Laef Stori

Jeova i Pulum Ol Man We Oli Gat Tingting Daon

ASANO KOSHINO I TALEM STORI YA

Long 1949, sam yia nomo afta we Wol Wo Tu i finis, wan strenja we i longfala mo i gat kaen fasin, i kam long Kobe blong visitim famle ya we mi mi wok blong olgeta. Man ya, hem i faswan misinari blong ol Witnes blong Jeova we i kam long Japan. Visit blong hem i givim janis long mi blong save trutok blong Baebol. Be ating i gud sipos fastaem mi storebaot laef blong mi taem mi smol.

MI MI bon long 1926 long wan smol vilej long not blong Distrik blong Okayama. Mi mi namba faef long eit pikinini. Papa i bilif strong long god blong Sinto we ol man long vilej blong mifala oli stap prea long hem. Taswe long ful yia, mifala ol pikinini i glad blong joen wetem famle mo mekem ol lafet blong jos tugeta.

Taem mi gruap, i gat plante kwestin we mi askem long mi wan long saed blong laef, be antap moa, mi wari long saed blong ded. Long kastom blong mifala ol man oli mas ded long prapa haos blong olgeta, mo ol pikinini oli mas stap klosap long man ya we bambae i ded. Mi harem nogud bitim mak taem bubu woman blong mi i ded, mo taem brata blong mi i ded bifo we hem i kasem wan yia blong hem. Mi fraet tumas taem mi tingbaot se wan dei papa mama blong mi tufala bambae i mas ded tu. ‘?Man i blong laef smoltaem nomo nao biaen hem i ded? ?I no gat wan narafala hop long laef ya?’ Mi nidim blong save ol ansa long ol kwestin ya.

Long 1937, taem mi stap long klas sikis long praemari skul, Faet blong Jaena mo Japan i stat. Oli singaot ol man blong oli joen long ami mo oli go faet long Jaena. Ol pikinini we oli skul yet oli go talem tata long ol papa no ol brata blong olgeta, mo oli singaot “!banzai!” (laef longtaem) long empera. Ol man oli sua fulwan se bambae Japan i mas winim faet ya, from we god nao i stap i rulum kantri ya, mo empera blong hem i wan god we i laef.

Kwiktaem nomo, ol famle oli stat kasem nius blong talem long olgeta se papa no brata blong olgeta i ded long faet. I no gat wan samting i save leftemap tingting blong ol famle ya we oli lusum wan memba blong famle blong olgeta. Ol man Japan oli no laekem finis ol man Jaena be filing ya i kam antap moa, mo oli glad taem plante enemi blong olgeta oli kasem kil no oli ded long faet. Be long semtaem mi stap tingting se, ‘Ol man Jaena tu oli mas safa olsem mifala nomo taem wan famle blong olgeta i ded.’ Taem mi kasem setifiket blong mi long praemari skul, faet ya i stap go moa insaed long Jaena.

Mi Mitim Wan Strenja

From we mifala i laef long wan fam, mifala i pua. Be nating se i olsem papa blong mi i letem mi mi gohed long skul, sipos mifala i no mas spenem mane blong pem skul ya. Taswe long 1941, mi go long wan skul blong ol gel long Okayama Siti, samwe 100 kilometa longwe long hom blong mi. Skul ya i tijim ol gel blong oli kam ol gudfala waef mo ol gudfala mama. Skul ya i sanem ol studen oli go laef wetem ol rij famle long taon, blong oli lanem wok blong haosgel. Long moning, ol studen oli lanem blong wok long haos, mo long aftenun oli go skul.

