⁰ Taem yumi jenis, hemia i no minim nomo se yumi gohed gud no yumi mekem fasin blong yumi i kamgud moa. Yumi traem tingbaot wan tin long stoa. Maet oli raetem long pepa blong hem se oli jenisim ol samting insaed. Plante taem oli ademap wan niufala samting nomo long hem, no maet oli jenisim pepa blong hem. Be ol samting insaed long tin ya i sem mak nomo. Wan buk i talem se tok ya “jenisim” long Rom 12:2, i min se tabu spirit i givhan long man blong i jenisim tingting blong hem. Taswe sipos wan Kristin i no moa folem ol rabis fasin, mo i no moa talem ol rabis tok, hemia i no min se hem i jenis. Sam man we oli no save Baebol, olgeta tu oli traem blong no mekem ol rabis fasin ya. Taswe, ?yumi ol Kristin, yumi mas mekem wanem blong yumi jenisim fasin blong yumi blong tingting?

11. ?Pol i talem se ol Kristin oli mas mekem wanem blong oli jenisim tingting blong olgeta?

¹¹ Pol i raetem se: “Yufala i mas letem God i jenisim tingting blong yufala, blong mekem tingting blong yufala i niuwan olgeta.” Taem Baebol i yusum tok ya “tingting,” hem i save minim samting we yumi laekem blong tingbaot, wetem fasin ya blong tingting gud long wan bisnes. Long leta blong hem, Pol i tokbaot ol man we oli “gohed blong folem ol krangke tingting blong olgeta” from we oli “stap mekem nogud, oli stap wantem evri samting, mo oli stap lukaot rod blong spolem man.” Oltaem oli stap “jalus, mo oli stap kilim man i ded, mo oli stap raorao,” mo oli mekem sam narafala rabis fasin bakegen. (Rom 1:28-31) Hemia nao from wanem Pol i givim advaes long ol Kristin we oli laef wetem ol man olsem, blong oli ‘mekem tingting blong olgeta i niuwan olgeta.’

12. ?Plante man tede oli gat wanem tingting? ?From wanem ol Kristin oli mas lukaotgud long ol tingting olsem?

¹² Sore tumas, plante man raonabaot long yumi oli gat ol rabis tingting ya we Pol i tokbaot. Oli ting se i no stret blong man i folem ol rul mo se man i no mas fosem narafala blong hem i folem ol rul. Plante tija mo papa mama oli letem ol pikinini oli mekem samting we olgeta nomo oli wantem. Oli tijim olgeta tu se evri man i save jusum se wanem i stret mo wanem i no stret. Ol man olsem, oli bilif se i no gat rod blong save se wan samting i stret no i no stret. Mo plante we oli talem se oli bilif long God, oli no ting se oli mas mekem samting we God i talem se i stret. (Sam 14:1) Ol Kristin oli mas lukaotgud blong ol tingting olsem i no spolem olgeta. Sipos yumi no lukaotgud, maet bambae yumi no moa folem ol advaes we oli kamaot long ogenaesesen blong God, mo yumi stat blong komplen from ol samting we yumi no laekem. No maet yumi no agri fulwan long advaes we Baebol i givim long saed blong ol samting we yumi wajem taem yumi spel, long fasin blong yusum Intenet, mo long hae edukesen.

13. ?From wanem yumi mas jekem gud yumi wan se yumi wanem kaen man?

¹³ Sipos yumi no wantem ‘letem fasin blong yumi i kam olsem fasin blong ol man long wol,’ yumi mas jekem gud yumi wan se yumi wanem kaen man. Yumi mas jekem gud ol tingting mo ol filing blong yumi we oli stap haed, ol mak we yumi wantem kasem, mo ol fasin we yumi stap folem. Ol narafala oli no save wanem i stap long hat blong yumi, mo maet bambae oli talem se yumi stap gohed gud. Be yumi nomo yumi save sipos yumi letem samting we yumi lanem long Baebol i jenisim yumi, mo sipos yumi stap gohed blong mekem olsem.—Ridim Jemes 1:23-25.

14. ?Wanem i save givhan long yumi blong luksave samting we yumi mas jenisim?

¹⁴ Sipos yumi wantem se God i jenisim tingting blong yumi, yumi mas jenisim ol samting we oli stap long hat blong yumi. ?Wanem i save givhan long yumi blong mekem ol jenis ya? Taem yumi stadi long Baebol, yumi lanem se yumi mas kam ol man we Jehova i glad long olgeta. Fasin we yumi soemaot taem yumi ridim Tok blong God, bambae i givhan long yumi blong save samting we i stap long hat blong yumi. Hemia bambae i givhan long yumi blong luksave samting we yumi mas jenisim, blong yumi save mekem ‘ol fasin we God i wantem we oli stret gud.’—Rom 12:2; Hib. 4:12.

15. ?Wanem i hapen taem Jehova i jenisim yumi?

