!Yu Wan Man Blong Wok We God i Trastem Yu!

“Bodi blong yufala . . . i blong God.”—1 KOR. 6:19.

?BAMBAE YU YU ANSA OLSEM WANEM?

?Long taem bifo, ol slef we masta i putumap olgeta, oli mekem wanem wok?

?God i wantem we olgeta man blong hem oli mekem wanem?

?Yumi mas gat wanem tingting long wok we God i givim long yumi?

 1. ?Wanem tingting we plante man oli gat long ol slef?

SAMWE long 2,500 yia bifo, wan man Gris i talem se, i no gat man we i wantem wok slef. Plante man tede oli agri wetem toktok blong man ya. Oli tingbaot slef se hem i man no woman we narafala i fosem hem blong wok mo oli mekem i nogud tumas long hem. Long tingting blong olgeta, wan slef i mas mekem i gud long masta blong hem, be hem i no kasem wan gudfala samting nating, mo masta i gat raet blong bos strong long hem.

2, 3. (1) ?Wanem fasin we Masta i soemaot long ol slef blong hem? (2) ?Wanem ol kwestin we bambae yumi tokbaot?

² Jisas i talem se ol disaepol blong hem oli man blong wok we oli gat tingting daon, mo hem i yusum tok ya slef tu blong tokbaot olgeta. Be ol tru Kristin oli no ol slef we masta blong olgeta i spolem olgeta mo mekem i nogud long olgeta. Nogat. Oli olsem slef we masta blong olgeta i trastem olgeta mo i gat respek long olgeta. Yu traem tingbaot wanem we Jisas i talem long saed blong wan “slef” blong hem. Smoltaem bifo we Jisas i ded, hem i talem se bambae hem i givim wok long “slef ya we i stret mo waes.”—Mat. 24:45-47, NW.

³ Buk blong Luk i tokbaot slef ya tu, se hem i wan “man blong wok” we masta i putumap hem. (Ridim Luk 12:42-44.) Bighaf blong ol tru Kristin tede, oli no stap long grup ya we Jisas i talem se i ‘man blong wok we i save lukaot gud long ol wok blong masta blong hem.’ Nating se i olsem, Baebol i talem se olgeta man blong God oli gat wok blong mekem. ?Wanem ol wok we God putum long han blong yumi? ?Yumi mas gat wanem tingting long ol wok ya? Blong kasem ansa blong ol kwestin ya, bambae yumi tokbaot ol man blong wok we Baebol i tokbaot olgeta.

SLEF WE MASTA I PUTUMAP HEM

4, 5. ?Wanem wok blong wan slef we masta i putumap hem? ?Wanem stori we i soemaot samting ya?

⁴ Baebol i soemaot se, long taem bifo, wan masta i save putumap wan man blong i bos long olgeta samting long haos blong hem no long bisnes blong hem. Plante taem, man ya hem i wan slef we masta ya i trastem hem. Slef ya i lukaot long graon, haos, mane blong masta blong hem, mo maet i bos tu long ol narafala wokman blong masta. Man ya Eliesa, hem i wan slef olsem. Ebraham i putumap hem i bos long olgeta samting blong hem. Mo maet hem nao man blong wok we Ebraham i sanem hem i go long Mesopotemia blong i jusum wan woman blong Aesak. !Hemia wan bigfala wok ya we Ebraham i putum long han blong wan slef!—Jen. 13:2; 15:2; 24:2-4.

⁵ Josef, we hem i pikinini blong wan smol bubu blong Ebraham, hem i wok slef blong Potifa. Mo Potifa i putumap hem i bos long olgeta samting long haos blong hem. (Jen. 39:1, 2, 4) Baebol i talem se, biaen, Josef tu i kam wan haeman, mo hem i gat wan slef blong hem “we i bos long olgeta samting insaed long haos blong hem.” Slef ya nao we i welkamem olgeta ten brata blong Josef mo i givim olgeta samting we oli nidim. Taem Josef i mekem plan blong traem ol brata blong hem wetem wan silva panikin, hem i sanem slef ya blong mekem olgeta samting olsem we hem i wantem. Ol stori ya oli soemaot se, ol masta oli trastem gud ol slef ya we oli putumap blong oli bos long ol samting blong olgeta.—Jen. 43:19-25; 44:1-12.

