Japta Tatin

Taem Mared Kolosap i Brok

1, 2. Taem wan mared i kasem trabol, ?i gud blong askem wanem kwestin?

LONG 1988, wan woman Itali we nem blong hem Lucia, i harem nogud tumas long tingting blong hem.a Ten yia afta we hem i mared, hem i no moa joengud wetem hasban blong hem. Plante taem, hem i traem blong mekem se tufala i joengud, be hem i no winim. Ale, hem i lego hasban blong hem, mo hem wan nomo i lukaot long tufala gel blong hem. Lucia i tingtingbak long taem ya, nao hem i talem se: “Long taem ya, mi mi sua se i no gat wan rod blong stretem trabol long mared blong mitufala.”

² Sipos i gat sam problem long mared blong yu, ating yu kasem save long filing blong Lucia. Maet mared blong yu i no stap rongud, nao yu stap tingbaot sipos i gat rod yet blong stretem ol problem. Sipos i olsem, i gud we yu tingtinggud long kwestin ya: ?Mi bin folem olgeta gudfala advaes we God i givim long Baebol, blong traem mekem mared blong mi i stanap strong?—Ol Sam 119:105.

 3. ?I gat wanem ripot long saed blong ol hasban mo waef we oli divos mo famle blong olgeta?

³ Taem hasban mo waef tufala i kros long tufala, maet tufala i ting se rod we i moa isi blong stretem problem ya, hemia divos. Long plante kantri, namba blong ol mared we oli seraot i go antap bitim mak. Be, ol ripot we oli kamaot i no longtaem i pas, oli soem se bighaf blong ol man mo woman we oli divos, biaen oli sore we mared blong olgeta i finis. Sam long olgeta oli kasem moa sik long bodi mo tingting, i bitim ol man mo woman we oli no seraot. Mo tu, ol pikinini blong ol man mo woman we oli divos, tingting blong olgeta i fasfas blong plante yia, mo oli no glad. Olfala papa mama mo ol fren blong tufala, olgeta tu oli harem nogud. ?God, we i Stampa blong mared, i gat wanem tingting long saed blong divos?

 4. ?Olsem wanem blong stretem ol problem insaed long mared?

⁴ Olsem yumi tokbaot finis long ol narafala japta, stampa tingting blong God fastaem, hemia se man mo woman we i mared i stap tugeta blong ful laef blong tufala. (Jenesis 2:24) Taswe, ?from wanem plante mared oli seraot? Maet samting ya i no kamaot kwik. Plante taem, i gat sam fasin oli kamaot we oli olsem woning. Sloslou, ol smosmol problem long mared oli kam bigwan, gogo hasban mo waef i no moa save winim olgeta. Be sipos tufala i kwik blong folem advaes blong Baebol blong stretem ol problem ya, plante taem oli save blokem fasin seraot.

TINGBAOT OL TRUFALA SAMTING

 5. ?Wanem trufala samting we olgeta hasban mo waef oli mas luksave?

⁵ Wan samting we i save mekem problem i kamaot, hemia se hasban no waef, no tufala evriwan, i no tingbaot ol trufala samting long saed blong mared. Tufala i drim nomo. Ol store buk blong lav, ol nyuspepa we plante man oli stap pem oltaem, ol store long televisin mo sinema, oli save givim ol hop mo drim we oli defren olgeta long ol trufala samting long saed blong mared. Taem ol drim ya oli no kamtru, wanwan long tufala i save harem se narawan i bin gyaman long hem, ale, tufala i no moa glad long mared blong tufala, mo tufala i save kam kros. Oraet, ?olsem wanem wan man mo woman we tufala i no stretgud olgeta, oli save faenem glad long mared? Tufala i mas traehad fulwan blong frengud oltaem.

 6. (a) ?Baebol i givim wanem stret tingting long saed blong mared? (b) ?Wanem sam samting we oli save mekem se hasban mo waef i rao?

