Fasin Blong Givim Plante i Karem Glad

OLSEM wan Kristin elda we i gat lav, aposol Pol i rili kea mo i wantem givhan long ol brata sista blong hem. (2 Korin 11:28) Taswe, long medel blong ol yia 50 blong faswan handred yia Kristin taem, hem i lukaot long wok blong tekem presen mane blong givhan long ol Kristin long Judia we oli gat nid. Hem i yusum janis ya blong tijim wan nambawan lesen long saed blong givim wetem gladhat. Pol i talemaot klia se, Jeova i tinghae long fasin blong givim wetem glad: “Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.”—2 Korin 9:7.

Nating Se Oli Pua, Be Oli Glad Blong Givim

Plante long ol Kristin blong ol faswan handred yia oli no gat hae nem blong plante man oli save gud olgeta. Pol i makem se i no plante long medel blong olgeta we oli “gat paoa.” Oli olsem “ol samting we ol man blong wol oli stap talem se oli no gat paoa,” “we oli no gat nem.” (1 Korin 1:26-28) Wan eksampol, ol Kristin we oli stap long Masedonia “oli puaman tru” mo “plante trabol i kasem olgeta blong traem olgeta.” !Nating se i olsem, ol man Masedonia ya we oli gat tingting daon oli askem sipos oli save gat janis blong givim presen mane i go “blong givhan long ol Kristin man long Judia”; mo Pol i talem se samting we oli givim i “bitim mak olgeta”!—2 Korin 8:1-4.

Nating se i olsem, oli no skelem gladhat blong wan man folem hamas presen we hem i givim. Defren olgeta, impoten samting hemia strong tingting we i pusum olgeta, oli rere blong serem samting we oli gat, mo se fasin ya i kamaot long hat blong olgeta. Pol i soemaot long ol Kristin long Korin se tingting mo hat blong olgeta i joen wetem fasin blong givim presen. Hem i talem se: “Mi mi save finis we yufala i glad blong joen blong sakem kleksen blong givhan long ol Kristin man we oli trabol. Nao from samting ya, mi no save raetem leta i kam long yufala from bisnes ya. Mi mi leftemap nem blong yufala finis long fes blong ol man Masedonia from samting ya. . . . Mo fasin blong yufala, we yufala i glad blong givhan, hem i stikim bighaf blong olgeta finis.” Olgeta “wanwan oli jusumaot” blong givim long gladhat.—2 Korin 9:2, 7.

‘Tingting Blong Olgeta i Pusum Olgeta’

Maet aposol Pol i stap tingbaot wan narafala eksampol blong givim presen wetem gladhat, hemia we i kamaot long drae ples 1,500 yia bifo long taem blong hem. Ol 12 laen blong Isrel oli kam fri long Ijip, oli no moa slef. Oli stap naoia long fored blong bigfala hil ya Sinae, mo Jeova i givim oda long olgeta blong wokem haos wosip mo putum ol samting blong wosip i go insaed. I nidim plante samting, mo oli invaetem nesen ya blong givim presen.

?Ol man Isrel ya oli mekem wanem? “Nao olgeta we tingting blong olgeta i glad blong givim sam samting i go long Hae God blong mekem wok ya, olgeta oli tekem ol samting ya i kam. Olgeta oli karem ol samting blong wokem Haos Tapolen ya blong Hae God.” (Eksodas 35:21) ?Olgeta long nesen ya oli givim presen wetem gladhat? !Yes oli mekem! Oli givim ripot ya long Moses se: “Naoia, ol man ya oli stap givim plante samting tumas. Yumi gat plante samting finis blong finisim ol wok ya we Hae God i talem.”—Eksodas 36:5.

?Ol man Isrel, oli gat plante mane long taem ya? Nogat. I no longtaem bifo, oli harem nogud olsem ol slef we oli “fosem olgeta blong oli wok,” laef blong olgeta i “strong tumas,” i wan laef we ol man Ijip oli mekem tumas “rabis fasin” long olgeta. (Eksodas 1:11, 14; 3:7; 5:10-18) From samting ya, i klia se oli no gat plante samting long saed blong bodi. I tru se, ol man Isrel oli lego kantri ya we oli bin slef long hem wetem ol sipsip mo ol buluk. (Eksodas 12:32) Be ol samting ya oli no plante tumas, from i no longtaem afta we oli lego Ijip, oli komplen se oli no gat bred no mit blong kakae.—Eksodas 16:3.

