!Yu Mas Gat Fasin Blong Wan Sitisen Blong Kingdom!

“Yufala i mas mekem we fasin blong laef blong yufala evri dei, i stret long mak blong gud nius.”—FIL. 1:27.

?BAMBAE YU YU ANSA OLSEM WANEM?

?Hu i save kam sitisen blong Kingdom?

?Yu save mekem wanem blong lanem lanwis blong Kingdom, histri blong hem, mo loa blong hem?

?Ol sitisen blong Kingdom oli mekem wanem blong soemaot se oli laekem loa blong God?

1, 2. ?Ol Kristin long Filipae oli tingbaot wanem taem oli harem tok ya “gat fasin blong wan sitisen”?

APOSOL POL i talem long ol Kristin long kongregesen blong Filipae se oli mas ‘mekem fasin blong laef blong olgeta i stret long mak blong gud nius.’ (Ridim Filipae 1:27.) Long olfala lanwis we oli raetem Baebol long hem fastaem, tok ya ‘mekem fasin blong laef i stret,’ i min se man i “gat fasin blong wan sitisen.” Ol tok ya oli gat spesel mining long tingting blong ol Kristin blong Filipae. ?From wanem? From we i luk olsem se gavman blong Rom i letem ol man Filipae blong oli kam sitisen blong Rom, nao loa blong Rom i save lukaot long olgeta. Ol man Filipae oli praod blong stap olsem ol sitisen blong Rom, from oli save kasem sam samting we plante man long taem ya oli no kasem.

² Be ol Kristin long Filipae we tabu spirit i makemaot olgeta, oli praod from wan narafala risen. Pol i talem long olgeta se: “Long yumi i narafala. Yumi man [“sitisen,” NW] blong heven.” (Fil. 3:20) Olgeta oli sitisen blong Kingdom blong God. Kingdom ya i hae moa long ol gavman blong man. Hem i lukaotgud long olgeta mo i givhan long olgeta. Gavman blong man i no save mekem olsem.—Efes. 2:19-22.

 3. (1) ?Hu i save kam sitisen blong Kingdom? (2) ?Bambae yumi tokbaot wanem long stadi ya?

³ Tok blong Pol i go fastaem long olgeta we bambae oli rul wetem Kraes long heven. (Fil. 3:20) Be tok ya i go tu long ol man we bambae oli laef olwe long wol ya, aninit long rul blong Kingdom blong God. ?From wanem? From we yumi evriwan i mekem wok blong sem King nomo, hemia Jehova. Mo yumi evriwan i mas mekem samting we hem i wantem. (Efes. 4:4-6) Tede, man we i wantem stap long wan narafala kantri mo kam sitisen blong kantri ya, hem i mas traehad. Yumi gat nambawan janis blong kam sitisen blong Kingdom, be yumi tu yumi mas traehad. Bambae yumi tokbaot sam samting we man i mas mekem blong i kam sitisen blong wan kantri. Mo bambae yumi skelem wetem wanem we man i mas mekem blong i kam sitisen blong Kingdom blong God. Biaen, bambae yumi tokbaot tri samting we yumi mas mekem blong yumi stap olsem sitisen blong Kingdom oltaem.

?YU MAS MEKEM WANEM BLONG KAM WAN SITISEN?

 4. ?Wanem ya klin lanwis? ?Man we i toktok klin lanwis, hem i mekem wanem?

⁴ Yu mas lanem narafala lanwis. Long sam kantri, gavman i talem se man we i wantem kam sitisen, hem i mas lanem lanwis blong kantri ya. Sam man oli mas traehad plante yia blong toktok gud long wan niufala lanwis, nating se oli kam sitisen finis. Maet oli lanem kwiktaem ol fasin blong talem ol tok, be oli nidim moa taem blong oli save toktok gud. Man we i wantem kam sitisen blong Kingdom blong God, hem tu i mas lanem wan niufala lanwis. Baebol i kolem lanwis ya se “klin lanwis.” (Ridim Sefanaea 3:9.a) ?Wanem ya klin lanwis? Hemia trutok blong Baebol long saed blong God mo ol samting we hem i wantem. Yumi toktok klin lanwis, taem yumi obei long ol loa blong God. Maet yumi kwik blong lanem ol stamba tijing blong Baebol. Be afta we yumi baptaes, yumi mas traehad blong kamgud moa long fasin ya blong toktok klin lanwis. ?Yumi mekem samting ya olsem wanem? Yumi wanwan i mas traehad oltaem blong mekem ol save we yumi lanem long Baebol, i wok long laef blong yumi.