⁶ Baebol i eksplenem mared long fasin we i tru nomo. Hem i agri se i gat plante gladtaem long mared, be hem i givim woning tu se olgeta we oli mared bambae “oli gat trabol long laef blong olgeta.” (1 Korin 7:28) Olsem yumi luk finis, hasban mo waef i no stretgud olgeta, mo tufala i save mekem sin. Tingting mo filing blong tufala wanwan, mo fasin we tufala i gruap long hem, oli no sem mak. Sam samtaem, maet tufala i no agri long saed blong mane, ol pikinini, mo ol famle blong tufala. Maet tufala i no gat plante taem blong mekem ol samting tugeta, mo maet tufala i gat problem long fasin blong slip tugeta. Ol samting ya oli save mekem rao i kamaot.b !I nidim taem blong stretem ol problem ya, be yu no mas letem tingting blong yu i foldaon! Bighaf blong ol hasban mo waef oli save tokbaot ol problem ya, mo faenem rod we tufala evriwan i agri long hem, blong winim olgeta.

TOKBAOT OL PROBLEM

7, 8. Sipos wan i mekem narawan i harem nogud no tufala i no agri long wan samting, ?Baebol i talem wanem rod blong stretem bisnes ya?

⁷ Plante taem, i hadwok long hasban mo waef blong toktok tugeta long kwaet fasin, long saed blong samting we wan long tufala i mekem we i spolem filing blong narawan, samting we tufala i no agri long hem, mo ol mastik blong tufala. Maet wan long tufala i kam kros mo mekem wan smol problem i kam wan bigfala trabol. I moagud we hem i talem stret nomo se: “Mi harem olsem se yu no kasem save long tingting blong mi.” Plante taem, wan long tufala i talem long narawan se: “Yu tingbaot yu wan nomo,” no, “Yu yu no laekem mi.” From we narawan i no wantem rao, maet hem i no toktok nating.

⁸ I moa gud blong folem advaes ya blong Baebol, se: “Sipos yufala i kros, yufala i no letem we kros ya i lidim yufala, blong yufala i mekem ol sin. Yufala i mas no stap kros, gogo kasem san i godaon.” (Efesas 4:26) Wan man i askem kwestin long wan hasban mo waef we mared blong tufala i stapgud blong 60 yia finis, i se, ‘?Wanem samting i mekem mared blong yutufala i stapgud?’ Hasban i ansa se: “Bifo we mitufala i slip long naet, mitufala i stretem olgeta problem bitwin long mitufala, nating sipos problem i smol we i smol.”

 9. (a) ?Wanem samting we Baebol i soem se i wan impoten haf blong fasin blong toktok tugeta? (b) ?Plante taem, ol hasban mo waef oli mas mekem wanem samting, we i nidim fasin no fraet mo tingting daon blong mekem?

⁹ Taem hasban mo waef i no agri long wan samting, tufala wanwan i mas ‘rere blong lesin, no hareap blong toktok, mo no hareap blong kam kros.’ (Jemes 1:19) Afta we wanwan long tufala i lesingud, maet tufala i luksave se tufala tugeta i nidim blong talem sore. (Jemes 5:16) I nidim tingting daon mo fasin no fraet, blong talem wetem fulhat se, “Mi mi sore we mi mekem yu yu harem nogud.” Fasin ya bambae i givhan bigwan long hasban mo waef blong winim ol problem. Antap long hemia, bambae i givhan long tufala blong wokem lav mo fasin fren, nao bambae tufala i haremgud tumas blong stap tugeta.

SEKS INSAED LONG MARED

10. ?Pol i givim wanem advaes long ol Kristin long Korin we maet i stret long sam Kristin tede?

¹⁰ Taem aposol Pol i raet i go long ol Kristin long Korin, hem i talem se i gud blong mared “from we i gat tumas man we oli stap mekem nogud.” (1 Korin 7:2) Fasin blong wol tede i sem mak long hemia blong Korin bifo, no ating i moa nogud. Ol man blong wol oli storeyan long ol rabis fasin long saed blong seks we oli no haedem wan samting nating. Oli putum klos we i bitim mak. Ol store buk, store long televisin, mo ol sinema, oli pulum ol man blong wantem mekem nogud fasin long saed blong seks. Aposol Pol i talem long ol man Korin we oli laef long medel blong ol rabis fasin olsemia, i se: “Mared i moa gud, i winim fasin ya we oltaem man i wantem woman tumas.”—1 Korin 7:9.

11, 12. (a) ?Hasban mo waef i mas mekem wanem fasin long tufala, mo tufala i mas mekem samting ya wetem wanem tingting? (b) ?I gud we tufala i mekem wanem sipos tufala i mas livim fasin blong slip tugeta blong smoltaem?