Afta we oli mekem seremoni blong welkamem ol niufala studen, tija blong mi i werem wan kimono, mo i tekem mi mi go long wan bigfala haos. Mi no save from wanem, be misis blong haos ya i no akseptem mi. Tija i askem long mi se: “Oraet. ?Olsem wanem sipos yumitu go long haos blong Misis Koda?” Hem i tekem mi, mitufala i go kasem wan haos we i luk olsem ol haos long ol kantri blong Wes, nao hem i kilkilim doa. I no longtaem, wan longfala woman we hea blong hem i grei, i kamaot. !Mi sapraes we mi sapraes! Woman ya i no wan woman Japan, mo mi neva luk wan misis blong ol kantri blong Wes bifo. Afta we tija blong mi i soem mi long Misis Maud Koda, hem i go kwiktaem nomo. Mi pulum ol basket blong mi i go insaed long haos, we mi stap seksek nomo. Biaen, mi lanem se Misis Maud Koda i wan woman Amerika we i maredem wan man Japan we i bin skul long Yunaeted Stet. Misis Koda i stap tijim lanwis Inglis long ol studen we oli go long ol bisnes skul.

Wan bisi laef i stat long nekis moning nomo. Hasban blong Misis Koda i gat sik blong faol, mo mi mas givhan blong lukaot long hem. Be mi no save Inglis nating, taswe mi fraet lelebet. Mi haremgud moa taem Misis Koda i toktok long mi long lanwis Japan. Evri dei, mi harem tufala i stap lanwis tugeta long Inglis, mo sloslo mi lan blong lesin taem tufala i toktok lanwis ya. Mi laekem fasin blong tufala mo mi haremgud wetem tufala.

Mi sapraes long nambawan fasin blong Maud blong lukaot long hasban blong hem we i sik. Man ya i laekem blong ridim Baebol. Biaen, mi lanem se tufala i bin kasem buk ya The Divine Plan of the Ages long lanwis Japan long wan stoa we i salem ol sekenhan buk, mo oli stap kasem ol Wajtaoa long lanwis Inglis blong plante yia finis.

Wan dei, mi kasem wan Baebol olsem wan presen. Mi glad from we hem i fastaem long laef blong mi we mi gat prapa Baebol blong mi. Mi stap ridim Baebol ya taem mi gokam long skul, be i gat plante samting we mi no kasem save long hem. Mi gruap long tijing blong skul Sinto blong ol man Japan, taswe Jisas Kraes i wan strenja long tingting blong mi. Long taem ya, mi no save yet se bambae fasin ya blong ridim Baebol i pulum mi blong save ol trutok blong Baebol we bambae oli ansa long ol kwestin blong mi long saed blong laef mo ded.

Tri Nogud Samting i Hapen

Afta we mi finisim tufala yia blong mi olsem haosgel long famle ya, mi talem tata long olgeta. Taem mi finisim skul, mi joen long wan grup blong gel we oli volontia blong wokem ol yunifom blong ami. Ol man Amerika oli stat yusum ol bigfala plen ya B-29 blong sakem ol bom long Japan, mo long Ogis 6, 1945, oli sakem wan atomik bom long Hiroshima. Sam dei biaen, mi kasem wan mesej, mo mi lanem se Mama i sik bigwan. Mi tekem faswan tren we i gobak long hom blong mi. Taem mi kamaot long tren, wan famle i welkamem mi mo i talem long mi se Mama i ded finis. Hem i ded long Ogis 11. !Samting ya we mi bin fraet long hem blong plante yia, naoia i kamtru, Mama blong mi i ded! Neva bambae hem i save toktok no smael long mi bakegen.

Long Ogis 15, i kam klia we Japan i lusum faet. Taswe long ten dei nomo, tri nogud samting i hapen we i mekem mi mi harem nogud tumas: faswan atomik bom we i bosta, ded blong Mama, mo bigfala samting ya we i makem histri blong Japan, se kantri blong mifala i lusum faet. Wan samting nomo i mekem mi mi haremgud, se bambae faet ya i no moa kilim man i ded. Mi harem nogud bitim mak, mi lego wok blong mi long faktri mo mi gobak long vilej blong mi.