 6. ?Wanem wok we i stap long han blong ol elda?

⁶ Aposol Pol i talem se ol elda oli ol man we God i putumap olgeta blong mekem wok blong hem. (Taet. 1:7, NW) Oli olsem ol man blong lukaot long ol sipsip from we oli stap lidim kongregesen blong ‘ol sipsip blong God.’ (1 Pita 5:1, 2) Ol elda oli gat ol defdefren wok blong mekem long ogenaesesen blong God. Bighaf blong ol elda tede oli lukaot long wan kongregesen nomo. Ol elda we oli stap goraon blong visitim ol kongregesen, oli lukaot long plante kongregesen. Mo ol elda long Komiti blong Hed Ofis oli lukaot long olgeta kongregesen long wan kantri. Nating se i olsem wanem, olgeta elda ya evriwan oli mas traehad blong mekem gud wok blong olgeta. Olgeta evriwan bambae oli mas “talemaot long God we oli holem wok ya olsem wanem.”—Hib. 13:17.

 7. ?Olsem wanem yumi save se olgeta Kristin oli gat wan wok blong mekem?

⁷ ?Olsem wanem yumi save se olgeta Kristin oli gat wan wok blong mekem, nating se oli no elda? Aposol Pita i raetem leta i go long olgeta Kristin mo hem i talem se: “God i soemaot gladhat blong hem long plante defdefren rod. Hem i givim presen long yufala wanwan we i stret long mak blong yufala. Ale, olsem ol gudfala man blong wok, yufala i mas yusum presen ya blong givgivhan long yufala.” (1 Pita 1:1; 4:10, NW) God i mekem i gud long yumi. Hem i givim ol presen long yumi evriwan. Ol presen ya i minim gudhan no save we yumi gat blong mekem wan wok. Yumi yusum gudhan no save ya blong yumi, blong givhan long ol brata mo sista blong yumi. Taswe yumi evriwan, yumi gat wok we God i putum long han blong yumi. Hem i trastem yumi, hem i tinghae long yumi, mo hem i wantem luk tu se yumi yusum gud ol samting ya we hem i givim long yumi.

YUMI BLONG GOD

 8. ?Wanem wan samting we yumi mas tingbaot taem yumi mekem wok blong God?

⁸ I gat tri stamba trutok we olgeta Kristin oli mas tingbaot taem oli mekem wok blong God. Faswan: Yumi evriwan, yumi blong God mo yumi mas mekem hem i glad. Pol i raetem se: ‘Yufala i blong God from we hem i pemaot yufala finis long bigfala praes.’ Praes ya, hemia laef blong Kraes we hem i givim olsem sakrefaes blong pemaot ol sin blong yumi. (1 Kor. 6:19, 20) Yumi blong Jehova, taswe yumi mas obei long ol loa blong hem, mo ol loa ya oli no strong tumas blong folem. (Rom 14:8; 1 Jon 5:3) Mo tu, yumi slef blong Kraes. Be yumi olsem ol slef ya we Baebol i talem se masta i putumap olgeta oli bos long olting blong hem. Yumi no kalabus, be yumi no save mekem eni samting olsem we yumi nomo i wantem. Yumi mas mekem ol samting olsem we God i wantem. Yes, yumi evriwan i man blong wok blong God mo Kraes, nomata hamas wok we yumi kasem long ogenaesesen blong God.

 9. ?Stori we Jisas i talem i soemaot se wan masta i wantem we man blong wok i mekem wanem?

⁹ ?Wan masta i wantem se man we i wok blong hem i mekem wanem? Jisas i talem wan stori long ol disaepol blong hem, blong soemaot samting ya. Long stori ya hem i tokbaot wan man blong wok we i kambak long haos long naet. ?Yufala i ting se masta bambae i talem long man ya se: “Yu kam kwik, yu sidaon, yu kakae”? Nogat. Masta bambae i talem long man ya se: “Yu go mekem kakae blong mi i rere. Biaen yu go putum klos blong yu, mo yu tekem kakae mo wota i kam, blong mi kakae. Nao biaen, yu yu save kakae.” ?Wanem lesen we Jisas i wantem tijim long ol disaepol blong hem? Hem i talem se: “Yufala i olsem ol man blong wok blong God. Taem yufala i mekem olgeta samting we hem i talem long yufala blong yufala i mekem, yufala i mas talem se, ‘Be yumi ya, yumi man blong wok nomo blong hem. I stret nomo blong yumi mekem olsem.’”—Luk 17:7-10.