¹¹ From samting ya, Baebol i talem long ol Kristin we oli mared, i se: “Man i mas stap mekem ol samting long woman blong hem we i stret long rod blong mared. Mo woman i mas stap mekem olsem long man blong hem tu.” (1 Korin 7:3) Makem se bigfala poen i blong mekem i gud long narawan—i no blong wantem se narawan i mekem i gud long yumi. Wan rod nomo blong hasban mo waef i haremgud long fasin blong slip tugeta, hemia se tufala wanwan i mas tingbaot blong mekem i gud long narawan fastaem. Olsem nao, Baebol i talem long ol hasban se oli mas “tingting gud long ol woman” blong olgeta. (1 Pita 3:7) Samting ya i tru moa taem tufala i slip tugeta. Sipos hasban i no soem kaen fasin long waef blong hem, maet waef i faenem i hadwok blong haremgud long fasin blong slip tugeta.

¹² I gat sam taem we maet hasban mo waef i mas blokem fasin blong slip tugeta. Samting ya i tru taem waef i gat sikmun no taem hem i harem se i taed tumas. (Skelem wetem Levitikas 18:19.) Mo tu, maet samting ya i tru taem hasban i stap fesem wan bigfala problem long wok mo i harem se ol filing blong hem oli slak tumas. Tufala i save haremgud moa long disisen ya blong livim fasin blong mared blong smoltaem, sipos tufala i tokbaot ol problem ya long klia fasin, mo tufala i “agri fastaem” long disisen ya. (1 Korin 7:5) Olsem nao, bambae wan i no save gat rong tingting long narawan. Be sipos waef i wantem nomo blong blokem hasban blong hem, no sipos hasban i no slip wetem waef blong hem long fasin we i soem lav, samting ya i save pulum wan long tufala blong wantem go slip wetem narafala. Long taem olsem, i save gat trabol insaed long mared.

13. ?Ol Kristin oli save mekem wanem blong holem wan tingting we i klin?

¹³ Ol man blong God we oli mared, oli mas folem semfala rul olsem ol narafala Kristin. Oli no mas ridim ol buk we oli soem ol doti pija long saed blong seks. Samting ya i save pulum olgeta blong wantem mekem fasin we i no klin mo i no stret. (Kolosi 3:5) Mo tu, ol hasban oli mas lukaotgud long tingting mo fasin blong olgeta taem oli stap long kampani blong ol narafala woman, mo ol waef oli mas mekem i sem mak taem oli stap long kampani blong ol narafala man. Jisas i givim woning se: “Man we i stap luk nogud long wan woman olsem we i wantem go long hem, hem i stilim woman ya finis, long tingting blong hem.” (Matyu 5:28) Taem hasban mo waef i folem advaes blong Baebol long saed blong seks, bambae tufala i naf blong blokem tingting we i save pulum tufala blong wantem slip wetem narafala woman no man. Tufala i save gohed blong haremgud long nambawan fasin fren insaed long mared, mo tinghae long seks olsem wan gudfala presen we Man ya we i Stampa blong mared, Jeova, i givim.—Proveb 5:15-19.

RISEN WE BAEBOL I TALEM SE TUFALA I SAVE DIVOS FROM

14. ?Wanem nogud samting we i save kamaot? ?From wanem?

¹⁴ I gud blong save se, long bighaf blong ol Kristin mared, ol hasban mo waef oli faenem rod blong stretem ol problem we oli kamaot. Be samtaem, oli no stretem. From we yumi no stretgud olgeta mo yumi stap long wol we i fulap long sin mo we Setan i bos long hem, sam mared oli kasem mak we oli rere blong seraot. (1 Jon 5:19) ?Ol Kristin oli save mekem wanem sipos oli fesem traem ya?

15. (a) ?Wanem wan risen nomo we Baebol i talem se hasban mo waef i save divos from, we tufala i gat raet blong mared bakegen wetem narafala? (b) ?From wanem samfala oli jusum blong no mekem divos long hasban no waef we i mekem krangke long olgeta?