 5. ?From wanem yumi mas save histri blong ol man blong Jehova?

⁵ Yu mas save histri. Man we i wantem kam sitisen blong wan kantri, hem i mas save histri blong kantri ya. From we yumi wantem kam sitisen blong Kingdom blong God, yumi mas savegud Kingdom ya. Yumi mas folem eksampol blong ol pikinini blong Kora long Isrel bifo. Oli laekem tumas Jerusalem mo ples blong wosip blong hem. Mo oli laekem tokbaot histri blong taon ya, i no from we taon ya i naes, be from we hem i taon blong Jehova. Ples blong wosip long Jerusalem hem i ples we ol man oli lanem Loa blong Jehova mo oli wosipim hem. King blong Jerusalem i rul long ol man we Jehova i glad long olgeta mo i lavem olgeta. (Ridim Ol Sam 48:1, 2, 9, 12, 13.) Tede tu, God i lidim ol man blong hem long wol. Olsem ol pikinini blong Kora, yumi mas wantem save histri blong ol man blong Jehova, mo yumi mas tokbaot histri ya long ol narafala. Sipos yumi mekem olsem, bambae yumi bilif strong se Kingdom blong God i tru. Nao bambae yumi gat strong tingting blong talemaot gud nius blong Kingdom ya.—Jer. 9:24; Luk 4:43.

 6. ?From wanem Jehova i wantem we yumi save ol loa blong hem mo yumi obei long olgeta?

⁶ Yu mas save loa. Ol gavman oli wantem se ol sitisen blong olgeta oli save loa blong kantri, mo oli obei long loa ya. Taswe, yumi save se Jehova tu i wantem we evri sitisen blong Kingdom i save ol loa blong hem, mo i obei long olgeta. (Aes. 2:3; Jon 15:10; 1 Jon 5:3) Ol loa blong man oli no stret gud mo oli save mekem i gud long sam man nomo. Be loa blong Jehova, hem i “stret gud.” (Sam 19:7) ?Olsem wanem? ?Yu yu laekem blong ridim Baebol evri dei blong save ol loa blong God? (Sam 1:1, 2) Yumi wanwan i mas traehad blong save gud ol loa blong God. Narafala i no save mekem samting ya blong yumi.

OL SITISEN BLONG KINGDOM OLI LAEKEM LOA BLONG GOD

 7. ?From wanem ol sitisen blong Kingdom oli obei long ol loa blong Jehova?

⁷ Blong stap oltaem olsem sitisen blong Kingdom, yumi mas save ol loa blong God mo yumi mas laekem ol loa ya. Long plante kantri, ol sitisen oli talem se oli agri long ol loa blong kantri blong olgeta. Be taem oli no laekem wan loa mo oli ting se man i no luk olgeta, oli no moa obei long loa ya. Plante taem oli obei nomo blong mekem ol man oli glad. (Kol. 3:22) Ol sitisen blong Kingdom oli obei long ol loa blong Jehova from we oli lavem hem. Taswe, yumi glad blong obei nating se i no gat man i luk yumi.—Aes. 33:22; ridim Luk 10:27.

8, 9. ?Yu mas mekem wanem blong save sipos yu laekem loa blong God?

⁸ ?Yu mas mekem wanem blong save sipos yu laekem loa blong God? Yu mas tingbaot fasin blong yu taem narafala i givim advaes long yu long sam samting we yu ting se i bisnes blong yu nomo. Maet narafala i givim advaes long saed blong klos blong yu. Bifo we yu save trutok, maet yu no wari long wanem klos we yu putum, mo yu putum klos we i mekem narafala i gat rabis tingting long yu. Be taem yu save Jehova mo yu lavem hem, yu lanem blong putum klos long fasin we i ona long Jehova. (1 Tim. 2:9, 10; 1 Pita 3:3, 4) Maet yu ting se klos blong yu i oraet nomo. Be sipos wan elda i talem long yu se plante brata mo sista long kongregesen oli luk se klos blong yu i no stret, ?bambae yu mekem wanem? ?Bambae yu mekem eskius, yu kros, mo yu no wantem jenisim fasin blong yu? Wan impoten loa we ol sitisen blong Kingdom oli mas obei long hem, hemia se oli mas folem fasin blong Kraes. (1 Pita 2:21) Pol i talem se: “Kraes i no folem ol fasin we hem nomo i wantem.” Sem mak, yumi mas “tingbaot ol fasin we ol Kristin brata mo sista blong yumi oli wantem, . . . blong mekem olgeta oli strong moa long bilif blong olgeta.” (Rom 15:2, 3) Man we i bigman long Kristin fasin i mas lukaotgud blong no mekem samting we i spolem tingting blong ol narafala. Olsem nao pis i stap long kongregesen.—Rom 14:19-21.