10. ?Wanem i soemaot se Jehova i tinghae long olgeta samting we yumi mekem blong hem?

¹⁰ Yumi glad from we Jehova i wan gudfala masta. Hem i tinghae long olgeta samting we yumi mekem blong hem. Baebol i talem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.” (Hib. 6:10) Jehova i askem long yumi blong mekem samting we yumi naf blong mekem. Ol samting ya oli mekem i gud long yumi, mo oli no had tumas. Be Jisas i tijim ol disaepol blong hem, se man blong wok i no save mekem samting olsem we hem nomo i wantem. Hem i mas mekem ol samting we masta blong hem i wantem fastaem. Long sem fasin, taem yumi givim laef blong yumi i go long God, yumi jus blong mekem ol samting we hem i wantem fastaem long ol samting we yumi wantem. ?Yu yu agri long samting ya?

?JEHOVA I WANTEM YUMI EVRIWAN BLONG MEKEM WANEM?

11, 12. ?Wanem fasin we yumi mas soemaot long ol man? ?Fasin blong laef blong yumi i mas olsem wanem?

¹¹ Namba tu stamba trutok we yumi mas tingbaot se: Yumi evriwan i obei long ol semfala rul nomo. I tru se sam man long ogenaesesen blong God oli gat wok we narafala i no gat. Be i gat sam samting we evri man blong God oli mas mekem. Wan long ol samting ya se, ol man blong Jehova oli mas lavlavem olgeta. Jisas i talem se olgeta man bambae oli save se yumi ol man blong hem sipos yumi lavlavem yumi. (Jon 13:35) Be yumi no lavem ol brata mo sista nomo. Yumi mas traehad tu blong lavem ol man we oli no Witnes blong Jehova. Hemia wan samting we yumi evriwan i save mekem, mo yumi mas mekem.

¹² Mo tu, God i wantem we yumi mekem ol fasin we oli stret mo yumi sakemaot ol rabis fasin ya we Baebol i tok agensem. Aposol Pol i raetem se: “Yufala i mas save se man we i stap ronem woman, mo man we i stap prea long ol narafala god, bambae oli no save go insaed long niufala wol ya. Man we i stap slip wetem woman blong narafala man mo woman we i stap mekem i krangke wetem narafala man, mo man we i stap slip wetem man, mo woman we i stap slip wetem woman, bambae oli no save go insaed long niufala wol ya. Man we i stap stil, mo man we i wantem plante samting tumas, mo man we i stap dring we i lusum hed, mo man we i stap spolem nem blong narafala man, mo man we i stap mekem ol bisnes blong stilim mane, bambae oli no save go insaed.” (1 Kor. 6:9, 10) Sipos yumi wantem mekem ol fasin we God i talem se oli stret, yumi mas traehad. Nao taem yumi traehad, bambae yumi kasem plante gudgudfala samting. Sam long ol samting ya se, yumi gat gudfala helt, yumi stap long pis wetem ol man, mo yumi fren gud wetem God.—Ridim Aesea 48:17, 18.

13, 14. ?Wanem wok we God i putum long han blong olgeta Kristin? ?Wanem tingting we yumi mas gat long wok ya?

¹³ Man we i bos long olgeta samting blong masta blong hem, hem i no bos nomo, be hem i gat wan wok tu blong mekem. Yumi tu yumi gat wan wok blong mekem. God i givim wan nambawan presen long yumi. Hem i tijim yumi long ol trutok. Mo hem i wantem we yumi tijim ol trutok ya long ol narafala man. (Mat. 28:19, 20) Pol i talem se olgeta Kristin oli man blong wok blong Kraes mo oli “holem ol tokhaed blong God.” (1 Kor. 4:1, NW) Ol “tokhaed” ya, hemia ol trutok blong Baebol. Pol i save se from we hem i “holem ol tokhaed” ya, hem i gat wan wok blong mekem. Yes, hem i mas tijim ol trutok ya long ol narafala man. Hemia nao samting we Masta blong hem, Jisas Kraes, i wantem hem blong mekem.—1 Kor. 9:16.