Trutok i Pulum Mi

Wan dei, mi sapraes taem mi kasem wan leta blong Maud Koda we i stap long Okayama. Hem i askem mi sipos mi save kam mo givhan long hem blong lukaot long wok long haos, from we hem i gat tingting blong openem wan Inglis skul. Mi no save wanem blong mekem, be mi agri blong go halpem hem. Sam yia biaen, mi muv i go long Kobe wetem famle Koda.

Long stat blong hot taem blong 1949, wan gudfala man we i longfala mo i gat kaen fasin, i kam visitim famle Koda. Nem blong hem Donald Haslett, mo hem i aot long Tokyo i kam long Kobe blong faenem wan haos blong ol misinari long Kobe. Man ya, hem i faswan misinari blong ol Witnes blong Jeova we i kam long Japan. Oli faenem wan haos, mo long Novemba 1949, plante misinari oli kam long Kobe. Wan dei, faef misinari oli kam visitim famle Koda. Tu long ol misinari ya, Lloyd Barry mo Percy Iszlaub, tufala i toktok long Inglis blong ten menet long ol man we oli hivap long haos. Ol misinari ya oli singaot Maud se hem i Kristin sista blong olgeta, mo i luk olsem se Maud i glad blong joen wetem olgeta. Hemia long taem ya we mi tekem disisen blong lanem lanwis ya Inglis.

Sam misinari we oli wokhad blong talemaot gud nius oli halpem mi blong kasem save sloslo ol stamba trutok blong Baebol. Mi faenem ol ansa long ol kwestin we mi gat taem mi pikinini yet. Yes, Baebol i givim hop ya long yumi se yumi save laef blong olwe long wan paradaes wol, mo hem i promes tu se olgeta man we oli stap “long beregraon” bambae oli laef bakegen. (Jon 5:​28, 29; Revelesen 21:​1, 4) Mi tangkiu long Jeova from we hem i givim hop ya long ol man, tru long ransom sakrefaes blong Pikinini blong hem, Jisas Kraes.

Ol Wok Long Saed Blong Spirit We Oli Karem Glad

Stat long Disemba 30, 1949, go kasem Jenuware 1, 1950, oli holem faswan tiokratik asembli long Japan, long misinari haos long Kobe. Mi go long asembli ya wetem Maud. Bigfala haos ya, wan man Nasi i ona blong hem bifo, mo taem yu stap long haos ya yu save luk Inland Si mo Awaji Aelan. Mi gat smol save nomo long Baebol, taswe mi no kasem save plante samting long ol tok blong asembli ya. Nating se i olsem, mi sapraes bigwan blong luk ol misinari we oli glad blong joen wetem ol man Japan. I gat 101 man i kam lesin long pablik tok long asembli ya.

Smoltaem biaen, mi tekem disisen blong joen long wok blong prij. Mi nidim fasin no fraet blong go long ol haos wanwan, from we mi mi wan woman we i sem. Wan moning, Brata Lloyd Barry i kam long haos blong mifala blong prij wetem mi. Hem i stat prij long nekis haos klosap long haos blong Sista Koda. Klosap mi haed long baksaed blong hem taem hem i stap tokbaot mesej blong Baebol. Seken taem we mi go prij, mi go wetem tu narafala misinari. Wan olfala woman Japan i welkamem mifala long haos blong hem, hem i lesin long mifala, mo biaen hem i givim wan glas melek long mitrifala. Hem i agri blong stadi long Baebol mo hem i gohedgud gogo i tekem baptaes mo i kam wan Kristin. Mi haremgud tumas blong luk ol traehad blong hem.