¹⁵ Olsem Japta 2 blong buk ya i tokbaot, Baebol i givim wan risen nomo blong man mo woman i save divos mo mared bakegen wetem narafala, hemia sipos wan long tufala i slip olbaot.c (Matyu 19:9) Sipos yu gat trufala pruf se hasban no waef blong yu i no stap tru long yu, ale yu gat wan bigfala disisen blong mekem. ?Bambae yu gohed blong stap wetem hem, no bambae yutufala i divos? I no gat rul long saed ya. Sam Kristin oli bin fogivim hasban no waef blong olgeta fulwan taem hem i rili tanem tingting blong hem from sin ya, ale oli no seraot, mo oli haremgud biaen. Sam narafala oli no mekem divos from we oli tingbaot ol pikinini blong olgeta.

16. (a) ?Wanem sam samting we i pusum samfala blong mekem divos long hasban no waef blong olgeta? (b) ?From wanem ol narafala oli no mas tok agensem wan hasban no waef we i no gat fol, taem hem i mekem disisen blong divos no blong no divos?

¹⁶ Be, maet waef i gat bel from sin we hem i mekem, no maet wan long tufala we i slip olbaot i kasem wan sik long saed blong seks. Maet hasban no waef i stap mekem nogud long pikinini long saed blong seks, mo pikinini i nidim we narawan i blokem hem. I klia se, i gat plante samting blong tingbaot, bifo we man no woman i mekem disisen long saed blong divos. Be, sipos yu faenemaot se waef no hasban blong yu i bin slip wetem narafala, nao yu girap yu slip wetem hem bakegen, hemia yu soemaot se yu fogivim hem finis mo se yu wantem we mared blong yutufala i gohed nomo. Risen we Baebol i talem se yu save divos from mo mared bakegen, i no moa stap. Wan narafala i no mas pusum nus blong hem long bisnes ya mo traem pulum yu blong mekem disisen folem tingting blong hem. Mo tu, narafala i no mas toktok agensem disisen blong yu. Yu nao yu mas laef wetem frut blong disisen blong yu. “Evri man i gat basket blong hem blong karem.”—Galesia 6:5.

RISEN BLONG SERAOT

17. ?Baebol i talem wanem long saed blong divos no fasin blong seraot long hasban no waef we i no bin slip olbaot?

¹⁷ ?Olsem wanem sipos wan long tufala i no bin slip olbaot? ?I gat sam narafala risen we Baebol i talem se tufala i save seraot no divos from? Yes i gat. Be sipos wan Kristin i lego waef no hasban blong hem from wan narafala risen, hem i no gat raet blong tekem wan narafala waef no hasban bakegen. (Matyu 5:32) Yes, Baebol i talem se man mo woman i save seraot, be hemia we i livim waef no hasban blong hem, ‘i mas stap olsem nomo, i no mared bakegen. Sipos no, hem i mas kambak blong joengud bakegen wetem hasban no waef blong hem.’ (1 Korin 7:11) ?Wanem sam nogud fasin we oli save lidim man no woman blong seraot long hasban no waef blong hem?

18, 19. ?Wanem sam nogud fasin we oli save mekem hasban mo waef i seraot, nating se oli no gat raet blong mared bakegen wetem narafala?

¹⁸ Famle i save kam pua tumas from we hasban i les mo i mekem ol nogud fasin.d Maet hem i spenem evri mane blong famle blong plei laki, no i yusum mane ya blong pem drag no alkol. Baebol i talem se: “Man we i no wantem lukaot long . . . olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timote 5:8) Maet wan man olsem i yusum mane we waef blong hem i winim tu, blong sapotem ol nogud fasin blong hem. Sipos hem i no wantem jenisim fasin blong hem, waef i save mekem wan pepa folem loa blong seraot long hem. Olsem nao, waef mo ol pikinini oli save kasem ol samting blong laef we oli nidim.

¹⁹ Mo tu, man no woman i gat raet blong seraot long hasban no waef blong hem we i stap mekem raf fasin long hem. Maet hem i stap kilim hem nogud, we helt mo laef blong hem i stap long denja. Mo tu, hem i gat raet blong seraot sipos hasban no waef blong hem i stap traem blong fosem hem blong brekem loa blong God, antap moa, sipos samting ya i mekem se hem i stap long denja long saed blong speret. Maet hemia we i stap long denja i luk se i gat wan rod nomo blong ‘obei blong God i bitim we hem i obei long man,’ hemia blong mekem pepa folem loa blong seraot long hasban no waef blong hem.—Ol Wok 5:29.