¹⁴ Taem yumi tijim trutok long ol man, yumi soemaot se yumi lavem olgeta. Be yumi evriwan, yumi no save mekem wok blong prij long fasin we i sem mak, from we laef blong yumi wanwan i defren. Jehova i save gud samting ya. Samting we i impoten, se yumi mas mekem evri samting we yumi naf blong mekem. Olsem nao, yumi soemaot se yumi no tingbaot yumi nomo be yumi lavem God mo ol man.

YU MAS MEKEMGUD WOK WE GOD I GIVIM LONG YU

15-17. (1) ?From wanem wan man blong wok i mas mekem gud wok blong hem? (2) ?Jisas i soemaot se sipos yumi no mekem gud wok blong yumi, wanem bambae i hapen?

¹⁵ Namba tri stamba trutok, se: Yumi soemaot se yumi mekemgud wok blong God taem yumi obei. Maet wan man blong wok i gat save mo gudhan blong mekem samting. Be sipos hem i no obei mo i no mekemgud wok blong hem, save mo gudhan blong hem i blong nating nomo. Wan man blong wok i mas mekemgud ol wok blong hem sipos hem i wantem we wok ya i stret mo masta blong hem i glad. I gud yumi tingbaot ol tok ya we Pol i raetem se: “Sipos wan masta i putum wok long han blong bos blong ol man blong hem, man ya bambae i mas lukaot gud blong mekem ol samting we masta blong hem i talem long hem.”—1 Kor. 4:2.

¹⁶ Sipos yumi mekemgud wok blong God, yumi save sua se bambae God i givim pei long yumi. Be sipos yumi no mekem olsem, bambae God i no save glad long yumi. Jisas i soemaot samting ya long wan stori. Stori ya i tokbaot trifala man we oli holem mane blong masta blong olgeta. Masta i talem gudfala toktok long tufala man we tufala i mekem “bisnes” wetem mane blong hem. Ale hem i putumap tufala blong tufala i lukaot long plante moa wok. Be hem i tok long man ya we i no obei long hem. Hem i talem se man ya i wan rabis man, mo hem i les tumas. Masta ya i karemaot mane blong hem long man ya, mo i sakemaot hem.—Ridim Matiu 25:14-18, 23, 26, 28-30.

¹⁷ Jisas i talem wan narafala stori blong soemaot wanem i hapen long man we i no mekemgud wok blong hem. Hem i talem se: “I gat wan rijman we hem i gat wan man we i bos long olgeta wok blong hem. Nao ol man oli kam ripotem bos ya long hem, oli talem se, ‘Ei, man ya i stap spolem olting blong yu ya.’ Nao rijman ya i singaot bos ya i kam stanap long fes blong hem, nao i askem long hem se, ‘!Ei! ?Wanem ol tok ya we mi mi stap harem? Yu mas mekem wan ripot long olgeta wok blong yu, from we naoia bambae yu yu finis, yu no moa save holem wok ya bakegen.’” (Luk 16:1, 2) Man ya i spolem olting blong masta blong hem. Taswe masta ya i karemaot wok long han blong man ya. Yumi lanem wan impoten lesen long stori ya. Taem God i askem long yumi blong mekem wan wok, nomata se wanem wok, be yumi mas traehad blong mekemgud wok ya.

I NO STRET BLONG SKELEM WOK BLONG YU WETEM WOK BLONG NARAFALA

18. ?From wanem i nogud yumi skelem wok blong yumi wetem wok blong narafala?