Long Eprel 1951, Brata Nathan H. Knorr, we i wok long hedkwota long Brooklyn, i mekem faswan visit blong hem long Japan. Raonabaot 700 man oli kam lesin long pablik tok we hem i givim long wan bigfala haos ya we oli kolem Kyoritsu long Kanda, Tokyo. Olgeta man we oli stap long spesel miting ya, oli glad blong harem se naoia Wajtaoa bambae i kamaot long lanwis Japan. Nekis manis, Brata Knorr i visitim Kobe, mo long spesel miting long ples ya, mi tekem baptaes blong soemaot se mi givim laef blong mi i go long God.

Klosap wan yia biaen, oli leftemap tingting blong mi blong mi joen long fultaem wok blong prij, olsem paenia. I gat smol man nomo i wok olsem paenia long Japan long taem ya, mo mi askem long mi wan olsem wanem bambae mi kasem naf mane blong laef. Mo tu mi no save sipos bambae mi save mared, olsem mi wantem. Be mi luksave se wok blong Jeova i mas kam long faswan ples long laef, taswe mi kam wan paenia long 1952. Mi glad tumas se taem mi paenia, Sista Koda i tekem mi mi wok haftaem long haos blong hem.

Raonabaot long taem ya, brata blong mi, we mi ting se hem i ded long taem blong faet, hem i aot long Taewan mo i kamhom wetem famle blong hem. Famle blong mi i neva soem intres long Kristin Skul, be olsem ol paenia we oli wokhad blong prij, mi stat sanem ol magasin mo ol buklet blong mifala long hem. Biaen, brata blong mi i muv i kam long Kobe wetem famle blong hem, from wok blong hem. Mi askem long waef blong brata blong mi se: “?Yu bin ridim ol magasin?” Mi sapraes tumas taem hem i ansa se, “Ol magasin ya oli pulum intres blong mi.” Hem i stat blong stadi long Baebol wetem wan blong ol misinari, mo yangfala sista blong mi we i laef wetem olgeta i joen long stadi. Biaen, tufala i tekem baptaes.

Mi Sapraes Long Fasin Joengud Blong Ol Brata Blong Fulwol

Smoltaem biaen, mi sapraes blong kasem wan invitesen blong go long namba 22 klas blong Wajtaoa Baebol Skul blong Gilead. Mi wetem Brata Tsutomu Fukase, mitufala i faswan man Japan we oli singaot blong go long skul ya. Long 1953, bifo klas ya i stat, mifala i gat janis blong go long asembli ya New World Society, we oli holem long Yankee Stadium long New York. Mi sapraes bigwan long fasin joengud blong ol man blong Jeova we oli kamaot long fulwol.

Long namba faef dei blong asembli, ol man Japan we oli kam long asembli, we bighaf blong olgeta oli misinari, oli werem ol kimono. Be mi no kasem yet kimono we mi bin sanem bifo mi kam, taswe mi askem long Sista Knorr sipos mi save werem wan kimono blong hem. Long asembli, ren i stat folfoldaon, mo mi wari se bambae kimono ya i kam wetwet. Jes long taem ya, wetem kaen fasin, wan man we i stap biaen long mi i putum wan renkot long solda blong mi. Wan sista we i stanap klosap long mi i askem mi se: “?Yu save hu ya brata ya?” Biaen, mi lanem se brata ya hemia Brata Frederick W. Franz, wan memba blong Hed Kampani. !Mi rili harem lav we i stap long ogenaesesen blong Jeova!

Namba 22 klas blong Gilead i rili wan intenasnal klas, we i gat 120 studen long hem we oli kamaot long 37 kantri. Nating se samtaem i had lelebet from we mifala i toktok ol defren lanwis, be mifala i joengud tugeta olsem wan intenasnal famle. Long Februari 1954, wan dei we sno i foldaon, mi kasem setifiket blong mi mo oli sanem mi mi gobak long Japan. Wan sista blong Swiden we i skul wetem mi, nem blong hem Inger Brandt, i kam blong prij wetem mi long Nagoya Siti. Long ples ya, mifala i joen wetem wan grup blong misinari we oli ronwe long Koria from faet. Mi laekem tumas ol yia we mi spenem long wok blong misinari.