20. (a) Long saed blong mared we i seraot, ?ol fren mo elda we oli bigman long tingting oli save mekem wanem, mo oli no mas mekem wanem? (b) ?Olgeta we oli mared oli no mas yusum ol vas blong Baebol long saed blong fasin blong seraot mo divos olsem wan eskyus blong mekem wanem?

²⁰ Sipos wan long tufala i stap mekem nogud tumas long narawan, ol narafala oli no mas traem fosem hemia we i no gat fol blong seraot long hemia we i stap mekem nogud, no blong stap wetem hem. I tru, ol fren mo elda we oli bigman long saed blong tingting, oli save givhan mo givim advaes we i stanap long Baebol. Be oli no save evri samting we i stap kamaot bitwin hasban mo waef. Jeova nomo i save luk ol samting ya. Sipos wan Kristin waef i mekem ol gyaman eskyus jes blong brekem mared blong hem, hem i no stap ona long plan blong God long saed blong mared. Be sipos man blong hem i gohed blong mekem ol samting we oli rili putum hem long denja, nao hem i jusum blong seraot long man blong hem, ol narafala oli no mas tok agensem hem from. Yumi save talem sem samting long saed blong ol Kristin hasban we oli seraot long waef blong olgeta. “Yumi evriwan i mas stanap long fes blong God, blong bambae hem i jajem yumi.”—Rom 14:10.

WAN MARED WE I SERAOT I KAMGUD BAKEGEN

21. ?Wanem store i soem se ol advaes blong Baebol long saed blong mared i wokgud?

²¹ Tingting bakegen long Lucia, we yumi tokbaot long stat blong japta ya. Tri manis afta we hem i seraot long hasban blong hem, hem i mitim ol Wetnes blong Jeova mo i stat stadi Baebol wetem olgeta. Hem i eksplenem se: “Mi mi sapraes tumas, se Baebol i talem ol rod blong winim problem blong mi. Wan wik nomo afta we mi stat stadi, mi wantem joen bakegen wetem hasban blong mi. Naoia, mi save talem se Jeova i save rod blong stretem ol mared we oli stap trabol, from we ol tijing blong hem oli givhan long hasban mo waef wanwan blong save olsem wanem blong tinghae long narawan. Samfala oli talem se ol Wetnes blong Jeova oli stap seraotem ol famle. Samting ya i no tru. Long saed blong mi, ol Wetnes blong Jeova oli mekem mitufala i joengud bakegen.” Lucia i lanem blong folem ol rul blong Baebol long laef blong hem.

22. ?Wanem samting we ol mared man mo woman oli mas trastem fulwan?

²² I no Lucia nomo we samting ya i hapen long hem. Mared i mas olsem wan blesing, i no wan baden. Taswe, Jeova i givim nambawan Tok blong hem, Baebol, olsem wan stampa blong advaes long saed blong mared. Baebol i gud moa i bitim ol narafala advaes we ol man oli bin raetemdaon. Hem i save “givim waes long olgeta we oli no gat waes.” (Ol Sam 19:7-11) Hem i stretem finis plante mared we kolosap oli brok, mo i givhan long plante narafala mared we oli gat bigfala problem. Ol hasban mo waef oli save trastem fulwan ol advaes long saed blong mared we Jeova God i givim. !Ol advaes ya oli rili wokgud!

[Futnot]

?OLSEM WANEM OL RUL YA BLONG BAEBOL OLI SAVE GIVHAN . . . LONG WAN MARED WE KOLOSAP I BROK?

Mared i save givim glad mo trabol tu.—Proveb 5:18, 19; 1 Korin 7:28.

Hasban mo waef i mas stretem rao kwiktaem.—Efesas 4:26.

Long wan storeyan, fasin blong lesin i impoten olsem fasin blong toktok.—Jemes 1:19.

Taem hasban mo waef i slip tugeta, tufala wanwan i mas soem kaengud fasin mo gat tingting blong mekem i gud long narawan fastaem.—1 Korin 7:3-5.

[Tok Blong Pija Long Pej 154]

Stretem ol problem kwiktaem. Yu no mas stap kros go kasem we san i godaon