¹⁸ I gud blong tingbaot se: ‘?Mi mi wanem kaen man blong wok?’ Be i nogud blong skelem wok blong yumi wetem wok blong narafala. Baebol i talem se: “Olgeta man wanwan oli mas traem ol wok we olgeta nomo oli mekem. Nao oli save makem we oli kam man olsem wanem from ol wok blong olgeta nomo, i no from wok blong sam narafala man.” (Gal. 6:4) Yes, i nogud blong makem wok blong yumi wetem wok blong narafala blong traem luk se weswan i gud. I moagud yumi makem wok blong yumi wan se: ‘?Mi mi save mekem wanem blong kam gud moa long wok we mi mi stap mekem?’ Ale yumi mas traehad blong kam gud moa. Olsem nao, bambae yumi no kam flas, be tu, bambae tingting blong yumi i no foldaon. Mo tu, maet sam samting long laef blong yumi i jenis. Maet yumi sik, yumi kam olfala, no yumi gat sam narafala wok blong mekem, ale yumi no moa save mekem plante long wok blong Jehova olsem fastaem. No maet ol samting long laef blong yumi i givim janis long yumi blong mekem moa long wok blong Jehova. Sipos i olsem, i gud yumi tekem janis ya.

19. ?Sipos oli no givim wok long yumi yet, from wanem yumi no mas harem nogud tumas?

¹⁹ Yumi no mas skelem yumi wetem olgeta we oli mekem wok we maet yumi tu yumi wantem mekem. Sipos yu wan brata, maet yu wantem mekem wok blong elda long kongregesen, mo maet yu wantem givim ol tok long asembli. I gud tumas blong luk we ol brata oli stap traehad blong kasem ol mak we Baebol i tokbaot, blong mekem wok long kongregesen. Be yumi no mas harem nogud tumas sipos yumi luk se yumi no kasem ol wok ya kwiktaem olsem we yumi wantem. Maet yumi no kasem ol wok ya from sam risen we yumi no luksave yet. Ale, yumi mas wet. Yu traem tingbaot Moses. Maet hem i gat tingting ya se hem i rere finis blong lidim ol man Isrel oli goaot long Ijip. Be hem i mas wet 40 yia. Long ol yia ya, hem i naf blong lanem plante gudfala fasin we oli givhan long hem blong lidim neson blong Isrel we i stronghed tumas.—Wok 7:22-25, 30-34.

20. ?Yumi lanem wanem long fasin blong Jonatan?

²⁰ Maet bambae yumi neva kasem wan wok. Yu traem tingbaot Jonatan. Hem i pikinini blong Sol, mo hem i sud kam king blong Isrel afta long papa blong hem. Be God i jusum Deved blong i king. Deved i yangfala moa long Jonatan. ?Jonatan i mekem wanem? Hem i glad long desisen blong God, mo hem i givhan long Deved nating se hem i save lusum laef blong hem from. Hem i talem long Deved se: ‘Bambae yu kam king blong Isrel, mo mi bambae mi kam nambawan haeman blong yu.’ (1 Saml. 23:17) ?Yumi lanem wanem long fasin blong Jonatan? Hem i no tok smosmol agensem desisen ya. Mo hem i no jalus long Deved, olsem we Sol i jalus. Taem yumi luk we ol narafala oli gat wok be yumi no gat, yumi no mas jalus long olgeta. I moagud yumi tingbaot wanem wok we yumi gat finis, mo yumi traehad blong mekemgud ol wok ya. Yumi mas trastem Jehova se, long niufala wol, bambae hem i givim olgeta samting we ol man blong hem oli nidim.

21. ?Wanem tingting we yumi mas gat long wok blong God?

²¹ Yumi mas tingbaot oltaem se yumi ol man blong wok blong God. Yumi no ol slef we oli fosem yumi blong wok. Mo yumi no gat wan masta we i mekem i strong long yumi. Jehova i trastem yumi mo hem i tinghae long yumi, taswe hem i givim wan impoten wok long yumi blong yumi mekem. Wok ya hemia blong talemaot gud nius long taem blong ol las dei. Bambae yumi no moa mekem wok ya bakegen long fiuja. Mo Jehova i letem yumi fri blong jus se yumi wantem mekem wok ya olsem wanem. Taswe, yumi mas mekemgud wok blong yumi. Jehova i haefala masta blong heven mo wol, taswe yumi no mas foget se taem yumi mekem wok blong hem, hemia wan bigfala blesing ya.

[Tok blong pija long pej 20]

Yumi mas traehad blong mekemgud ol wok we God i givim long yumi