Wan Kwestin

?Wanem ya baptaes blong ol dedman?

Taem aposol Pol i raet long saed long laef bakegen blong go long heven, hem i raetem wan tok ya we i narakaen. Long Baebol ya King James Version, oli raetem olsem: “?Sipos ol dedman oli no save laef bakegen, from wanem ol narafala man i baptaes blong olgeta?” Mo long Baebol long Bislama vas ya i se: “?Mo bakegen, sipos ol dedman oli no save laef bakegen, from wanem ol man oli stap tekem baptaes long bihaf blong ol dedman we oli no baptaes bifo? Sipos ol dedman ya oli no save laef bakegen samtaem, fasin ya i krangke nomo.”​—1 Korin 15:29.

?Long ples ya Pol i stap minim se ol man we oli laef oli mas tekem baptaes long bihaf blong ol dedman we oli no baptaes bifo? Long sam translesen blong Baebol, olsem tufala Baebol ya antap, i luk olsem we vas ya i talem olsem. Be sipos yumi lukluk gud long Baebol mo long faswan tok long lanwis Grik we Pol i yusum long vas ya, yumi kasem samting we i defren bakegen. Pol i minim se ol tabu Kristin oli baptaes blong folem wan fasin blong laef we i olsem Kraes, we bambae oli stap tru long God gogo kasem ded. Be afta, bambae oli laef bakegen blong kam ol spirit man olsem Jisas hem wan.

Baebol i sapotem fulwan mining ya we yumi tokbaot long saed blong vas ya. Taem Pol i raet long ol man Rom, hem i se: “Yufala i save finis we long taem ya we yumi baptaes blong joen long Jisas Kraes, be baptaes ya, i blong yumi joen long ded blong hem.” (Rom 6:3) Mo taem Pol i raet long ol man Filipae, hem i tokbaot hem wan se, ‘Mi wantem joen long Kraes blong kasem haf blong ol samting we oli mekem hem i harem nogud long bodi blong hem. Mo mi wantem laef blong mi i folem fasin blong ded blong hem, blong bambae God i save mekem mi mi laef bakegen long ded.’ (Filipae 3:​10, 11) Poen we Pol i soemaot long ples ya se, ol man blong Kraes we tabu spirit i makemaot olgeta, oli mas stap tru long God long laef blong olgeta evri dei nomata wanem traem we oli save kasem, mo maet oli fesem ded, mo biaen bambae oli mas ded be, from we oli stap tru long God, bambae oli laef bakegen blong go long heven.

I gud blong kasem save se long vas ya, mo long ol narafala vas we oli tokbaot ded wetem baptaes, oltaem mining blong hem i laenap wetem man we i tekem baptaes finis we i laef i stap, i no minim man we i ded. Pol i talem long ol tabu Kristin tu se: “Taem yufala i baptaes, i olsem we God i berem yufala wantaem wetem Kraes. Mo long baptaes ya bakegen, i olsem we God i mekem yufala i laef bakegen long ded, wantaem wetem Kraes. Samting ya i kamtru long yufala, from we yufala i bilif long bigfala paoa ya blong God, we i mekem Kraes i laef bakegen.”​—Kolosi 2:​12.

Long lanwis Grik, tok ya hy·perʹ, we long plante Baebol oli tanem i kam “blong” no “long bihaf blong” olsem i stap long 1 Korin 15:​29, i save minim tu “blong oli save kam olsem.” Folem ol narafala tok blong Baebol, New World Translation of the Holy Scriptures i tanem vas ya i kam stret se: “?Olsem wanem long ol man ya we oli tekem baptaes blong oli save kam olsem dedman? ?Sipos ol dedman oli no save laef bakegen samtaem, from wanem ol man oli stap tekem baptaes blong kam olsem dedman?”