⁹ ?Wanem tingting blong yu long fasin blong man wetem woman, mo long mared? Plante man we oli no sitisen blong Kingdom, oli ting se i oraet nomo blong man i slip wetem man mo woman wetem woman. Oli ting se i oraet nomo we man i lukluk ol rabis pija, i tekem woman we i no woman blong hem, mo i divos. Be ol sitisen blong Kingdom oli tingbaot samting we bambae i kamaot sipos oli mekem fasin we i no stret. Mo oli tingbaot se fasin blong olgeta bambae i spolem narafala. Bifo we oli save trutok, plante long olgeta oli mekem ol nogud fasin blong man wetem woman. Be taem oli lanem trutok, oli luksave se fasin ya we man mo woman i mared mo tufala i slip tugeta, hem i wan presen we Jehova i givim. Oli laekem ol loa blong Jehova mo oli save se sipos oli no obei long ol loa ya, oli no save stap olsem sitisen blong Kingdom. (1 Kor. 6:9-11) Mo oli luksave se hat blong olgeta i save pulum olgeta blong mekem samting we i no stret. (Jer. 17:9) Taswe, oli glad se i gat ol woning we i givhan long olgeta blong oli gohed blong obei long ol loa blong God.

OLI TINGHAE LONG OL WONING

10, 11. ?Kingdom blong God i givim wanem woning long yumi? ?Wanem tingting blong yu long ol woning ya?

¹⁰ Ol gavman blong man oli givim woning long ol sitisen blong kantri, blong oli lukaotgud long sam samting we i save spolem olgeta, olsem kakae mo meresin. I tru se i no evri kakae mo meresin we i nogud. Be gavman nao i gat wok ya blong givimaot ol woning. Kingdom blong God tu i givim woning long ol sitisen blong hem. Hem i wonem yumi long ol samting we i save mekem yumi brekem loa blong God, nao yumi no moa fren gud wetem hem. Yu traem tingbaot. Plante man oli yusum Intenet blong storian wetem narafala. Samfala oli yusum Intenet blong skul mo blong pleplei. Ogenaesesen blong God i yusum Intenet blong mekem plante gudfala samting. Be plante Websaet oli no stret nating, oli soemaot ol rabis pija. Olgeta we oli wantem mekem samting we i stret oli mas lukaotgud se oli no go long ol Websaet ya. Blong plante yia, slef we i stret mo waes i givim woning long yumi long saed ya. !Yumi glad tumas blong kasem ol woning ya!

¹¹ I no longtaem i pas, plante man oli stat yusum Intenet blong faenem ol fren. Samting ya i save givhan long yumi, be i save spolem yumi tu. Taswe yumi mas lukaotgud taem yumi yusum Intenet long fasin ya, from we yumi save storian wetem sam man we oli gat rabis tingting. (1 Kor. 15:33) Slef we i stret mo waes i givim woning long yumi blong yumi luksave sipos i stret blong yusum Intenet blong faenem ol fren. ?Olsem wanem? ?Yu yu ridim evri advaes long ol magasin we i tokbaot samting ya? Sipos yu yusum Intenet long fasin ya be yu no ridim ol advaes ya yet, yu save kasem bigfala trabol.b Hemia i sem mak olsem we yu dring wan strong meresin, be yu no ridim woning we i stap long pepa blong meresin ya.

12. ?From wanem i krangke blong no lesin long woning?

¹² Olgeta we oli no lesin long woning blong slef we i stret mo waes bambae oli harem nogud, mo bambae oli spolem ol famle mo ol fren blong olgeta. Samfala oli wantem lukluk ol rabis pija oltaem, mo samfala oli mekem nogud fasin blong man wetem woman. Oli ting se Jehova i no luk wanem we oli mekem. !I krangke nomo blong ting se yumi save haedem samting long Jehova! (Prov. 15:3; ridim Hibrus 4:13.) Jehova i no save letem man we i gohed blong brekem loa blong hem, i stap olsem sitisen blong Kingdom. Sem mak olsem we gavman i no save letem man we i brekem loa, i stap olsem sitisen blong kantri.c (1 Kor. 5:11-13) Be Jehova i gat sore long man. Hem i yusum ol elda blong givhan long ol man we oli mekem sin. (Gal. 6:1) Ol man we oli tanem tingting blong olgeta, mo oli no moa mekem nogud fasin, oli save kam fren blong Jehova bakegen mo oli save gohed blong stap olsem sitisen blong Kingdom. (2 Kor. 2:5-8) !Yumi glad tumas blong mekem wok blong King ya we i lavem yumi!