?Be weples nao ol man Isrel oli karem ol sas samting ya we oli givim olsem presen long haos wosip? Ol samting ya oli kam long ol man Ijip we oli masta blong olgeta bifo. Baebol i talem se: “Mo long taem ya, . . . oli go asaskem long ol man Ijip ya blong oli givim ol samting long olgeta we ol man oli wokem long silva no long gol, wetem ol gudfala klos blong olgeta. . . . ol man Ijip oli . . . bin givim ol samting ya long olgeta olsem we oli askem.” Kaen fasin we ol man Ijip oli soem blong givim plante samting, i wan blesing we i kam long Jeova, i no long Fero. Baebol i talem se: “Nao Hae God i bin mekem ol man Ijip oli tinghevi long olgeta, mo long taem ya, oli bin givim ol samting ya long olgeta olsem we oli askem.”—Eksodas 12:35, 36.

Traem tingbaot filing we ol man Isrel oli gat long taem ya. Long ol yia we oli pas, plante long olgeta oli bin safa from nogud fasin blong slef mo oli sot long plante samting. Naoia oli fri mo oli gat ol rij samting. ?Bambae oli harem olsem wanem taem oli lego sam long ol samting ya? Maet oli harem se oli wokhad from ol samting ya mo oli gat raet blong holemtaet i stap. Be, taem oli askem olgeta blong givim presen mane blong sapotem trufala wosip, oli mekem olsem—!from we oli wantem mo oli no givim smol nomo! Oli no fogetem se Jeova nao i mekem se oli save gat ol samting ya. Taswe, oli givim plante long ol silva mo ol gol mo ol anamol blong olgeta. Oli “glad blong givim.” ‘Hat blong olgeta i glad blong givim.’ “Tingting blong olgeta i glad blong givim.” Hem i rili wan nambawan presen we “oli givim i go long Hae God.”—Eksodas 25:1-9; 35:4-9, 20-29; 36:3-7.

Oli Rere Blong Givim

I no hamas presen we man i givim we i soemaot gladhat blong man ya. Wantaem Jisas Kraes i stap lukluk taem ol man oli stap putum mane i go insaed long presen bokis blong haos prea. Ol rij man oli putum plante mane, be Jisas i glad taem hem i luk wan wido we i putum tu smol mane we oli no bigwan nating. Hem i talem se: “Kleksen we wido ya i sakem i moa long ol mane we olgeta narafala man ya oli sakem. . . . hem i sakem olgeta mane we hem i gat, we i blong pem kakae blong hem long hem.”—Luk 21:1-4; Mak 12:41-44.

Ol tok we Pol i talem long ol man Korin i laenap wetem tingting blong Jisas. Pol i talem samting ya long saed blong ol presen mane we oli givim blong givhan long ol brata sista we oli gat nid, i se: “Sipos yufala i glad blong givim, bambae God i glad blong tekem presen long ol samting nomo we yufala i gat. Hem i no save askem long yufala, blong yufala i givim ol samting we yufala i no gat.” (2 Korin 8:12) Yes, yumi no givim presen mane blong traem winim narafala no blong skelem wetem hemia blong ol narafala. Wan man i givim samting folem wanem we hem i gat, mo Jeova i glad wetem man we i gat tingting blong wantem givim.

Jeova i bos long olgeta samting, i no gat man we i save mekem Jeova i kam rij. Nating se i olsem, fasin blong givim presen hem i wan janis we ol trufala man blong hem oli gat blong soem lav long hem. (1 Kronikel 29:14-17) Ol presen we man i givim, we oli no blong soemaot hem, no from hem i wantem kasem sam samting blong hem nomo, be we man i givim wetem stret tingting mo blong givhan long trufala wosip, ol presen ya nao oli karem glad wetem ol blesing blong God. (Matiu 6:1-4) Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Yumi save kasem glad ya taem yumi givim paoa blong yumi long wok blong Jeova mo taem yumi yusum sam samting we yumi gat blong sapotem trufala wosip mo blong givhan long olgeta we oli gat nid.—1 Korin 16:1, 2.

Yumi Mas Rere Blong Givim Tede

Tede, ol Witnes blong Jeova oli glad tumas blong luk se wok blong talemaot “gud nius blong Kingdom” long ful wol i stap gru. (Matiu 24:14, NW) Long ol las ten yia blong ol yia 1900, bitim 3,000,000 man oli baptaes blong soemaot se oli givim laef blong olgeta i go long Jeova God, mo i gat samwe long 30,000 niu kongregesen oli stanap. !Yes, 30 pesen blong ol kongregesen blong ol Witnes blong Jeova we oli stap tede oli bin stat long ol ten yia we oli jes pas! Bigfala namba ya i kamaot from ol hadwok blong ol Kristin man mo woman we oli givim taem mo paoa blong olgeta blong visitim ol man we oli stap raonabaot olgeta mo tokbaot ol stamba tingting blong Jeova long olgeta. Wan samting we i mekem se namba ya i kam antap, hemia frut we i kamaot from wok blong ol misinari we oli livim ples blong olgeta blong go long sam kantri longwe blong givhan long wok blong talemaot Kingdom. From we namba ya i go antap, oli nidim blong mekem ol niufala seket. Samting ya i mekem se oli mas putumap sam niufala seket elda. Antap moa, oli nidim moa Baebol blong yusum long wok blong prij mo blong mekem prapa stadi wanwan. Oli nidim moa buk we oli prentem. Mo long plante kantri, oli mas mekem ol branj ofis oli kam bigwan moa no blong bildim ol niufala ofis we oli bigwan moa. Olgeta samting we yumi nidim oli kamaot from help blong ol presen mane we ol man blong Jeova oli glad blong givim.