Wan Hapi Taem Long Wok Blong Jeova Wetem Hasban Blong Mi

Long Septemba 1957, oli invaetem mi blong wok long Betel long Tokyo. Branj ofis blong Japan hem i wan bilding we oli wokem long wud mo i gat tu stori long hem. Long branj ofis, i gat fo memba nomo, wetem Brata Barry, we i lukaot long branj ofis. Ol narafala memba blong famle oli misinari. Oli askem mi blong mekem translesen mo blong ridim ol atikol blong faenem mastik, mo tu mi mas klinim ples, wajem ol klos, mekem kakae, mo plante narafala samting bakegen.

Wok long Japan i stap kam bigwan, mo oli invaetem plante moa brata long Betel. Wan long ol brata ya i kam wan elda long kongregesen we mi joen long hem. Long 1966, mi wetem brata ya, Junji Koshino, mitufala i mared. Afta long mared blong mitufala, oli askem Junji blong wok olsem seket elda. Mifala i glad tumas blong save plante defren brata sista taem mitufala i go visitim ol defren kongregesen. From we mi mi mekem translesen, mi stap mekem wok ya long haos blong famle we i welkamem mitufala blong wik ya. Taem mitufala i wokbaot i go long ol defren ples, mitufala i mas tekem ol hevi diksonari, wetem ol basket blong klos mo ol narafala basket.

Mitufala i glad blong stap long wok blong seket blong fo yia, mo mitufala i luk ogenaesesen i stap kam bigwan moa. Branj ofis i muv i go long Numazu, mo plante yia biaen i muv i go long Ebina, mo i stap long ples ya kam kasem tede. Mi wetem Junji, mitufala i glad blong spenem plante yia long Betel, mo tede mifala i wok wetem klosap 600 memba long famle blong Betel. Long Mei 2002, sam fren long Betel oli mekem wan smol kakae blong makem namba 50 yia blong mi long fultaem sevis.

Mi Glad Blong Luk Plante Moa Man i Wok Blong God

Taem mi stat wok blong Jeova long ol yia 1950, i gat smol pablisa nomo long Japan. Naoia i gat bitim 210,000 pablisa we oli talemaot Kingdom. Yes, Jeova i pulum plante taosen man we oli olsem sipsip oli kam long hem, olsem mi nomo.

Ol fofala misinari we oli visitim mifala long haos blong Sista Koda long 1949, wetem Sista Maud Koda tu, oli holem strong long bilif gogo oli ded. Brata blong mi, we hem i wan man blong givhan, mo waef blong brata blong mi we i bin paenia blong 15 yia, tufala tu i holem strong long bilif gogo oli ded. ?Wanem bambae i hapen long papa mama blong mi, we taem mi pikinini yet, mi fraet tumas se wan dei bambae tufala i ded? Baebol i promes se bambae ol dedman oli save laef bakegen, mo promes ya i givim hop mo i leftemap tingting blong mi.​—Ol Wok 24:15.

Taem mi tingtingbak, mi harem se dei ya we mi mitim Maud long 1941 i makem wan impoten jenis long laef blong mi. Sipos mi no mitim hem long taem ya, mo sipos mi no agri blong wok blong hem bakegen afta long faet, ating mi go stap laef long fam blong mifala long vilej ya longwe, mo mi neva mitim ol misinari long taem ya. !Mi tangkiu we mi tangkiu tumas long Jeova we Hem i yusum Maud mo ol faswan misinari blong pulum mi mi kam long Hem!

[Tok blong pija long pej 25]

Wetem Maud Koda mo hasban blong hem. Mi stap long fored long lefsaed

[Tok blong pija long pej 27]

Wetem ol misinari blong Japan long Yankee Stadium long 1953. Mi stap long lefsaed olgeta

[Tok blong pija long pej 28]

Long Betel wetem hasban blong mi, Junji