OLI TINGHEVI LONG TIJING WE I KAM LONG JEHOVA

13. ?Ol sitisen blong Kingdom oli mekem wanem blong soemaot se oli tinghae long edukesen?

¹³ Plante gavman oli traehad blong mekem se ol sitisen blong olgeta, oli kasem edukesen. Oli wokem ol skul blong lanem ol man blong rid mo raet. Ol sitisen blong Kingdom oli glad long ol skul ya we i tijim olgeta blong rid mo raet, mo blong mekem wan wok. Oli mekem evri samting we oli naf blong mekem blong kasem edukesen ya. Be oli glad moa long tijing we ogenaesesen blong Jehova i givim. Ogenaesesen ya i pulum yumi blong rid. Hem i talem long ol papa mo mama blong oli rid long pikinini blong olgeta. Evri tri manis, slef we i stret mo waes i wokem tri Wajtaoa mo wan Wekap! I gat plante save blong Baebol long ol pej blong ol magasin ya. Sipos yu ridim 1 no 2 pej long wan dei, bambae yu ridim evriwan, bifo we ol niu magasin i kamaot. Taem yu mekem olsem, bambae yu harem gud oltaem long tijing we Jehova i givim long yu.

14. (1) ?Wanem trening we yumi kasem? (2) ?Wanem advaes long saed blong Famle Wosip we yu yu folem?

¹⁴ Evri wik, ol sitisen blong Kingdom oli kasem trening long ol miting blong kongregesen. Bitim 60 yia nao, Skul Blong Trenem Yumi Blong Tij, i givhan long plante man blong oli tijim gud narafala long Baebol. ?Yu yu joen long skul ya? I no longtaem i pas, slef we i stret mo waes i talem bakegen mo bakegen se yumi mas mekem Famle Wosip evri wik. Samting ya i save givhan long famle blong i joen gud. Long ol buk blong yumi, i gat ol advaes we yumi save folem long Famle Wosip. ?Yu yu stap folem olgeta?d

15. ?Yumi gat wanem blesing?

¹⁵ Long plante kantri, ol man oli traem pulum ol narafala blong oli sapotem wan pati blong politik. Samfala oli go luk ol man long haos blong olgeta. Ol sitisen blong Kingdom we oli stap long olgeta ples long wol, oli sapotem Kingdom blong Jehova nomo. Ale, oli talemaot Kingdom ya long ol man long rod mo long ol haos wanwan. Wok blong magasin ya Wajtaoa i blong talemaot Kingdom blong Jehova. Olsem we yumi talem finis, oli seremaot magasin ya long olgeta ples long wol, i bitim ol narafala magasin. !I wan bigfala blesing blong talemaot Kingdom blong God! ?Olsem wanem? ?Yu yu wok strong long wok ya?—Mat. 28:19, 20.

16. ?Yu save mekem wanem blong soemaot se yu wan gudfala sitisen blong Kingdom?

¹⁶ I no longtaem, bambae Kingdom blong God nomo i rul long wol ya. Ol man bambae oli folem loa blong Kingdom ya nomo. ?Olsem wanem? ?Bambae yu yu wan gudfala sitisen blong Kingdom? Yu mas soemaot naoia se yu yu wan gudfala sitisen. Long olgeta samting we yu mekem evri dei, yu mas leftemap nem blong Jehova, mo yu mas gat fasin blong wan gudfala sitisen blong Kingdom.—1 Kor. 10:31.

[Ol futnot]

[Tok blong makem poen long pej 21]

?Yu yu lesin long ol woning we slef we i stret mo waes i givim long saed blong Intenet?

[Tok blong pija long pej 19]

?Yu yu laekem tru wosip mo histri blong hem, olsem ol pikinini blong Kora?

[Tok blong pija long pej 22]

Famle Wosip i save givhan long yu mo famle blong yu blong kam ol gudfala sitisen blong Kingdom