I Nidim Ol Haos Kingdom

From we namba blong ol Witnes blong Jeova i stap kam antap, i klia se oli nidim moa Haos Kingdom. Wan stadi we oli mekem long stat blong yia 2000 i soemaot se i nidim bitim 11,000 Haos Kingdom long ol kantri we oli pua, we ol man oli no gat plante mane. Tingbaot Angola. Nating se faet i stap gohed long kantri ya long plante yia finis, namba blong ol niufala pablisa blong Kingdom i kam antap 10 pesen evri yia. Be, bighaf blong ol 675 kongregesen long bigfala kantri ya long Afrika oli stap holem miting afsaed long open ples. I gat 22 Haos Kingdom nomo long kantri ya, mo 12 long olgeta nomo oli gat wan ruf.

Sem samting i stap kamaot long Demokratik Ripablik blong Kongo. Nating we i gat klosap 300 kongregesen long bigfala taon blong Kinshasa, i gat ten Haos Kingdom nomo. Fulwan kantri ya i rili nidim moa long 1,500 Haos Kingdom. Rasia mo Yukren oli talemaot se oli nidim plante handred Haos Kingdom, from we namba i stap gru kwiktaem long ol kantri blong Is Yurop. Namba blong ol pablisa i kam antap bigwan tu long Latin Amerika. Samting ya i klia long Brasil, we i gat bitim 500,000 Witnes mo we oli nidim plante moa Haos Kingdom.

Ol Witnes blong Jeova oli stanemap wan plan blong bildim ol Haos Kingdom kwiktaem. Samting ya i givhan long ol kantri we oli nidim ol Haos Kingdom. Program ya blong bildim ol Haos Kingdom i kasem mane blong hem tru long ol presen mane we i kam long kampani blong olgeta brata long ful wol. Long rod ya nating se wan kantri i pua, bambae hem i save gat wan stret ples blong wosip.

Olsem long taem blong ol man Isrel bifo, wok i save gohed gud from we ol trufala Kristin oli soem “ona long Jeova wetem ol sas samting blong olgeta.” (Ol Proveb 3:9, 10, NW) Hed Kampani i wantem tekem janis ya blong talem bigfala tangkiu long evriwan we hat blong olgeta i pusum olgeta blong joen long fasin ya blong givim presen mane. Mo yumi save trastem se bambae spirit blong Jeova i gohed blong pusum hat blong ol man blong hem blong sapotem wok blong Kingdom we i stap gru i kam antap oltaem.

Taem wok ya long ful wol i stap gohed, i gud yumi lukaot janis blong soem glad blong yumi mo soem se yumi rere blong givim paoa blong yumi, taem blong yumi, mo ol samting we yumi gat. Mo i gud yumi kasem trufala glad ya we i kamaot from fasin blong givim.

[Bokis blong pija long pej 29]

“!YUSUM LONG WAES FASIN!”

“Mi mi gat ten yia. Mi sanem mane ya i kam long yufala blong yufala i save pem pepa no sam narafala samting bakegen blong mekem ol buk.”—Cindy.

“Mi laekem blong sanem mane ya i kam long yufala blong yufala i mekem moa buk blong mifala. Mi sevem mane ya taem mi bin halpem papa blong mi. !Taswe, yusum long waes fasin!”—Pam, seven yia.

“Mi harem nogud from hariken ya. Mi hop se yufala i sefgud. Hemia [$2, U.S.] olgeta mane we mi bin sevem.”—Allison, fo yia.

“Nem blong mi Rudy, mo mi gat 11 yia. Brata blong mi Ralph i gat sikis yia. Mo sista blong mi Judith i gat tu yia haf. Mifala i bin sevem mane we mifala i kasem blong tri manis finis, blong mifala i save halpem ol brata blong mifala long [wan ples we i gat faet i stap gohed long hem]. Mifala i sevem 20 dola we mifala i sanem naoia.”

“Mi mi sore long ol brata [we wan hariken i bin kilim olgeta]. Mi winim 17 dola taem mi wok wetem papa blong mi. Mi no talemaot stret wanem we yufala i mas mekem wetem mane ya we mi sanem i kam, taswe bambae mi letem yufala i mekem disisen long saed ya.”—Maclean, eit yia.