¹⁵ Ridim Aesea 64:8. Pijatok we profet Aesea i yusum, i tijim yumi long wan impoten samting. Yumi olsem graon, mo Jehova i olsem man blong wokem graonpot. Taem hem i jenisim yumi olsem we man blong wokem graonpot i jenisim graon, hem i no jenisim ol samting long saed blong yumi we ol man oli save luk. Be hem i jenisim ol samting we oli stap long hat blong yumi. Taem yumi letem hem i jenisim yumi, hem i stap givhan long yumi blong yumi jenisim fasin blong yumi blong tingting. Hemia nao samting we yumi nidim blong yumi save faet agensem ol tingting blong wol. ?Jehova i jenisim yumi olsem wanem?

16, 17. (1) Yu eksplenem samting we man i mekem long graon blong i kam wan gudfala graonpot. (2) ?Tok blong God i givhan olsem wanem long yumi, blong yumi kam wan gudfala graonpot we Jehova i save yusum?

¹⁶ Taem man i wantem mekem wan spesel graonpot, hem i mas yusum gudfala graon. Be i gat tu samting we hem i mas mekem long graon ya, bifo we hem i wok long hem. Faswan, hem i mas wasem gud graon ya, blong i klin. Biaen, hem i mas putum wota we i stret nomo i go long graon ya, ale hem i save wok long hem blong mekem i kam graonpot.

¹⁷ Man blong wokem graonpot i yusum wota blong klinim graon, mo blong mekem se graon ya i no strong tumas blong wok long hem. Biaen hem i save mekem enikaen graonpot we hem i wantem, wetem ol gudfala graonpot tu. Olsem we wota i jenisim graon, Tok blong God i jenisim yumi. Taem yumi stat blong save God, Baebol i givhan long yumi blong yumi no moa tingting olsem ol man blong wol. Mo yumi stat blong gat sem tingting olsem God. Biaen, hem i save jenisim yumi i kam olsem wan gudfala graonpot we hem i save yusum. (Efes. 5:26) Plante taem, yumi kasem ol tok we oli talem se yumi mas ridim Baebol evri dei, mo joen oltaem long ol miting. ?From wanem? From we sipos yumi obei, yumi stap letem Jehova i jenisim yumi.—Sam 1:2; Wok 17:11; Hib. 10:24, 25.

18. (1) Sipos yumi wantem se Tok blong God i jenisim yumi, ?from wanem yumi mas tingting dip long hem? (2) ?Wanem ol kwestin we bambae oli givhan long yumi?

¹⁸ Sipos yumi wantem se Tok blong God i jenisim yumi, yumi mas ridim mo letem hem i tijim yumi. Be i no hemia nomo. Plante man oli ridim Baebol mo oli save plante tok we i stap long hem. Maet yu mitim sam man olsem long wok blong prij. Samfala oli save talem sam vas blong Baebol baehat.a Be plante taem, samting ya i no jenisim tingting mo laef blong olgeta. ?From wanem? From we Tok blong God i save jenisim man we i letem tok ya blong i kasem hat blong hem. (Gal. 6:6) Yumi mas tingting dip long samting we yumi lanem long Baebol. Yumi mas askem se: ‘?Mi mi bilif se hemia i no wan tijing blong jos nomo? ?I gat sam samting long laef blong mi we oli pruvum se hemia i trutok? ?Mi mi folem ol samting we mi lanem, be mi no tijim nomo long ol narafala? ?Mi mi bilif se samting we mi lanem i kam long Jehova, olsem we hem i stap toktok long mi wan?’ Sipos yumi tingting dip long ol kwestin olsem, bambae yumi kam klosap long Jehova. Taem samting we yumi lanem i tajem hat blong yumi, bambae i pulum yumi blong jenisim ol samting long laef blong yumi mo i save mekem God i glad.—Prov. 4:23; Luk 6:45.

19, 20. ?Wanem gudfala samting i save kamaot sipos yumi folem advaes blong Baebol?

¹⁹ Sipos yumi ridim Baebol oltaem mo yumi tingting dip long hem, hemia bambae i givhan long yumi blong gohed blong folem tok ya blong Pol we i talem se: ‘Yufala i sakemaot olfala laef ya blong yufala wetem ol fasin blong hem, mo yufala i putum niufala laef ya blong yufala, olsem prapa klos blong yufala.’ (Kol. 3:9, 10) Sipos yumi kasem save gud long samting we Baebol i tijim mo yumi folem long laef blong yumi, bambae yumi wantem blong gat ol niufala fasin we wan Kristin i mas gat. Samting ya bambae i protektem yumi long ol trap blong Setan.

²⁰ Aposol Pita i talem se: ‘Yufala i mas obei long God. Yufala i no letem ol samting ya we yufala i wantem bifo, oli pulum tingting blong yufala bakegen. Be yufala i mas tabu, yufala i mas klin gud long olgeta samting we yufala i mekem.’ (1 Pita 1:14, 15) Sipos yumi mekem bes blong yumi blong jenisim tingting mo fasin blong yumi, bambae Jehova i blesem yumi. Nekis stadi bambae i tokbaot moa long saed ya.